ᠬᠠᠷᠬᠢᠯ ᠤᠨ ᠰᠢᠯᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/10
                                           ᠴᠠᠬᠠᠷ ᠨᠠᠷᠠᠨᠳᠠᠯᠠᠢ     ᠲᠠᠮᠠᠭᠠᠯᠠᠢ ᠶᠢᠨ ᠴᠠᠶᠢᠳᠠᠮ ᠮᠠᠨ ᠤ ᠭᠡᠷ ᠠᠴᠠ ᠡᠮᠦᠨ᠎ᠠ ᠠᠷᠪᠠᠨ ᠬᠡᠳᠤᠨ ᠭᠠᠵᠠᠷ ᠲᠤ ᠪᠠᠶᠢᠳᠠᠭ᠃ ᠲᠡᠭᠡᠷ᠎ᠡ ᠨᠢ ᠲᠤᠮᠪᠤᠶᠢᠵᠤ ᠰᠦᠷᠯᠡᠶᠢᠨ ᠬᠠᠷᠠᠭᠳᠠᠬᠤ ᠦᠨᠳᠤᠷ ᠰᠢᠯᠢ ᠨᠢ ᠲᠠᠪᠤᠨ ᠨᠠᠰᠤᠳᠠᠢ ᠨᠠᠳᠠ ᠳᠤ ᠪᠤᠯ ᠭᠡᠵᠢᠶᠡᠳᠡ ᠬᠠᠷᠠᠬᠤ ᠠᠴᠠ ᠪᠢᠰᠢ᠂ ᠬᠦᠷᠴᠦ ᠲᠡᠶᠢᠯᠦᠰᠢ ᠦᠭᠡᠢ ᠲᠡᠭᠷᠢ ᠶᠢᠨ ᠬᠢᠵᠠᠭᠠᠷ ᠯᠠ ᠪᠠᠶᠢᠭᠰᠠᠨ᠃ ᠭᠡᠬᠦ ᠳᠤ ᠲᠠᠷᠠ ᠬᠤᠯᠠ ᠶᠢᠨ ᠵᠠᠢ ᠶᠢ ᠪᠢ ᠡᠵᠢ ᠶᠢᠨ ᠢᠶᠠᠨ ᠬᠠᠯᠠᠭᠤᠨ ᠨᠢᠷᠤᠭᠤᠨ ᠲᠡᠭᠡᠷ᠎ᠡ ᠡᠷᠭᠡᠯᠡᠨ ᠪᠠᠶᠢᠵᠤ ᠬᠦᠷᠦᠭᠰᠡᠨ ᠪᠢᠯᠠ᠃ ᠬᠠᠷᠠᠭᠠᠳ ᠯᠠ ᠪᠠᠶᠢᠳᠠᠭ ᠬᠤᠯᠠ ᠶᠢᠨ ᠪᠠᠷ᠎ᠠ ᠲᠡᠭᠡᠷ᠎ᠡ ᠬᠦᠷᠦᠭᠰᠡᠨ ᠪᠢ ᠦᠭᠡᠷ᠎ᠡ ᠤᠷᠴᠢᠯᠠᠩ ᠳᠤ ᠬᠦᠷᠦᠭᠰᠡᠨ ᠭᠡᠮᠡᠷ ᠠᠯᠢ ᠪᠦᠬᠦᠨ ᠨᠢ ᠰᠤᠨᠢᠨ ᠰᠠᠶᠢᠬᠠᠨ᠃ ᠠᠷᠬᠠᠶᠢᠵᠤ ᠲᠠᠷᠬᠠᠶᠢᠯᠵᠠᠬᠰᠠᠨ ᠡᠪᠡᠷ ᠲᠠᠢ ᠠᠯᠠᠬᠯᠠᠵᠤ ᠴᠠᠶᠢᠯᠵᠠᠬᠰᠠᠨ ᠢᠮᠠᠭᠠᠨ ᠰᠥᠷᠥᠭ ᠢᠶᠠᠨ ᠥᠳᠡ ᠶᠢᠨ ᠵᠠᠶᠢᠳᠡᠢ ᠲᠤᠯᠤᠭᠠᠢ ᠶᠢ ᠨᠢ ᠵᠠᠯᠠᠵᠤ ᠰᠢᠯᠢ ᠶᠢᠨ ᠰᠠᠶᠢᠨ ᠡᠪᠠᠰᠤᠨ ᠤ ᠰᠤᠷ ᠢ ᠬᠤᠪᠳᠤᠬᠯᠠᠨ ᠢᠳᠡᠰᠢᠯᠡᠬᠦ ᠶᠢ ᠬᠠᠷᠠᠵᠤ ᠪᠠᠶᠠᠰᠤᠨ᠂ ᠰᠢᠷᠠᠵᠤ ᠬᠤᠶᠢᠬᠠᠯᠠᠮ᠎ᠠ ᠨᠢᠯᠴᠢᠬᠡᠷ ᠨᠠᠷᠠᠨ ᠳᠤ ᠬᠥᠯᠥᠰᠤ ᠪᠥᠮᠪᠥᠬᠡᠨᠡᠭᠰᠡᠨ ᠴᠢᠷᠡᠢ ᠪᠠᠨ ᠬᠠᠨᠴᠤᠢ ᠪᠠᠷ ᠢᠶᠠᠨ ᠰᠢᠪᠳᠤᠷᠤᠨ ᠠᠷᠴᠢᠬᠰᠠᠨ ᠡᠵᠢ ᠮᠢᠨᠢ ᠰᠥᠷᠥᠭ ᠠᠳᠣᠭᠤ ᠰᠡᠬᠦᠳᠡᠷᠯᠡᠮ᠎ᠡ ᠰᠡᠬᠦᠶᠢᠭᠰᠡᠨ ᠲᠤᠮᠤ ᠶᠠᠰᠢᠯ ᠮᠤᠳᠤᠨ ᠤ ᠲᠤᠤᠷ᠎ᠠ ᠲᠥᠷᠥ ᠲᠡᠯᠡᠬᠡᠢ ᠪᠤᠯᠤᠬᠰᠠᠨ ᠲᠤᠶᠢᠮᠤᠭ ᠲᠤᠯᠤᠭᠠᠢ᠂ ᠰᠠᠭᠠᠷᠢᠳᠤᠬᠰᠠᠨ ᠬᠠᠷ᠎ᠠ ᠭᠠᠷ ᠲᠠᠢ ᠬᠥᠤ ᠪᠠᠨ ᠬᠥᠨᠳᠡᠬᠦᠷᠯᠡᠵᠤ ᠬᠠᠳᠬᠤᠯᠠᠬᠰᠠᠨ ᠨᠢᠷᠤᠭᠤᠨ ᠠᠴᠠ ᠪᠠᠨ ᠱᠤᠳᠤᠷᠠᠭᠤᠯᠤᠨ ᠪᠠᠭᠤᠯᠭᠠᠵᠤ ᠨᠢᠬᠡ ᠠᠮᠠᠷᠠᠬᠰᠠᠨ ᠲᠡᠷᠡ ᠥᠳᠡ ᠳᠤ᠃ ᠲᠤᠭᠤᠯ ᠲᠤᠯᠤᠮ ᠲᠠᠢ ᠬᠠᠭᠤᠷᠠᠢ ᠬᠥᠨᠡᠰᠤ ᠪᠠᠷ ᠬᠥᠤ ᠲᠠᠢ ᠪᠠᠨ ᠴᠠᠭ ᠤᠨ ᠬᠤᠭᠤᠯᠠ ᠪᠤᠯᠭᠠᠵᠤ ᠨᠥᠢᠷ ᠲᠤ ᠪᠠᠨ ᠲᠠᠶᠢᠯᠳᠡᠭᠰᠡᠨ ᠬᠥᠤ ᠪᠠᠨ ᠲᠡᠷᠯᠢᠭ ᠲᠡᠬᠡᠷ᠎ᠡ ᠪᠠᠨ ᠤᠨᠳᠠᠭᠤᠯᠵᠤ  ᠬᠤᠷᠤᠬᠠᠢ ᠰᠢᠮᠠᠭᠤᠯ ᠠᠴᠠ ᠬᠢᠴᠢᠶᠡᠵᠤ ᠬᠠᠮᠠᠭᠠᠯᠠᠵᠤ ᠰᠠᠭᠤᠬᠰᠠᠨ ᠥᠶ᠎ᠡ᠂ ᠴᠠᠭ ᠵᠢᠯ ᠤᠨ ᠰᠠᠶᠢᠨ ᠳᠤ ᠬᠥᠢ ᠪᠠᠶᠢᠵᠠ ᠶᠢᠨ ᠵᠠᠪᠳᠤᠯ ᠥᠬᠡᠢ ᠢᠷᠡᠴᠢᠬᠡᠳᠡᠭ ᠠᠶᠤᠩᠭᠠᠳᠤ ᠪᠤᠷᠤᠭᠠᠨ ᠨᠢ ᠶᠠᠭᠤ ᠬᠠᠢ ᠥᠬᠡᠢ ᠢᠷᠡᠴᠢᠬᠡᠵᠤ᠂ ᠠᠯᠳᠠᠷᠡᠢ ᠪᠠᠭ᠎ᠠ ᠬᠥᠤ ᠪᠠᠨ ᠠᠷᠡᠶᠢᠬᠠᠨ ᠲᠠᠭᠤᠳᠠᠵᠤ ᠰᠡᠷᠡᠬᠡᠬᠦ ᠳᠤ ᠬᠠᠷ᠎ᠠ ᠡᠬᠦᠯᠡ ᠬᠤᠶᠢᠯᠠᠷᠠᠨ ᠬᠤᠶᠢᠯᠠᠷᠠᠨ ᠨᠡᠳᠤᠶᠢᠵᠤ᠂ ᠠᠶᠤᠩᠭ᠎ᠠ ᠨᠢᠵᠢᠬᠡᠨᠡᠨ ᠴᠠᠬᠢᠯᠭᠠᠨ ᠴᠠᠬᠢᠯᠵᠤ ᠲᠡᠷᠡᠬᠡᠨ ᠵᠠᠭᠤᠷ᠎ᠠ ᠠᠵᠢᠷᠭᠠᠨ ᠪᠤᠷᠤᠭᠠᠨ ᠰᠠᠭᠤᠯᠠᠭ᠎ᠠ ᠰᠠᠪᠠ ᠪᠠᠷ ᠴᠢᠳᠬᠤᠬᠤ ᠮᠡᠳᠤ ᠲᠡᠭᠷᠢ ᠭᠠᠵᠠᠷ ᠬᠠᠷᠠᠩᠭᠤᠶᠢᠯᠠᠨ ᠨᠡᠶᠢᠯᠠᠵᠤ ᠡᠬᠢᠯᠡᠵᠡᠢ᠃ ᠡᠵᠢ ᠮᠢᠨᠢ ᠥᠬᠢᠷᠡᠬᠡᠢ ᠶᠠᠰᠢᠯ ᠤᠨ ᠡᠩᠬᠡᠷ ᠲᠤ ᠲᠡᠷᠯᠢᠭ ᠢᠶᠠᠷ ᠢᠶᠠᠨ ᠨᠥᠮᠥᠷᠬᠡ ᠲᠠᠳᠠᠵᠤ ᠤᠰᠤᠨ ᠬᠤᠢ ᠲᠠᠳᠠᠬᠰᠠᠨ ᠠᠶᠤᠮᠰᠢᠬᠳᠤ ᠪᠤᠷᠤᠭᠠᠨ ᠠᠴᠠ ᠬᠥᠤ ᠪᠠᠨ ᠬᠠᠭᠤᠷᠡᠢ ᠠᠪᠴᠤ ᠴᠢᠳᠠᠬᠰᠠᠨ ᠴᠤ ᠥᠪᠡᠷ ᠢ ᠪᠠᠨ‌‍ᠱᠠᠯᠠᠪ ᠨᠤᠷᠭᠠᠵᠤ ᠥᠶᠡᠳᠡᠵᠤ ᠣᠰᠣᠭᠠᠬᠤ  ᠶᠢᠨ ᠨᠠᠭᠠᠨ᠎ᠠ ᠴᠠᠭᠠᠨ᠎ᠠ  ᠪᠤᠯᠤᠬᠰᠠᠨ ᠪᠠᠶᠢᠵᠠᠢ᠃ ᠤᠬᠢᠯᠡᠨ ᠬᠠᠶᠢᠯᠠᠵᠤ ᠡᠵᠢ ᠪᠠᠷ ᠢᠶᠠᠨ ᠠᠷᠭᠠᠳᠠᠭᠤᠯᠤᠬᠰᠠᠨ ᠪᠢ᠂ ᠴᠠᠭ ᠤᠨ ᠵᠠᠭᠤᠷ᠎ᠠ ᠡᠬᠦᠯᠡ ᠠᠷᠢᠯᠵᠤ ᠨᠠᠷᠠᠨ ᠲᠤᠯᠠᠶᠢᠬᠤ ᠳᠤ ᠬᠥᠳᠡᠭᠡ ᠭᠠᠳᠠᠭ᠎ᠠ ᠪᠡᠯᠴᠢᠬᠡᠷ ᠤᠨ ᠥᠵᠥᠬᠦᠷ ᠲᠤ ᠪᠠᠶᠢᠭᠠᠯᠢ ᠶᠢᠨ ᠲᠤᠬᠰᠢᠨ ᠠᠭᠤᠷ ᠠᠮᠢᠰᠬᠤᠯ ᠳᠤ ᠤᠴᠠᠷᠠᠵᠤ ᠠᠶᠤᠩᠭ᠎ᠠ ᠶᠢᠨ ᠨᠥᠰᠡᠷ ᠲᠠᠭᠤᠨ  ᠳᠤ ᠬᠥᠮᠥᠨ ᠪᠤᠯᠤᠬᠰᠠᠨ ᠤ ᠠᠩᠬᠠᠨ ᠤ ᠤᠢ ᠴᠡᠭᠡᠵᠢ ᠪᠠᠨ ᠤᠷᠢᠨ ᠰᠡᠷᠬᠦᠬᠡᠭᠰᠡᠨ ᠬᠡᠵᠤ ᠢᠳᠡᠭᠡᠭᠰᠡᠨ᠃ ᠡᠨᠡ ᠡᠳᠤᠷ ᠨᠢ ᠮᠢᠨᠥ ᠨᠢᠯᠬ᠎ᠠ ᠪᠠᠯᠴᠢᠷ ᠲᠠᠷᠢᠬᠢᠨ ᠳᠤ ᠠᠩᠬ᠎ᠠ ᠰᠠᠭᠤᠬᠳᠠᠬᠰᠠᠨ ᠨᠠᠰᠤᠨ ᠤ ᠲᠤᠷᠠᠳᠬᠠᠯ ᠪᠤᠯᠵᠤ ᠮᠥᠩᠬᠡᠷᠡᠬᠦ ᠶᠤᠰᠤᠳᠠᠢ ᠪᠠᠶᠢᠵᠠᠢ ᠳ᠋ᠠ︕ ᠤᠨᠠᠭᠠᠨ ᠬᠤᠯᠪᠤᠭ᠎ᠠ ᠲᠠᠢ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠡ︕           ᠲᠠᠷᠠ ᠡᠳᠦᠷ ᠠᠴᠠ ᠡᠬᠢᠯᠡᠵᠤ ᠥᠨᠡᠨ ᠤ ᠬᠤᠷᠸ᠎ᠠ ᠳᠤ ᠤᠬᠠᠭ᠎ᠠ ᠵᠠᠯᠭᠠᠭᠤᠯᠤᠬᠰᠠᠨ ᠨᠤᠳᠤᠭ ᠤᠨ ᠮᠢᠨᠢ ᠬᠠᠯᠠᠭᠤᠨ ᠰᠢᠷᠤᠢ ᠨᠠᠳᠠ ᠬᠠᠷᠠᠮ ᠥᠬᠡᠢ ᠶᠡᠭᠡ ᠬᠠᠶᠢᠷ᠎ᠠ ᠶᠢᠨ ᠲᠠᠯᠠᠢ ᠪᠤᠯᠵᠤ  ᠴᠠᠯᠬᠢᠯᠠᠳᠠᠭ ᠪᠤᠯᠪᠠ᠃ ᠲᠠᠪᠠᠭ ᠴᠠᠶᠢᠯᠵᠠᠭᠤᠯᠵᠤ ᠬᠤᠷᠮᠤᠢ ᠲᠠᠷᠪᠠᠯᠵᠠᠬᠦᠯᠵᠤ ᠬᠤᠨᠢᠨ ᠤ ᠬᠤᠳᠠ ᠠᠴᠠ ᠵᠠᠶᠢᠳᠠᠮ᠎ᠠ ᠬᠤᠷᠠᠭᠠᠨ ᠤ ᠪᠡᠯᠴᠢᠬᠡᠷ ᠠᠴᠠ ᠬᠤᠯᠠᠳᠠᠮ᠎ᠠ ᠵᠢᠷᠪᠡᠯᠵᠡᠬᠦᠯᠵᠤ ᠵᠢᠷᠤᠭᠠᠯᠠᠬᠤ ᠳᠤ᠂ ᠲᠥᠭᠦᠷᠢᠭᠬᠡᠨ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠬᠢᠵᠠᠭᠠᠷ ᠲᠤ ᠨᠤᠳᠤᠭ ᠤᠨ ᠰᠥᠭ ᠰᠥᠨᠡᠰᠤ ᠪᠤᠯᠤᠬᠰᠠᠨ ᠰᠢᠯᠢ  ᠲᠤᠯᠤᠭᠠᠢ ᠤᠪᠤᠭ᠎ᠠ ᠣᠷᠣᠳ ᠨᠢᠯᠵᠠᠷᠡᠢ ᠪᠠᠭ᠎ᠠ  ᠵᠢᠷᠤᠬᠡᠨ ᠤ ᠲᠤᠯᠳᠤ ᠳᠤ ᠬᠥᠰᠡᠯ ᠮᠥᠷᠤᠬᠡᠳᠤᠯ ᠤᠨ ᠭᠤᠬᠴᠤᠭ᠎ᠠ ᠪᠤᠯᠵᠤ ᠡᠬᠢᠯᠡᠭᠰᠡᠨ᠃ ᠲᠡᠷᠡ ᠲᠤᠮᠳᠠ ᠨᠠᠷᠠᠨ ᠰᠤᠪᠤᠷᠠᠬᠤ ᠵᠥᠭ ᠲᠤ ᠰᠥᠭᠯᠡᠶᠢᠵᠤ ᠬᠥᠬᠡᠷᠡᠵᠤ ᠬᠠᠷᠠᠬᠳᠠᠳᠠᠭ ᠬᠠᠷᠬᠢᠯ ᠤᠨ ᠥᠨᠳᠤᠷ ᠰᠢᠯᠢ ᠨᠢ ᠡᠨᠡᠬᠡᠨ ᠨᠠᠰᠤᠨ ᠤ ᠮᠢᠨᠢ ᠰᠠᠬᠢᠭᠤᠰᠤ ᠰᠢᠳᠤᠬᠡᠨ ᠪᠤᠯᠵᠤ ᠬᠠᠷᠠᠬᠳᠠᠳᠠᠭ ᠪᠤᠯᠤᠬᠰᠠᠨ ᠨᠢ ᠤᠨᠠᠭᠠᠨ ᠬᠤᠯᠪᠤᠭ᠎ᠠ ᠠᠴᠠ ᠭᠤᠬᠴᠤᠭᠠᠷᠠᠬᠰᠠᠨ ᠠᠮᠢᠨ ᠬᠠᠶᠢᠷ᠎ᠠ ᠶᠢᠨ ᠬᠡᠯᠬᠢᠶ᠎ᠡ ᠪᠤᠯᠬᠤ ᠨᠢ ᠥᠨᠡᠨᠳᠡᠢ᠃         ᠬᠠᠷᠬᠢᠯ ᠤᠨ ᠰᠢᠯᠢ ᠣᠷᠣᠬᠰᠢ ᠬᠤᠶᠢᠰᠢ ᠪᠠᠨ ᠲᠠᠪᠤ ᠵᠢᠷᠭᠤᠭᠠᠨ ᠭᠠᠵᠠᠷ ᠥᠷᠬᠡᠨ᠂ ᠵᠠᠬᠦᠨᠰᠢ ᠪᠠᠷᠠᠭᠤᠨᠰᠢ ᠠᠷᠪᠠᠨ ᠬᠡᠳᠤᠨ‌ᠭᠠᠵᠠᠷ ᠤᠷᠳᠤ᠂ ᠵᠠᠬᠦᠨ ᠤᠷᠤᠬᠰᠢ  ᠪᠠᠨ ᠪᠠᠭ᠎ᠠ ᠰᠢᠯᠢ᠂ ᠬᠠᠷᠭᠠᠨᠳᠤ ᠶᠢᠨ ᠰᠢᠯᠢ ᠲᠠᠢ ᠵᠠᠯᠭᠠᠯᠳᠤᠵᠤ᠂ ᠵᠠᠬᠦᠨᠰᠢ ᠤᠩᠭᠤᠨ ᠰᠢᠯᠢ ᠲᠠᠢ ᠵᠡᠷᠭᠡᠴᠡᠵᠤ ᠪᠠᠶᠢᠳᠠᠭ᠃ ᠬᠠᠷᠬᠢᠯ ᠤᠨ ᠰᠢᠯᠢ ᠤᠨ ᠲᠤᠮᠳᠠ ᠨᠢ ᠭᠤᠵᠤᠩ ᠬᠠᠷᠬᠢᠯ ᠬᠡᠵᠤ ᠬᠠᠮᠤᠭ ᠥᠨᠳᠤᠷ ᠤᠷᠤᠢ ᠲᠠᠢ᠂ ᠡᠮᠤᠨ᠎ᠡ ᠪᠡᠶ᠎ᠡ ᠳᠤ ᠲᠠᠷᠴᠣᠬᠳᠣ ᠲᠤᠯᠤᠭᠠᠢ ᠬᠡᠵᠤ ᠲᠠᠷᠴᠤᠭ ᠲᠠᠯᠪᠠᠭ᠎ᠠ ᠬᠡᠶᠢᠰᠬᠡᠳᠡᠭ ᠥᠨᠳᠤᠷ ᠤᠷᠤᠢ  ᠲᠠᠢ᠂ ᠪᠠᠷᠠᠭᠤᠨ ᠰᠤᠭᠤ ᠪᠠᠷ ᠨᠢ ᠬᠢᠳᠠᠳ ᠮᠤᠩᠭᠤᠯ ᠤᠷᠤᠨ ᠢ ᠬᠤᠯᠪᠤᠳᠠᠭ ᠶᠡᠭᠡ ᠡᠷᠳᠡᠨ ᠤ ᠵᠠᠮ ᠬᠤᠭᠤᠯᠠᠢ ᠪᠠᠶᠢᠳᠠᠭ᠃ ᠡᠨᠡᠬᠦ ᠵᠠᠮ ᠢᠶᠠᠷ ᠲᠡᠮᠡᠬᠡᠳᠤ ᠬᠤᠳᠠ ᠶᠢᠨ ᠬᠡᠳᠤᠨ ᠵᠠᠯᠢᠬᠠᠢ ᠠᠷᠢᠯᠵᠢᠶᠠᠴᠢᠨ ᠭᠠᠩ ᠠᠴᠢᠵᠤ ᠶᠠᠪᠤᠭᠠᠳ ᠵᠠᠮ ᠢᠶᠠᠷ ᠲᠠᠭᠠᠷᠠᠬᠰᠠᠨ ᠠᠳᠤᠭᠤᠨ ᠰᠥᠷᠥᠭ ᠲᠤ ᠰᠠᠨᠠᠭᠠᠰᠢᠷᠠᠵᠤ ᠰᠥᠨᠢ ᠲᠤᠮᠳᠠ ᠪᠠᠷ ᠵᠠᠬᠦᠨ ᠡᠮᠤᠨᠠᠰᠢ ᠲᠠᠭᠤᠵᠤ ᠪᠠᠶᠢᠭᠠᠳ ᠨᠤᠳᠤᠭ ᠠᠴᠠ ᠪᠠᠨ ᠰᠠᠯᠬᠤ ᠲᠤᠷ᠎ᠠ ᠥᠬᠡᠢ ᠠᠳᠤᠭᠤᠨ ᠰᠥᠷᠥᠭ ᠲᠠᠷᠴᠤᠬᠳᠤ ᠶᠢᠨ ᠡᠷᠢᠶᠠᠯᠠᠩ ᠪᠠᠯᠠᠷ ᠤᠷᠤᠭᠤ ᠲᠤᠳᠠᠭᠠᠬᠤ ᠳᠤ ᠶᠡᠭᠡ ᠰᠠᠨᠠᠬᠰᠠᠨ ᠬᠤᠳᠠᠯᠳᠣᠭᠠᠴᠢᠳ ᠤᠨ ᠡᠯᠵᠢᠬᠡ ᠯᠠᠭᠤᠰᠠ ᠨᠢ ᠥᠷᠬᠦᠨ ᠨᠠᠳᠬᠤᠵᠤ᠂ ᠲᠡᠷᠬᠡ ᠬᠠᠰᠠᠭ ᠨᠢ ᠤᠩᠬᠤᠯᠳᠠᠵᠤ᠂ ᠲᠤᠩ ᠤᠯᠠᠨ ᠭᠠᠩ ᠰᠠᠪᠠ ᠨᠢ ᠬᠠᠭᠠᠷᠠᠵᠤ ᠪᠠᠯᠪᠠᠷᠠᠬᠰᠠᠨ ᠠᠴᠠ ᠡᠨᠡ ᠬᠤᠭᠤᠯᠠᠢ ᠶᠢ ᠵᠠᠪᠰᠠᠷ ᠤᠨ ᠬᠤᠭᠤᠯᠠᠢ ᠵᠠᠨᠠᠭ ᠤᠨ ᠵᠠᠮ ᠬᠡᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠰᠡᠬᠦᠯᠡᠷ ᠨᠢ ᠭᠠᠩ ᠤᠨ ᠬᠠᠭᠠᠷᠠᠬᠠᠢ ᠬᠡᠵᠤ ᠤᠳᠤ ᠪᠤᠯᠳᠠᠯ᠎ᠠ ᠨᠡᠷᠡᠯᠡᠭᠰᠡᠬᠡᠷ ᠪᠠᠶᠢᠨ᠎ᠠ᠃ ᠭᠠᠩ ᠤᠨ ᠬᠠᠭᠠᠷᠬᠠᠢ ᠶᠢᠨ ᠪᠠᠷᠠᠭᠤᠳᠠᠢ ᠬᠤᠯᠠ ᠤᠶᠢᠷ᠎ᠡ ᠳᠤ ᠪᠠᠨ ᠠᠯᠳᠠᠷᠳᠡᠢ ᠠᠯᠠᠭ ᠲᠤᠯᠤᠭᠠᠢ᠂ ᠴᠤᠬᠤᠢ ᠲᠤᠯᠤᠭᠠᠢ ᠬᠡᠵᠤ ᠢᠬᠡᠷ᠎ᠡ ᠬᠤᠶᠠᠷ ᠥᠨᠳᠤᠷ ᠲᠤᠯᠤᠭᠠᠢ ᠲᠠᠢ᠃  ᠲᠠᠷᠴᠤᠬᠳᠤ ᠲᠤᠯᠤᠭᠠᠢ ᠠᠴᠠ ᠤᠷᠤᠬᠰᠢ ᠰᠤᠪᠤᠷᠭ᠎ᠠ ᠶᠢᠨ ᠬᠤᠭᠤᠯᠠᠢ ᠶᠢ ᠥᠩᠬᠡᠷᠡᠪᠡᠯ ᠲᠡᠤᠬᠡ ᠴᠠᠳᠢᠭ ᠲᠤ ᠲᠡᠮᠳᠡᠭᠯᠡᠯ ᠲᠠᠢ ᠠᠯᠳᠠᠷᠳᠤ ᠠᠯᠳᠠᠨ ᠭᠠᠳᠠᠰᠤᠨ ᠴᠠᠶᠢᠳᠠᠮ ᠳᠤ ᠤᠷᠤᠴᠢᠬᠠᠨ᠎ᠠ᠃ ᠬᠠᠷᠬᠢᠯ ᠤᠨ ᠰᠢᠯᠢ ᠲᠡᠬᠡᠷ᠎ᠡ ᠭᠠᠷᠪᠠᠯ  ᠡᠮᠤᠨ᠎ᠡ ᠨᠢ ᠴᠢᠯᠠᠭᠤᠨ ᠤᠪᠤᠭ᠎ᠠ ᠲᠠᠢ᠃ ᠪᠠᠷᠠᠭᠤᠨ ᠡᠮᠤᠨ᠎ᠠ ᠪᠠᠨ ᠬᠤᠷᠠᠬᠤ ᠶᠢᠨ ᠤᠪᠤᠭ᠎ᠠ᠂ ᠬᠤᠶᠢᠨ᠎ᠠ ᠨᠢ ᠴᠢᠪᠠᠭᠠᠳᠤ ᠶᠢᠨ ᠤᠪᠤᠭ᠎ᠠ᠂ ᠵᠠᠬᠦᠨᠰᠢ ᠤᠩᠭᠤᠨ ᠤᠪᠤᠭ᠎ᠠ ᠵᠡᠷᠬᠡ ᠨᠡᠷᠡᠳᠤ ᠤᠪᠤᠭ᠎ᠠ ᠬᠠᠶᠢᠷᠬᠠᠨ ᠪᠠᠷ᠎ᠠ ᠪᠠᠷ᠎ᠠ ᠪᠠᠨ ᠬᠠᠷᠠᠯᠴᠠᠵᠤ ᠨᠤᠳᠤᠭ ᠤᠨ ᠰᠠᠬᠢᠭᠤᠯ ᠪᠤᠯᠵᠤ ᠰᠡᠬᠦᠶᠢᠳᠡᠭ ᠪᠥᠬᠡᠳ ᠲᠤᠩᠭᠠᠯᠠᠭ ᠰᠠᠶᠢᠬᠠᠨ ᠡᠳᠤᠷ ᠠᠯᠤᠰ ᠬᠤᠯᠠᠬᠢ ᠡᠮᠤᠨ᠎ᠡ ᠵᠥᠭ ᠤᠨ ᠭᠤᠷᠪᠠᠨ ᠰᠠᠯᠠᠭ᠎ᠠ᠂ ᠯᠢᠶᠠᠩ ᠵᠧᠩ ᠤᠨ ᠠᠭᠤᠯᠠ᠂ ᠪᠠᠷᠠᠭᠤᠨ ᠬᠤᠶᠢᠨ᠎ᠠ  ᠠᠯᠠᠱᠠ ᠠᠭᠤᠯᠠ ᠪᠥᠷ ᠲᠤᠳᠤᠬᠠᠨ ᠬᠠᠷᠠᠬᠳᠠᠳᠠᠭ ᠪᠥᠬᠡᠳ ᠲᠡᠯᠬᠡᠷ ᠰᠠᠶᠢᠬᠠᠨ ᠵᠤᠨ ᠤ ᠤᠯᠠᠷᠢᠯ ᠳᠤ ᠲᠤᠯᠢ ᠰᠢᠭ᠋ ᠮᠡᠯᠳᠡᠶᠢᠭᠰᠡᠨ ᠨᠠᠭᠤᠷ ᠵᠠᠳᠠᠭᠠᠢ᠂ ᠠᠯᠳᠠᠨ ᠰᠢᠷᠭᠠᠯ ᠡᠯᠠᠰᠤ ᠮᠠᠩᠬ᠎ᠠ᠂ ᠬᠥᠬᠡᠷᠡᠨ ᠬᠥᠷᠡᠩᠳᠡᠬᠦ ᠣᠢ ᠮᠤᠳᠤ᠂ ᠨᠤᠮᠢᠨ ᠨᠤᠭᠤᠭᠠᠠ ᠬᠥᠳᠡᠭᠡ ᠲᠠᠯ᠎ᠠ ᠵᠡᠷᠬᠡ ᠬᠠᠷᠠᠭᠠᠨ ᠳᠤ ᠪᠠᠭᠳᠠᠬᠤ ᠪᠥᠬᠦᠨ ᠵᠢᠰᠤᠨ ᠵᠥᠢᠯ ᠢᠶᠠᠷ ᠢᠯᠭᠠᠷᠠᠨ ᠰᠡᠳᠬᠢᠯ ᠢ ᠲᠠᠳᠠᠮ᠎ᠠ ᠰᠠᠶᠢᠬᠠᠨ ᠥᠵᠡᠮᠵᠢ ᠪᠠᠨ ᠭᠠᠶᠢᠬᠠᠭᠤᠯᠳᠠᠭ᠃ ᠨᠤᠳᠤᠭ ᠤᠨ ᠮᠢᠨᠢ ᠰᠥᠷ ᠬᠡᠢ ᠮᠤᠷᠢ ᠪᠤᠯᠤᠬᠰᠠᠨ ᠲᠤᠮᠤᠭ ᠬᠠᠭᠤᠴᠢ ᠲᠠᠢ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠡ︕         ᠬᠠᠷᠬᠢᠯ ᠬᠡᠳᠡᠭ ᠨᠢ ᠨᠢᠬᠡ ᠲᠥᠷᠥᠯ ᠤᠨ ᠶᠠᠰᠢᠯ ᠤᠨ ᠨᠡᠷ᠎ᠡ ᠬᠡᠨ᠎ᠡ᠃ ᠬᠠᠷᠬᠢᠯ ᠤᠨ ᠰᠢᠯᠢ ᠨᠢ ᠪᠥᠬᠦᠶᠢᠯᠡ ᠪᠠᠷ ᠢᠶᠠᠨ ᠶᠠᠰᠢᠯ ᠪᠤᠷᠭᠠᠰᠤᠨ ᠳᠤ ᠬᠤᠴᠢᠬᠳᠠᠬᠰᠠᠨ ᠮᠠᠨ ᠤ ᠪᠠᠯᠠᠷ ᠮᠠᠩᠬᠠᠨ ᠨᠤᠳᠤᠭ ᠲᠤ ᠤᠷᠤᠰᠢᠵᠤ ᠪᠠᠶᠢᠬᠰᠠᠨ ᠢ ᠨᠢᠳᠤ ᠪᠠᠷ ᠢᠶᠠᠨ ᠥᠵᠡᠬᠦ ᠥᠬᠡᠢ ᠪᠤᠯ ᠢᠳᠡᠬᠡᠵᠤ ᠶᠠᠳᠠᠮ᠎ᠠ ᠲᠤᠮᠤ ᠤᠢ ᠰᠢᠭᠤᠢ ᠪᠠᠶᠢᠬᠰᠠᠨ ᠠᠵᠢ᠃ ᠬᠡᠳᠤᠨ ᠬᠥᠮᠥᠨ ᠲᠠᠪᠠᠷᠢᠵᠤ ᠪᠠᠭᠳᠠᠬᠤ ᠥᠬᠡᠢ ᠪᠥᠳᠤᠬᠦᠨ ᠶᠠᠰᠢᠯ ᠤᠯᠠᠨ ᠪᠠᠶᠢᠬᠰᠠᠨ ᠬᠡᠵᠤ ᠪᠤᠭᠤᠷᠤᠯᠴᠤᠤᠨ ᠲᠤᠷᠠᠰᠤᠨ ᠬᠠᠭᠤᠴᠢᠯᠠᠳᠠᠭ ᠪᠥᠬᠡᠳ ᠨᠤᠭᠤᠭᠠᠨ ᠰᠢᠷ᠎ᠠ ᠬᠠᠷ᠎ᠠ  ᠬᠥᠷᠡᠩ ᠡᠯᠳᠡᠪ ᠥᠩᠬᠡ ᠶᠢᠨ ᠥᠷᠡᠯ ᠵᠢᠮᠢᠰ ᠲᠠᠢ ᠪᠠᠶᠢᠬᠰᠠᠨ ᠢ ᠰᠠᠨᠠᠪᠠᠯ ᠣᠯᠠᠨ ᠲᠥᠷᠤᠯ ᠤᠨ ᠶᠠᠰᠢᠯ ᠵᠡᠷᠬᠡᠪᠡᠷ ᠤᠷᠭᠤᠵᠤ ᠪᠠᠶᠢᠬᠰᠠᠨ ᠨᠢ ᠲᠤᠳᠤᠷᠬᠠᠢ ᠶᠤᠮ᠃ ᠠᠳᠡᠬᠢ ᠮᠠᠯᠴᠢᠳ ᠤᠨ ᠣᠳᠠᠭᠠᠨ ᠵᠢᠯ ᠤᠨ ᠡᠯᠡᠬᠡᠯᠳᠡ ᠪᠠᠷ ᠥᠬᠢᠷᠡᠵᠤ ᠬᠠᠭᠤᠴᠢᠷᠠᠬᠰᠠᠨ ᠶᠠᠰᠢᠯ ᠤᠨ ᠥᠶ᠎ᠡ ᠬᠡᠰᠢᠬᠦᠥ᠂ ᠬᠥᠷᠣᠰᠤᠨ ᠠᠴᠠ ᠰᠠᠯᠤᠬᠰᠠᠨ ᠥᠨᠳᠤᠰᠤ ᠰᠠᠯᠠᠭ᠎ᠠ ᠶᠢ ᠨᠢ ᠠᠰᠢᠬᠯᠠᠵᠤ ᠬᠡᠷ ᠪᠠᠶᠢᠰᠢᠩ ᠪᠠᠷᠢᠬᠤ᠂ ᠬᠤᠳᠳᠤᠭ ᠴᠥᠬᠦᠷᠤᠮ ᠬᠠᠰᠢᠬᠤ᠂ ᠣᠶᠠᠭ᠎ᠠ ᠱᠤᠩ ᠪᠤᠰᠬᠠᠬᠤ᠂ ᠬᠤᠷᠤᠭ᠎ᠠ ᠬᠠᠰᠢᠶ᠎ᠠ ᠵᠠᠰᠠᠬᠤ ᠳᠤ ᠬᠡᠷᠡᠭᠴᠡᠬᠡᠨ ᠤ ᠬᠢᠷᠢ ᠪᠠᠷ ᠵᠠᠷᠤᠳᠠᠭ ᠪᠠᠶᠢᠵᠠᠢ᠃ ᠮᠤᠩᠭᠤᠯᠴᠤᠤᠨ ᠶᠠᠰᠢᠯ ᠢ ᠰᠥᠨᠡᠰᠤ ᠰᠡᠬᠢᠭᠤᠰᠤ ᠲᠠᠢ ᠬᠡᠬᠦ ᠪᠤᠶᠤ ᠬᠠᠳᠠᠭᠤ ᠮᠤᠳᠤ ᠬᠡᠵᠤ ᠰᠦᠵᠦᠭᠯᠡᠵᠤ ᠰᠢᠳᠦᠭᠦ  ᠶᠢᠨ ᠡᠬᠦᠳᠠᠨ ᠠᠴᠠ ᠤᠷᠭᠤᠭ᠎ᠠ ᠶᠠᠰᠢᠯ ᠢ ᠬᠥᠨᠳᠠᠵᠤ ᠡᠪᠳᠠᠬᠦ ᠶᠢ ᠲᠠᠰᠤ ᠴᠡᠬᠡᠷᠯᠡᠵᠤ ᠪᠠᠶᠢᠬᠰᠠᠨ ᠤᠴᠢᠷ ᠡᠷᠳᠡᠨ ᠭᠠᠯᠠᠪ ᠠᠴᠠ ᠤᠷᠴᠢᠨ ᠥᠶ᠎ᠡ ᠪᠤᠯᠳᠠᠯ᠎ᠠ ᠴᠢᠨ᠋ᠸ᠎ᠠ ᠬᠥᠷᠥᠬᠡᠰᠤ ᠡᠯᠳᠡᠪ ᠵᠢᠬᠦᠷᠳᠡᠨ ᠡᠬᠦᠷᠯᠡᠭᠰᠡᠨ ᠪᠢᠳᠡᠬᠦᠥ ᠤᠢ ᠪᠠᠷ ᠢᠶᠠᠨ ᠪᠠᠶᠢᠵᠤ ᠢᠷᠡᠵᠡᠢ᠃ ᠬᠡᠬᠦ ᠳᠤ ᠬᠠᠷᠬᠢᠯ ᠤᠨ ᠰᠢᠯᠢ ᠤᠷᠴᠢᠨ ᠥᠶ᠎ᠡ  ᠠᠴᠠ ᠡᠬᠢᠯᠡᠨ ᠤᠯᠠᠨ ᠤᠳᠠᠭᠠᠨ ᠤ ᠰᠥᠨᠥᠬᠡᠯᠳᠡ ᠶᠢᠨ ᠴᠢᠨᠠᠷᠳᠠᠢ ᠲᠡᠬᠡᠷᠡᠮᠳᠡᠯ ᠲᠠᠯᠬᠢᠳᠠᠯ ᠳᠤ ᠤᠴᠠᠷᠠᠵᠠᠢ᠃ ᠵᠢᠷᠠᠭᠠᠳ ᠤᠨ ᠤ ᠲᠥᠷᠤ ᠲᠥᠮᠡᠨ ᠢᠶᠠᠷ ᠪᠤᠵᠢᠬᠢᠨᠠᠬᠰᠠᠨ ᠬᠤᠪᠢᠰᠬᠠᠯ ᠤᠨ ᠥᠶ᠎ᠡ ᠳᠤ ᠲᠠᠤᠬᠡᠨ ᠳᠤ ᠬᠤᠪᠤᠷ ᠪᠠᠶᠢᠭᠠᠯᠢ ᠶᠢᠨ ᠭᠠᠩ ᠭᠠᠴᠢᠭ ᠴᠠᠭᠠᠨ ᠵᠤᠤᠨ ᠲᠠᠪᠬᠤᠴᠠᠵᠤ ᠡᠷᠬᠡ ᠠᠳᠬᠤᠬᠴᠢᠳ ᠨᠢ ᠲᠥᠮᠡ ᠮᠢᠩᠭᠠᠨ ᠵᠢᠯ ᠤᠨ ᠠᠮᠢ ᠲᠠᠢ ᠶᠠᠰᠢᠯ ᠳᠤ ᠲᠠᠶᠢᠨ ᠵᠠᠷᠯᠠᠵᠤ ᠬᠠᠷ᠎ᠠ ᠲᠤᠯᠤᠭᠠᠶᠢᠳᠤ ᠬᠥᠮᠤᠰ ᠤᠨ ᠠᠮᠢ ᠮᠠᠨᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠲᠥᠯᠠᠰᠢ ᠲᠤᠯᠠᠭᠠᠯᠠᠭ᠎ᠠ ᠪᠤᠯᠭᠠᠵᠤ ᠶᠠᠬᠡᠪᠠᠷ ᠴᠠᠪᠴᠢᠵᠤ ᠰᠥᠢᠳᠬᠡᠭᠰᠡᠨ ᠪᠥᠬᠡᠳ ᠲᠠᠷᠠᠭ᠎ᠠ ᠪᠠᠷ ᠨᠢ ᠤᠰᠤᠨ ᠠᠰᠢᠬᠯᠠᠯᠳᠠ ᠳᠤ ᠥᠢᠯᠡᠴᠢᠯᠡᠬᠦ ᠬᠤᠳᠳᠤᠭ ᠴᠥᠬᠦᠷᠤᠮ ᠳᠤ ᠬᠡᠷᠡᠭᠯᠡᠵᠤ ᠪᠠᠰᠠ ᠲᠤᠭ᠎ᠠ ᠥᠬᠡᠢ ᠶᠠᠰᠢᠯ ᠤᠨ ᠠᠮᠢ ᠨᠠᠰᠤ ᠶᠢ ᠬᠤᠷᠤᠭᠠᠪᠠ᠃ ᠮᠢᠨᠥ ᠮᠡᠳᠡᠭᠡ ᠤᠷᠤᠬᠤ ᠥᠶ᠎ᠡ ᠳᠤ ᠨᠢᠬᠡᠨᠳᠡ ᠶᠡᠬᠡᠩᠬᠢ ᠤᠢ ᠰᠢᠭᠤᠢ ᠪᠠᠨ ᠡᠪᠳᠡᠬᠦᠯᠵᠤ ᠰᠥᠢᠳᠬᠡᠬᠦᠯᠥᠭᠰᠡᠨ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠪᠠᠰᠠ ᠴᠤ ᠣᠢ ᠰᠢᠭᠤᠢ ᠮᠡᠳᠤ ᠬᠠᠷᠠᠬᠳᠠᠵᠤ ᠪᠠᠶᠢᠬᠰᠠᠨ ᠢ ᠰᠠᠨᠠᠪᠠᠯ ᠲᠡᠤᠬᠡᠨ ᠳᠤ ᠶᠠᠮᠠᠷ ᠰᠢᠤᠬᠠᠨ ᠢᠬᠴᠤᠷᠠᠨ ᠪᠢᠳᠡᠬᠦᠷᠡᠭᠰᠡᠨ ᠤᠢ ᠪᠠᠶᠢᠬᠰᠠᠨ ᠢ ᠤᠬᠠᠭ᠎ᠠ ᠰᠡᠬᠡᠬᠡ ᠲᠠᠢ ᠪᠥᠬᠦᠨ ᠲᠤᠩ ᠠᠮᠠᠷᠬᠠᠨ ᠲᠥᠰᠥᠭᠯᠡᠵᠤ ᠮᠡᠳᠡᠬᠦ ᠶᠤᠮ ᠡ᠃ ᠬᠠᠷᠢᠨ ᠲᠡᠬᠡᠬᠦ ᠳᠤ ᠲᠥᠷᠤ ᠵᠠᠰᠠᠭ ᠤᠨ ᠪᠤᠳᠤᠯᠭ᠎ᠠ ᠬᠥᠮᠥᠨ ᠪᠠᠶᠢᠭᠠᠯᠢ ᠪᠥᠬᠦᠨ ᠳᠤ ᠵᠠᠷᠬᠡᠪᠡᠷ ᠲᠤᠶᠠᠭᠠᠯᠠᠵᠤ ᠢᠷᠡᠬᠦ ᠶᠢᠨ ᠬᠤᠷᠤᠮ ᠳᠤ ᠬᠠᠷᠭᠠᠨᠳᠤ ᠨᠡᠩᠰᠤ ᠬᠤᠶᠠᠷ ᠭᠠᠴᠠᠭᠠᠨ ᠤ ᠬᠡᠳᠤᠨ ᠡᠪᠥᠬᠡᠳ ᠬᠥᠭᠰᠢᠳ‌‍ᠪᠤᠯᠤᠨ ᠴᠠᠭᠠᠨᠳᠤᠯᠤᠭᠠᠢ ᠳᠤ ᠬᠢ ᠣᠢ ᠰᠢᠭᠤᠢ ᠶᠢᠨ ᠲᠠᠯᠠᠪᠠᠢ ᠶᠢᠨ ᠮᠡᠷᠬᠡᠵᠢᠯᠳᠡᠨ ᠤ ᠢᠳᠬᠠᠯ ᠰᠠᠨᠠᠭᠤᠯᠭ᠎ᠠ ᠶᠢ ᠬᠠᠶᠢᠬᠤᠷᠤᠯ ᠥᠬᠡᠢ ᠲᠤᠮᠤ ᠬᠢᠨᠵᠢᠳᠤ ᠲᠠᠷᠺᠡᠲ᠋ᠤᠷ ᠤᠳ ᠰᠢᠯᠢ  ᠶᠢᠨ ᠤᠷᠤᠢ ᠪᠠᠷ ᠬᠠᠷ᠎ᠠ ᠤᠳᠤᠭ᠎ᠠ ᠪᠠᠭᠠᠬᠢᠭᠤᠯᠤᠨ ᠲᠡᠷᠴᠢᠬᠢᠨᠠᠵᠤ᠂ ᠡᠳᠤᠷ ᠰᠥᠨᠢ ᠥᠬᠡᠢ ᠥᠨᠳᠤᠰᠤ ᠲᠠᠢ ᠨᠢ ᠰᠤᠭᠤᠯᠵᠤ᠂ ᠲᠡᠷᠬᠡ ᠲᠡᠷᠬᠡ ᠪᠠᠷ ᠵᠥᠬᠡᠪᠤᠷᠢᠯᠡᠵᠤ᠂ ᠲᠠᠬᠦᠨ ᠢ ᠬᠠᠷᠠᠬᠰᠠᠨ ᠬᠤᠯᠠ ᠤᠶᠢᠷ᠎ᠡ ᠶᠢᠨ ᠠᠶᠢᠯ ᠤᠳ ᠪᠤᠯᠢᠶᠠᠯᠴᠠᠬᠤ ᠶᠢᠨ ᠲᠤᠬ᠎ᠠ ᠪᠠᠷ ᠤᠨᠤᠭ᠎ᠠ ᠬᠠᠰᠠᠭ ᠢᠶᠠᠷ ᠲᠡᠬᠡᠬᠡᠪᠥᠷᠢᠯᠡᠭᠰᠡᠬᠡᠷ ᠪᠠᠶᠢᠭᠠᠳ ᠨᠢᠬᠡ ᠨᠠᠮᠤᠷ ᠨᠢᠬᠡ ᠡᠪᠤᠯ ᠤᠨ ᠬᠤᠭᠤᠷᠤᠨᠳᠤ ᠬᠠᠷᠬᠢᠯ ᠶᠠᠰᠢᠯ ᠨᠢ ᠲᠤᠷᠤᠶᠢᠬᠤ ᠪᠠᠷ᠎ᠠ ᠲᠠᠢ ᠶᠠᠭᠤᠮ᠎ᠠ ᠲᠡᠮᠡᠢ ᠥᠯᠡᠳᠡᠭᠡ ᠥᠬᠡᠢ ᠬᠠᠯᠴᠠᠭᠠᠢ ᠰᠢᠯᠢ ᠪᠤᠯᠤᠨ ᠬᠤᠴᠤᠷᠠᠵᠠᠢ᠃       ᠬᠠᠷᠬᠢᠯ ᠮᠤᠳᠤ ᠬᠠᠮᠤᠭ ᠶᠡᠭᠡ ᠭᠠᠢ ᠭᠠᠮᠰᠢᠭ ᠤᠴᠠᠷᠠᠬᠰᠠᠨ ᠲᠠᠷᠠ ᠵᠢᠯ ᠪᠢ ᠨᠢᠬᠡ ᠨᠡᠷ᠎ᠡ ᠶᠢ ᠨᠢ ᠥᠯᠥ ᠮᠡᠳᠡᠬᠦ ᠠᠷᠠᠰᠤᠨ ᠡᠪᠳᠴᠢᠨ ᠳᠤ ᠨᠠᠷᠪᠡᠭᠳᠡᠵᠤ ᠰᠢᠬᠦᠰᠥ ᠨᠥᠵᠢ ᠴᠤᠪᠤᠷᠢᠵᠤ ᠡᠳᠡᠬᠡᠷᠡᠵᠤ ᠪᠤᠯᠬᠤ ᠥᠬᠡᠢ ᠶᠡᠭᠡ ᠤᠳᠠᠬᠰᠠᠨ ᠶᠤᠮ ᠡ᠃ ᠠᠵᠠ ᠪᠠᠷ ᠡᠵᠢ ᠮᠢᠨᠢ ᠣᠢ ᠰᠢᠭᠤᠢ ᠶᠢᠨ ᠲᠠᠯᠠᠪᠠᠢ ᠳᠤ ᠠᠵᠢᠯ ᠪᠠᠷ ᠪᠠᠭᠤᠬᠰᠠᠨ ᠨᠢᠬᠡᠨ ᠮᠡᠷᠬᠡᠵᠢᠯᠳᠠᠨ ᠲᠠᠢ ᠤᠴᠠᠷᠠᠵᠤ᠂ ᠪᠥᠳᠥᠨ ᠪᠡᠶ᠎ᠡ ᠶᠢ ᠮᠢᠨᠢ ᠣᠯᠠᠨ ᠵᠥᠢᠯ ᠤᠨ ᠡᠪᠠᠰᠤᠨ ᠡᠮ ᠤᠨ ᠨᠤᠨᠳᠠᠭ ᠢᠶᠠᠷ ᠤᠯᠠᠨ ᠬᠤᠨᠤᠭ ᠰᠢᠪᠠᠵᠣ ᠪᠠᠶᠢᠭᠠᠳ ᠡᠳᠡᠬᠡᠷᠡᠬᠦᠯᠵᠠᠢ᠃ ᠰᠤᠨᠢᠷᠬᠠᠯᠳᠠᠢ ᠨᠢ ᠬᠠᠴᠢᠨ ᠥᠨᠥᠷᠳᠡᠢ ᠰᠢᠷ᠎ᠠ ᠪᠠᠭᠠᠰᠤ ᠰᠢᠭ᠋ ᠲᠡᠷᠡ ᠡᠮ ᠳᠤ ᠶᠠᠰᠢᠯ ᠮᠤᠳᠤᠨ ᠤ ᠨᠤᠨᠳᠠᠭ ᠭᠤᠤᠯ ᠵᠤᠷ ᠪᠤᠯᠤᠬᠰᠠᠨ ᠪᠠᠶᠢᠵᠠᠢ᠃ ᠡᠵᠢ ᠶᠢᠨ ᠬᠡᠯᠡᠬᠦ ᠪᠠᠷ ᠨᠠᠳᠠ ᠶᠢ ᠪᠠᠭ᠎ᠠ ᠠᠴᠠ ᠪᠠᠨ ᠬᠡᠷᠡᠭ ᠤᠨ ᠡᠴᠢᠬᠡ ᠬᠡᠩᠬᠡᠷᠡᠭᠡ ᠶᠢᠨ ᠲᠤᠬᠢᠭᠤᠷ ᠪᠠᠶᠢᠵᠤ ᠠᠯᠢᠶ᠎ᠠ ᠲᠥᠢᠳᠬᠡᠷ ᠨᠢ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠥᠬᠡᠢ ᠶᠤᠮ ᠬᠡᠨ᠎ᠡ᠃ ᠲᠠᠷᠠ ᠨᠢᠬᠡ ᠭᠠᠢ ᠪᠠᠷᠴᠢᠳ ᠢ ᠲᠤᠭᠤᠯᠤᠭᠠᠳ ᠲᠡᠭᠷᠢ ᠭᠠᠵᠠᠷ ᠤᠨ ᠡᠷᠬᠢᠯᠳᠡ ᠭᠠᠷᠴᠤ ᠠᠮᠠᠨ ᠠᠴᠠ ᠨᠢ ᠠᠯᠳᠠ ᠤᠨᠠᠮᠠᠷ ᠲᠤᠭᠤᠢ ᠨᠤᠮᠤᠬᠠᠨ ᠬᠡᠤᠬᠡᠳ ᠪᠤᠯᠤᠬᠰᠠᠨ ᠬᠡᠳᠡᠭ᠃ ᠠᠮᠢᠨ ᠬᠤᠯᠪᠤᠭ᠎ᠠ ᠲᠠᠢ ᠬᠠᠷᠬᠢᠯ ᠶᠠᠰᠢᠯ᠂ ᠡᠪᠠᠰᠤ ᠤᠷᠭᠤᠮᠠᠯ ᠮᠢᠨᠢ ᠡ︕     ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶᠢᠨ ᠭᠤᠷᠪᠠᠳᠤᠭᠠᠷ ᠤᠨ‌‍ᠳᠤ ᠤᠷᠤᠬᠰᠠᠨ ᠲᠡᠷᠡ ᠵᠢᠯ ᠶᠤᠮᠰᠠᠨ᠃ ᠪᠢ ᠠᠬ᠎ᠠ ᠪᠠᠨ ᠲᠠᠭᠠᠵᠤ ᠮᠠᠯ ᠳᠤ ᠶᠠᠪᠤᠭᠠᠳ ᠪᠡᠯᠴᠢᠬᠡᠷ ᠤᠨ ᠥᠵᠤᠬᠦᠷ ᠠᠴᠠ ᠲᠠᠪᠠᠵᠤ᠂ ᠰᠠᠯᠬᠢ ᠲᠠᠭᠠᠵᠤ ᠶᠠᠪᠤᠬᠰᠠᠨ ᠬᠤᠨᠢ ᠢᠮᠠᠭ᠎ᠠ ᠪᠠᠨ ᠬᠥᠬᠡᠬᠡᠬᠦ ᠶᠢᠨ ᠲᠥᠯᠥᠬᠡ ᠠᠯᠳᠠ ᠭᠠᠳᠠᠰᠤᠨ ᠴᠠᠶᠢᠳᠠᠮ ᠳᠤ ᠬᠥᠷᠳᠡᠯ᠎ᠡ ᠬᠥᠬᠡᠬᠡᠬᠦ ᠪᠤᠯᠵᠤ᠂ ᠲᠠᠷᠴᠤᠬᠳᠤ ᠲᠤᠯᠤᠭᠠᠢ ᠲᠡᠬᠡᠷᠡᠬᠢ ᠭᠠᠭᠴᠠ ᠰᠠᠭᠤᠷᠢ ᠶᠠᠰᠢᠯ ᠮᠤᠳᠤᠨ ᠤ ᠥᠨᠳᠤᠰᠤᠨ ᠬᠥᠨᠳᠡᠢ ᠳᠤ ︽ᠮᠥᠩᠬᠦᠨ ᠬᠤᠢ ᠲᠠᠢ ᠬᠢᠳᠤᠭ᠎ᠠ︾ ᠬᠡᠰᠡᠨ ᠨᠤᠮ ᠢᠶᠠᠨ ᠬᠠᠳᠠᠭᠠᠯᠠᠵᠤ ᠲᠠᠯᠪᠢᠭᠠᠳ ᠪᠤᠴᠠᠬᠤ ᠳᠤ ᠪᠠᠨ ᠶᠠᠳᠠᠷᠠᠵᠤ ᠲᠤᠶᠢᠯᠳᠠᠬᠰᠠᠨ ᠠᠴᠠ ᠮᠠᠷᠳᠠᠵᠤ᠂ ᠨᠠᠯᠢᠶᠠᠳ ᠬᠤᠨᠤᠭ ᠤᠨ ᠲᠠᠷᠠᠭ᠎ᠠ ᠲᠡᠬᠢᠵᠤ ᠬᠠᠷᠬᠢᠯ ᠤᠨ ᠰᠢᠯᠢ ᠲᠡᠬᠡᠷ᠎ᠡ ᠭᠠᠷᠬᠤ ᠳᠤ ᠭᠠᠭᠴᠠ ᠰᠠᠭᠤᠷᠢ ᠶᠠᠰᠢᠯ ᠮᠤᠳᠤ ᠨᠢ ᠥᠨᠳᠣᠰᠤ ᠲᠠᠢ ᠪᠠᠨ᠂ ᠬᠠᠶᠢᠷᠠᠯᠠᠵᠤ ᠬᠠᠷᠠᠮᠨᠠᠳᠠᠭ ᠨᠤᠮ ᠲᠠᠢ ᠮᠢᠨᠢ ᠬᠠᠮᠳᠤ ᠪᠠᠷ᠎ᠠ ᠲᠤᠷᠤ ᠥᠬᠡᠢ ᠪᠤᠯᠵᠤ᠂ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠰᠡᠬᠦᠯᠴᠢ ᠶᠢᠨ ᠬᠡᠳᠤᠨ ᠪᠤᠰᠤᠭ᠎ᠠ ᠶᠠᠰᠢᠯ ᠣᠷᠣ ᠲᠠᠰᠤᠷᠠᠵᠠᠢ ᠪᠢᠯᠡ᠃ ᠤᠳᠤ ᠪᠤᠯᠳᠠᠯ᠎ᠠ ᠮᠤᠩᠭᠤᠯ ᠨᠤᠳᠤᠭ ᠠᠴᠠ ᠡᠬᠢᠯᠡᠨ ᠶᠠᠪᠤᠬᠰᠠᠨ ᠭᠠᠵᠠᠷ ᠪᠥᠬᠦᠨ ᠳᠤ ᠤᠢ ᠪᠤᠯᠤᠬᠰᠠᠨ ᠶᠠᠰᠢᠯ ᠲᠠᠢ ᠭᠠᠵᠠᠷ ᠢ ᠲᠡᠬᠢᠵᠤ ᠤᠯᠵᠤ ᠥᠵᠡᠭᠰᠡᠨ ᠥᠬᠡᠢ ᠨᠢ ᠶᠠᠰᠢᠯ ᠪᠤᠯ ᠶᠠᠭ ᠯᠠ ᠮᠠᠨ ᠤ ᠡᠯᠡᠰᠤ ᠮᠠᠩᠬ᠎ᠠ᠂ ᠪᠠᠯᠠᠷ ᠰᠢᠯᠢ ᠬᠤᠯᠢᠯᠳᠣᠬᠰᠠᠨ ᠬᠠᠬᠢᠷ ᠬᠠᠭᠤᠷᠡᠢ ᠤᠷᠤᠨ ᠳᠤ ᠯᠡ ᠲᠤᠬᠢᠷᠠᠬᠰᠠᠨ ᠡᠬᠡ ᠪᠠᠶᠢᠭᠠᠯᠢ ᠠᠴᠠ ᠬᠠᠶᠢᠷᠯᠠᠬᠰᠠᠨ ᠡᠴᠢᠨ᠎ᠠ ᠭᠠᠶᠢᠬᠠᠮᠰᠢᠬᠳᠤ ᠬᠤᠪᠤᠷ ᠴᠤᠬᠠᠭ ᠤᠷᠭᠤᠮᠠᠯ ᠪᠠᠶᠢᠬᠰᠠᠨ ᠨᠢ ᠢᠯᠡᠷᠬᠡᠢ᠃ ᠡᠯᠡᠰᠤᠨ ᠭᠤᠪᠢ ᠶᠢᠨ ᠠᠯᠳᠠᠨ ᠲᠤᠤᠷᠡᠢ ᠲᠠᠢ ᠮᠥᠷᠤ ᠵᠢᠷᠬᠡᠴᠡᠬᠦ ᠡᠷᠳᠡᠨᠢ ᠪᠤᠯᠤᠬᠰᠠᠨ ᠶᠠᠰᠢᠯ ᠢᠶᠠᠨ ᠥᠨᠳᠤᠰᠤ ᠤᠬᠰᠠᠭ᠎ᠠ ᠲᠠᠰᠤᠷᠠᠬᠤ ᠶᠢ ᠬᠠᠷᠠᠬᠤ ᠮᠠᠨ ᠤ ᠥᠶ᠎ᠡ ᠶᠢᠨ ᠬᠢᠨ ᠶᠠᠭᠤᠳᠠᠢ ᠡᠮᠬᠢᠨᠡᠯᠳᠡᠢ ᠭᠤᠨᠢᠬᠯᠠᠯᠳᠠᠢ ᠪᠤᠢ︕︖ ᠬᠡᠷᠪᠡ ᠲᠡᠤᠬᠡ ᠶᠢᠨ ᠬᠠᠭᠤᠳᠠᠰᠤᠨ ᠠᠴᠠ ᠲᠡᠷᠡᠬᠦ ᠠᠷᠪᠠ ᠬᠤᠷᠢᠭᠠᠳ ᠵᠢᠯ ᠢ ᠬᠠᠰᠤᠵᠤ ᠴᠢᠳᠠᠳᠠᠭ ᠪᠤᠯ ᠤᠷᠳᠤᠰ ᠨᠤᠳᠤᠭ ᠤᠨ ᠮᠤᠤᠡᠤᠰᠤ ᠡᠯᠡᠰᠤᠨ ᠤ ᠶᠠᠰᠢᠯ ᠲᠠᠢ ᠰᠢᠯᠢ ᠪᠠᠯᠠᠷ ᠪᠥᠬᠦᠨ‌ᠡᠷᠬᠡ ᠥᠬᠡᠢ ᠭᠠᠳᠠᠭᠠᠳᠤ ᠲᠤᠳᠤᠭᠠᠳᠤ ᠶᠢᠨ ᠮᠡᠷᠬᠡᠵᠢᠯᠳᠡᠨ ᠰᠢᠨᠵᠢᠯᠬᠡᠳᠡᠨ ᠪᠤᠯᠤᠨ ᠵᠤᠭᠠᠴᠠᠬᠰᠠᠳ ᠤᠨ ᠪᠠᠭ᠋ᠠᠷᠤᠯ ᠢ ᠲᠠᠳᠠᠬᠰᠠᠨ ᠤᠯᠠᠨ ᠤᠯᠤᠰ ᠤᠨ ᠬᠡᠪᠴᠢᠶᠠᠨ ᠤ ᠶᠠᠰᠢᠯ ᠮᠤᠳᠤᠨ ᠤ ᠪᠠᠶᠢᠭᠠᠯᠢ ᠶᠢᠨ ᠬᠠᠮᠠᠭᠠᠯᠠᠯᠳᠠ ᠶᠢᠨ ᠴᠡᠴᠡᠷᠯᠢᠭ ᠪᠤᠯᠤᠬᠰᠠᠨ ᠨᠢ ᠯᠠᠪᠳᠠᠢ᠃ ᠲᠡᠬᠡᠪᠡᠯ ᠪᠢᠳᠡ ᠶᠠᠭᠤᠨ ᠳᠤ ᠪᠠᠨ ᠬᠡᠵᠤ ᠥᠷᠥᠬᠡᠯ ᠬᠠᠷᠢ ᠶᠢᠨ ᠤᠢ ᠰᠢᠭᠤᠢ᠂ ᠡᠵᠡᠨ᠎ᠡ ᠲᠤᠷᠭᠤᠤᠨ ᠤᠨ ᠲᠤᠤᠷᠡᠢ ᠶᠢᠨ ᠤᠢ ᠶᠢ ᠬᠠᠴᠢᠷᠬᠠᠨ ᠭᠠᠶᠢᠬᠠᠵᠤ ᠶᠠᠪᠤᠬᠤ ᠶᠤᠮ ᠳ᠋ᠠ᠃ ᠬᠠᠷᠠᠰᠠᠯᠳᠤ ᠲᠡᠤᠬᠡᠳᠤ ᠡᠪᠤᠬᠡᠨ ᠪᠤᠭᠤᠷᠤᠯ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠡ︕           ᠨᠠᠶᠠᠨ ᠬᠡᠳᠤᠨ ᠤᠨ ᠳᠤ ᠬᠠᠷᠬᠢᠯ ᠤᠨ ᠰᠢᠯᠢ ᠨᠠᠶᠢᠳᠠ ᠶᠢᠨ ᠪᠡᠯᠴᠢᠬᠡᠷ ᠪᠠᠶᠢᠬᠰᠠᠨ ᠠᠴᠠ ᠪᠠᠨ ᠬᠤᠪᠢ ᠠᠶᠢᠯ ᠤᠨ ᠪᠡᠯᠴᠢᠬᠡᠷ ᠪᠤᠯᠵᠤ ᠬᠤᠪᠢᠷᠠᠪᠠ᠃ ᠡᠬᠢᠨ ᠤ ᠥᠶ᠎ᠡ ᠠᠶᠢᠯ ᠤᠳ ᠪᠡᠯᠴᠢᠬᠡᠷ ᠢᠶᠠᠨ ᠲᠤᠰᠭᠠᠷᠯᠠᠬᠤ ᠶᠢ ᠮᠡᠳᠡᠬᠦ ᠥᠬᠡᠢ ᠪᠠᠶᠢᠬᠰᠠᠨ ᠪᠤᠯᠬᠤᠷ ᠮᠠᠨ ᠤ ᠬᠢᠨ ᠤ ᠮᠤᠷᠢ ᠥᠬᠡᠷ ᠤᠨ ᠰᠥᠷᠥᠭ  ᠶᠡᠭᠡ ᠤᠷᠤᠢ ᠪᠤᠯᠳᠠᠯ᠎ᠠ ᠡᠪᠡᠰᠤᠯᠠᠵᠤ ᠪᠡᠯᠴᠢᠬᠡᠷᠯᠡᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠪᠥᠷ ᠰᠡᠬᠦᠯ ᠳᠤ ᠠᠷᠪᠠᠨ ᠬᠡᠳᠤᠨ ᠬᠡᠰᠡᠭ ᠬᠤᠪᠢᠶᠠᠬᠳᠠᠵᠤ᠂ ᠲᠠᠮᠤᠷ ᠲᠤᠤᠷ ᠢᠶᠠᠷ ᠬᠥᠷᠢᠶᠡᠯᠡᠭᠳᠡᠭᠰᠡᠨ ᠤᠴᠢᠷ ᠲᠡᠬᠢᠵᠤ ᠰᠢᠯᠢ ᠳᠤ ᠭᠠᠷᠬᠤ ᠲᠤᠬᠢᠶᠠᠯ ᠴᠤ ᠴᠥᠬᠡᠷᠡᠪᠡ᠃ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠡᠮᠤᠨ᠎ᠡ ᠡᠩᠬᠡᠷ᠂ ᠵᠠᠬᠦᠨ ᠪᠠᠷᠠᠭᠤᠨ ᠰᠤᠭᠤ ᠬᠤᠭᠤᠯᠠᠢ᠂ ᠠᠷᠤ ᠬᠤᠷᠮᠤᠢ ᠳᠤ ᠵᠡᠬᠡᠷᠬᠡᠨ᠎ᠡ ᠡᠪᠠᠰᠤ ᠭᠠᠵᠠᠷ ᠰᠠᠢ ᠥᠬᠡᠢ ᠤᠷᠭᠤᠵᠤ᠂ ᠬᠤᠶᠢᠳᠤ ᠲᠠᠯ ᠳᠤ ᠨᠢ ᠰᠢᠭᠢᠷ ᠡᠪᠠᠰᠤ ᠤᠷᠭᠤᠵᠤ ᠪᠠᠶᠢᠬᠰᠠᠨ ᠪᠤᠯᠬᠤᠷ ᠡᠮ ᠤᠨ ᠮᠡᠲ᠋ᠧᠷᠢᠶᠠᠯ ᠦᠨ᠎ᠠ ᠳᠤ ᠬᠥᠷᠤᠭ᠍ᠰᠡᠨ ᠲᠡᠳᠡᠬᠡᠷ ᠵᠢᠯ   ᠳᠤ ᠬᠠᠳᠤᠭᠤᠷᠴᠢᠨ ᠮᠠᠯᠳᠠᠭᠤᠷᠴᠢᠨ ᠰᠢᠯᠢ ᠶᠢ ᠪᠥᠷᠬᠦᠵᠤ᠂  ᠲᠡᠷᠬᠡ ᠤᠨᠤᠭ᠎ᠠ ᠬᠥᠷᠥᠯᠳᠤᠵᠤ ᠪᠠᠶᠢᠭᠠᠳ ᠰᠢᠭᠢᠷ ᠡᠪᠠᠰᠤ ᠨᠢ ᠬᠡᠳᠤᠬᠡᠨ ᠵᠢᠯ ᠳᠤ ᠥᠨᠳᠤᠰᠤ ᠲᠠᠰᠤᠷᠠᠵᠤ᠂ ᠵᠡᠬᠡᠷᠬᠡᠨ᠎ᠡ ᠤᠷᠭᠤᠳᠠᠭ ᠲᠠᠯᠠᠪᠠᠢ ᠴᠤ ᠬᠠᠭᠠᠰ ᠲᠤᠭᠠᠨ ᠤ ᠬᠡᠪᠴᠢᠶ᠎ᠠ ᠪᠠᠷ ᠪᠠᠭᠠᠰᠤᠬᠰᠠᠨ ᠪᠠᠶᠢᠨ᠎ᠠ᠃ ᠶᠠᠷᠡᠨ ᠬᠡᠳᠤᠨ ᠤᠨ ᠠᠴᠠ ᠡᠬᠢᠯᠡᠨ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠡᠷᠬᠢᠨ ᠲᠤᠭᠤᠷᠢᠨ ᠳᠤ ᠴᠢᠯᠠᠭᠤᠨ ᠲᠤᠰᠤ᠂ ᠰᠢᠳᠠᠮᠠᠬᠠᠢ ᠬᠡᠢ ᠶᠢᠨ ᠬᠠᠶᠢᠯᠳᠠ ᠬᠢᠵᠤ ᠬᠠᠳᠠᠭᠤ ᠬᠥᠷᠤᠰᠤ ᠶᠢ ᠰᠠᠨᠳᠠᠯᠤᠨ᠂ ᠭᠠᠵᠠᠷ ᠤᠨ ᠬᠥᠨ ᠪᠤᠯᠳᠠᠯ᠎ᠠ ᠴᠤᠭᠤᠴᠢᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠰᠢᠳᠠᠮᠠᠬᠠᠢ ᠬᠡᠢ ᠶᠢᠨ ᠶᠡᠭᠡ ᠢᠯᠡᠷᠡᠬᠦᠯᠥᠯᠳᠡ ᠪᠤᠯᠵᠤ᠂ ᠨᠠᠩ ᠶᠡᠭᠡ ᠬᠡᠮᠵᠢᠶᠠᠨ ᠤ ᠨᠡᠬᠡᠬᠡᠯᠳᠡ ᠪᠤᠯᠤᠭᠠᠳ᠂ ᠮᠠᠯ ᠰᠥᠷᠥᠭ ᠠᠮᠢᠳᠠᠨ ᠵᠢᠬᠦᠷᠳᠡᠨ ᠠᠴᠠ ᠥᠬᠡᠷ᠎ᠡ ᠲᠠᠭᠤ ᠠᠶᠠᠯᠭᠤ ᠥᠬᠡᠢ ᠰᠢᠯᠢ ᠶᠢᠨ ᠤᠷᠤᠢ ᠡᠳᠤᠷᠵᠢᠨ ᠰᠤᠨᠢᠵᠢᠨ ᠬᠥᠴᠤᠳᠤ ᠮᠠᠰᠢᠨ ᠬᠥᠨᠳᠡᠶᠢᠯᠡᠬᠦ ᠥᠷᠥᠮᠳᠡᠬᠦᠷ ᠬᠥᠷᠴᠢᠬᠡᠨᠡᠬᠦ ᠨᠥᠰᠡᠷ ᠲᠠᠭᠤᠨ ᠳᠤ ᠪᠥᠰᠡᠯᠡᠭᠳᠡᠭᠰᠡᠨ ᠪᠠᠶᠢᠨ᠎ᠠ᠃ ᠬᠡᠳᠤᠬᠡᠨ ᠵᠢᠯ ᠤᠨ ᠲᠤᠳᠤᠷ᠎ᠠ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠤᠷᠤᠢ ᠪᠠᠷ ᠬᠢ ᠥᠩ ᠰᠢᠮᠡᠯᠢᠭ ᠬᠥᠷᠤᠰᠤ ᠰᠢᠷᠤᠢ ᠨᠢ ᠠᠳᠡ ᠲᠠᠨᠳᠠ ᠨᠢ ᠰᠡᠨᠴᠢᠭᠳᠡᠨ ᠴᠤᠭᠤᠷᠠᠵᠤ᠂ ᠢᠳᠡᠭᠳᠡᠨ ᠬᠠᠯᠴᠠᠭᠠᠶᠢᠷᠠᠭᠠᠳ᠂ ᠡᠯᠡᠰᠤ ᠰᠢᠷᠤᠢ ᠬᠤᠶᠢᠯᠠᠷᠠᠬᠰᠠᠨ ᠡᠷᠢᠶᠠᠨ ᠴᠤᠬᠤᠷ ᠰᠢᠯᠢ ᠪᠤᠯᠵᠤ ᠬᠤᠪᠢᠷᠠᠵᠠᠢ᠃ ᠰᠤᠨᠤᠰᠬᠤᠯ᠎ᠠ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠲᠤᠤᠷ᠎ᠠ ᠪᠠᠰᠠ ᠬᠤᠪᠤᠷ ᠨᠡᠬᠦᠷᠡᠰᠤ ᠥᠨᠡᠳᠤ ᠴᠢᠯᠠᠭᠤ ᠲᠠᠷᠤᠬᠳᠠᠵᠤ ᠪᠠᠶᠢᠳᠠᠭ ᠬᠡᠨ᠎ᠡ᠃ ᠬᠥᠷᠤᠰᠤᠨ  ᠤ ᠶᠡᠭᠡ ᠬᠥᠨ ᠳᠤ ᠪᠠᠶᠢᠳᠠᠭ ᠠᠴᠠ ᠤᠳᠤᠬᠢ ᠮᠠᠷᠬᠡᠵᠢᠯ ᠨᠢ ᠮᠠᠯᠳᠠᠵᠤ ᠴᠢᠳᠠᠳᠠᠭ ᠥᠬᠡᠢ ᠴᠤ ᠬᠡᠨ᠎ᠡ᠃ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠮᠢᠨᠢ ᠬᠤᠪᠢ ᠵᠠᠶᠠᠭ᠎ᠠ ᠢᠷᠡᠬᠦ ᠮᠠᠷᠭᠠᠰᠢ ᠶᠠᠮᠠᠷᠬᠠᠨ ᠪᠤᠯᠬᠤ ᠬᠡᠬᠦ ᠠᠴᠠ ᠥᠷᠥ ᠵᠢᠷᠤᠬᠡ ᠮᠢᠨᠢ ᠭᠤᠨᠢᠭ ᠭᠤᠳᠤᠷᠠᠯ ᠢᠶᠠᠷ ᠲᠥᠬᠦᠷᠥᠨ᠎ᠡ᠃ ᠥᠪᠡᠷ ᠤᠨ ᠪᠡᠶ᠎ᠡ ᠮᠢᠨᠢ ᠪᠢᠳᠡᠬᠦᠥ ᠬᠠᠷ᠎ᠠ ᠨᠢᠬᠦᠯ ᠬᠢᠯᠢᠨᠴᠡ ᠥᠢᠯᠡᠳᠥᠭᠰᠡᠨ ᠪᠠᠭ ᠬᠠᠷ᠎ᠠ ᠴᠢᠳᠬᠦᠷ ᠪᠤᠯᠵᠤ ᠰᠠᠨᠠᠬᠳᠠᠵᠤ᠂ ᠥᠶ᠎ᠡ ᠶᠢᠨ ᠥᠶ᠎ᠡ ᠪᠠᠷ ᠬᠤᠯᠠᠵᠤ ᠴᠢᠳᠠᠰᠢ ᠥᠬᠡᠢ ᠥᠷᠢ ᠲᠥᠯᠥᠬᠡᠰᠤ ᠲᠠᠢ ᠪᠤᠯᠤᠬᠰᠠᠨ ᠰᠢᠭ᠋ ᠰᠢᠨᠠᠯᠤᠯ ᠡᠪᠡᠷᠰᠢᠶᠠᠯ ᠳᠤ ᠠᠪᠳᠠᠨ᠎ᠠ᠃ ᠡᠳ᠋ ᠡᠷᠳᠡᠨᠢᠰ ᠢᠶᠠᠨ ᠬᠠᠷᠠᠮ ᠥᠬᠡᠢ ᠡᠷᠬᠦᠭᠰᠡᠬᠡᠷ ᠢᠷᠡᠭᠰᠡᠨ ᠥᠭᠯᠡᠭᠡ ᠶᠡᠬᠡᠳᠤ ᠥᠭᠶᠤᠬᠡᠮᠤᠷ ᠰᠡᠳᠬᠢᠯᠳᠤ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠡ︕           ᠨᠠᠮᠠᠢᠢ ᠰᠦᠨ ᠦᠨᠦᠷ ᠲᠠᠢ ᠪᠦᠯᠢᠶᠡᠨ ᠨᠢᠷᠤᠭᠤᠨ ᠲᠡᠭᠡᠷ᠎ᠡ ᠪᠠᠨ ᠡᠬᠦᠷᠦᠭᠡᠳ ᠬᠠᠷᠬᠢᠯ ᠤᠨ ᠰᠢᠯᠢ ᠳᠤ ᠭᠠᠷᠭᠠᠭᠰᠠᠨ ᠡᠵᠢ ᠮᠢᠨᠢ ᠴᠦ ᠤᠳᠤ ᠬᠠᠷᠬᠢᠯ ᠮᠤᠳᠤ  ᠶᠢᠨ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ ᠶᠠᠪᠤᠭᠠᠳ ᠭᠡᠳᠦᠨ ᠵᠢᠯ ᠪᠤᠯᠤᠯ᠎ᠠ᠃ ᠦᠯᠡᠳᠡᠭᠰᠡᠨ ᠨᠢ ᠡᠵᠢ ᠶᠢᠨ ᠮᠢᠨᠢ ᠭᠡᠨ ᠳᠤ ᠴᠦ ᠲᠤᠰᠠ ᠪᠠᠨ ᠬᠦᠷᠭᠡᠬᠦ ᠭᠡᠵᠤ ᠵᠢᠳᠬᠦᠳᠡᠭ ᠭᠠᠭᠴᠠ ᠦᠵᠦᠬᠦᠷᠳᠤ ᠵᠤᠷᠢᠭ ᠰᠠᠨᠠᠭ᠎ᠠ᠂ ᠡᠵᠢ ᠶᠢᠨ ᠮᠢᠨᠢ ᠤᠨᠠᠰᠢ ᠦᠭᠡᠢ ᠦᠩᠭᠡ ᠪᠤᠳᠤᠭ ᠪᠤᠯᠵᠤ᠂ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠪᠠᠷ᠎ᠠ ᠪᠤᠯᠵᠤ ᠰᠠᠨᠠᠬᠳᠠᠨ᠎ᠠ᠃           ᠬᠠᠷᠬᠢᠯ ᠤᠨ ᠰᠢᠯᠢ ᠨᠢ ᠶᠠᠰᠢᠯ ᠤᠨ ᠪᠠᠷ᠎ᠠ ᠥᠬᠡᠢ ᠭᠤᠴᠢᠨ ᠬᠡᠳᠤᠨ ᠵᠢᠯ ᠪᠤᠯᠵᠠᠢ᠃ ᠡᠨᠡ ᠵᠢᠯ ᠤᠨ ᠵᠤᠨ ᠤ ᠰᠠᠶᠢᠬᠠᠨ ᠤᠯᠠᠷᠢᠯ  ᠳᠤ ᠪᠢ ᠨᠤᠳᠤᠭ ᠲᠤ ᠪᠠᠨ ᠬᠥᠷᠴᠤ ᠠᠯᠠᠭ ᠲᠤᠯᠤᠭᠠᠢ ᠲᠡᠬᠡᠷ᠎ᠡ ᠪᠠᠨ ᠭᠠᠷᠪᠠ᠃ ᠶᠠᠭᠤ ᠤᠯᠵᠤ ᠥᠵᠡᠭᠰᠡᠨ ᠬᠡᠵᠣ ᠰᠠᠨᠠᠪᠠ︖ ᠥᠨᠳᠤᠰᠤ ᠬᠥᠷᠳᠡᠯ᠎ᠡ ᠥᠯᠡᠳᠡᠭᠰᠡᠨ ᠥᠬᠡᠢ ᠬᠡᠵᠤ ᠰᠠᠨᠠᠬᠰᠠᠨ ᠬᠠᠷᠬᠢᠯ ᠤᠨ ᠶᠠᠰᠢᠯ ᠥᠨᠳᠤᠷ ᠲᠤᠯᠤᠭᠠᠢ ᠶᠢᠨ ᠡᠩᠬᠡᠷ ᠲᠤ ᠶᠠᠭᠠᠬᠢᠵᠤ ᠨᠢᠭᠤᠵᠤ ᠴᠢᠳᠠᠵᠤ ᠪᠠᠶᠢᠪᠠ ᠬᠡᠮᠡᠷ ᠠᠶᠠᠭᠠᠨ ᠬᠢᠷᠢ ᠪᠥᠳᠤᠬᠦᠨ ᠶᠠᠰᠢᠯ ᠤᠨ ᠲᠠᠭᠠᠷᠢᠭᠳᠠᠬᠰᠠᠨ ᠥᠬᠢᠷᠡᠬᠡᠢ ᠶᠤᠵᠤᠭᠤᠷ ᠰᠠᠯᠬᠢ ᠪᠤᠷᠤᠭᠠᠨ ᠤ ᠢᠳᠡᠭᠳᠡᠯ ᠢᠶᠠᠷ ᠭᠠᠵᠠᠷ ᠤᠨ ᠬᠥᠷᠤᠰᠤᠨ ᠠᠴᠠ ᠢᠯᠡ ᠭᠠᠷᠴᠣ ᠤᠭ ᠠᠴᠠ ᠨᠢ ᠲᠥᠬᠡ ᠣᠷᠳᠤ ᠰᠢᠨ᠎ᠠ ᠨᠠᠮᠠᠭ᠎ᠠ ᠤᠷᠭᠤᠬᠰᠠᠨ ᠪᠠᠶᠢᠯ᠎ᠠ᠃ ᠲᠡᠷᠡᠬᠡᠨ ᠮᠥᠴᠡ ᠳᠤ ᠬᠦᠯᠦᠰᠤ᠂ ᠰᠦ ᠪᠠᠷ ᠭᠤᠤᠯᠯᠠᠭᠰᠠᠨ ᠡᠵᠢ ᠶᠢᠨ ᠮᠢᠨᠢ ᠨᠢᠷᠤᠭᠤᠨ ᠤ ᠦᠨᠦᠷ ᠲᠡᠨᠳᠡ ᠬᠠᠩᠬᠤᠯᠠᠬᠤ ᠰᠢᠭ᠋ ᠪᠤᠯᠵᠤ ᠪᠢᠯᠡ᠃᠃         ᠱᠠᠬᠰᠢᠷᠠᠵᠤ ᠭᠠᠶᠢᠬᠠᠬᠤ ᠶᠢᠨ ᠲᠤᠶᠢᠯ ᠪᠤᠯᠵᠤ ᠪᠥᠳᠤᠨ ᠡᠳᠤᠷ ᠭᠠᠩ ᠤᠨ ᠬᠠᠭᠠᠷᠬᠠᠢ᠂ ᠲᠠᠷᠴᠤᠬᠳᠤ ᠲᠤᠯᠤᠭᠠᠢ᠂  ᠭᠤᠵᠤᠩ ᠬᠠᠷᠬᠢᠯ᠂ ᠬᠠᠳᠠᠭᠤ ᠲᠤᠯᠤᠭᠠᠢ  ᠪᠠᠷ ᠬᠡᠤᠬᠡᠳ ᠰᠢᠭ ᠲᠠᠪᠬᠡᠷᠡᠵᠤ᠂ ᠬᠥᠯ ᠬᠥᠬᠡᠷᠴᠡᠭ ᠪᠤᠯᠵᠤ ᠡᠷᠢᠯ ᠲᠠᠯᠪᠢᠪᠠ᠃ ᠶᠠᠳᠠᠬᠤ ᠳᠤ ᠬᠡᠳᠤᠨ ᠠᠷᠪᠠᠨ ᠶᠠᠰᠢᠯ ᠤᠨ ᠥᠨᠳᠤᠰᠤ ᠠᠴᠠ ᠰᠢᠨ᠎ᠠ ᠤᠯᠠᠭᠠᠨ ᠬᠥᠷᠡᠩ᠂ ᠤᠯᠠᠭᠠᠨ ᠪᠤᠷᠤ ᠰᠤᠶᠤᠭ᠎ᠠ ᠨᠠᠮᠠᠭ᠎ᠠ ᠰᠤᠭᠤᠷᠤᠨ ᠭᠠᠷᠤᠬᠰᠠᠨ ᠢ ᠬᠠᠷᠠᠯ᠎ᠠ᠃ ᠶᠠᠰᠢᠯ ᠢ ᠲᠤᠤᠷᠡᠢ ᠲᠠᠢ ᠠᠳᠠᠯᠢᠬᠠᠨ ᠤᠷᠭᠤᠬᠤ ᠳᠤ ᠮᠢᠩᠭᠠᠨ ᠵᠢᠯ᠂ ᠤᠨᠠᠬᠤ  ᠳᠤ ᠮᠢᠩᠭᠠᠨ ᠵᠢᠯ᠂ ᠥᠬᠢᠷᠡᠬᠦ ᠳᠤ ᠮᠢᠩᠭᠠᠨ ᠵᠢᠯ ᠬᠡᠳᠡᠭ ᠪᠥᠬᠡᠳ ᠲᠥᠴᠢ ᠲᠠᠪᠢᠨ ᠵᠢᠯ ᠳᠤ ᠨᠢᠳᠤᠷᠭᠠᠨ ᠬᠢᠷᠢ ᠪᠥᠳᠤᠬᠦᠨ ᠪᠤᠯᠳᠠᠭ ᠬᠡᠨ᠎ᠡ ᠪᠢᠯᠡ᠃ ᠲᠡᠬᠡᠬᠦ ᠳᠤ ᠨᠠᠳᠠ ᠢᠮᠡᠭᠠᠨ ᠰᠢᠳᠠᠮ ᠤᠨ ᠬᠢᠷᠢ ᠪᠤᠯᠬᠤ ᠶᠢ ᠥᠵᠡᠬᠦ ᠨᠠᠰᠤ ᠪᠠᠶᠢᠬᠤ ᠴᠤ ᠶᠤᠮ ᠤᠤ ᠬᠡᠬᠦ ᠪᠤᠳᠤᠯ ᠤᠷᠭᠤᠵᠤ ᠠᠮᠵᠢᠬᠤ ᠶᠢ ᠶᠠᠭᠠᠬᠢᠨ᠎ᠠ᠃ ᠠᠯᠮᠠᠶᠢᠷᠠᠯ ᠰᠤᠴᠢᠯ ᠪᠥᠬᠦᠨ ᠢ ᠬᠥᠷᠬᠡᠭᠰᠡᠨ ᠡᠳᠡᠬᠡᠳ ᠭᠠᠶᠢᠬᠠᠮᠰᠢᠬᠳᠤ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠡ︕                   ᠡᠬᠡ ᠪᠠᠶᠢᠭᠠᠯᠢ ᠬᠡᠵᠤ ᠶᠠᠭᠤᠳᠠᠢ ᠰᠤᠨᠢᠨ ᠬᠠᠴᠢᠨ ᠶᠠᠭᠤᠮ᠎ᠠ ᠪᠢᠯᠡ︖ ᠠᠮᠢ ᠠᠬᠤᠢ ᠶᠢᠨ ᠬᠠᠮᠠᠭᠠᠯᠠᠯᠳᠠ ᠰᠡᠷᠬᠦᠬᠡᠯᠳᠡ ᠬᠢᠭᠰᠡᠨ ᠠᠷᠪᠠᠨ ᠬᠡᠳᠣᠨ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠪᠥᠬᠦ ᠰᠢᠯᠢ ᠪᠠᠷ ᠢᠶᠠᠨ ᠨᠢᠳᠤ ᠬᠠᠯᠢᠷᠠᠮᠠᠷ ᠡᠯᠡᠰᠤ ᠮᠠᠩᠬ᠎ᠠ ᠪᠤᠯᠬᠤ ᠠᠶᠤᠯ ᠳᠤ ᠤᠴᠠᠷᠠᠭᠠᠳ ᠪᠠᠶᠢᠬᠰᠠᠨ ᠥᠵᠡᠭᠳᠡᠯ  ᠥᠬᠡᠷᠡᠴᠢᠯᠡᠭᠳᠡᠵᠤ ᠰᠢᠷ᠎ᠠ ᠡᠯᠡᠰᠤ ᠲᠠᠬᠢᠨ ᠪᠥᠷᠢᠮᠤᠰᠤᠨ ᠬᠠᠷᠭᠠᠨ᠎ᠠ ᠰᠢᠪᠠᠭ ᠵᠤᠶᠢᠯ ᠤᠨ ᠡᠪᠠᠰᠤ ᠤᠷᠭᠤᠮᠠᠯ ᠲᠤᠤᠷ᠎ᠠ ᠲᠠᠷᠤᠬᠳᠠᠬᠰᠠᠨ ᠪᠠᠶᠢᠪᠠ᠃ ᠥᠷ᠎ᠡ ᠬᠤᠶᠢᠴᠢᠰ ᠮᠢᠨᠢ ᠡᠨᠡ ᠨᠤᠳᠤᠭ ᠲᠤ ᠪᠠᠶᠢᠳᠠᠭ ᠲᠤ ᠲᠤᠯᠪᠠᠯ ᠬᠡᠳᠤᠨ ᠠᠷᠪᠠᠨ ᠵᠢᠯ ᠤᠨ ᠲᠠᠷᠠᠭ᠎ᠠ ᠵᠤᠬᠰᠤᠭ᠎ᠠ ᠪᠠᠷ᠎ᠠ ᠲᠠᠢ ᠤᠷᠭᠤᠭ᠎ᠠ ᠶᠠᠰᠢᠯ ᠤᠯᠵᠤ ᠥᠵᠡᠬᠦ ᠪᠥᠬᠡᠳ ᠬᠡᠳᠤᠨ ᠵᠠᠭᠤᠨ ᠵᠢᠯ ᠤᠨ ᠲᠠᠷᠠᠭ᠎ᠠ ᠶᠠᠰᠢᠯ ᠤᠨ ᠤᠢ ᠰᠡᠷᠬᠦᠨ ᠪᠤᠰᠬᠤ ᠬᠡᠰᠡᠨ ᠬᠡᠶᠢᠷᠬᠡᠯ ᠳᠤ ᠠᠪᠳᠠᠵᠤ ᠲᠥᠮᠡᠨ ᠳᠤ ᠵᠠᠷᠯᠠᠵᠤ ᠪᠤᠮᠠᠨ ᠳᠤ ᠲᠤᠩᠬᠠᠬᠯᠠᠮᠠᠷ ᠪᠤᠯᠪᠠ᠃ ᠥᠨᠢ ᠮᠥᠩᠬᠡ ᠶᠢᠨ ᠨᠤᠭᠤᠭᠠᠨ ᠵᠡᠬᠦᠳᠤ ᠲᠠᠢ ᠬᠠᠷᠬᠢᠯ ᠤᠨ ᠰᠢᠯᠢ ᠮᠢᠨᠢ ᠡ︕
ᠢᠷᠡᠯᠲᠡ᠄ ᠵᠣᠬᠢᠶᠠᠭᠴᠢ ᠠᠴᠠ ᠬᠠᠩᠭᠠᠪᠠ