ᠠᠪᠤ  ᠪᠢᠳᠠ ᠬᠤᠶᠠᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/2
                                    ᠴᠠᠬᠠᠷ ᠨᠠᠷᠠᠨᠳᠠᠯᠠᠢ       ᠨᠢᠬᠡ     ᠵᠢᠷᠭᠤᠭᠠᠨ ᠨᠠᠰᠤᠳᠠᠢ ᠨᠢᠰᠤᠩᠬᠠᠢ ᠵᠢᠭᠠᠯ ᠪᠠᠶᠢᠬᠤ ᠶᠢᠨ ᠨᠢᠬᠡ ᠥᠳᠡᠰᠢ ᠠᠪᠤ ᠮᠠᠯ ᠢᠶᠠᠨ ᠬᠤᠳᠠᠯᠠᠭᠠᠳ ᠡᠬᠡᠴᠢ ᠪᠢᠳᠠ ᠬᠤᠶᠠᠭᠤᠯᠠ ᠶᠢ ᠲᠠᠭᠠᠭᠤᠯᠵᠤ ᠴᠠᠭᠠᠨᠳᠤᠯᠤᠭᠠᠢ ᠤᠯᠤᠰ ᠤᠨ ᠤᠢ ᠶᠢᠨ ᠲᠠᠯᠠᠪᠠᠢ ᠳᠤ  ᠬᠦᠷᠴᠤ ᠺᠢᠨᠤ᠋ ᠥᠵᠡᠪᠡ᠃ ︽ᠪᠤᠬ᠎ᠠ ᠲᠡᠷᠬᠡᠨ ᠵᠢᠯᠥᠭᠤᠴᠢ ᠶᠢᠨ ᠬᠥᠥ︾᠂ ︽ᠨᠥᠬᠡᠨ ᠵᠠᠮ ᠤᠨ ᠪᠠᠶᠢᠯᠳᠤᠭᠠᠨ︾ ᠬᠡᠬᠦ ᠬᠤᠶᠠᠷ ᠺᠢᠨᠤ᠋ ᠥᠵᠡᠬᠡᠳ ᠬᠠᠷᠢᠬᠤ ᠪᠤᠯᠬᠤ ᠳᠤ ᠪᠢᠳᠠ ᠬᠤᠶᠠᠷ ᠨᠤᠶᠢᠷ ᠲᠤ ᠪᠠᠨ ᠲᠡᠶᠢᠯᠳᠠᠵᠤ ᠠᠯᠬᠤᠬᠤ ᠲᠡᠩᠬᠡᠬᠡ ᠥᠬᠡᠢ ᠪᠤᠯᠤᠬᠰᠠᠨ ᠲᠤᠯᠠ ᠠᠪᠤ ᠡᠬᠡᠯᠵᠢᠶ᠎ᠠ ᠪᠠᠷ ᠡᠬᠦᠷᠴᠤ ᠶᠠᠪᠤᠵᠠᠢ᠃ ᠡᠬᠡᠴᠢ ᠶᠢ ᠡᠬᠦᠷᠬᠦ ᠨᠢ ᠢᠯᠡᠬᠦᠦ ᠲᠠᠢ ᠮᠡᠳᠡᠭᠳᠡᠬᠦ ᠪᠠᠷ ᠪᠢ ᠠᠭᠤᠷᠤᠨ ᠳᠤ ᠪᠠᠨ ᠬᠠᠷᠠᠩᠭᠤᠢ ᠪᠠᠷ ᠡᠮᠤᠨ᠎ᠠ ᠨᠢ ᠬᠥᠶᠤᠨ ᠬᠠᠷᠢᠵᠤ ᠲᠠᠬᠦᠥ ᠶᠢ ᠤᠨᠳᠠᠭᠤᠯᠤᠭᠠᠳ ᠭᠤᠳᠤᠯ ᠤᠶᠤᠵᠤ ᠰᠠᠭᠤᠬᠰᠠᠨ ᠡᠵᠢ ᠳᠤ ᠪᠠᠨ ᠵᠠᠭᠠᠯᠳᠤᠵᠤ᠄ ︽ᠠᠪᠤ ᠨᠠᠳᠠ ᠶᠠᠭ ᠬᠠᠶᠢᠷ᠎ᠠ ᠥᠬᠡᠢ᠂ ᠮᠠᠭᠤ ᠠᠪᠤ︾ ᠬᠡᠵᠤ ᠤᠬᠢᠯᠡᠨ ᠬᠠᠶᠢᠯᠵᠤ ᠪᠢᠯᠡ᠃ ᠠᠪᠤ ᠬᠠᠷᠢᠵᠤ ᠢᠷᠡᠬᠡᠳ᠄ ︽ᠡᠷ᠎ᠡ ᠬᠦᠮᠦᠨ ᠪᠠᠶᠢᠵᠤ ᠨᠢᠰᠤ ᠨᠢᠯᠪᠤᠰᠤ ᠪᠠᠨ ᠴᠤᠪᠤᠭᠤᠯᠳᠠᠭ ᠥᠬᠡᠢ ᠶᠤᠮ ᠰᠢᠤ︕ ᠵᠢᠷᠵᠢᠬᠡᠷ ᠬᠠᠳᠠᠩᠬᠠᠢ ᠡᠬᠡᠴᠢ ᠪᠠᠨ ᠬᠦᠴᠦᠷᠦᠬᠡᠳ ᠪᠠᠶᠢᠵᠤ ᠪᠤᠯᠬᠤ ᠦᠬᠡᠢ ᠰᠢᠦ︾ ᠬᠡᠳ ᠬᠡ ᠬᠡ ᠢᠨᠢᠶᠡᠬᠦ ᠳᠤ  ᠶᠠᠷᠤ ᠶᠢᠨ ᠴᠠᠭ ᠡᠬᠡᠴᠢ ᠪᠠᠨ ᠠᠳᠠᠯᠠᠵᠤ ᠡᠷ᠎ᠡ ᠪᠠᠨ ᠵᠢᠭᠠᠳᠠᠭ ᠯᠤᠷᠵᠤᠤ   ᠪᠠᠨ ᠮᠡᠳᠡᠵᠤ ᠪᠠᠶᠢᠪᠠᠴᠤ ᠠᠭᠤᠷ ᠬᠤᠷᠤᠨ ᠤ ᠭᠠᠯ ᠢᠳᠡᠨ ᠲᠡᠬᠡᠷ᠎ᠡ ᠪᠠᠶᠢᠬᠰᠠᠨ ᠪᠤᠯᠬᠤᠷ ᠤᠯᠠᠮ ᠴᠢᠩᠭ᠎ᠠ ᠤᠬᠢᠯᠡᠬᠰᠡᠨ ᠶᠤᠮ ᠡ᠃ ᠤᠯᠠᠨ ᠬᠡᠤᠬᠡᠳ ᠤᠨ ᠲᠤᠮᠳᠠ ᠤᠨᠴᠠᠭᠠᠢ ᠠᠯᠢᠶ᠎ᠠ ᠲᠤᠶᠢᠳᠬᠡᠷ ᠠᠴᠠ ᠪᠤᠯᠪᠠ ᠤᠤ︖ ᠰᠢᠷᠦᠬᠦᠨ ᠬᠠᠳᠠᠭᠤ ᠰᠠᠨᠠᠬᠳᠠᠳᠠᠭ ᠠᠪᠤ ᠪᠠᠨ ᠨᠠᠳᠠ ᠬᠠᠶᠢᠷ᠎ᠠ ᠥᠬᠡᠢ ᠶᠤᠮ ᠬᠡᠵᠤ ᠨᠢᠯᠬ᠎ᠠ ᠤᠬᠠᠭᠠᠨ ᠢᠶᠠᠷ ᠤᠶᠢᠯᠭᠠᠵᠤ ᠡᠬᠢᠯᠡᠭᠰᠡᠨ ᠪᠠᠶᠢᠵᠠᠢ᠃     ᠨᠢᠬᠡ ᠤᠳᠠᠭ᠎ᠠ ᠮᠠᠯ ᠤᠰᠤᠯᠠᠵᠤ ᠲᠤᠮᠤ ᠬᠢᠳᠡᠯ ᠬᠢᠴᠢᠬᠡᠭᠰᠡᠨ ᠬᠡᠷ ᠲᠤ ᠤᠷᠤᠭᠠᠳ ᠬᠥᠷᠥᠬᠡᠭᠰᠡᠨ ᠴᠠᠢ ᠪᠠᠨ ᠤᠤᠭᠤᠬᠤ ᠬᠡᠬᠦ ᠳᠤ ᠬᠠᠵᠠᠭᠤ   ᠳᠤ ᠮᠢᠨᠢ ᠨᠠᠭᠠᠳᠤᠵᠤ ᠪᠠᠶᠢᠬᠰᠠᠨ ᠲᠠᠬᠦᠥ ᠮᠢᠨᠢ ᠮᠢᠨᠥ ᠤᠷᠢᠳᠡᠢ ᠴᠠᠩᠭᠠᠭ᠎ᠠ ᠪᠠᠨ ᠲᠠᠷᠤᠴᠢᠬᠠᠬᠰᠠᠨ ᠪᠠᠶᠢᠵᠠᠢ᠃ ᠶᠡᠬᠡᠮᠡᠳ ᠤᠨ ᠲᠡᠷᠬᠡᠳᠡ ᠠᠮᠠᠷᠬᠠᠨ ᠪᠠᠭᠤᠵᠤ ᠦᠭᠳᠡᠭ ᠦᠬᠡᠢ ᠲᠡᠬᠦᠦ ᠳᠤ ᠪᠠᠨ ᠠᠭᠤᠷ ᠤᠮᠤᠭ ᠭᠠᠷᠭᠠᠵᠤ ᠴᠠᠢ ᠶᠢᠨ ᠰᠢᠭᠠᠷᠤ ᠶᠢ ᠲᠡᠬᠦᠥ ᠤᠷᠤᠭᠤ ᠰᠠᠴᠤᠵᠤ᠂ ᠬᠡᠷᠡᠯᠳᠤᠵᠤ ᠡᠬᠢᠯᠡᠪᠡᠯ ᠴᠠᠭ᠎ᠠ ᠴᠢᠨᠠᠵᠤ ᠪᠠᠶᠢᠬᠰᠠᠨ ᠡᠵᠢ ᠲᠤᠮᠳᠠ  ᠨᠢ ᠬᠡᠷᠡᠭ ᠰᠢᠬᠦᠵᠤ ᠡᠬᠢᠯᠡᠪᠡ᠃ ᠬᠡᠨ ᠤ ᠬᠥᠷᠥᠬᠡᠭᠰᠡᠨ ᠴᠠᠢ ᠪᠤᠯᠬᠤ ᠳᠤ ᠬᠠᠵᠠᠭᠤ ᠶᠢᠨ ᠬᠡᠷᠡᠴᠢ ᠥᠬᠡᠢ ᠲᠤᠯᠠ ᠲᠡᠬᠦᠥ ᠳᠡᠭᠡᠨ ᠬᠤᠳᠠᠯ ᠠᠶᠢᠯᠠᠳᠳᠠᠭ ᠵᠠᠩ ᠰᠤᠷᠭᠠᠬᠤ ᠦᠬᠡᠢ ᠬᠡᠵᠤ ᠭᠠᠯ ᠤᠨ ᠰᠢᠨᠠᠭ᠎ᠠ ᠢ ᠰᠢᠬᠦᠷᠡᠵᠤ ᠤᠷᠤᠬᠰᠢ ᠱᠤᠩᠭᠤᠴᠢᠪᠠᠯ ᠠᠳᠣᠭᠤᠨ ᠳᠤ ᠶᠠᠪᠤᠬᠰᠠᠨ ᠠᠪᠤ ᠬᠡᠳᠤᠢ ᠳᠤ ᠨᠢ ᠢᠷᠡᠭᠰᠡᠨ ᠢ ᠮᠡᠳᠡᠭᠰᠡᠨ ᠥᠬᠡᠢ᠄ ︽ᠮᠠᠭᠤ ᠲᠤᠷᠠᠰᠬ᠎ᠠ︕ ᠤᠳᠤ ᠬᠠᠷᠢᠨ ᠡᠵᠢ ᠳᠡᠭᠡᠨ ᠰᠢᠨᠠᠭ᠎ᠠ ᠲᠠᠯᠠᠶᠢᠬᠤ ᠴᠢᠳᠠᠯ‌‍ᠰᠤᠷᠴᠢᠬᠠᠬᠰᠠᠨ ᠤᠤ︖︾ ᠬᠡᠵᠤ ᠭᠠᠭᠴᠠᠬᠠᠨ ᠵᠠᠩᠳᠤᠷᠤᠯ᠎ᠠ᠃ ᠬᠡᠯᠢᠰᠳᠡᠵᠤ ᠭᠤᠮᠤᠳᠠᠬᠰᠠᠨ ᠪᠢ ᠣᠷᠣᠢ ᠲᠠᠯᠠᠩ ᠤᠨ ᠴᠠᠭᠠᠭᠤᠷ ᠱᠤᠬᠰᠢᠷᠠᠵᠤ ᠤᠬᠢᠯᠠᠵᠤ ᠪᠠᠶᠢᠬᠰᠠᠭᠠᠷ ᠶᠠᠭᠤ ᠪᠤᠳᠤᠬᠰᠠᠨ ᠢ ᠮᠡᠳᠡᠬᠦ ᠥᠬᠡᠢ ᠭᠤᠷᠪᠠᠨ ᠠᠶᠢᠯ ᠲᠠᠮᠵᠢᠨ ᠰᠤᠷᠠᠬᠯᠠᠵᠤ᠂ ᠵᠢᠯᠡᠢᠬᠡᠳ ᠬᠡᠳᠤ ᠬᠤᠨᠤᠬᠰᠠᠨ ᠲᠠᠪᠤᠨ ᠢᠮᠠᠭ᠎ᠠ ᠪᠠᠨ ᠤᠯᠵᠤ ᠢᠷᠡᠬᠦ ᠳᠤ ᠬᠠᠷᠤᠢ ᠪᠥᠷᠤᠢ ᠪᠤᠯᠵᠠᠢ᠃ ︽ᠡᠨᠡ ᠮᠠᠭᠤ ᠪᠠᠨᠳᠢ ᠶᠡᠷᠤᠨᠢ ᠬᠡᠨᠡᠨ ᠬᠡᠷᠡᠭ ᠬᠢᠴᠢᠬᠡᠬᠦ ᠦᠬᠡᠢ ᠪᠢᠵᠡ︕︾ ᠬᠡᠵᠤ ᠠᠪᠤ ᠮᠢᠨᠢ ᠪᠥᠷᠤᠢ ᠪᠤᠯᠳᠠᠯ᠎ᠠ ᠪᠠᠶᠢᠨ ᠲᠠᠬᠢᠨ ᠤᠷᠤᠢ ᠲᠤᠯᠤᠭᠠᠢ ᠲᠠᠭᠠᠵᠤ ᠪᠠᠷ᠎ᠠ ᠬᠠᠷᠠᠵᠤ ᠬᠥᠯᠢᠶᠡᠭᠰᠡᠨ ᠢ ᠡᠵᠢ ᠠᠴᠠ ᠰᠤᠨᠤᠰᠤᠭᠠᠳ ᠪᠠᠷᠢᠨ ᠢᠳᠡᠬᠡᠭᠰᠡᠨ ᠦᠬᠡᠢ ᠥᠩᠬᠡᠷᠡᠵᠡᠢ᠃     ᠠᠪᠤ ᠡᠵᠢ ᠬᠤᠶᠠᠭᠤᠯᠠ ᠪᠢᠳᠡ ᠬᠡᠳᠤᠬᠦᠯᠡ ᠳᠤ ᠬᠤᠨᠢ ᠢᠮᠠᠭ᠎ᠠ᠂ ᠦᠬᠡᠷ ᠮᠤᠷᠢ ᠬᠡᠵᠤ ᠭᠠᠭᠴᠠ ᠬᠤᠶᠠᠷ ᠢᠶᠠᠷ ᠪᠦᠷ ᠲᠦᠯ ᠪᠠᠶᠢᠬᠤ ᠠᠴᠠ ᠨᠢ ᠨᠡᠷ᠎ᠡ ᠵᠢᠭᠠᠭᠠᠨ᠎ᠠ᠃ ᠬᠤᠶᠠᠷ ᠠᠬ᠎ᠠ ᠪᠦᠰᠡᠬᠦᠢ ᠪᠠᠭᠤᠯᠭᠠᠬᠤ ᠳᠤ ᠨᠠᠷ᠎ᠠ ᠵᠢᠭᠠᠬᠰᠠᠨ ᠪᠤᠭ ᠮᠠᠯ ᠨᠢ ᠵᠤᠵᠠᠭᠠᠷᠠᠵᠤ ᠰᠦᠷᠦᠭ ᠰᠠᠯᠭᠠᠵᠤ ᠠᠶᠢᠯ ᠪᠦᠯᠢ ᠪᠤᠯᠵᠠᠢ᠃ ᠠᠳᠠᠯᠢ ᠦᠬᠡᠢ ᠨᠢ ᠬᠡᠪᠡᠯ ᠠᠬ᠎ᠠ ᠡᠬᠡᠴᠢ ᠶᠢᠨ ᠪᠤᠳᠠ ᠮᠠᠯ ᠨᠢ ᠬᠠᠷᠢᠨ ᠬᠡᠨ ᠤ ᠬᠢᠨ ᠴᠤ ᠲᠠᠮᠠᠢ ᠦᠰᠦᠭᠰᠡᠨ ᠦᠬᠡᠢ᠃ ᠨᠠᠳᠠ ᠵᠢᠭᠠᠬᠰᠠᠨ ᠭᠠᠭᠴᠠ ᠦᠬᠢᠨ ᠲᠤᠭᠤᠯ ᠨᠢ ᠦᠰᠦᠬᠡᠳ ᠠᠷᠪᠠᠭᠠᠳ ᠠᠯᠠᠭ ᠲᠠᠷᠯᠠᠨ ᠥᠬᠡᠷ ᠪᠤᠯᠵᠠᠢ᠃ ᠪᠢ ᠲᠤᠮᠳᠠ ᠲᠤᠰᠬᠠᠢ ᠮᠡᠷᠬᠡᠵᠢᠯ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠬᠳᠠᠵᠤ ᠤᠷᠤᠬᠰᠠᠨ ᠵᠢᠯ ᠬᠡᠳᠤᠨ ᠦᠬᠡᠷ ᠮᠢᠨᠢ ᠬᠡᠨᠡᠳᠳᠡ ᠪᠠᠷ᠎ᠠ ᠲᠠᠰᠤᠷᠠᠵᠠᠢ᠃ ᠠᠪᠤ ᠪᠤᠰᠤᠤᠨ ᠤᠨ ᠨᠡᠷ᠎ᠡ ᠵᠢᠭᠠᠬᠰᠠᠨ ᠢ ᠪᠦᠷ ᠠᠮᠠᠯᠳᠤᠬᠰᠠᠨ ᠶᠤᠰᠤᠭᠠᠷ ᠡᠵᠡᠨ ᠳᠤ ᠨᠢ ᠲᠤᠰᠢᠶᠠᠵᠤ ᠪᠠᠶᠢᠭᠠᠳ ᠭᠠᠭᠴᠠᠬᠠᠨ ᠮᠦᠬᠡᠷᠡᠳᠡᠭ ᠲᠤᠭᠤᠯ ᠴᠤ ᠦᠯᠡᠳᠡᠬᠡᠭᠰᠡᠨ ᠦᠬᠡᠢ᠂ ᠨᠠᠳᠠ ᠶᠢ ᠪᠠᠰᠠ ᠭᠠᠳᠠᠭᠤᠷᠴᠢᠯᠠᠯ᠎ᠠ ᠬᠡᠵᠤ ᠠᠪᠤ ᠳᠤ ᠪᠦᠬᠡᠮ ᠰᠠᠨᠠᠯ ᠪᠤᠯᠪᠠ᠃ ᠠᠬ᠎ᠠ ᠡᠬᠡᠴᠢ ᠲᠦᠷᠪᠡᠬᠦᠯᠡ ᠲᠠᠷᠠᠭᠠᠯᠠᠨ ᠬᠤᠷᠢᠮ ᠬᠢᠵᠤ ᠪᠦᠯᠢ ᠤᠯᠠᠨᠳᠠᠢ ᠠᠶᠢᠯ ᠳᠤ ᠠᠵᠤ ᠠᠬᠤᠢ ᠶᠢᠨ ᠬᠦᠨᠳᠤ ᠲᠠᠷᠤᠭᠠᠰᠤ ᠤᠴᠠᠷᠠᠵᠤ ᠬᠡᠳᠤᠨ ᠦᠬᠡᠷ ᠤᠨ ᠠᠴᠢ ᠪᠠᠷ ᠮᠡᠷᠬᠡᠵᠢᠯ ᠤᠨ ᠰᠤᠷᠭᠠᠭᠤᠯᠢ ᠳᠤ ᠨᠡᠷ᠎ᠡ ᠮᠡᠳᠡᠬᠦᠯᠵᠤ ᠴᠢᠳᠠᠬᠰᠠᠨ ᠢ ᠨᠠᠰᠤ ᠪᠠᠭ᠎ᠠ ᠴᠢᠰᠤ ᠰᠢᠩᠬᠡᠨ ᠪᠢ ᠶᠠᠭᠠᠬᠢᠨ ᠤᠬᠠᠬᠤ ᠪᠢᠯᠡ᠃     ᠬᠡᠷ ᠢᠶᠠᠷ ᠢᠶᠠᠨ ᠨᠠᠳᠠ ᠶᠢ ᠴᠤᠬᠤᠮ ᠬᠡᠷᠡᠭ ᠤᠨ ᠡᠴᠢᠬᠡ ᠬᠡᠳᠡᠭ ᠶᠤᠮ᠃ ᠪᠠᠶᠢᠬᠰᠠᠨ ᠪᠦᠬᠦᠨ ᠢ ᠤᠳᠤᠵᠤ ᠠᠭᠤᠳᠠᠯᠠᠨ᠂ ᠪᠦᠬᠦ ᠠᠪᠳᠠᠷ᠎ᠠ ᠱᠦᠬᠦᠢ ᠶᠢ ᠡᠷᠬᠢᠬᠦᠯᠳᠡᠵᠤ᠂ ᠶᠡᠬᠡᠮᠡᠳ ᠬᠤᠷᠢᠶᠠᠬᠰᠠᠨ ᠶᠠᠭᠤᠮ᠎ᠠ ᠪᠠᠨ ᠤᠯᠬᠤ ᠦᠬᠡᠢ ᠪᠤᠯ ᠪᠦᠬᠦᠨ ᠢᠶᠠᠷ ᠢᠶᠠᠨ ᠮᠢᠨᠦ ᠬᠢᠭᠰᠡᠨ ᠦᠷ᠎ᠡ ᠪᠦᠳᠦᠬᠡᠯ ᠪᠤᠯᠬᠤ ᠨᠢ ᠠᠰᠠᠭᠤᠯᠳᠠ ᠦᠬᠡᠢ ᠲᠤᠳᠤᠷᠬᠠᠢ ᠬᠡᠨ᠎ᠡ᠃ ᠰᠠᠶᠢᠨ ᠨᠡᠷ᠎ᠡ ᠤᠯᠬᠤ ᠬᠡᠵᠤ ᠴᠢᠷᠮᠡᠶᠢᠬᠰᠡᠨ ᠴᠤ ᠲᠦᠷᠰᠦ ᠦᠬᠡᠢ ᠬᠡᠤᠬᠡᠳ ᠲᠤ ᠬᠡᠵᠢᠶᠡᠳᠡ ᠦᠬᠡᠳᠡ ᠦᠬᠡᠢ ᠤᠴᠢᠷ ᠲᠤᠬᠢᠶᠠᠯᠳᠤᠳᠠᠭ ᠪᠤᠯᠤᠯᠳᠠᠢ᠃ ᠬᠠᠶᠠ ᠡᠵᠢ ᠳᠤ ᠬᠠᠪᠰᠤᠷᠤᠨ ᠴᠠᠢ ᠤᠰᠤ ᠤᠶᠢᠷᠳᠤᠭᠤᠯᠳᠠᠭ ᠴᠤ ᠠᠪᠳᠠᠷ᠎ᠠ ᠲᠠᠪᠢᠯᠭ᠎ᠠ ᠨᠢ ᠦᠨᠳᠤᠷ ᠪᠠᠶᠢᠵᠤ᠂ ᠤᠨᠠᠵᠤ ᠪᠦᠳᠤᠷᠡᠨ ᠦᠪᠡᠷ ᠢ ᠪᠠᠨ ᠪᠤᠴᠠᠯᠤᠬᠰᠠᠨ ᠴᠠᠢ ᠤᠰᠤ ᠪᠠᠷ ᠲᠦᠯᠡᠵᠤ ᠤᠰᠤᠨ ᠤ ᠰᠠᠪᠠ ᠶᠢ ᠬᠠᠭᠠᠯᠵᠤ ᠤᠷᠬᠢᠳᠠᠭ᠃ ᠪᠦᠳᠦᠨ ᠨᠢᠭᠤᠷ ᠰᠢᠳᠤᠨ ᠤ ᠦ ᠲᠦᠷᠬᠢᠵᠤ  ᠪᠠᠷᠤᠭᠠᠷ ᠴᠢᠷᠡᠢ ᠲᠠᠢ ᠠᠪᠤ ᠢᠷᠡᠬᠦ ᠳᠤ ᠰᠢᠷᠦᠬᠦᠨ ᠵᠠᠩᠳᠤᠷᠠᠬᠤ ᠡᠰᠡᠬᠦᠯ᠎ᠠ ᠨᠠᠷᠢᠨ ᠰᠢᠷᠭ᠎ᠠ ᠡᠬᠦᠷᠬᠦ ᠴᠤ ᠪᠤᠯᠪᠠ ᠤᠤ︖ ᠬᠡᠵᠤ ᠠᠶᠤᠵᠤ ᠲᠠᠬᠵᠢᠨ ᠰᠠᠭᠤᠬᠤ ᠳᠤ ᠡᠵᠢ ᠲᠡᠭᠳᠡᠬᠡᠬᠡᠢ ᠪᠠᠨ ᠬᠠᠷᠠᠮᠨᠠᠬᠰᠠᠨ ᠰᠢᠪᠠᠭᠤ ᠰᠢᠭ᠋ ᠡᠮᠤᠨ᠎ᠡ ᠠᠴᠠ ᠨᠢ ᠠᠵᠢᠯ ᠬᠢᠳᠡᠯ ᠳᠤ ᠬᠠᠪᠰᠤᠷᠠᠬᠰᠠᠨ ᠭᠠᠪᠢᠶ᠎ᠠ ᠶᠢ ᠢᠯᠡᠬᠦᠦ ᠲᠠᠢ ᠲᠤᠷᠠᠳᠴᠤ ᠬᠠᠳᠠᠭᠤ ᠵᠢᠮᠡᠯᠡᠬᠦ ᠠᠶᠤᠯ ᠠᠴᠠ ᠠᠪᠤᠷᠠᠵᠤ ᠭᠠᠷᠭᠠᠳᠠᠭ ᠪᠠᠶᠢᠵᠠᠢ᠃ ᠬᠡᠬᠦ ᠳᠤ ᠪᠢ ᠪᠤᠯ ᠲᠤᠳᠤᠷ᠎ᠠ ᠪᠠᠨ ᠬᠤᠷᠤᠰᠤᠯ ᠡᠪᠤᠷᠯᠠᠵᠤ ᠪᠠᠶᠢᠳᠠᠭ᠃ ᠬᠠᠯᠠᠭᠤᠨ ᠤᠰᠤᠨ ᠰᠠᠪᠠ ᠬᠠᠭᠠᠷᠠᠪᠠᠯ ᠬᠤᠳᠠᠯᠳᠤᠨ ᠠᠪᠴᠤ ᠪᠤᠯᠤᠨ᠎ᠠ᠂ ᠬᠦᠦ ᠶᠢᠨ ᠴᠢᠨᠢ ᠲᠤᠯᠤᠭᠠᠢ ᠨᠢᠭᠤᠷ ᠰᠢᠷᠬ᠎ᠠ ᠰᠤᠷᠪᠢ ᠰᠠᠭᠤᠵᠤ ᠬᠡᠮᠳᠤᠪᠠᠯ ᠶᠠᠭᠠᠬᠢᠬᠤ ᠶᠤᠮ ᠪᠤᠢ︖ ᠠᠪᠤ ᠨᠠᠳᠠ ᠬᠠᠶᠢᠷ᠎ᠠ ᠦᠬᠡᠢ ᠶᠤᠮ ᠴᠢᠨᠢ ᠡᠨᠡ ᠶᠤᠰᠤ ᠶᠢ ᠤᠶᠢᠯᠭᠠᠬᠤ ᠦᠬᠡᠢ ᠬᠡᠵᠤ ᠪᠤᠳᠤᠨ᠎ᠠ︕ ᠦᠨᠡᠨ ᠳᠤ ᠪᠠᠨ ᠠᠪᠤ ᠶᠢᠨ ᠴᠢᠩᠭ᠎ᠠ ᠰᠢᠷᠤᠬᠦᠨ ᠬᠠᠷᠠᠴᠠ᠂ ᠭᠠᠭᠴᠠ ᠴᠢᠩᠭ᠎ᠠ ᠵᠢᠮᠡᠯᠡᠬᠦ ᠪᠤᠯᠭᠠᠨ  ᠳᠤ ᠪᠢᠳᠡ ᠪᠤᠯ ᠶᠠᠭᠤ ᠨᠢᠬᠡᠨ ᠨᠢ ᠪᠤᠷᠤᠭᠤᠳᠠᠭᠠᠳ ᠪᠠᠶᠢᠭ᠎ᠠ ᠪᠠᠨ ᠮᠡᠳᠡᠷᠡᠬᠡᠳ ᠢᠷᠡᠨ᠎ᠡ᠃ ᠬᠠᠷᠢᠨ ᠪᠢᠳᠡ ᠬᠡᠳᠤᠬᠦᠯᠡ ᠶᠢ ᠪᠤᠯ ᠲᠡᠯᠡᠳᠴᠤ ᠨᠢᠰᠠᠯᠠᠬᠤ ᠶᠢ ᠴᠤ ᠮᠡᠳᠡᠬᠦ ᠦᠬᠡᠢ ᠪᠠᠶᠢᠵᠠᠢ᠃ ᠨᠠᠳᠠ ᠶᠢ ᠭᠤᠯᠤᠳᠠᠭ ᠠᠪᠤ ᠬᠡᠵᠤ ᠪᠤᠷᠤᠭᠤ ᠰᠠᠨᠠᠳᠠᠭ ᠴᠤ ᠪᠢᠳᠡᠬᠦᠦ ᠳᠤ ᠪᠠᠨ ᠠᠪᠤ ᠶᠢᠨ ᠰᠦᠷ ᠬᠡᠵᠤ ᠦᠯᠢᠬᠡᠷ ᠤᠨ ᠵᠠᠩᠵᠤᠨ ᠪᠠᠭᠠᠳᠤᠷ ᠬᠡᠵᠤ ᠮᠡᠳᠡᠷᠡᠵᠤ ᠡᠬᠢᠯᠡᠵᠤ ᠰᠠᠨ︕     ᠠᠪᠤ ᠨᠠᠳᠠ ᠬᠠᠶᠢᠷ᠎ᠠ ᠥᠬᠡᠢ ᠶᠤᠮ ᠬᠡᠳ ᠪᠢ ᠨᠤᠮ ᠰᠤᠷᠴᠤ ᠬᠤᠯᠠ ᠶᠠᠪᠤᠨ᠎ᠠ ᠬᠡᠵᠤ ᠬᠠᠷ᠎ᠠ ᠪᠠᠭ᠎ᠠ ᠠᠴᠠ  ᠵᠤᠷᠢᠭ ᠰᠢᠭᠤᠳᠤᠬᠰᠠᠨ ᠨᠢᠬᠡᠨ ᠪᠢᠯᠡ᠃ 15 ᠨᠠᠰᠤᠳᠠᠢ ᠲᠤᠮᠳᠠ ᠵᠡᠷᠭᠡ ᠶᠢᠨ ᠲᠤᠰᠬᠠᠢ ᠮᠡᠷᠬᠡᠵᠢᠯ ᠤᠨ ᠰᠤᠷᠭᠠᠭᠤᠯᠢ ᠳᠤ ᠡᠯᠰᠡᠭᠳᠡᠵᠤ᠂ ᠠᠪᠤ ᠨᠠᠳᠠ ᠶᠢ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠬᠡᠵᠡᠢ᠃ ᠡᠵᠢ ᠬᠦᠷᠬᠡᠬᠦ ᠶᠢ ᠬᠦᠰᠡᠵᠤ ᠪᠠᠶᠢᠬᠰᠠᠨ ᠴᠤ ᠡᠵᠢ ᠮᠢᠨᠢ ᠪᠠᠯᠠᠷ ᠤᠨ ᠬᠤᠳᠤᠭᠤᠷ ᠠᠴᠠ ᠪᠠᠨ ᠵᠠᠶᠢᠳᠠᠵᠤ ᠦᠵᠡᠭᠡ ᠥᠬᠡᠢ ᠬᠦᠮᠦᠨ᠃ ᠠᠪᠤ ᠪᠤᠯ ᠬᠤᠯᠠ ᠶᠠᠪᠤᠵᠤ ᠨᠢᠳᠤ ᠲᠠᠶᠢᠯᠤᠬᠰᠠᠨ ᠨᠢᠬᠡᠨ᠃ ᠬᠡᠳᠤᠶᠢᠪᠠᠷ ᠲᠠᠪᠤᠨ ᠵᠠᠭᠤᠨ ᠺᠢᠯᠤᠮᠧᠲ᠋ᠧᠷ ᠤᠨ ᠬᠤᠯᠠ ᠴᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠵᠠᠮ ᠨᠡᠪᠳᠡᠷᠯᠡᠭᠡ ᠬᠤᠴᠤᠷᠠᠩᠭᠤᠢ ᠪᠤᠯᠬᠤᠷ ᠬᠤᠶᠠᠷ ᠡᠳᠤᠷ ᠬᠠᠭᠠᠰ ᠡᠬᠡᠯᠵᠢ ᠶᠢᠨ ᠮᠠᠰᠢᠨ ᠳᠤ ᠰᠠᠭᠤᠵᠤ ᠨᠠᠷ᠎ᠠ ᠮᠡᠳᠡᠬᠦᠯᠥᠬᠡᠳ᠂ ᠡᠷᠬᠢᠵᠤ ᠠᠪᠤ ᠪᠠᠨ ᠮᠠᠰᠢᠨ ᠲᠡᠷᠬᠡᠨ ᠤ ᠥᠷᠳᠡᠬᠡᠨ ᠳᠤ ᠬᠥᠷᠬᠡᠪᠡ᠃ ᠰᠠᠯᠬᠤ ᠶᠢᠨ ᠦᠶ᠎ᠡ‌ᠨᠠᠳᠠ ᠳᠤ ᠬᠥᠮᠥᠨ ᠤ ᠭᠠᠵᠠᠷ ᠶᠠᠭᠤ  ᠬᠢᠴᠢᠶᠡᠬᠦ ᠬᠡᠬᠦ ᠮᠡᠳᠤ ᠤᠯᠠᠨ ᠶᠠᠭᠤᠮ᠎ᠠ ᠶᠠᠷᠢᠬᠰᠠᠨ᠃ ᠬᠠᠶᠢᠷ᠎ᠠ ᠦᠬᠡᠢ ᠪᠠᠶᠢᠭᠠᠳ ᠶᠠᠭᠤᠨᠢ ᠬᠠᠭᠤᠷᠮᠠᠬᠯᠠᠬᠤ ᠶᠤᠮ ᠪᠤᠢ ᠬᠡᠵᠤ ᠬᠦᠰᠢᠬᠦᠨ ᠪᠤᠳᠤᠯ ᠡᠪᠤᠷᠯᠠᠵᠤ ᠲᠤᠷᠰᠢᠵᠤ ᠦᠵᠡᠬᠦ ᠰᠠᠨᠠᠭ᠎ᠠ ᠲᠠᠢ ᠪᠤᠴᠠᠬᠤ ᠳᠤ ᠪᠠᠨ ᠭᠠᠭᠴᠠ ᠵᠡᠬᠡᠯᠢ ᠤᠷᠢᠶᠠᠨ ᠬᠦᠶᠦᠵᠤ ᠲᠠᠯᠳᠠ ᠠᠴᠠ ᠦᠷᠳᠡᠬᠡᠨ ᠤ  ᠲᠡᠷᠬᠡ ᠬᠦᠯᠢᠶᠡᠬᠦ ᠲᠢᠩᠬᠢᠮ ᠢ ᠴᠠᠬᠳᠠᠪᠠᠯ ᠠᠪᠤ ᠬᠡᠨᠡᠭ ᠦᠬᠡᠶᠢᠬᠡᠨ ᠲᠠᠮᠡᠬᠢ ᠲᠠᠳᠠᠵᠤ ᠰᠠᠭᠤᠬᠤ ᠶᠤᠮ ᠪᠢᠯᠡ᠃ ᠦᠪᠡᠷ ᠤᠨ ᠨᠤᠳᠠᠯᠤᠯᠳᠠ ᠪᠠᠨ ᠪᠠᠳᠤᠯᠠᠭᠠᠳ ᠰᠠᠨᠠᠭ᠎ᠠ  ᠶᠡᠭᠡ ᠠᠮᠤᠷᠴᠤ ᠰᠤᠷᠭᠠᠭᠤᠯᠢ ᠶᠢᠨ ᠵᠦᠭ ᠬᠠᠷᠡᠶᠢᠯᠭᠠᠬᠰᠠᠨ ᠶᠤᠮ ᠡ᠃ ᠬᠠᠷᠢᠨ ᠠᠵᠢᠯ ᠳᠤ ᠤᠷᠤᠬᠰᠠᠨ ᠬᠤᠶᠢᠨ᠎ᠠ ᠲᠡᠷᠡ ᠤᠳᠠᠭᠠᠨ ᠤ ᠨᠢᠭᠤᠴᠡ ᠲᠤᠬᠯᠠᠭᠠᠮ ᠳᠤ ᠪᠢ ᠱᠦᠬᠦᠭᠳᠡᠭᠰᠡᠨ ᠢᠶᠠᠨ ᠮᠡᠳᠡᠵᠡᠢ᠃ ᠮᠢᠨᠦ ᠵᠢᠭᠠᠬᠠᠨ ᠮᠡᠭᠡ ᠬᠦᠷᠦᠬᠡᠰᠤ ᠪᠠᠨ ᠤᠷᠬᠠᠯᠠᠬᠤ ᠪᠠᠷ ᠴᠠᠬᠳᠠᠨ ᠬᠦᠯᠢᠶᠡᠭᠰᠡᠨ ᠠᠩᠴᠢᠨ ᠮᠡᠳᠤ ᠠᠪᠤ ᠶᠢᠨ ᠬᠢᠷᠠᠬᠠᠢ ᠨᠢᠳᠤᠨ   ᠠᠴᠠ ᠬᠤᠷᠤᠮ ᠴᠤ ᠪᠤᠯᠳᠠᠵᠤ ᠴᠢᠳᠠᠬᠰᠠᠨ ᠦᠬᠡᠢ ᠪᠠᠶᠢᠵᠠᠢ᠃     — — ᠡᠨᠡ ᠬᠥᠥ ᠴᠤ ᠵᠤᠷᠢᠭ ᠲᠠᠢ ᠶᠤᠮ ᠡ᠃ ᠬᠠᠷᠢᠨ ᠨᠠᠳᠠ ᠶᠢ ᠶᠠᠭᠠᠬᠢᠴᠢᠬᠠᠬᠤ ᠪᠤᠯᠪᠠ ᠤᠤ ᠬᠡᠵᠤ ᠰᠢᠯᠭᠠᠵᠤ ᠪᠠᠶᠢᠳᠠᠭ ᠨᠢᠬᠡᠨ ᠰᠢᠤ᠃ ᠥᠬᠡ ᠰᠢᠯᠥᠭ ᠴᠤ  ᠨᠠᠪᠳᠠᠷᠠᠯᠴᠡᠬᠦ ᠥᠬᠡᠢ ᠬᠠᠷᠢ ᠬᠤᠯᠠ ᠶᠢᠨ ᠬᠢᠳᠡᠳ‌ᠭᠠᠵᠠᠷ ᠨᠢᠯᠬ᠎ᠠ ᠪᠠᠭ᠎ᠠ ᠶᠠᠭᠤᠮ᠎ᠠ ᠶᠢ ᠬᠠᠶᠠᠴᠢᠬᠠᠭᠠᠳ ᠬᠡᠵᠤ ᠪᠤᠳᠤᠬᠤ ᠳᠤ ᠨᠢᠳᠤ ᠵᠠᠶᠢᠷᠠᠳᠤᠭᠠᠳ ᠨᠢᠯᠪᠤᠰᠤ  ᠪᠠᠨ ᠵᠠᠯᠬᠢᠨ ᠨᠤᠳᠤᠭ ᠪᠤᠴᠠᠬᠰᠠᠨ ᠶᠤᠮ ᠡ ᠬᠡᠵᠤ ᠠᠶᠢᠯ ᠤᠨ ᠠᠪᠠᠭ᠎ᠠ ᠳᠤ ᠶᠠᠷᠢᠬᠤ ᠶᠢ ᠰᠤᠨᠤᠰᠤᠬᠰᠠᠨ ᠪᠢᠯᠡ᠃ ᠬᠠᠶᠠ ᠰᠤᠬᠳᠤᠪᠠᠯ ᠤᠶᠠᠷᠠᠵᠤ ᠰᠠᠭᠤᠳᠠᠭ ᠪᠤᠯᠪᠠᠴᠤ ᠨᠢᠯᠪᠤᠰᠤ ᠦᠬᠡᠢ ᠪᠠᠷᠠᠭᠠᠨ ᠬᠠᠳᠠᠭᠤ ᠬᠠᠳᠠ ᠴᠢᠯᠠᠭᠤ ᠮᠡᠳᠤ ᠠᠪᠤ ᠶᠢᠨ ᠡᠨᠡ ᠦᠬᠡ ᠶᠢ ᠬᠡᠳᠤᠨ ᠵᠢᠯ ᠤᠨ ᠲᠠᠷᠠᠭ᠎ᠠ ᠤᠯᠵᠤ ᠰᠤᠨᠤᠰᠤᠭᠠᠳ ᠬᠠᠮᠠᠷ ᠪᠤᠷᠬᠢᠷᠡᠵᠤ ᠨᠢᠯᠪᠤᠰᠤ ᠬᠠᠰᠢᠯᠭ᠎ᠠ ᠰᠡᠳᠡᠯᠤᠭᠰᠡᠨ ᠦᠶᠡᠷ ᠰᠢᠭ ᠠᠰᠬᠠᠷᠠᠵᠤ ᠪᠢᠯᠡ᠃     ᠠᠪᠤ ᠨᠠᠳᠠ ᠬᠠᠶᠢᠷ᠎ᠠ ᠦᠬᠡᠢ ᠬᠡᠵᠤ ᠠᠳᠡᠬᠦᠷᠡᠵᠤ ᠶᠠᠪᠤᠬᠰᠠᠨ ᠪᠠᠭ᠎ᠠ ᠨᠠᠰᠤ ᠮᠢᠨᠢ ᠬᠦᠬᠡᠷᠦᠬᠦᠢ ᠯᠠ ᠪᠠᠶᠢᠵᠠᠢ᠃ ᠠᠪᠤ ᠪᠤᠯᠭᠠᠨ ᠤ ᠬᠠᠶᠢᠷ᠎ᠠ ᠪᠠᠨ ᠢᠯᠡᠷᠡᠬᠦᠯᠬᠦ ᠠᠷᠭ᠎ᠠ ᠨᠢ ᠠᠳᠠᠯᠢ ᠥᠬᠡᠢ ᠪᠦᠬᠡᠳ ᠬᠡᠤᠬᠡᠳ ᠪᠤᠯᠭᠠᠨ ᠳᠤ ᠪᠠᠰᠠ ᠴᠤ ᠢᠯᠭᠠᠭ᠎ᠠ ᠲᠠᠢ ᠪᠠᠶᠢᠵᠤ ᠪᠤᠯᠬᠤ ᠶᠢ ᠦᠪᠡᠷ ᠢᠶᠠᠨ ᠦᠬᠢᠨ ᠲᠠᠢ ᠪᠤᠯᠤᠭᠠᠳ ᠯᠡ ᠤᠶᠢᠯᠭᠠᠵᠤ ᠡᠬᠢᠯᠡᠭᠰᠡᠨ ᠶᠤᠮ ᠳ᠋ᠠ᠃     ᠬᠤᠶᠠᠷ     ᠠᠪᠤ ᠬᠡᠵᠤ ᠨᠤᠳᠤᠭ ᠤᠷᠤᠨ ᠳᠤ ᠪᠠᠨ ᠨᠠᠷᠡᠳᠠᠢ ᠪᠥᠬᠡᠴᠢᠨ᠂ ᠤᠯᠠᠨ ᠤ ᠲᠤᠮᠳᠠ ︽ᠣᠳᠤᠭ ᠤᠨ ᠬᠠᠷ᠎ᠠ︾᠂ ︽ᠬᠦᠬᠡ ᠮᠡᠯᠡᠬᠡᠢ︾  ᠂ ︽ᠬᠠᠷ᠎ᠠ ᠰᠠᠸᠠᠩ︾ ᠬᠡᠳ ᠯᠠ ᠪᠠᠷᠢᠯᠳᠤᠵᠤ ᠶᠠᠪᠤᠬᠤ ᠳᠤ ᠪᠠᠨ‌‍ᠴᠤᠯᠠ ᠮᠢᠨᠳᠠᠭ  ᠵᠶ᠋ᠡᠨ‌ᠤᠶᠢᠷ᠎ᠡ ᠵᠡᠷᠬᠡᠯᠳᠡᠭᠡ ᠬᠡᠳᠤᠨ ᠬᠤᠰᠢᠭᠤᠨ ᠳᠤ ᠪᠠᠨ ᠠᠯᠳᠠᠷᠰᠢᠭᠤᠯᠵᠤ ᠶᠠᠪᠤᠬᠰᠠᠨ ᠬᠥᠮᠥᠨ ᠶᠤᠮ᠃ ᠵᠢᠷᠠᠨ ᠬᠡᠳᠤᠨ ᠤᠨ ᠳᠤ ᠬᠤᠷᠢ ᠥᠩᠬᠡᠷᠡᠭᠰᠡᠨ ᠵᠠᠯᠠᠭᠤ᠂ ᠬᠠᠮᠳᠤ ᠶᠢᠨ ᠠᠳᠤᠭᠤᠨ ᠤᠳᠤᠷ ᠢᠶᠠᠷ ᠱᠠᠷᠯᠢᠭ ᠬᠥᠩᠱᠧ ᠶᠢᠨ  ᠥᠯᠵᠡᠶᠢᠴᠠᠶᠢᠳᠠᠮ᠂ ᠰᠢᠷᠳᠡᠭ ᠤᠨ ᠴᠠᠶᠢᠳᠠᠮ ᠳᠤ ᠪᠠᠶᠢᠬᠤ ᠳᠤ ᠪᠠᠨ ᠱᠠᠷᠯᠢᠭ ᠤᠨ ᠨᠠᠭᠠᠳᠤᠮ ᠳᠤ ᠣᠴᠢᠵᠤ ᠪᠥᠬᠡ ᠶᠢᠨ ᠳ᠋ᠤᠭᠠᠷ ᠲᠤ ᠤᠷᠤᠵᠤ᠂ ᠰᠡᠬᠦᠯᠡᠷ ᠨᠢ ᠰᠤᠪᠤᠷᠭ᠎ᠠ ᠶᠢᠨ ᠰᠥᠮ᠎ᠠ᠂ ᠱᠠᠷᠯᠢᠭ ᠤᠨ ᠰᠥᠮ᠎ᠠ ᠶᠢᠨ ᠴᠠᠮ ᠲᠡᠬᠡᠷ᠎ᠡ ᠤᠯᠠᠨ‌ᠤᠳᠠᠭ᠎ᠠ ᠬᠥᠷᠴᠤ ᠬᠤᠶᠠᠷ ᠤᠳᠠᠭ᠎ᠠ ᠲᠡᠷᠢᠬᠦᠨ ᠱᠠᠩ ᠠᠪᠴᠤ ᠥᠩᠬᠡᠷᠡᠪᠡ᠃ ᠤᠷᠳᠤᠰ ᠪᠦᠬᠡ ᠶᠢᠨ ᠲᠠᠷᠬᠠᠨ ᠠ᠊ · ᠷᠢᠨᠴᠢᠨ᠂ ᠪᠤᠬ᠎ᠠ ᠲᠠᠯᠠᠨᠳᠠᠢ ᠪᠤᠯᠤᠨ ᠪᠦᠬᠡᠴᠢᠨ ᠱᠠᠯᠵᠠ ᠲᠢᠨᠽᠢᠨ᠂ ᠥᠷᠯᠥᠬᠦᠳ ᠬᠡᠶᠢᠷᠡᠪ   ᠲᠠᠢ ᠰᠠᠶᠢᠨ ᠨᠥᠬᠦᠷᠯᠡᠵᠤ ᠨᠤᠳᠤᠭ ᠤᠨ ᠨᠠᠭᠠᠳᠤᠮ᠂ ᠤᠪᠤᠭ᠎ᠠ ᠨᠠᠶᠢᠷ ᠢᠶᠠᠷ ᠪᠥᠷ ᠬᠠᠷᠢᠯᠴᠠᠨ ᠤᠨᠠᠭᠠᠵᠤ ᠪᠠᠶᠢᠬᠰᠠᠨ ᠪᠥᠬᠡᠳ ᠤᠯᠠᠨ ᠤᠳᠠᠭ᠎ᠠ ᠪᠥᠬᠡ ᠶᠢᠨ ᠱᠠᠩ ᠠᠪᠴᠤ ᠪᠠᠶᠢᠬᠰᠠᠨ ᠲᠡᠤᠬᠡ ᠲᠠᠢ᠃ ᠪᠡᠶ᠎ᠡ ᠨᠢ ᠪᠤᠭᠤᠨᠢᠪᠳᠤᠷ ᠴᠤ ᠬᠦᠴᠦ ᠲᠤᠷᠪᠢᠳᠡᠢ᠂ ᠪᠥᠬᠡ ᠶᠢᠨ ᠮᠡᠭᠡ ᠮᠡᠷᠬᠡᠵᠢᠯ ᠠᠷᠪᠢᠨ ᠪᠠᠶᠢᠳᠠᠭ ᠠᠴᠠ ᠨᠡᠷᠡᠳᠡᠢ ᠪᠥᠬᠡ ᠪᠤᠯᠵᠤ ᠴᠢᠳᠠᠵᠠᠢ᠃ ᠲᠠᠰᠢᠯᠠᠭ᠎ᠠ᠂ ᠲᠤᠬᠳᠤᠷᠤᠯᠭ᠎ᠠ᠂ ᠮᠤᠰᠬᠢᠯᠠᠭ᠎ᠠ᠂ ᠡᠬᠦᠷᠤᠬᠡ ᠵᠡᠷᠬᠡ ᠮᠡᠭᠡ ᠮᠡᠷᠬᠡᠵᠢᠯ ᠢ ᠮᠠᠰᠢ ᠡᠪᠳᠡᠢ ᠤᠯᠠᠷᠢᠭᠤᠯᠤᠨ ᠬᠡᠷᠡᠭᠯᠡᠵᠤ ᠨᠡᠩ ᠴᠤ ᠤᠬᠰᠠᠷᠠᠭ᠎ᠠ ᠲᠤᠬᠳᠤᠷᠤᠯᠭ᠎ᠠ ᠶᠢ ᠵᠠᠯᠭᠠᠭ᠎ᠠ ᠪᠠᠷ ᠬᠢᠳᠡᠭ ᠪᠠᠶᠢᠵᠤ᠂ ᠬᠠᠷ᠎ᠠ ᠰᠠᠸᠠᠩ ᠤᠨ ᠠᠷᠪᠠᠨ ᠨᠢᠬᠡᠨ ᠲᠤᠬᠳᠤᠷᠤᠯᠭ᠎ᠠ ᠬᠡᠵᠤ ᠬᠡᠯᠡᠯᠴᠡᠳᠡᠭ ᠪᠠᠶᠢᠵᠠᠢ᠃     ᠲᠠᠯᠠᠨ ᠲᠤᠯᠤᠭᠠᠨ ᠤᠨ ᠳᠤ ᠨᠠᠩᠰᠤ ᠶᠢᠨ ᠨᠠᠭᠠᠳᠤᠮ ᠳᠤ ᠦᠪᠡᠷ ᠠᠴᠠ ᠨᠢ ᠨᠠᠢᠮᠠᠨ ᠨᠠᠰᠤ ᠲᠠᠬᠦᠦ ᠬᠤᠷᠢᠨ ᠲᠤᠯᠤᠭᠠᠳᠠᠢ ᠪᠤᠬ᠎ᠠ ᠲᠠᠯᠠᠨᠳᠠᠢ ᠠᠪᠠᠭ᠎ᠠ ᠳᠤ ᠤᠨᠠᠵᠤ ᠬᠤᠶᠠᠳᠤᠭᠠᠷ ᠠᠪᠤᠭᠠᠳ ᠢᠳᠡᠷ ᠨᠠᠰᠤ ᠪᠤᠯᠤᠬᠰᠠᠨ ᠤ ᠬᠠᠷᠠᠭ᠎ᠠ ᠪᠠᠷ ᠲᠠᠬᠢᠵᠤ ᠪᠠᠷᠢᠯᠳᠤᠬᠰᠠᠨ ᠥᠬᠡᠢ᠃     ᠠᠪᠤ ᠶᠢᠨ ᠶᠠᠷᠢᠶ᠎ᠠ ᠪᠠ ᠪᠦᠬᠡᠴᠢᠨ ᠠᠪᠠᠭ᠎ᠠ ᠨᠠᠷ ᠤᠨ ᠪᠦᠬᠡ ᠶᠢᠨ ᠲᠤᠬᠠᠢ ᠲᠤᠮᠤᠭ ᠰᠢᠭ᠋ ᠬᠠᠭᠤᠴᠢ ᠲᠤᠷᠠᠰᠤᠯ ᠢ ᠤᠯᠠᠨ ᠰᠤᠨᠤᠰᠤᠬᠰᠠᠨ ᠪᠤᠯᠪᠠᠴᠤ ᠲᠠᠩᠴᠤ ᠠᠩᠬᠠᠷᠤᠯ ᠳᠤ ᠪᠠᠨ ᠠᠪᠤᠬᠰᠠᠨ ᠦᠬᠡᠢ ᠶᠠᠪᠤᠬᠰᠠᠨ ᠠᠴᠠ ᠬᠤᠰᠢᠭᠤ ᠨᠤᠳᠤᠭ ᠤᠨ ᠪᠦᠬᠡ ᠶᠢᠨ ᠨᠡᠶᠢᠬᠡᠮᠯᠢᠭ ᠠᠴᠠ ᠤᠯᠠᠨ ᠤᠳᠠᠭ᠎ᠠ ᠥᠯᠢᠬᠡᠷ ᠲᠡᠤᠬᠡ ᠶᠢ ᠨᠢ ᠡᠮᠬᠢᠳᠬᠡᠬᠦ ᠬᠡᠵᠤ ᠢᠷᠡᠭᠰᠡᠨ ᠴᠤ ᠪᠤᠭᠤᠷᠤᠯᠴᠤᠤᠨ ᠮᠢᠨᠢ ᠪᠦᠷ ᠯᠠ ᠬᠠᠳᠠᠨ ᠬᠡᠷ ᠲᠤ ᠪᠠᠨ ᠪᠤᠴᠠᠵᠤ᠂ ᠪᠦᠳᠦᠯ ᠦᠬᠡᠢ ᠬᠦᠦ ᠨᠢ ᠲᠤᠬᠳᠠᠭᠠᠬᠰᠠᠨ ᠶᠠᠭᠤᠮ᠎ᠠ ᠦᠬᠡᠢ ᠬᠤᠴᠤᠷᠤᠭᠠᠳ ᠬᠠᠷᠠᠮᠰᠠᠯ ᠠᠴᠠ ᠦᠬᠡᠷ᠎ᠡ ᠥᠯᠡᠳᠡᠭᠰᠡᠨ ᠵᠤᠶᠢᠯ ᠦᠬᠡᠢ ᠪᠤᠯᠬᠤ ᠶᠢ ᠶᠠᠭᠠᠬᠢᠨ᠎ᠠ ᠪᠢᠯᠡ᠃     ᠭᠤᠷᠪᠠ     ᠠᠪᠤ ᠮᠥᠨ ᠴᠤ ᠨᠢᠬᠡᠨ ᠬᠠᠰᠢᠷ ᠠᠳᠤᠭᠤᠴᠢᠨ ᠪᠠᠶᠢᠵᠠᠢ᠃ ᠵᠠᠯᠠᠭᠤ ᠨᠠᠰᠤᠨ ᠳᠤ ᠪᠠᠨ ᠪᠠᠷᠢᠭᠠᠳᠠ ᠶᠢᠨ ᠲᠤᠰᠬᠠᠢ ᠠᠳᠣᠭᠤᠴᠢᠨ ᠪᠤᠯᠵᠤ ᠦᠳᠡᠯᠳᠠᠯ᠎ᠠ ᠠᠳᠤᠭᠤᠨ ᠠᠴᠠ ᠰᠠᠯᠤᠬᠰᠠᠨ ᠥᠬᠡᠢ᠃       ᠢᠳᠡ ᠵᠠᠯᠠᠭᠤ ᠶᠢᠨ ᠥᠶ᠎ᠡ ᠬᠥᠳᠡᠯᠮᠤᠷᠢ ᠪᠠᠷ ᠮᠠᠯᠠᠳ ᠬᠥᠩᠱᠧ ᠳᠤ  ᠪᠠᠭᠤᠬᠤ ᠳᠤ ᠮᠠᠯᠠᠳ ᠤᠨ ᠨᠢᠬᠡ ᠡᠪᠤᠬᠡᠨ ᠠᠳᠤᠭᠤᠴᠢᠨ‌‍ᠲ᠋ᠥ᠋ᠷᠥᠬᠦᠥ ᠵᠢᠯ ᠨᠢ ᠰᠤᠷᠭᠠᠵᠤ ᠠᠮᠵᠢᠬᠰᠠᠨ ᠥᠬᠡᠢ ᠵᠢᠷᠠᠨ ᠥᠨᠵᠢᠮᠡᠯ ᠲᠠᠭ᠎ᠠ ᠳᠤ ᠨᠢ ᠤᠨᠤᠵᠤ ᠡᠳ᠋ᠯᠡᠬᠦ ᠵᠠᠯᠠᠭᠤᠴᠤᠤᠨ ᠪᠠᠶᠢᠬᠤ ᠥᠬᠡᠢ ᠭᠠᠴᠢᠬᠳᠠᠵᠤ ᠪᠠᠶᠢᠬᠤ ᠲᠠᠢ ᠲᠠᠭᠠᠷᠠᠵᠤ᠂ ᠠᠪᠤ ᠬᠠᠭᠠᠰ ᠰᠠᠷ᠎ᠠ ᠪᠤᠯᠤᠬᠰᠠᠨ ᠥᠬᠡᠢ ᠵᠡᠷᠯᠢᠭᠰᠢᠭᠰᠡᠨ ᠵᠢᠷᠠᠨ ᠲᠠᠭ᠎ᠠ ᠶᠢ ᠨᠢ ᠨᠤᠮᠤᠬᠠᠷᠠᠭᠤᠯᠤᠭᠠᠳ ᠭᠠᠷᠬᠤ ᠳᠤ ᠡᠪᠤᠬᠡᠨ ᠠᠳᠣᠭᠤᠴᠢᠨ ᠭᠠᠶᠢᠬᠠᠨ ᠱᠠᠬᠰᠢᠷᠠᠵᠤ ᠪᠠᠶᠢᠬᠰᠠᠨ ᠬᠡᠳᠡᠭ ᠃     ᠠᠪᠤ ᠮᠤᠷᠢᠨ ᠳᠤ ᠤᠨᠴᠠᠭᠠᠢ ᠬᠤᠷᠤᠬᠠᠢ ᠲᠠᠢ᠃ ᠡᠳᠤᠷ ᠤᠨ ᠨᠠᠷᠠ ᠶᠢ ᠮᠤᠷᠢᠨ ᠨᠢᠷᠤᠭᠤᠨ ᠲᠡᠬᠡᠷ᠎ᠡ᠂ ᠤᠶᠠᠭ᠎ᠠ ᠱᠤᠩ ᠲᠡᠬᠡᠷ᠎ᠡ ᠠᠪᠴᠢᠬᠠᠨ᠎ᠠ᠃ ᠵᠢᠷᠤᠭ᠎ᠠ ᠮᠤᠷᠢ᠂ ᠬᠦᠶᠤᠯᠬᠡᠨ ᠮᠤᠷᠢ ᠬᠡᠳ ᠤᠶᠠᠵᠤ ᠶᠠᠩᠵᠤᠯᠠᠨ᠎ᠠ᠃ ᠠᠷᠠᠰᠤ ᠰᠢᠷᠢ᠂ ᠴᠢᠳᠤᠷ ᠲᠤᠱᠠᠭ᠎ᠠ᠂ ᠡᠮᠡᠬᠡᠯ ᠬᠠᠵᠠᠭᠠᠷ ᠬᠡᠳ ᠡᠳᠤᠷᠵᠢᠨ ᠠᠳᠤᠭᠤᠨ ᠤ ᠡᠳᠡᠯᠡᠯ ᠬᠡᠷᠡᠭᠰᠡᠯ ᠲᠠᠢ ᠨᠤᠴᠤᠯᠳᠤᠵᠤ ᠴᠠᠭ ᠢ ᠪᠠᠷᠠᠭᠠᠨ᠎ᠠ᠃ ᠬᠤᠶᠠᠷ ᠠᠬ᠎ᠠ ᠪᠤᠯᠤᠨ ᠲᠠᠬᠦᠥ ᠠᠳᠤᠭᠤ ᠮᠠᠯ ᠤᠨ ᠠᠷᠠᠴᠢᠯᠠᠭ᠎ᠠ ᠲᠤᠳᠤᠮᠳᠤᠯᠭ᠎ᠠ ᠳᠤ ᠬᠠᠪᠰᠤᠷᠤᠬᠴᠢ ᠪᠤᠯᠵᠤ ᠪᠢ ᠪᠤᠯ ᠡᠵᠢ ᠪᠤᠯᠤᠨ ᠬᠤᠶᠠᠷ ᠡᠬᠡᠴᠢ ᠲᠠᠢ ᠤᠨᠠᠭ᠎ᠠ ᠲᠤᠭᠤᠯ᠂ ᠪᠠᠭ᠎ᠠ ᠮᠠᠯ ᠲᠠᠢ ᠪᠤᠭᠤᠷᠤᠯᠳᠤᠵᠤ᠂ ᠬᠠᠮᠤᠭ ᠨᠤᠮᠤᠬᠠᠨ ᠮᠤᠷᠢ ᠤᠨᠤᠬᠤ ᠬᠤᠪᠢ ᠲᠠᠢ ᠯᠠ ᠴᠢᠳᠠᠯ ᠦᠬᠡᠢ ᠬᠦᠮᠦᠨ᠃ ᠬᠤᠶᠠᠷ ᠠᠬ᠎ᠠ ᠪᠤᠯᠤᠨ ᠲᠠᠬᠦᠦ   ᠶᠢᠨ ᠮᠤᠷᠢᠨ ᠮᠡᠷᠬᠡᠵᠢᠯ ᠦᠨᠳᠤᠷ᠃ ᠲᠠᠬᠦᠦ ᠪᠤᠯ ᠨᠡᠩ ᠴᠤ ᠬᠡᠯᠡᠬᠦ ᠭᠠᠵᠠᠷ ᠦᠬᠡᠢ᠂ ᠶᠤᠰᠤᠳᠠᠢ ᠯᠠ ᠠᠪᠤ ᠶᠢᠨ ᠭᠠᠷ ᠱᠠᠪᠢ ᠬᠡᠵᠤ ᠮᠡᠳᠡ᠃ ᠶᠡᠭᠡ ᠬᠦᠮᠦᠰ ᠤᠨ ᠨᠢᠳᠤᠨ ᠲᠠᠯᠳᠠ ᠴᠠᠶᠢᠳᠠᠮ ᠵᠠᠳᠠᠭᠠᠢ ᠳᠤ ᠴᠤᠬᠯᠠᠷᠠᠬᠰᠠᠨ ᠡᠯᠵᠢᠬᠡ ᠯᠠᠭᠤᠰᠠ ᠶᠢ ᠬᠤᠭᠤᠰᠤᠨ ᠭᠠᠷ ᠢᠶᠠᠷ ᠠᠯᠢ ᠡᠮᠨᠢᠭ ᠢ ᠨᠢ ᠠᠷᠭᠠᠯᠠᠵᠤ ᠮᠤᠨᠳᠠᠭ᠎ᠠ ᠲᠠᠯ ᠠᠴᠠ ᠨᠢ ᠵᠠᠭᠤᠷᠠᠵᠤ ᠮᠤᠷᠳᠠᠭᠠᠳ ᠪᠡᠯᠴᠢᠬᠡᠷ ᠤᠨ ᠦᠵᠦᠬᠦᠷ ᠲᠤᠪᠳᠤᠯᠭᠠᠵᠤ ᠬᠦᠯᠦᠷᠡᠬᠡᠵᠤ ᠢᠷᠡᠬᠡᠳ ᠬᠠᠶᠠᠴᠢᠬᠠᠳᠠᠭ ᠲᠦᠢᠳᠬᠡᠷ ᠰᠢᠤ᠃     ᠶᠡᠭᠡ ᠬᠠᠮᠳᠤ ᠲᠠᠷᠬᠠᠵᠤ᠂ ᠮᠠᠯ ᠰᠦᠷᠦᠭ ᠢ ᠡᠷᠤᠬᠡ ᠳᠤ  ᠪᠤᠴᠠᠭᠠᠬᠤ ᠳᠤ᠂ ᠮᠠᠨ ᠤ ᠬᠢᠨ ᠠᠳᠤᠭᠤ᠂ ᠦᠬᠡᠷ᠂ ᠬᠤᠨᠢ ᠢᠮᠠᠭ᠎ᠠ‌‍ᠲ᠋ᠠᠢ ᠨᠢᠬᠡ ᠯᠡ ᠲᠡᠬᠡᠷ᠎ᠡ  ᠴᠦᠬᠡᠪᠳᠤᠷ ᠪᠤᠯᠪᠠᠴᠤ‌‍ᠰᠦ᠋ᠷᠦᠭ ᠪᠦᠷᠢᠳᠦᠭᠰᠡᠨ‌ᠠᠶᠢᠯ ᠪᠤᠯᠵᠠᠢ᠃ ᠪᠢ ᠪᠤᠯ ᠠᠳᠤᠭᠤ ᠬᠥᠬᠡᠬᠡᠵᠤ᠂ ᠥᠬᠡᠷ ᠬᠠᠰᠢᠶᠠᠯᠠᠬᠤ ᠳᠤ ᠠᠶᠤᠮᠳᠠᠭᠠᠢ ᠬᠡᠭᠴᠢ ᠨᠢ  ᠬᠡᠴᠡᠬᠦᠦ᠃ ᠬᠡᠬᠦᠦ ᠦᠨᠢᠶ᠎ᠡ ᠪᠠᠷᠢᠵᠤ ᠲᠠᠭ᠎ᠠ  ᠲᠤᠭᠤᠯ ᠨᠤᠮᠤᠬᠠᠷᠠᠭᠤᠯᠬᠤ᠂ ᠲᠡᠯᠡᠯᠯᠡᠬᠦ᠂ ᠡᠮᠨᠡᠬᠦ ᠳᠤ ᠲᠡᠩᠳᠡ ᠬᠤᠷᠢᠵᠤ ᠬᠠᠰᠢᠶᠠᠯᠠᠬᠤ ᠬᠡᠷᠡᠭᠳᠡᠢ᠃ ᠡᠮᠨᠢᠭ ᠮᠠᠯ ᠣᠩᠬᠤᠯᠳᠠᠵᠤ ᠲᠤᠪᠳᠤᠯᠵᠤ ᠲᠤᠳᠠᠭᠠᠬᠤ ᠳᠤ ᠠᠪᠤ ᠨᠠᠳᠠ ᠪᠤᠯ ᠥᠬᠡ ᠲᠤᠤᠭᠠᠷᠬᠤ ᠪᠢᠰᠢ᠂ ᠠᠬ᠎ᠠ ᠨᠠᠷ ᠪᠤᠯᠤᠨ ᠲᠠᠬᠦᠥ ᠬᠢᠴᠢᠶᠡᠮᠵᠢ ᠠᠯᠳᠠᠵᠤ ᠲᠤᠳᠠᠭᠠᠯᠭᠠᠵᠤ ᠭᠠᠷᠬᠤ ᠳᠤ ᠵᠠᠩᠨᠠᠵᠤ ᠵᠢᠮᠡᠯᠡᠬᠦ ᠦᠬᠡᠢ ᠤᠳᠠᠭ᠎ᠠ ᠴᠦᠬᠡᠨ᠃ ᠲᠡᠬᠡᠯᠬᠦᠢ ᠶᠠᠭᠠᠬᠢᠬᠤᠪ᠂ ᠡᠷᠢᠯ ᠳᠤ ᠶᠠᠪᠤᠭᠠᠳ ᠬᠠᠭᠠᠰ ᠡᠳᠤᠷ᠂ ᠲᠤᠳᠠᠭᠠᠵᠤ ᠰᠢᠯᠢ ᠲᠠᠪᠠᠭᠠᠳ ᠲᠡᠬᠢᠵᠤ ᠬᠤᠮᠢᠵᠤ ᠢᠷᠡᠬᠦ ᠳᠤ ᠪᠠᠰᠠᠯᠠ ᠬᠠᠭᠠᠰ ᠡᠳᠤᠷ ᠤᠨ ᠴᠠᠭ ᠤᠷᠤᠨ᠎ᠠ᠃ ︽ᠰᠠᠶᠢᠨ ᠮᠠᠯᠴᠢᠨ ᠪᠤᠯᠬᠤ ᠠᠮᠠᠷᠬᠠᠨ ᠪᠢᠰᠢ ᠰᠢᠤ︕︾ ᠬᠡᠵᠤ ᠠᠪᠤ ᠪᠢᠳᠠᠨ ᠳᠤ ᠴᠠᠢ ᠤᠭᠤᠴᠢᠵᠤ ᠬᠦᠯᠦᠰᠤ ᠪᠠᠨ ᠠᠷᠴᠢᠬᠤ ᠶᠢᠨ ᠵᠠᠭᠤᠷ᠎ᠠ  ᠠᠳᠤᠭᠤᠨ ᠤ ᠵᠤᠭᠤᠭ ᠢᠶᠠᠨ ᠲᠡᠯᠬᠡᠳᠡᠭ᠃     ᠠᠪᠤ ᠶᠢ ᠲᠠᠭᠠᠵᠤ ᠨᠢᠬᠡ ᠤᠳᠠᠭ᠎ᠠ ᠰᠠᠭᠠᠬᠠᠯᠳᠠ ᠤᠨ ᠨᠠᠶᠢᠷ ᠲᠤ ᠣᠴᠢᠵᠠᠢ᠃ ᠪᠤᠴᠠᠬᠤ ᠳᠤ ᠠᠪᠤ ᠰᠤᠬᠳᠤᠵᠤ ᠵᠢᠷᠤᠭ᠎ᠠ ᠬᠠᠯᠳᠠᠷ ᠮᠤᠷᠢ ᠭᠠᠯᠵᠠᠭᠤ ᠨᠢ ᠬᠦᠳᠡᠯᠵᠤ᠂ ᠵᠡᠬᠦᠨ ᠪᠠᠷᠠᠭᠤᠨ ᠤᠷᠤᠢ ᠲᠠᠯᠠᠩ ᠦᠬᠡᠢ ᠭᠠᠯᠵᠠᠭᠤᠷᠠᠵᠤ ᠲᠤᠪᠳᠤᠯᠤᠭᠠᠳ ᠬᠡᠷ ᠤᠨ ᠵᠦᠭ ᠠᠬᠢᠵᠤ ᠦᠭᠬᠦ ᠦᠬᠡᠢ᠃ ᠠᠷᠭ᠎ᠠ ᠴᠦᠬᠦᠷᠦᠭᠰᠡᠨ ᠪᠢ ᠵᠤᠷᠢᠭ ᠪᠦᠳᠦᠬᠦᠷᠡᠵᠤ᠂ ᠠᠷᠢᠬᠢᠨ ᠦᠨᠦᠷ ᠦᠬᠡᠢ ᠨᠠᠳᠠ ᠪᠤᠯ ᠠᠶᠠᠳᠠᠢ ᠪᠠᠶᠢᠵᠤ ᠮᠡᠳᠡᠨ᠎ᠡ ᠬᠡᠳ ᠨᠤᠮᠤᠬᠠᠨ ᠮᠤᠷᠢ ᠪᠠᠨ ᠠᠪᠤ ᠳᠤ ᠬᠠᠶᠠᠵᠤ ᠭᠠᠯᠵᠠᠭᠤ ᠬᠠᠯᠳᠠᠷ ᠲᠡᠬᠡᠷ᠎ᠡ ᠮᠤᠷᠳᠠᠵᠠᠢ᠃ ᠬᠠᠷᠢᠨ ᠪᠤᠷᠳᠤᠭᠠᠨ ᠳᠤ ᠬᠦᠯᠦᠯᠵᠡᠭᠰᠡᠨ ᠵᠢᠷᠤᠭ᠎ᠠ ᠬᠠᠯᠳᠠᠷ ᠤᠨ ᠠᠮᠠ ᠢ ᠲᠠᠳᠠᠵᠤ ᠲᠡᠶᠢᠯᠬᠦ ᠦᠬᠡᠢ ᠵᠠᠮ  ᠲᠤᠵᠢᠨ ᠲᠤᠪᠳᠤᠯᠵᠤ ᠬᠡᠷ ᠤᠨ ᠪᠠᠷ᠎ᠠ ᠬᠠᠷᠠᠬᠤ ᠳᠤ ᠨᠠᠳᠡ ᠶᠢ ᠲᠠᠨᠢᠬᠰᠠᠨ ᠡᠵᠢ ᠤᠤᠯᠭ᠎ᠠ ᠠᠯᠳᠠᠨ ᠣᠨᠠᠨ ᠲᠣᠰᠤᠨ ᠤᠬᠳᠤᠵᠤ ᠠᠳᠠᠯᠢᠬᠠᠨ ᠨᠢᠳᠤ ᠨᠢ ᠪᠦᠯᠳᠦᠯᠵᠡᠨ ᠬᠦᠯᠦᠰᠤ ᠤᠰᠤᠨ ᠳᠤ ᠠᠪᠳᠠᠬᠰᠠᠨ ᠮᠤᠷᠢ ᠬᠦᠮᠦᠨ ᠲᠠᠢ ᠨᠢ ᠤᠶ᠋ᠭᠠᠨ ᠲᠡᠬᠡᠷ᠎ᠡ ᠲᠤᠬᠳᠠᠭᠠᠵᠤ ᠠᠪᠴᠠᠢ᠃ ᠤᠬᠢᠯᠠᠨ ᠬᠠᠶᠢᠯᠠᠨ ᠵᠠᠩᠨᠠᠬᠰᠠᠨ ᠡᠵᠢ ᠶᠢᠨ ᠡᠮᠤᠨ᠎ᠡ ᠠᠴᠠ ᠠᠪᠤ ᠶᠠᠭᠤ ᠴᠤ ᠲᠤᠤᠭᠠᠷᠤᠬᠰᠠᠨ ᠥᠬᠡᠢ ᠤᠨᠳᠠᠴᠢᠬᠠᠪᠠ᠃ ᠮᠠᠷᠭᠠᠰᠢ ᠨᠢ ᠠᠪᠤ᠄         ︽ᠠᠷᠢᠬᠢᠨ ᠬᠠᠯᠠᠭᠤᠨ ᠢᠶᠠᠷ ᠬᠦᠦ ᠪᠠᠨ ᠠᠷᠡᠢ ᠬᠡᠮᠳᠤᠬᠡᠭᠰᠡᠨ ᠥᠬᠡᠢ ᠨᠢ ᠪᠤᠷᠬᠠᠨ ᠤ ᠠᠪᠤᠷᠠᠯ ᠪᠤᠯᠵᠠᠢ᠃ ᠡᠨᠡ ᠬᠦᠦ ᠴᠤ ᠰᠠᠶᠢᠨ ᠮᠠᠯᠴᠢᠨ ᠪᠤᠯᠬᠤ  ᠭᠤᠷᠢ ᠦᠬᠡᠢ ᠶᠤᠮ ᠪᠠᠶᠢᠨ᠎ᠠ᠃ ᠶᠠᠭᠠᠬᠢᠯ᠎ᠠ ᠴᠤ ᠬᠡᠰᠡᠨ ᠬᠦᠦ ᠮᠢᠨᠢ ᠪᠠᠰᠠ ᠡᠷ᠎ᠡ ᠬᠦᠮᠦᠨ ᠤ ᠬᠡᠢ ᠮᠤᠷᠢ ᠲᠠᠢ ᠶᠤᠮ ᠡ︾ ᠬᠡᠵᠤ ᠲᠠᠮᠠᠬᠢ ᠪᠠᠭᠠᠬᠢᠭᠤᠯᠵᠤ ᠶᠠᠷᠢᠬᠤ ᠶᠤᠮ ᠪᠢᠯᠡ᠃ ᠲᠡᠬᠦᠨ ᠠᠴᠠ ᠬᠤᠶᠢᠰᠢ ᠪᠢ ᠲᠡᠬᠢᠵᠤ ᠡᠮᠨᠢᠭ ᠤᠨ ᠨᠢᠷᠤᠭᠤᠨ ᠳᠤ ᠭᠠᠷᠤᠬᠰᠠᠨ ᠦᠬᠡᠢ᠃ ᠶᠠᠭᠠᠬᠢᠭᠠᠳ ᠠᠪᠤ ᠶᠢᠨ ᠢᠶᠠᠨ ᠵᠤᠷᠢᠭ ᠰᠦᠰᠦ ᠢ ᠵᠠᠯᠭᠠᠮᠵᠢᠯᠠᠵᠤ ᠴᠢᠳᠠᠬᠰᠠᠨ ᠦᠬᠡᠢ ᠶᠤᠮ ᠬᠡᠵᠤ ᠤᠳᠤ ᠴᠤ ᠭᠠᠶᠢᠬᠠᠨ ᠪᠠᠶ᠎ᠠ ᠪᠠᠨ ᠬᠠᠶᠠ ᠲᠤᠤᠷ᠎ᠠ ᠦᠵᠡᠳᠡᠭ ᠢᠶᠠᠨ ᠨᠢᠭᠤᠬᠤ ᠦᠬᠡᠢ᠃     ᠠᠪᠤ ᠨᠠᠳᠠ ᠶᠢ ᠪᠠᠭ᠎ᠠ ᠡᠬᠡᠴᠢ ᠲᠠᠢ ᠵᠢᠯ ᠲᠠᠷᠠᠭ᠎ᠠ ᠪᠠᠷ ᠲᠦᠷᠦᠭᠰᠡᠨ᠂ ᠰᠢᠮ᠎ᠡ ᠲᠡᠵᠢᠬᠡᠯ ᠪᠠᠭᠤᠷᠠᠢ᠂ ᠪᠠᠶ᠎ᠠ ᠲᠠᠮᠢᠷ ᠰᠤᠯᠠ᠂ ᠡᠪᠡᠳᠴᠢᠨ ᠠᠴᠠ ᠰᠠᠯᠳᠠᠭ ᠦᠬᠡᠢ ᠬᠡᠳ ᠬᠠᠮᠤᠭ ᠤᠨ ᠨᠤᠮᠤᠢ ᠬᠦᠦ ᠪᠠᠨ ᠠᠩᠬᠠᠨ ᠠᠴᠠ ᠪᠠᠨ‌‍ᠰᠤᠶᠤᠯ ᠤᠨ ᠮᠦᠷ ᠬᠦᠬᠡᠬᠡᠯᠬᠡᠬᠦ ᠵᠠᠮ ᠢ ᠨᠢ ᠵᠠᠰᠠᠴᠢᠬᠠᠬᠰᠠᠨ ᠪᠠᠶᠢᠵᠤ ᠤᠤ ᠳ᠋ᠠ︕     ᠲᠦᠷᠪᠡ     ᠠᠪᠤ ᠮᠢᠨᠢ ᠨᠠᠶᠢᠷᠴᠢᠨ ᠤᠷᠯᠢᠬᠴᠢᠨ ᠬᠦᠮᠦᠨ ᠪᠠᠶᠢᠬᠰᠠᠨ᠃ ᠮᠠᠨ ᠤ ᠬᠢᠨ ᠪᠤᠯ ᠯᠢᠭᠳᠡᠨ ᠬᠠᠭᠠᠨ ᠢᠶᠠᠨ ᠲᠠᠭᠠᠵᠤ ᠬᠦᠬᠡᠨᠡᠭᠤᠷ ᠤᠷᠤᠭᠠᠳ ᠰᠤᠳᠡᠢ ᠬᠠᠳᠤᠨ᠂ ᠡᠷᠬᠡ ᠬᠤᠩᠭᠤᠷ ᠲᠠᠢ ᠮᠠᠨᠵᠤ ᠶᠢᠨ ᠬᠠᠭᠠᠨ ᠳᠤ ᠪᠠᠭᠤᠵᠤ ᠦᠭᠬᠦ  ᠵᠠᠮ ᠳᠤ ᠲᠠᠯᠠᠳ ᠬᠤᠰᠢᠭᠤᠨ ᠳᠤ ᠦᠯᠡᠳᠡᠭᠰᠡᠨ ᠴᠠᠬᠠᠷ ᠤᠨ ᠬᠤᠶᠢᠴᠢᠰ ᠬᠡᠳᠡᠭ᠃ ᠰᠡᠬᠦᠯᠡᠷ ᠮᠠᠨ ᠤ ᠬᠢ ᠨᠢᠬᠡ ᠪᠦᠯᠦᠭ ᠨᠢ ᠤᠳᠤᠭ ᠬᠤᠰᠢᠭᠤᠨ ᠤ ᠴᠠᠭᠠᠨᠳᠤᠯᠤᠭᠠᠢ ᠨᠤᠳᠤᠭ ᠲᠤ ᠨᠡᠬᠦᠳᠡᠯᠯᠡᠵᠤ ᠢᠷᠡᠬᠡᠳ ᠰᠠᠭᠤᠷᠢᠰᠢᠵᠠᠢ᠃ ᠬᠠᠭᠠᠨ ᠢ ᠲᠠᠭᠠᠬᠰᠠᠨ ᠴᠠᠬᠠᠷ  ᠤᠳ ᠠᠯᠢᠪᠠ ᠠᠵᠢᠯ ᠳᠤ ᠤᠷᠠᠨ ᠠᠪᠢᠶᠠᠰᠤᠯᠢᠭ ᠪᠠᠶᠢᠳᠠᠭ ᠬᠡᠬᠦ ᠳᠤ ᠮᠠᠨ ᠤ ᠨᠢᠬᠡ ᠠᠶᠢᠯ ᠤᠨ ᠬᠢᠨ ᠨᠠᠶᠢᠷ ᠬᠦᠭᠵᠢᠮ ᠢᠶᠠᠨ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠨᠢ ᠤᠨᠴᠠᠭᠠᠢ ᠪᠠᠶᠢᠷᠢ ᠶᠢᠨ ᠰᠢᠨᠵᠢ ᠲᠠᠢ᠃ ᠲᠡᠬᠡᠷ᠎ᠡ ᠬᠡᠳᠤᠨ ᠦᠶ᠎ᠡ ᠶᠢᠨ ᠬᠢᠨ ᠬᠦᠭᠵᠢᠮ ᠨᠠᠶᠢᠷ ᠴᠢᠳᠠᠬᠤ ᠦᠬᠡᠢ ᠬᠦᠮᠦᠨ ᠲᠤᠩ ᠬᠤᠪᠤᠷ᠃ ᠲᠠᠯᠠᠳ ᠤᠨ ᠴᠠᠬᠠᠷ ᠬᠡᠭᠰᠡᠬᠡᠷ ᠰᠠᠶᠢᠬᠢ ᠨᠠᠶᠢᠷᠴᠢ ᠲᠠᠯᠠᠳ ᠤᠳ ᠶᠤᠮ ᠤᠤ ᠬᠡᠳ ᠲᠠᠶᠠᠭᠠᠷ ᠮᠡᠳᠡᠳᠡᠭ᠃ ᠠᠪᠤ ᠤᠯᠠᠨ ᠬᠦᠭᠵᠢᠮ ᠳᠤ ᠨᠡᠪᠳᠡᠷᠡᠭᠰᠡᠨ ᠪᠦᠬᠡᠳ ᠲᠥᠷᠪᠠᠨ ᠣᠳᠠᠰᠤᠳᠤ  ᠬᠤᠭᠤᠷ ᠤᠨᠴᠠᠭᠠᠢ ᠬᠤᠭᠤᠷᠳᠠᠳᠠᠭ ᠨᠠᠷᠠᠳᠠᠢ ᠨᠠᠶᠢᠷᠴᠢ‌‍ᠬᠥ᠋ᠮᠥᠨ᠃ ᠠᠪᠤ ᠶᠢᠨ ᠬᠤᠭᠤᠷ ᠤᠶᠠᠩᠭ᠎ᠠ ᠰᠠᠶᠢᠬᠠᠨ ᠤᠷᠠᠨ ᠨᠤᠭᠤᠯᠤᠭ᠎ᠠ ᠪᠠᠷ ᠢᠶᠠᠨ ᠤᠷᠤᠶᠢᠯᠠᠵᠤ ᠬᠤᠯᠠ ᠣᠶᠢᠷ᠎ᠠ ᠳᠤ  ᠪᠠᠨ ᠠᠯᠳᠠᠷᠰᠢᠵᠠᠢ᠃ ᠵᠠᠯᠠᠭᠤ ᠶᠢᠨ ᠥᠶ᠎ᠡ  ᠬᠤᠰᠢᠭᠤ ᠨᠤᠳᠤᠭ ᠤᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠬᠰᠠᠨ‌ᠤᠷᠠᠨ ᠰᠠᠶᠢᠬᠠᠨ ᠤ ᠬᠥᠳᠡᠯᠬᠡᠬᠡᠨ ᠢᠶᠠᠷ ᠲᠤᠭᠤᠷᠢᠨ ᠲᠤᠬᠯᠠᠯᠳᠠ ᠬᠢᠵᠤ ᠪᠠᠶᠢᠬᠰᠠᠨ ᠪᠦᠬᠡᠳ ᠬᠤᠷᠢᠮ ᠨᠠᠶᠢᠷ ᠪᠠᠶᠢᠪᠠᠯ ᠤᠷᠢᠯᠭ᠎ᠠ ᠵᠠᠯᠠᠯᠭ᠎ᠠ ᠲᠠᠢ ᠤᠴᠢᠵᠤ ᠨᠠᠶᠢᠷ ᠪᠠᠷᠢᠳᠠᠭ ᠠᠵᠠᠢ᠃ ᠡᠬᠡᠴᠢ ᠲᠡᠬᠦᠦ ᠬᠡᠳᠦᠬᠦᠯᠡ ᠪᠠᠨ ᠬᠤᠭᠤᠷ ᠱᠠᠨᠵᠠ᠂ ᠶᠠᠩᠴᠢᠨ ᠳᠠᠴᠢᠩ ᠬᠡᠳ  ᠨᠠᠶᠢᠷ ᠬᠦᠭᠵᠢᠮ ᠴᠢᠳᠠᠳᠠᠭ ᠨᠢ ᠪᠦᠷ ᠠᠪᠤ ᠶᠢᠨ ᠨᠦᠯᠦᠬᠡ ᠪᠢᠯᠡ᠃     ᠲᠠᠪᠤ     ᠠᠪᠤ ᠮᠢᠨᠢ ᠲᠤᠩ ᠤᠯᠠᠨ ᠨᠡᠷ᠎ᠡ ᠦᠬᠡᠢ ᠲᠤᠰᠢᠶᠠᠯ ᠲᠠᠢ ᠬᠦᠮᠦᠨ ᠶᠤᠮ᠃ ᠵᠢᠷᠠ ᠲᠠᠯᠠᠭᠠᠳ ᠤᠨ ᠬᠡᠵᠤ  ᠲᠦᠷᠦ ᠵᠠᠰᠠᠭ ᠨᠢ ᠤᠷᠤᠭ᠎ᠠ ᠪᠤᠰᠤᠭ᠎ᠠ᠂ ᠬᠦᠮᠦᠨ ᠲᠦᠮᠡᠨ ᠤ ᠠᠳᠠᠯ ᠠᠮᠢᠳᠤᠷᠠᠯ ᠤᠯᠠᠩᠬᠢ ᠨᠢ ᠶᠠᠳᠠᠷ ᠲᠤᠷᠤᠢ ᠪᠠᠶᠢᠵᠠᠢ᠃ ᠬᠡᠯᠡᠬᠦ ᠳᠤ ᠰᠠᠶᠢᠨ ᠲᠤᠷ᠎ᠠ ᠶᠢᠨ ᠤᠷᠤᠭ ᠬᠡᠬᠦ ᠪᠤᠯᠪᠠᠴᠤ ᠬᠠᠭᠤᠴᠢᠨ ᠤ ᠤᠯᠠᠮᠵᠢᠯᠠᠯ᠂ ᠭᠠᠵᠠᠷ ᠨᠤᠳᠤᠭ ᠤᠨ ᠵᠠᠩᠰᠢᠯ ᠢᠶᠠᠷ ᠵᠠᠭᠤᠴᠢ ᠦᠬᠡᠢ ᠤᠷᠤᠭ ᠨᠢ ᠴᠦᠬᠡᠨ ᠪᠠᠶᠢᠵᠠᠢ᠃ ᠠᠪᠤ ᠬᠡᠯᠡ ᠠᠮᠠᠨ ᠳᠤ ᠪᠠᠨ ᠬᠤᠷᠴᠠ᠂ ᠬᠤᠯᠠ ᠤᠶᠢᠷ᠎ᠡ ᠶᠢᠨ ᠵᠠᠩ ᠵᠠᠩᠰᠢᠯ ᠂ ᠬᠦᠮᠦᠨ ᠵᠤᠨ ᠢ ᠲᠠᠨᠢᠬᠤ ᠪᠠᠷ ᠰᠠᠶᠢᠨ ᠪᠤᠯᠬᠤᠷ  ᠵᠠᠭᠤᠴᠢ ᠶᠢᠨ ᠠᠯᠪᠠ ᠪᠠᠷ ᠶᠠᠪᠤᠬᠤ ᠨᠢ ᠤᠯᠠᠨ᠂ ᠮᠠᠨ ᠤ ᠡᠷᠬᠢᠨ ᠲᠤᠭᠤᠷᠢᠨ ᠪᠡᠷᠤᠭ ᠯᠠ ᠪᠦᠬᠦᠨ ᠢᠶᠠᠷ ᠢᠶᠠᠨ ᠠᠪᠤ ᠶᠢᠨ ᠲᠠᠨᠢᠯᠴᠠᠭᠤᠯᠭ᠎ᠠ ᠪᠠᠷ ᠠᠶᠢᠯ ᠬᠡᠷ ᠪᠤᠯᠤᠬᠰᠡᠨ ᠬᠡᠬᠦ ᠳᠤ ᠬᠡᠳᠤᠷᠡᠬᠦ ᠪᠠᠷ ᠦᠬᠡᠢ᠃ ᠲᠡᠬᠡᠬᠡᠳ ᠯᠡ ᠬᠤᠷ ᠶᠢᠨ ᠠᠮᠪᠠᠨ᠂ ᠲᠠᠮᠴᠢ᠂ ᠬᠤᠷᠢᠮ ᠤᠨ ᠡᠷᠬᠢᠯᠡᠭᠴᠢ ᠬᠡᠳ ᠨᠡᠷ᠎ᠡ ᠦᠬᠡᠢ ᠠᠯᠪᠠ ᠰᠤᠨᠵᠢᠷᠠᠭᠠᠳ ᠢᠷᠡᠨ᠎ᠡ᠃ ᠬᠤᠷᠢᠮ ᠨᠠᠶᠢᠷ ᠳᠤ ᠬᠤᠷᠬᠢᠶᠠᠨ ᠴᠤᠤᠬᠢᠶᠠᠨ ᠪᠠᠶᠢᠭᠠᠳ ᠪᠠᠶᠢᠳᠠᠭ᠃ ᠬᠡᠳᠤᠷᠡᠪᠡᠯ ᠵᠤᠳᠤᠭᠠᠨ ᠨᠦᠳᠦᠬᠡᠨ ᠪᠤᠯᠴᠢᠬᠠᠬᠤ ᠴᠤ ᠤᠶᠢᠷᠬᠠᠨ᠃ ᠰᠠᠭᠠᠳᠠᠭ ᠤᠨ ᠬᠦᠮᠦᠨ᠂ ᠲᠡᠮᠴᠢ᠂ ᠡᠷᠬᠢᠯᠡᠭᠴᠢ ᠬᠡᠵᠤ ᠬᠤᠷᠢᠮ ᠨᠠᠶᠢᠷ ᠢ ᠥᠩᠬᠡ ᠲᠠᠢ ᠦᠬᠡᠳᠡ ᠲᠠᠢ ᠠᠪᠴᠤ ᠭᠠᠷᠳᠠᠭ ᠭᠤᠤᠯ ᠬᠦᠮᠦᠰ ᠮᠦᠨ᠃ ᠠᠪᠤ ᠥᠬᠡ ᠬᠡᠯᠡᠨ ᠤ ᠤᠷᠠᠨ ᠢᠶᠠᠷ ᠶᠤᠰᠤ ᠵᠠᠩᠰᠢᠯ᠂ ᠵᠡᠬᠦᠬᠡ ᠵᠡᠬᠦᠯᠡᠪᠤᠷᠢ ᠶᠢᠨ ᠮᠠᠷᠭᠤᠭᠠᠨ ᠢ ᠨᠠᠮᠳᠠᠭᠠᠵᠤ᠂ ᠨᠠᠶᠢᠷᠴᠢ ᠶᠢᠨ ᠠᠪᠢᠶᠠᠰ ᠢᠶᠠᠷ ᠨᠠᠶᠢᠷ ᠬᠦᠷ ᠤᠨ ᠨᠠᠮᠪᠠ ᠬᠦᠭ ᠢ ᠵᠤᠬᠢᠴᠠᠭᠤᠯᠵᠤ᠂ ᠪᠦᠬᠡᠴᠢᠨ ᠤ ᠵᠢᠪᠬᠤᠭ᠎ᠠ ᠰᠦᠷ ᠢᠶᠠᠷ ᠮᠠᠷᠭᠤᠭᠠᠨ ᠵᠢᠭᠤᠷᠭᠠᠨ ᠢ ᠲᠠᠷᠤᠵᠤ ᠴᠢᠳᠠᠳᠠᠭ ᠢᠶᠠᠷ ᠢᠶᠠᠨ ᠨᠤᠳᠤᠭ ᠤᠷᠤᠨ ᠳᠤ  ᠪᠠᠨ ᠬᠤᠪᠤᠷᠬᠠᠨ ᠤᠯᠳᠠᠬᠤ ᠴᠢᠳᠠᠪᠤᠷᠢᠳᠠᠨ ᠪᠠᠶᠢᠬᠰᠠᠨ ᠠᠵᠠᠢ᠃ ᠡᠵᠢ ᠶᠢᠨ ᠬᠡᠯᠡᠬᠦ ᠪᠠᠷ ᠭᠠᠭᠴᠠ ᠰᠠᠭᠠᠳᠠᠭ ᠤᠨ ᠡᠷᠭᠢᠯᠡᠭᠴᠢ ᠪᠠᠷ ᠵᠢᠷᠠᠨ ᠭᠤᠷᠪᠠ ᠤᠳᠠᠭ᠎ᠠ ᠶᠠᠪᠤᠬᠰᠠᠨ ᠭᠡᠳᠡᠭ᠃       ᠲᠠᠷᠡ ᠦᠶ᠎ᠡ ᠶᠢᠨ ᠠᠮᠢᠳᠤᠷᠠᠯ ᠬᠡᠵᠤ ᠨᠠᠶᠢᠳᠡᠮ ᠳᠤ ᠪᠠᠨ ᠬᠠᠳᠠᠭᠤ ᠪᠤᠷᠤᠬᠵᠢᠭᠤᠨ ᠪᠠᠶᠢᠵᠠᠢ᠃ ᠨᠢᠬᠡ ᠠᠶᠢᠯ ᠤᠨ ᠬᠢᠨ ᠪᠡᠷᠢ ᠰᠤᠷᠠᠬᠤ ᠳᠤ ᠬᠡᠤᠬᠡᠨ ᠲᠠᠯ᠎ᠠ  ᠶᠢᠨ ᠬᠢᠨ ᠬᠤᠷᠠᠭᠠᠨ ᠠᠷᠠᠰᠤᠨ ᠲᠡᠪᠡᠯ ᠠᠮᠠᠯᠠᠵᠤ ᠪᠠᠶᠢᠬᠤ ᠦᠬᠡᠢ ᠪᠤᠯ ᠤᠷᠤᠭ ᠪᠤᠴᠠᠬᠤ ᠬᠡᠰᠡᠨ ᠬᠡᠨ᠎ᠡ᠃ ᠲᠤᠬᠠᠢ ᠶᠢᠨ ᠴᠠᠭ ᠬᠤᠷᠠᠭᠠᠨ ᠠᠷᠠᠰᠤᠨ ᠲᠠᠪᠠᠯ ᠨᠢ ᠤᠳᠤᠬᠢ ᠭᠤᠶᠤ ᠬᠢᠴᠡ ᠲᠠᠢ ᠬᠡᠬᠡᠨᠴᠢᠷ ᠲᠡᠷᠬᠡ᠂ ᠰᠠᠷᠠᠭᠤᠯ ᠠᠭᠤᠵᠢᠮ ᠤᠷᠤᠨ ᠰᠠᠭᠤᠴᠠ ᠠᠴᠠ ᠴᠤ ᠠᠮᠠᠷᠬᠠᠨ‌ᠤᠯᠳᠠᠳᠠᠭ ᠦᠬᠡᠢ ᠬᠤᠪᠤᠷ ᠴᠤᠬᠠᠭ ᠶᠠᠭᠤᠮ᠎ᠠ ᠪᠠᠶᠢᠵᠤ  ᠠᠷᠭ᠎ᠠ ᠮᠤᠬᠤᠷᠳᠠᠬᠰᠠᠨ ᠠᠶᠢᠯ ᠤᠨ ᠬᠢᠨ ᠠᠪᠤ ᠶᠢ ᠰᠠᠭᠠᠳᠠᠭ ᠤᠨ ᠡᠷᠬᠢᠯᠡᠭᠴᠢ ᠪᠠᠷ ᠤᠷᠢᠬᠰᠡᠨ ᠪᠠᠶᠢᠨ᠎ᠠ᠃ ᠬᠡᠤᠬᠡᠨ ᠲᠠᠯ᠎ᠠ ᠳᠤ ᠤᠴᠢᠭᠠᠳ ᠲᠡᠬᠡᠵᠢ ᠪᠡᠯᠡᠭ ᠵᠡᠬᠦᠬᠡ ᠵᠡᠬᠦᠯᠡᠪᠤᠷᠢ ᠦᠭᠬᠦ ᠳᠤ ᠬᠤᠨᠢᠨ ᠠᠷᠠᠰᠤᠨ ᠲᠠᠪᠠᠯ ᠭᠠᠷᠴᠤ ᠢᠷᠡᠬᠦ ᠳᠤ ᠬᠤᠳᠠ ᠶᠢᠨ ᠲᠠᠯ᠎ᠠ ᠶᠢᠨ ᠬᠢᠨ ᠬᠡᠯᠡᠭᠰᠡᠨ ᠢᠶᠠᠨ ᠮᠡᠯᠵᠢᠯ᠎ᠡ᠂ ᠬᠡᠤᠬᠡᠨ ᠢᠶᠠᠨ ᠡᠶᠢᠮᠦ ᠠᠶᠢᠯ ᠳᠤ ᠦᠭᠬᠦ ᠦᠬᠡᠢ ᠬᠡᠵᠤ ᠪᠦᠬᠡᠮ ᠮᠠᠷᠭᠤᠭᠠᠨ ᠪᠤᠯᠤᠬᠰᠡᠨ ᠶᠤᠮ ᠪᠠᠶᠢᠨ᠎ᠠ᠃ ᠠᠪᠤ  ᠰᠢᠭᠤᠳ ᠯᠠ᠄    ︽ᠵᠠ ᠲᠠᠨᠤᠰ ᠬᠡᠯᠡᠴᠢᠬᠡ᠂ ᠬᠤᠨᠢ  ᠶᠡᠭᠡ ᠶᠤᠮ ᠤᠤ︖ ᠬᠤᠷᠠᠭ᠎ᠠ ᠶᠡᠭᠡ ᠶᠤᠮ ᠤᠤ︖︾ ᠬᠡᠪᠡᠯ ᠲᠠᠶᠠᠭᠠᠷ ᠬᠤᠨᠢ ᠨᠢ ᠶᠡᠭᠡ ᠬᠡᠵᠤ ᠬᠠᠷᠢᠭᠤᠯᠵᠠᠢ᠃ ᠠᠪᠤ᠄ ︽ᠲᠡᠬᠡᠪᠡᠯ ᠬᠤᠷᠠᠭᠠᠨ ᠠᠴᠠ ᠶᠡᠭᠡ ᠬᠤᠨᠢᠨ ᠠᠷᠠᠰᠤᠨ ᠲᠠᠪᠠᠯ ᠢ ᠨᠢ ᠠᠪᠴᠢᠷᠠᠭᠠᠳ ᠪᠠᠰᠠ ᠪᠤᠯᠳᠠᠭ ᠦᠬᠡᠢ ᠨᠢ ᠶᠠᠭᠤ ᠶᠤᠮ︖︾ ᠬᠡᠵᠤ ᠠᠰᠠᠭᠤᠪᠠᠯ ᠠᠪᠤ ᠶᠢ ᠮᠡᠳᠡᠳᠡᠭ ᠬᠤᠷᠢᠮ ᠤᠨ ᠡᠷᠬᠡᠯᠡᠭᠴᠢ ᠨᠢ᠄ ︽ᠵᠠ ᠂ ᠵᠠ ᠡᠨᠡ ᠴᠤ ᠪᠤᠯ ᠬᠦᠷᠦᠰᠦ ︵ᠠᠷᠠᠰᠤ︶ ᠦᠬᠡᠢ ᠡᠷ᠎ᠡ ᠪᠠᠶᠢᠨ᠎ᠠ᠃ ᠤᠳᠤ ᠬᠡᠯᠡᠯᠴᠡᠬᠦ ᠦᠬᠡᠢ᠂ ᠶᠤᠰᠤ ᠵᠠᠩᠰᠢᠯ ᠢᠶᠠᠨ ᠬᠦᠢᠴᠡᠭᠡ︕︾ ᠬᠡᠵᠤ ᠬᠡᠯᠡᠬᠡᠳ ᠬᠤᠶᠠᠷ ᠵᠠᠯᠠᠭᠤ ᠶᠢᠨ ᠬᠤᠷᠢᠮ ᠤᠨ ᠶᠤᠰᠤᠯᠠᠯ ᠰᠠᠭᠠᠳ ᠲᠦᠪᠡᠭ ᠦᠬᠡᠢ ᠪᠤᠯᠤᠯ᠎ᠠ ᠬᠡᠳᠡᠭ᠃ ᠡᠨᠡ ᠪᠤᠯ ᠶᠠᠷᠤ ᠶᠢᠨ ᠨᠢᠬᠡᠨ ᠵᠢᠱᠢᠶ᠎ᠡ ᠪᠤᠯᠤᠨ᠎ᠠ᠃ ᠪᠤᠭᠤᠷᠤᠯᠴᠤᠤᠨ  ᠤᠨ ᠬᠡᠯᠡᠬᠦ ᠪᠠᠷ ᠠᠪᠤ   ᠶᠢᠨ ᠰᠤᠨᠢᠨ ᠬᠠᠴᠢᠨ‌ᠦᠯᠢᠬᠡᠷ ᠬᠡᠯᠡᠬᠡᠳ ᠪᠠᠷᠠᠬᠤ ᠦᠬᠡᠢ  ᠠᠷᠪᠢᠨ ᠪᠠᠶᠢᠬᠰᠠᠨ ᠬᠡᠨ᠎ᠡ᠃       ᠵᠢᠷᠭᠤᠭ᠎ᠠ     ᠠᠪᠤ ᠮᠢᠨᠢ ᠮᠠᠯ ᠤᠨ ᠡᠮᠴᠢ ᠬᠦᠮᠦᠨ ᠪᠠᠶᠢᠬᠰᠠᠨ᠃ ᠵᠠᠯᠠᠭᠤ ᠳᠤ ᠪᠠᠨ ᠨᠤᠳᠤᠭ ᠤᠨ ᠨᠠᠷᠠᠳᠠᠢ ᠮᠠᠯ ᠤᠨ ᠡᠮᠴᠢ ᠶᠢ ᠲᠠᠭᠠᠵᠤ ᠰᠤᠷᠴᠤ᠂ ᠪᠠᠷᠢᠭᠠᠳᠠ᠂ ᠪᠠᠭ᠎ᠠ ᠪᠠᠷᠢᠭᠠᠳᠠ ᠶᠢᠨ ᠮᠠᠯ ᠤᠨ ᠡᠮᠴᠢ ᠶᠢᠨ ᠠᠵᠢᠯ ᠢ ᠲᠠᠯᠠᠭᠠᠳ ᠤᠨ ᠠᠴᠠ ᠮᠠᠩᠵᠠᠨ ᠲᠤᠭᠤᠭ᠎ᠠ ᠪᠠᠯᠪᠠᠷᠠᠳᠠᠯ᠎ᠠ ᠠᠷᠪᠠᠨ ᠬᠡᠳᠤᠨ ᠵᠢᠯ ᠬᠢᠵᠤ ᠶᠠᠪᠤᠪᠠ᠃         ᠮᠠᠯ ᠤᠨ ᠡᠮᠴᠢ ᠶᠢᠨ ᠠᠵᠢᠯ ᠪᠤᠯ ᠪᠠᠰᠠ ᠴᠤ ᠬᠠᠮᠤᠭ ᠤᠨ ᠬᠠᠳᠠᠭᠤ ᠰᠢᠷᠤᠬᠦᠨ ᠠᠵᠢᠯ ᠮᠦᠨ᠃ ᠵᠢᠯ ᠤᠨ ᠲᠦᠷᠪᠠᠨ ᠤᠯᠠᠷᠢᠯ ᠳᠤ ᠪᠤᠳᠠ ᠪᠤᠭ ᠮᠠᠯ ᠲᠠᠢ ᠨᠤᠴᠤᠯᠳᠤᠵᠤ ᠦᠩᠬᠡᠷᠬᠡᠨ᠎ᠡ᠃     ᠡᠪᠦᠭᠡ ᠶᠢᠨ ᠬᠢ ᠪᠠᠷᠢᠭᠠᠳᠠ ᠶᠢᠨ ᠬᠠᠮᠤᠭ ᠤᠯᠠᠨ ᠦᠬᠡᠷ ᠬᠠᠷᠠᠬᠰᠠᠨ ᠡᠷᠤᠬᠡ  ᠶᠤᠮ᠃ ᠰᠤᠷᠭᠠᠭᠤᠯᠢ ᠠᠴᠠ ᠥᠢᠷ᠎ᠠ ᠪᠤᠯᠬᠤᠷ ᠪᠠᠭ᠎ᠠ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠲᠠᠨᠳᠠ ᠠᠴᠠ ᠬᠦᠶᠦᠵᠤ ᠪᠢᠴᠢᠭ ᠰᠤᠷᠴᠤ ᠪᠠᠶᠢᠯ᠎ᠠ᠃ ᠨᠢᠬᠡ ᠤᠳᠠᠭ᠎ᠠ ᠠᠪᠤ ᠪᠠᠷᠢᠭᠠᠳᠠ ᠶᠢᠨ ᠬᠡᠳᠤᠨ ᠮᠠᠯ ᠤᠨ ᠡᠮᠴᠢ ᠲᠠᠢ ᠢᠷᠡᠵᠤ ᠦᠬᠡᠷ ᠤᠨ ᠰᠦᠷᠦᠭ ᠲᠤ ᠡᠮ ᠴᠢᠳᠬᠤᠪᠠ᠃ ᠤᠯᠠᠨ ᠦᠬᠡᠷ ᠢ ᠴᠠᠯᠮᠠᠳᠠᠵᠤ ᠡᠮ ᠴᠢᠳᠬᠤᠵᠤ ᠪᠠᠷᠠᠬᠤ ᠳᠤ ᠨᠢᠬᠡ ᠬᠠᠷ᠎ᠠ ᠪᠤᠬ᠎ᠠ ᠨᠢ ᠪᠠᠷᠢᠬᠳᠠᠬᠤ ᠦᠬᠡᠢ᠂ ᠰᠡᠬᠦᠯ ᠳᠤ ᠪᠦᠷᠢᠮᠤᠰᠤᠨ ᠤᠯᠠᠶᠢᠴᠢᠬᠠᠵᠤ ᠬᠠᠰᠢᠶᠠᠨ ᠤ ᠡᠬᠦᠳᠡ ᠰᠡᠳᠡᠯᠵᠤ ᠭᠠᠷᠪᠠ᠃ ᠬᠡᠳᠤᠬᠦᠯᠡ ᠮᠤᠷᠢ ᠤᠨᠤᠵᠤ ᠤᠷᠭ᠎ᠠ ᠰᠤᠨᠤᠯᠵᠠᠭᠤᠯᠤᠨ ᠬᠦᠬᠡᠬᠡᠵᠤ ᠰᠤᠶᠢᠳ ᠪᠤᠯᠪᠠ᠃ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠨᠠᠯᠢᠶᠠᠳ ᠵᠠᠶᠢᠳᠠᠢ ᠲᠤᠬᠯᠠᠵᠤ ᠪᠠᠶᠢᠬᠰᠠᠨ ᠪᠤᠯᠪᠠᠴᠤ ᠮᠤᠷᠢ ᠲᠠᠢ ᠬᠦᠮᠦᠨ ᠤ ᠦᠬᠡᠳᠡ ᠨᠢᠳᠤ ᠨᠢ ᠤᠯᠠᠶᠢᠨ ᠬᠡᠷᠤᠵᠤ ᠰᠡᠯᠡᠯᠵᠡᠭᠰᠡᠨ ᠬᠠᠷ᠎ᠠ ᠪᠤᠬ᠎ᠠ ᠶᠢ ᠦᠵᠡᠬᠡᠳ ᠰᠢᠪᠠᠭ ᠬᠠᠷᠭᠠᠨ᠎ᠠ ᠶᠢᠨ ᠴᠠᠭᠠᠳᠠᠢ ᠨᠢᠭᠤᠵᠤ  ᠬᠦᠳᠡᠯᠵᠤ ᠴᠤ ᠴᠢᠳᠠᠬᠤ ᠦᠬᠡᠢ ᠠᠶᠤᠨ ᠲᠠᠬᠵᠢᠵᠤ ᠪᠠᠶᠢᠯ᠎ᠠ᠃ ᠤᠯᠠᠶᠢᠬᠰᠠᠨ ᠦᠬᠡᠷ ᠬᠡᠪᠡᠯ ᠠᠶᠤᠮᠰᠢᠬᠳᠠᠢ ᠭᠠᠯᠵᠠᠭᠤ ᠪᠤᠯᠴᠢᠬᠠᠳᠠᠭ ᠢ ᠰᠤᠨᠤᠰᠤᠬᠰᠠᠨ ᠠᠴᠠ ᠦᠵᠡᠭᠰᠡᠨ ᠨᠢ ᠴᠦᠬᠡᠨ ᠪᠤᠯᠬᠤᠷ ᠰᠦᠷᠳᠡᠵᠤ  ᠠᠶᠤᠬᠤ ᠶᠢ ᠬᠡᠯᠡᠬᠦ ᠶᠠᠭᠤᠨ ᠪᠤᠢ᠃ ᠡᠪᠦᠭᠡ᠄ ︽ᠭᠠᠭᠴᠠ ᠪᠤᠬ᠎ᠠ ᠳᠤ ᠲᠤᠯᠤᠬᠰᠠᠨ ᠶᠤᠮ ᠴᠢᠨᠢ ᠡᠮᠨᠡᠬᠦ ᠦᠬᠡᠢ ᠪᠤᠯᠪᠠᠴᠤ ᠶᠠᠭᠠᠬᠢᠳᠠᠭ ᠶᠤᠮ᠂ ᠬᠡᠤᠬᠡᠳ ᠰᠢᠤᠬᠠᠳ ᠮᠦᠷᠬᠦᠴᠢᠬᠦ ᠶᠤᠮ ᠪᠠᠶᠢᠨ᠎ᠠ︾ ᠬᠡᠵᠤ ᠠᠪᠤ ᠶᠢ  ᠵᠠᠩᠨᠠᠪᠠᠴᠤ ᠠᠭᠤᠷ ᠲᠤ ᠪᠠᠨ ᠲᠡᠶᠢᠯᠳᠡᠭᠰᠡᠨ ᠠᠪᠤ ᠰᠤᠨᠤᠰᠳᠠᠭ ᠨᠢ ᠪᠢᠰᠢ᠃ ᠬᠤᠶᠠᠷ ᠡᠮᠴᠢ ᠤᠷᠭ᠎ᠠ ᠴᠠᠯᠮ᠎ᠠ ᠵᠡᠷᠬᠡ ᠤᠷᠤᠭᠤᠯᠵᠤ ᠬᠦᠵᠦᠬᠦᠦ ᠶᠢ ᠨᠢ ᠰᠢᠬᠠᠨ ᠴᠡᠴᠡᠷᠡᠬᠦᠯᠵᠤ᠂ ᠠᠪᠤ ᠬᠤᠶᠠᠷ ᠬᠦᠯ ᠶᠢ ᠨᠢ ᠵᠡᠷᠬᠡᠳᠡ ᠲᠡᠬᠡᠬᠡᠯᠡᠨ ᠤᠨᠠᠭᠠᠵᠤ ᠠᠳᠤᠷᠢᠳᠠᠯ᠎ᠠ ᠬᠦᠯᠢᠨ ᠴᠢᠳᠬᠤᠵᠤ ᠪᠠᠷᠠᠭᠠᠳ ᠰᠠᠨᠠᠭ᠎ᠠ ᠨᠢ ᠠᠮᠠᠷᠠᠳᠠᠭ ᠶᠤᠮ ᠪᠠᠶᠢᠨ᠎ᠠ᠃     ᠮᠠᠨ ᠤ ᠬᠡᠷ ᠴᠠᠭᠠᠨᠳᠤᠯᠤᠭᠠᠢ ᠤᠢ ᠶᠢᠨ ᠲᠠᠯᠠᠪᠠᠢ ᠠᠴᠠ ᠬᠡᠳᠤᠬᠡᠨ ᠭᠠᠵᠠᠷ ᠵᠠᠶᠢᠳᠠᠢ ᠪᠤᠯᠬᠤᠷ ᠤᠢ ᠶᠢᠨ ᠲᠠᠯᠠᠪᠠᠢ ᠶᠢᠨ ᠬᠠᠮᠳᠤ ᠪᠠ ᠬᠤᠪᠢ ᠡᠷᠤᠬᠡ ᠦᠬᠡᠢ ᠠᠪᠤ ᠶᠢ ᠲᠠᠭᠤᠳᠠᠵᠤ ᠦᠬᠡᠷ ᠭᠠᠭ᠋ᠠᠢ ᠡᠪᠳᠴᠢᠯᠡᠯ᠎ᠡ ᠬᠡᠳ ᠬᠡᠵᠢᠶᠡᠳᠡ ᠲᠠᠭᠤᠳᠠᠨ᠎ᠠ᠃ ᠠᠪᠤ ᠦᠨ᠎ᠡ ᠲᠦᠯᠦᠪᠤᠷᠢ ᠦᠬᠡᠢ ᠵᠡᠬᠦᠦ ᠬᠠᠳᠬᠤᠵᠤ  ᠂ ᠡᠮ ᠦᠭᠴᠤ  ᠡᠳᠡᠬᠡᠷᠡᠬᠦᠯᠬᠦ ᠳᠤ  ᠪᠠᠶᠠᠷᠯᠠᠬᠰᠠᠨ ᠬᠦᠮᠦᠰ  ᠠᠯᠢᠮ᠎ᠠ ᠵᠢᠮᠢᠰ ᠨᠤᠭᠤᠭ᠎ᠠ ᠨᠠᠪᠴᠢ ᠬᠦᠷᠬᠡᠵᠤ ᠲᠠᠯᠠᠷᠬᠠᠨ᠎ᠠ᠃ ᠠᠪᠤ ᠤᠢ ᠰᠢᠭᠤᠢ ᠶᠢᠨ ᠲᠠᠯᠠᠪᠠᠢ ᠳᠤ ᠮᠠᠯ ᠡᠮᠨᠡᠬᠦ ᠪᠠᠷ ᠶᠠᠪᠤᠬᠤ ᠪᠤᠯᠭᠠᠨ ᠮᠠᠨ ᠤ ᠬᠡᠷ ᠢᠶᠠᠷ ᠪᠦᠬᠡᠮ ᠪᠠᠶᠠᠷ ᠪᠤᠯᠳᠠᠭ᠃ ᠤᠴᠢᠷ ᠨᠢ ᠮᠠᠨ ᠤ ᠬᠢᠨ ᠲᠤᠬᠠᠢ ᠶᠢᠨ ᠦᠶ᠎ᠡ ᠨᠠᠪᠴᠢ ᠨᠤᠭᠤᠭ᠎ᠠ  ᠭᠤᠸᠠ ᠵᠢᠮᠢᠰ ᠲᠠᠷᠢᠬᠤ ᠶᠢ ᠮᠡᠳᠡᠬᠦ ᠦᠬᠡᠢ ᠲᠤᠯᠠ ᠢᠳᠡᠬᠦ ᠲᠤᠬᠢᠶᠠᠯ ᠴᠤ ᠲᠤᠩ ᠴᠦᠬᠡᠨ ᠶᠤᠮ᠃ ᠡᠵᠢ ᠯᠡ ᠭᠠᠭᠴᠠᠭᠠᠷ ᠴᠢᠷᠡᠢ ᠮᠠᠭᠤᠳᠠᠢ ᠪᠠᠶᠢᠵᠤ ᠰᠠᠶᠢᠬᠢ ᠭᠠᠰᠢᠭᠤᠨ ᠬᠠᠷ᠎ᠠ ᠠᠷᠢᠬᠢ ᠪᠠᠷ  ᠢᠶᠠᠨ ᠲᠠᠶᠢᠯᠠᠭᠠᠳ ᠪᠠᠶᠢᠬᠤ ᠳᠤ ᠨᠢ ᠲᠤᠷ᠎ᠠ ᠦᠬᠡᠶᠢᠴᠡᠳᠡᠭ᠃     ᠲᠤᠯᠤᠭ᠎ᠠ     ᠠᠪᠤ ᠮᠢᠨᠢ ᠶᠤᠰᠤᠳᠠᠢ ᠯᠠ ᠠᠷᠢᠬᠢᠴᠢᠨ ᠬᠦᠮᠦᠨ ᠪᠠᠶᠢᠬᠰᠠᠨ᠃ ᠲᠠᠪᠢᠨ ᠨᠠᠢᠮᠠᠬᠠᠨ ᠨᠠᠰᠤᠳᠠᠢ ᠦᠨᠡᠨ ᠤ ᠬᠤᠷᠸ᠎ᠠ ᠳᠤ ᠶᠠᠪᠤᠬᠰᠠᠨ ᠨᠢ ᠠᠷᠢᠬᠢᠨ ᠠᠴᠠ ᠯᠡ ᠪᠤᠯᠤᠯ᠎ᠠ ᠬᠡᠵᠤ ᠪᠢ ᠪᠤᠳᠤᠳᠠᠭ᠃ ᠡᠯᠢᠬᠡᠨ ᠬᠠᠳᠠᠭᠤᠷᠠᠯ ᠳᠤ ᠲᠠᠮᠤᠯᠠᠬᠳᠠᠨ ᠰᠢᠳᠤ ᠵᠠᠭᠤᠨ ᠬᠡᠤᠬᠡᠳ ᠢᠶᠠᠨ ᠵᠤᠪᠠᠭᠠᠬᠤ ᠦᠬᠡᠢ ᠬᠡᠵᠤ ᠦᠪᠡᠷ ᠢᠶᠠᠨ ᠡᠷᠬᠢᠵᠤ ᠤᠷᠪᠠᠵᠤ ᠡᠪᠡᠷᠰᠢᠶᠡᠯ ᠡᠪᠡᠳᠬᠡᠯ ᠢᠶᠠᠨ ᠨᠠᠮᠳᠠᠭᠠᠵᠤ ᠪᠠᠶᠢᠬᠰᠠᠨ ᠰᠡᠬᠦᠯᠴᠢ ᠶᠢᠨ ᠬᠡᠳᠤᠨ ᠬᠤᠨᠤᠭ ᠤᠳ ᠨᠢᠳᠤᠨ ᠳᠤ ᠬᠡᠵᠢᠶᠡᠳᠡ ᠦᠵᠡᠭᠳᠡᠬᠡᠳ ᠪᠠᠶᠢᠳᠠᠭ᠃ ᠲᠡᠷᠡ ᠡᠳᠤᠷ ᠪᠢᠳᠠ ᠬᠡᠳᠤ ᠨᠢ ᠠᠪᠤ ᠶᠢᠨ ᠵᠤᠯᠭᠠᠬᠤ ᠬᠡᠰᠡᠨ ᠯᠠᠮᠠ ᠪᠠᠭᠰᠢ ᠶᠢ ᠵᠠᠯᠠᠵᠤ ᠢᠷᠡᠬᠦ ᠳᠤ ᠠᠪᠤ ᠨᠢᠬᠡᠨᠳᠡ ᠮᠦᠩᠬᠡ ᠪᠤᠰᠤ ᠶᠢ ᠦᠵᠡᠬᠦᠯᠴᠢᠬᠡᠭᠰᠡᠨ ᠪᠠᠶᠢᠯ᠎ᠠ᠃ ᠬᠡᠷ  ᠢᠶᠠᠷ ᠲᠦᠬᠦᠷᠡᠩ ᠬᠦᠮᠦᠰ ᠲᠠᠭᠤ ᠱᠤᠤ ᠲᠠᠰᠤᠷᠠᠵᠤ ᠬᠦᠨᠳᠤ ᠨᠦᠰᠡᠷ ᠪᠠᠶᠢᠵᠤ ᠪᠠᠶᠢᠳᠠᠯ᠎ᠠ  ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠲᠦᠷᠦᠯ ᠤᠨ ᠡᠬᠡᠴᠢ ᠲᠡᠬᠦᠦ ᠨᠡᠷ ᠲᠠᠭᠤ ᠲᠠᠯᠪᠢᠨ ᠤᠬᠢᠯᠠᠵᠤ᠂ ᠮᠠᠨ ᠤ ᠬᠡᠳᠤᠬᠦᠯᠡ ᠶᠢ ᠴᠤ ᠲᠤᠭᠤᠢ ᠲᠤᠭᠤᠢ ᠮᠡᠭᠰᠢᠷᠡᠬᠦᠯᠵᠤ ᠤᠷᠬᠢᠪᠠ᠃ ᠪᠢ ᠤᠬᠢᠯᠠᠬᠰᠠᠨ ᠦᠬᠡᠢ᠂ ᠨᠠᠰᠤ ᠪᠤᠯᠤᠬᠰᠠᠨ ᠬᠦᠮᠦᠨ ᠢᠶᠠᠨ ᠨᠢᠯᠪᠤᠰᠤ ᠪᠠᠷ ᠦᠳᠡᠳᠡᠭ ᠦᠬᠡᠢ ᠠᠴᠠ ᠪᠤᠯᠤᠬᠰᠠᠨ ᠪᠤᠰᠤ᠂ ᠵᠤᠷᠢᠭ ᠴᠢᠩᠭ᠎ᠠ ᠬᠦᠮᠦᠨ ᠨᠡᠩ ᠴᠤ ᠪᠤᠰᠤ᠃ ᠶᠠᠭᠤ ᠴᠤ ᠬᠡᠰᠡᠨ ᠮᠢᠨᠦ ᠤᠢ ᠭᠠᠰᠢᠭᠤᠳᠠᠯ ᠠᠴᠠ ᠢᠯᠡᠬᠦᠦ ᠢᠳᠡᠬᠡᠵᠤ ᠪᠤᠯᠬᠤ ᠦᠬᠡᠢ ᠭᠤᠮᠤᠷᠬᠠᠯ ᠰᠡᠳᠬᠢᠯ ᠵᠢᠷᠤᠬᠡ ᠶᠢ ᠡᠵᠠᠯᠠᠵᠤ ᠪᠠᠶᠢᠪᠠ᠃ ᠨᠢᠬᠡ ᠵᠤᠶᠢᠯ ᠤᠨ ᠦᠯᠦ ᠮᠡᠳᠡᠬᠦ ᠪᠢᠳᠡᠬᠦᠦ ᠮᠠᠨᠠᠨ ᠲᠠᠷᠢᠬᠢ ᠲᠤᠯᠤᠭᠠᠢ  ᠶᠢ ᠮᠢᠨᠢ ᠪᠢᠳᠡᠬᠦᠷᠡᠬᠦᠯᠵᠤ ᠤᠷᠬᠢᠪᠠ᠃ ᠨᠤᠳᠤᠭ ᠤᠷᠤᠨ ᠳᠤ ᠪᠠᠨ ᠨᠠᠷ᠎ᠡ ᠬᠦᠨᠳᠤᠳᠡᠢ ᠯᠠᠮᠠ ᠪᠠᠭᠰᠢ ᠠᠪᠤ ᠶᠢᠨ  ᠬᠤᠶᠢᠳᠤᠬᠢ ᠪᠦᠬᠦ ᠶᠤᠰᠤ ᠵᠠᠩᠰᠢᠯ ᠤᠨ ᠪᠤᠯᠤᠨ ᠪᠤᠶᠠᠨ ᠤ ᠤᠶᠢᠯᠡ ᠶᠢ ᠡᠷᠬᠢᠯᠡᠵᠤ᠂ ᠠᠮᠢᠳᠤ ᠪᠠᠶᠢᠬᠤ ᠶᠢᠨ ᠰᠠᠨᠠᠭ᠎ᠠ ᠵᠤᠷᠢᠭ ᠢ ᠨᠢ ᠬᠦᠢᠴᠡᠬᠡᠪᠡ᠃     — — — ᠶᠠᠭᠠᠬᠢᠬᠰᠠᠨ ᠶᠡᠭᠡ ᠪᠤᠶᠠᠨ ᠲᠠᠢ ᠬᠦᠮᠦᠨ ᠶᠤᠮ ᠪᠤᠢ︖ ᠵᠢᠷᠭᠤᠭᠠᠨ ᠬᠡᠤᠬᠡᠳ ᠢᠶᠠᠨ ᠪᠡᠶ᠎ᠡ ᠪᠦᠳᠦᠨ ᠪᠤᠯᠭᠠᠵᠤ᠂ ᠡᠪᠡᠳᠴᠢᠨ ᠲᠠᠢ  ᠬᠤᠭᠤᠴᠠᠭᠠᠨ ᠳᠤ ᠪᠠᠨ ᠴᠤ ᠡᠭᠦᠷᠳᠡᠬᠦᠯᠵᠤ ᠵᠤᠪᠠᠭᠠᠬᠰᠠᠨ ᠦᠬᠡᠢ᠂ ᠨᠡᠷᠡᠳᠡᠢ ᠪᠠᠭᠰᠢ ᠪᠠᠷ ᠥᠨᠡᠨ ᠤ ᠵᠠᠮ ᠢᠶᠠᠨ ᠵᠢᠭᠠᠯᠭᠠᠬᠰᠠᠨ ᠴᠤᠬᠤᠮ ᠴᠤ ᠪᠤᠶᠠᠨ ᠲᠠᠢ ᠬᠦᠮᠦᠨ ᠪᠠᠶᠢᠨ᠎ᠠ ᠬᠡᠵᠤ ᠬᠡᠯᠡᠯᠴᠡᠬᠡᠨ ᠪᠤᠯᠴᠢᠬᠠᠨ᠎ᠠ᠃     ᠡᠳᠡᠬᠡᠷ ᠬᠡᠷᠡᠭ ᠦᠬᠡᠢ ᠦᠬᠡ ᠶᠢ ᠪᠢ ᠰᠤᠨᠤᠰᠬᠤ ᠴᠤ ᠲᠤᠷ᠎ᠠ ᠦᠬᠡᠢ᠃ ᠶᠠᠮᠠᠷ ᠵᠠᠶᠠᠭᠠᠨ ᠳᠤ ᠪᠤᠶᠠᠨ ᠲᠠᠢ ᠳᠤ ᠲᠤᠭᠤᠴᠠᠬᠳᠠᠬᠤ ᠶᠤᠮ ᠪᠤᠢ︖ ᠦᠳᠡ ᠲᠤᠮᠳᠠ ᠶᠢᠨ ᠨᠠᠰᠤᠨ ᠳᠤ ᠪᠠᠨ ᠪᠠᠶᠢᠭᠠᠳ ᠶᠢᠷᠳᠢᠨᠴᠤ ᠤᠨ ᠠᠯᠢ ᠰᠠᠶᠢᠨ ᠰᠠᠶᠢᠬᠠᠨ ᠪᠦᠬᠦᠨ ᠢ ᠠᠵᠢᠶᠠᠷᠠᠵᠤ ᠲᠠᠭᠤᠰᠤᠭ᠎ᠠ ᠦᠬᠡᠢ ᠪᠠᠶᠢᠵᠤ ᠬᠠᠷ᠎ᠠ ᠠᠷᠢᠬᠢᠨ ᠤ ᠮᠠᠭᠤ  ᠪᠠᠷ ᠲᠤᠳᠠᠭᠤ ᠲᠤᠷᠭᠤᠨ ᠨᠠᠰᠤᠯᠠᠯ᠎ᠠ ᠬᠡᠵᠤ ᠪᠢᠳᠡᠬᠦᠦ ᠠᠭᠤᠷ ᠪᠡᠭᠳᠡᠷᠡᠯ ᠳᠤ ᠠᠪᠳᠠᠵᠤ ᠰᠠᠭᠤᠬᠰᠠᠨ ᠬᠦᠦ ᠨᠢ ᠪᠢ ᠪᠢᠯᠡ᠃     ᠶᠤᠰᠤ ᠮᠡᠳᠡᠬᠦ ᠦᠬᠡᠢ ᠶᠤᠷᠤᠭ ᠲᠠᠨᠢᠬᠤ ᠦᠬᠡᠢ ᠶᠢᠨ ᠬᠡᠴᠡᠬᠦᠦ ᠬᠡᠵᠤ ᠬᠠᠯᠠᠳᠠᠢ ᠲᠤᠰᠳᠠᠭ‌‍ᠪᠠᠶᠢᠬᠤ ᠳᠤ ᠤᠬᠳᠤ ᠤᠬᠠᠵᠤ ᠰᠡᠷᠡᠵᠤ ᠪᠠᠶᠢᠭ᠎ᠠ ᠦᠬᠡᠢ ᠵᠤᠶᠢᠯ ᠠᠯᠳᠠᠬᠰᠠᠨ ᠬᠤᠶᠢᠨ᠎ᠠ  ᠬᠦᠨᠳᠤ ᠢᠷᠡᠳᠡᠭ ᠪᠠᠶᠢᠨ᠎ᠠ᠃ ᠬᠡᠵᠢᠶ᠎ᠠ ᠬᠤᠶᠢᠨ᠎ᠠ ᠨᠢ ᠰᠡᠳᠬᠢᠯ ᠰᠡᠷᠬᠦᠬᠡᠭᠰᠡᠨ ᠤ ᠰᠡᠬᠦᠯᠡᠷ ᠪᠠᠭ᠎ᠠ ᠠᠪᠠᠭ᠎ᠠ ᠶᠢᠨ ᠳᠤ ᠤᠴᠢᠵᠤ ᠬᠡᠳᠤᠬᠡᠨ ᠬᠤᠨᠳᠠᠭ᠎ᠠ ᠠᠷᠢᠬᠢ ᠬᠤᠳᠤᠭᠤᠳᠤᠨ ᠳᠤ ᠤᠷᠤᠬᠤ ᠳᠤ ᠯᠠ ᠠᠪᠤ ᠶᠢᠨ ᠲᠤᠬᠠᠢ ᠲᠤᠷᠠᠰᠴᠤ ᠭᠠᠭᠴᠠᠭᠠᠷᠳᠠᠯ᠂ ᠰᠦᠷᠳᠠᠯ᠂  ᠲᠦᠬᠡᠷᠢᠭᠳᠡᠯ᠂ ᠬᠠᠷᠠᠮᠰᠠᠯ ᠤᠨ ᠮᠠᠨᠠᠨ ᠳᠤ ᠪᠦᠷᠬᠦᠭᠳᠡᠵᠤ ᠡᠭᠰᠡᠷᠡᠳᠡᠯ᠎ᠡ ᠤᠬᠢᠯᠡᠵᠤ ᠪᠢᠯᠡ᠃ ᠠᠪᠤ ᠮᠢᠨᠢ ᠪᠢᠳᠠᠨ ᠳᠤ ᠪᠠᠨ ᠰᠦᠮᠪᠤᠷ ᠠᠭᠤᠯᠠ ᠰᠢᠭ᠋ ᠲᠦᠰᠢᠭ ᠲᠤᠯᠭᠠᠭᠤᠷᠢ ᠪᠠᠶᠢᠬᠰᠠᠨ ᠢ ᠲᠠᠩᠴᠤ ᠤᠬᠠᠭᠠᠷᠠᠭ᠎ᠠ ᠦᠬᠡᠢ ᠶᠠᠪᠤᠵᠠᠢ ᠮᠠᠭᠤ ᠬᠦᠦ ᠴᠢᠨᠢ︕     ᠨᠠᠢᠮᠠ     ᠠᠪᠤ ᠶᠢᠨ ᠨᠢᠬᠡ ᠨᠠᠰᠤ ᠶᠢ ᠭᠠᠰᠢᠭᠤᠨ ᠬᠠᠳᠠᠭᠤ ᠴᠠᠭ ᠦᠶ᠎ᠡ ᠢᠯᠡᠬᠦᠦ ᠡᠵᠠᠯᠠᠵᠠᠢ᠃ ᠠᠪᠤ  ᠲᠥᠷᠪᠠᠨ ᠨᠠᠰᠤᠳᠠᠢ  ᠪᠠᠶᠢᠬᠤ ᠳᠤ  ᠡᠮᠡᠭᠡ ᠡᠪᠡᠳᠴᠢᠨ ᠢᠶᠠᠷ ᠨᠠᠰᠤ  ᠪᠠᠷᠠᠵᠠᠢ᠃ ᠨᠠᠰᠤ ᠪᠠᠷ ᠢᠶᠠᠨ ᠦᠷ᠎ᠡ ᠬᠡᠤᠬᠡᠳ ᠦᠬᠡᠢ ᠪᠠᠭ᠎ᠠ ᠡᠪᠦᠭᠡ ᠲᠡᠶᠢᠸᠠᠩᠴᠤᠬᠳᠤ᠂ ᠡᠵᠢ ᠶᠢᠨ ᠬᠠᠶᠢᠷ᠎ᠠ ᠪᠠᠨ ᠠᠯᠳᠠᠬᠰᠠᠨ ᠠᠪᠤ ᠳᠤ ᠣᠴᠢᠷ ᠦᠬᠡᠢ ᠬᠠᠶᠢᠷ᠎ᠠ ᠲᠠᠢ ᠪᠠᠶᠢᠵᠤ ᠤᠯᠠᠨ ᠲᠠᠬᠢᠨ ᠠᠬ᠎ᠠ ᠳᠤ ᠪᠠᠨ ᠦᠷᠡᠴᠢᠯᠡᠵᠤ ᠠᠪᠤᠶ᠎ᠠ ᠬᠡᠰᠡᠨ ᠴᠤ ᠡᠪᠦᠭᠡ ᠵᠦᠪᠰᠢᠶᠡᠷᠡᠭᠰᠡᠨ ᠦᠬᠡᠢ  ᠪᠠᠶᠢᠵᠠᠢ᠃ ᠬᠠᠷᠢᠨ ᠬᠤᠶᠢᠳᠤ ᠡᠵᠢ ᠢᠷᠡᠵᠤ ᠤᠯᠠᠨ ᠡᠬᠡᠴᠢ ᠠᠬ᠎ᠠ ᠶᠢ ᠨᠢ ᠠᠰᠠᠷᠠᠵᠤ ᠲᠡᠬᠡᠭᠰᠢ ᠲᠠᠳᠠᠬᠤ ᠳᠤ ᠲᠤᠷ᠎ᠠ ᠲᠠᠪᠠ ᠪᠠᠷ ᠦᠰᠦᠭᠰᠡᠨ ᠬᠠᠮᠤᠭ ᠪᠠᠭ᠎ᠠ ᠬᠦᠦ ᠨᠢ ᠪᠤᠯᠬᠤ ᠠᠪᠤ ᠮᠢᠨᠢ ᠬᠠᠷᠢᠨ‌ᠦᠬᠡ ᠰᠤᠨᠤᠰᠬᠤ ᠦᠬᠡᠢ ᠮᠦᠷᠳᠡᠬᠡᠨ ᠬᠤᠶᠢᠳᠤ ᠡᠵᠢ ᠶᠢᠨ ᠡᠮᠤᠨ᠎ᠡ ᠶᠤᠰᠤ ᠦᠬᠡᠢ ᠠᠭᠠᠰᠢᠯᠠᠵᠤ ᠡᠪᠦᠭᠡ ᠪᠠᠷ ᠬᠡᠳᠤᠨᠳᠡ ᠵᠠᠩᠨᠠᠭᠤᠯᠵᠤ ᠡᠪᠦᠭᠡ ᠶᠢᠨ ᠡᠵᠡᠬᠦᠢ ᠳᠤ ᠬᠡᠷ  ᠠᠴᠠ ᠤᠷᠭᠤᠵᠤ᠂ ᠪᠠᠭ᠎ᠠ ᠡᠪᠦᠭᠡ ᠶᠢᠨ ᠳᠤ ᠲᠤᠳᠠᠭᠠᠵᠤ ᠢᠷᠡᠵᠠᠢ᠃ ᠬᠡᠳᠤ ᠬᠤᠨᠤᠭ ᠤᠨ ᠲᠠᠷᠠᠭ᠎ᠠ ᠡᠪᠦᠭᠡ ᠲᠠᠰᠢᠭᠤᠷ ᠰᠤᠶᠢᠷᠡᠵᠤ ᠤᠶᠠᠭᠠᠨ ᠲᠡᠬᠡᠷ᠎ᠡ ᠢᠷᠡᠬᠦ ᠳᠤ ᠪᠠᠭ᠎ᠠ ᠡᠪᠦᠭᠡ ᠦᠬᠡᠳᠡ ᠠᠴᠠ ᠨᠢ ᠦᠮᠦᠭᠯᠡᠵᠤ ᠤᠴᠢᠬᠰᠠᠨ ᠶᠤᠮ ᠪᠠᠶᠢᠨ᠎ᠠ᠃ ᠡᠪᠦᠭᠡ  ᠪᠤᠷᠭᠠᠰᠤᠨ ᠥᠪᠥᠩ ᠤᠪᠤᠬᠠᠢ ᠠᠴᠠ ᠪᠤᠯᠳᠠᠯᠵᠠᠬᠤ ᠠᠪᠤ ᠶᠢ ᠬᠠᠷᠠᠵᠤ᠂ ᠬᠠᠯᠵᠠ ᠲᠡᠮᠡᠴᠡᠬᠦ ᠪᠠᠷ ᠢᠷᠡᠭᠰᠡᠨ ᠪᠠᠭ᠎ᠠ ᠡᠪᠦᠭᠡ ᠶᠢ ᠨᠢᠬᠡ ᠬᠠᠷᠠᠭᠠᠳ ᠡᠮᠡᠬᠡᠯ ᠤᠨ ᠲᠤᠤᠷ᠎ᠠ ᠠᠴᠠ ᠰᠢᠨᠡᠬᠡᠨ ᠲᠠᠨᠽ ᠠᠪᠴᠤ ᠭᠠᠵᠠᠷ ᠲᠡᠬᠡᠷ᠎ᠡ ᠰᠢᠳᠡᠴᠢᠬᠡᠬᠡᠳ ᠮᠤᠷᠢᠨ  ᠠᠴᠠ ᠴᠤ ᠪᠠᠭᠤᠬᠰᠠᠨ ᠦᠬᠡᠢ ᠪᠤᠴᠠᠬᠰᠠᠨ ᠪᠠᠶᠢᠵᠠᠢ᠃ ᠢᠩᠬᠢᠵᠤ ᠠᠪᠤ  ᠶᠢᠰᠤᠨ ᠨᠠᠰᠤᠳᠠᠢ  ᠪᠠᠭ᠎ᠠ ᠡᠪᠦᠭᠡ ᠶᠢᠨ ᠡᠬᠦᠳᠡ ᠤᠩᠭᠤᠶᠢᠯᠭᠠᠵᠤ ᠦᠷᠡᠴᠢᠯᠡᠭᠳᠡᠭᠰᠡᠨ ᠪᠦᠬᠡᠳ ᠰᠡᠬᠦᠯ ᠳᠤ ᠪᠦᠷ ᠬᠤᠶᠠᠷ ᠠᠪᠤ ᠪᠠᠨ ᠠᠳᠠᠯᠢᠬᠠᠨ‌ᠡᠷᠬᠦᠵᠤ ᠬᠦᠨᠳᠤᠯᠡᠵᠤ ᠢᠷᠡᠭᠰᠡᠨ ᠲᠡᠤᠬᠡ ᠲᠠᠢ ᠬᠡᠵᠤ ᠪᠠᠭ᠎ᠠ ᠡᠪᠦᠭᠡ ᠮᠢᠨᠢ ᠬᠠᠭᠤᠴᠢᠯᠠᠵᠤ ᠶᠠᠷᠢᠳᠠᠭ ᠰᠠᠨ᠃     ᠠᠪᠤ ᠲᠤᠯᠤᠭᠠᠨ ᠨᠠᠰᠤᠨ ᠲᠡᠬᠡᠷ᠎ᠡ ᠪᠠᠨ ᠨᠠᠩᠰᠤ ᠶᠢᠨ ᠰᠥᠮ᠎ᠡ ᠲᠡᠬᠡᠷ᠎ᠡ ᠨᠠᠮᠵᠠᠯ ᠯᠠᠮ᠎ᠠ ᠶᠢᠨ ᠱᠠᠪᠢ ᠪᠠᠨᠳᠢ ᠪᠤᠯᠵᠤ  ᠬᠤᠶᠠᠷ ᠭᠤᠷᠪᠠᠨ ᠵᠢᠯ ᠨᠤᠮ ᠰᠤᠷᠪᠠ᠃ ᠰᠡᠬᠦᠯᠡᠷ ᠨᠢ ᠯᠠᠮᠠ ᠬᠦᠮᠦᠨ ᠡᠬᠡᠨᠡᠷ ᠠᠪᠴᠤ ᠠᠶᠢᠯ  ᠬᠡᠷ ᠪᠤᠯᠵᠤ ᠪᠤᠯᠳᠠᠭ ᠠᠴᠠ ᠬᠠᠶᠢᠷ᠎ᠠ ᠲᠠᠢ ᠯᠠᠮᠠ ᠪᠠᠭᠰᠢ ᠨᠢ ᠠᠶᠢᠯ ᠪᠤᠯᠵᠤ ᠠᠪᠤ ᠴᠤ ᠰᠦᠮ᠎ᠡ ᠠᠴᠠ ᠰᠠᠯᠵᠤ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠵᠤ ᠲᠡᠬᠦᠰᠴᠤ ᠬᠡᠷ ᠲᠤ  ᠬᠠᠷᠢᠪᠠ᠃ ᠬᠤᠷᠠᠭ᠎ᠠ ᠢᠰᠢᠬᠡᠨ ᠳᠤ ᠶᠠᠪᠤᠬᠤ ᠳᠤ ᠪᠠᠨ ᠴᠠᠮᠴᠠ ᠪᠠᠨ ᠲᠠᠶᠢᠯᠠᠵᠤ ᠪᠦᠭᠰᠡ ᠪᠠᠨ ᠤᠷᠢᠶᠠᠴᠢᠭᠠᠳ ᠴᠢᠷᠮᠠᠨ ᠨᠢᠴᠦᠬᠦᠨ ᠲᠤᠭᠠᠨ ᠤ ᠠᠮᠢᠳᠠᠨ ᠨᠠᠷᠠ ᠰᠠᠯᠬᠢᠨ ᠳᠤ ᠬᠡᠶᠢᠰᠬᠦᠯᠳᠡᠭ ᠠᠴᠠ ᠪᠠᠭ᠎ᠠ ᠠᠴᠠ ᠪᠠᠨ ᠬᠠᠪ ᠬᠠᠷ᠎ᠠ ᠬᠦᠷᠦᠰᠦ ᠲᠠᠢ ᠪᠤᠯᠵᠠᠢ᠃ ᠦᠨᠡᠨ ᠳᠤ ᠪᠠᠨ ᠡᠮᠤᠰᠬᠦ ᠤᠯᠢᠬᠳᠠᠢ ᠬᠤᠪᠴᠠᠰᠤ ᠴᠤ ᠦᠬᠡᠢ ᠪᠠᠶᠢᠵᠠᠢ᠃ ︽ᠬᠠᠷ᠎ᠠ ᠰᠠᠸᠠᠩ︾ ᠬᠡᠳᠡᠭ ᠨᠠᠷ᠎ᠠ ᠬᠡᠤᠬᠡᠳ ᠠᠴᠠ ᠪᠠᠨ ᠲᠠᠭᠠᠵᠤ ᠢᠷᠡᠵᠠᠢ᠃     ᠠᠪᠤ ᠤᠯᠠᠨ ᠲᠦᠮᠡᠨ ᠤ ᠠᠵᠢᠯ ᠢ ᠴᠤ ᠠᠯᠳᠠᠯ ᠦᠬᠡᠢ ᠪᠡᠶᠡᠯᠡᠬᠦᠯᠳᠡᠭ ᠨᠢᠬᠡᠨ ᠪᠠᠶᠢᠵᠠᠢ᠃ ᠱᠠᠷᠯᠢᠭ᠂ ᠲᠤᠯᠢ ᠬᠥᠩᠱᠧ ᠪᠠᠷ ᠵᠢᠬᠡᠯᠡᠯᠬᠡ ᠶᠢᠨ ᠺᠠᠳ᠋ᠷ ᠢᠶᠠᠷ ᠶᠠᠪᠤᠵᠤ᠂ ᠪᠤᠭᠤᠳᠤ ᠬᠤᠳᠠ ᠳᠤ ᠪᠠᠶᠢᠴᠠᠭᠠᠨ ᠰᠤᠳᠤᠯᠤᠯᠳᠡ ᠬᠢᠵᠤ ᠥᠩᠬᠡᠷᠡᠪᠡ᠃ ᠭᠠᠴᠠᠭ᠎ᠠ ᠪᠡ ᠪᠠᠷᠢᠭᠠᠳᠠ ᠶᠢᠨ ᠶᠠᠳᠠᠭᠤ ᠶᠠᠳᠠᠭᠤᠯᠢᠭ ᠮᠠᠯᠴᠢᠨ ᠤ ᠡᠪᠯᠡᠯ ᠤᠨ ᠡᠷᠬᠡᠯᠡᠭᠴᠢ ᠬᠢᠵᠤ ᠤᠷᠤᠨ ᠤ ᠶᠠᠳᠠᠭᠤ ᠶᠠᠳᠠᠭᠤᠯᠢᠭ ᠮᠠᠯᠴᠢᠨ ᠤ ᠡᠪᠯᠠᠯ ᠤᠨ ᠲᠥᠯᠥᠬᠡᠯᠡᠭᠴᠢ ᠪᠤᠯᠵᠤ ᠬᠥᠬᠡᠬᠤᠳᠠ ᠳᠤ ᠬᠤᠷᠠᠯ ᠳᠤ ᠤᠷᠤᠯᠴᠠᠵᠤ ᠥᠩᠬᠡᠷᠡᠪᠡ᠃     ᠴᠠᠭᠠᠨᠳᠤᠯᠤᠭᠠᠢ ᠬᠥᠩᠱᠧ ᠶᠢᠨ ᠯᠢᠶᠠᠨ ᠸᠧᠢ ᠶᠢᠨ ᠲᠠᠷᠤᠭ᠎ᠠ ᠬᠢᠵᠤ ᠤᠷᠪᠠᠯᠭ᠎ᠠ ᠭᠠᠷᠭᠠᠬᠴᠢ ᠶᠢᠨ ᠬᠢᠨ ᠳᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠤᠷᠤᠨ ᠨᠤᠳᠤᠭ ᠤᠨ ᠤᠳᠤᠷᠢᠳᠤᠯᠭ᠎ᠠ ᠶᠠᠩ ᠬᠥᠸᠧ ᠬᠤᠸᠠ᠂ ᠴᠢ᠊ · ᠪᠠᠶᠠᠷᠮᠠᠩᠯᠠᠢ ᠲᠠᠢ ᠬᠠᠮᠳᠤ ᠲᠡᠮᠡᠴᠠᠬᠦᠯᠵᠤ᠂ ᠪᠤᠯᠤᠤᠨ ᠬᠠᠪᠳᠠᠰᠤ ᠪᠠᠷ ᠴᠤᠬᠢᠭᠤᠯᠵᠤ᠂ ᠲᠤᠯᠤᠭᠠᠢ ᠲᠤᠬᠤ ᠪᠠᠨ ᠲᠡᠮᠡᠬᠢ ᠪᠠᠷ ᠰᠢᠷᠠᠭᠤᠯᠵᠤ᠂ ᠨᠢᠷᠤᠭᠤ ᠪᠠᠨ ᠤᠯᠠᠶᠢᠰᠬᠠᠬᠰᠠᠨ ᠲᠠᠮᠤᠷ ᠬᠠᠳᠠᠭᠠᠰᠤ ᠪᠠᠷ ᠰᠢᠷᠠᠭᠤᠯᠵᠤ  ᠬᠠᠯᠠ ᠲᠠᠮᠤ ᠥᠵᠡᠨ ᠨᠠᠰᠤᠨ ᠤ ᠰᠢᠷᠬ᠎ᠠ ᠰᠣᠷᠪᠢ ᠥᠯᠡᠳᠡᠵᠡᠢ᠃ ᠰᠡᠬᠦᠯᠡᠷ ᠨᠢ ᠴᠠᠭᠠᠳᠬᠠᠬᠰᠠᠨ ᠬᠤᠶᠢᠨ᠎ᠠ ᠴᠤᠬᠢᠬᠰᠡᠨ ᠬᠦᠮᠦᠨ ᠲᠠᠢ ᠬᠤᠷᠤᠭᠤᠨ ᠲᠠᠳᠤᠢ ᠦᠰᠢᠶ᠎ᠡ ᠬᠤᠨᠵᠢᠩ ᠪᠤᠳᠤᠬᠰᠠᠨ ᠦᠬᠡᠢ ᠪᠦᠬᠡᠳ ᠪᠤᠰᠤᠤᠨ ᠲᠠᠢ ᠠᠳᠠᠯᠢ ᠴᠠᠯᠢᠩ ᠨᠦᠬᠦᠪᠤᠷᠢ ᠠᠪᠬᠤ᠂ ᠬᠡᠤᠬᠡᠳ ᠲᠤ ᠪᠠᠨ ᠠᠵᠢᠯ ᠤᠯᠭᠤᠬᠤ ᠬᠡᠭᠴᠢ ᠶᠢ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠳᠤ ᠰᠢᠳᠤᠨ ᠵᠢᠪᠳᠡᠷᠡᠭᠡ ᠭᠠᠷᠭᠠᠬᠰᠠᠨ ᠦᠬᠡᠢ᠃     ᠠᠪᠤ ᠪᠤᠯ ᠪᠠᠭ᠎ᠠ ᠵᠠᠯᠠᠭᠤ ᠨᠠᠰᠤᠨ ᠳᠤ ᠪᠠᠨ ᠬᠠᠯᠠ ᠦᠵᠡᠵᠤ ᠬᠠᠯᠠᠭᠤᠨ ᠴᠢᠯᠠᠭᠤ ᠲᠤᠯᠢᠶᠠᠬᠰᠠᠨ ᠨᠢᠬᠡᠨ ᠪᠦᠬᠡᠳ ᠦᠳᠡᠯᠤᠨ ᠵᠢᠷᠭᠠᠬᠤ ᠶᠢᠨ  ᠦᠵᠦᠬᠦᠷ ᠮᠠᠨ  ᠢ ᠪᠠᠨ ᠬᠠᠶᠠᠵᠤ ᠨᠦᠬᠦᠬᠡ ᠶᠢᠷᠳᠢᠨᠴᠤ ᠳᠤ ᠶᠠᠪᠤᠬᠰᠠᠨ ᠶᠤᠮ᠃ ᠡᠵᠢ ᠶᠢᠨ ᠬᠡᠯᠡᠳᠡᠭ ᠰᠢᠭ ᠴᠢᠷᠡᠢ ᠨᠢ ᠬᠠᠷ᠎ᠠ ᠪᠤᠯᠪᠠᠴᠤ ᠰᠠᠨᠠᠭ᠎ᠠ ᠨᠢ ᠰᠦ ᠰᠢᠭ ᠴᠠᠭᠠᠨ ᠬᠦᠮᠦᠨ ᠬᠡᠭᠴᠢ ᠠᠪᠤ ᠮᠢᠨᠢ ᠮᠦᠨ᠃ ᠰᠡᠬᠦᠯ ᠤᠨ ᠵᠢᠯ ᠠᠴᠠ᠄ ︽ᠠᠪᠤ ᠨᠢ ᠬᠡᠪᠡᠯ ᠨᠠᠰᠤ ᠪᠠᠷ ᠢᠶᠠᠨ ᠵᠢᠷᠭᠠᠵᠤ ᠶᠠᠪᠤᠬᠰᠠᠨ ᠬᠦᠮᠦᠨ᠂ ᠡᠵᠢ ᠴᠢᠨᠢ ᠪᠤᠯ ᠨᠠᠰᠤᠳᠠᠨ ᠠᠰᠠᠷᠠᠬᠤ᠂ ᠲᠠᠨ ᠤ ᠬᠡᠳᠤᠬᠦᠯᠡ ᠶᠢ ᠬᠦᠮᠦᠨ ᠪᠤᠯᠭᠠᠬᠤ ᠬᠡᠵᠤ ᠵᠦᠳᠡᠵᠤ ᠶᠠᠪᠤᠬᠰᠠᠨ ᠬᠦᠮᠦᠨ᠃ ᠲᠠᠨᠤᠰ ᠡᠵᠢ ᠶᠢ ᠪᠠᠨ ᠰᠠᠶᠢᠨ ᠠᠰᠠᠷᠠ︕︾᠂ ︽ᠠᠪᠤ ᠨᠢ ᠨᠠᠰᠤ ᠪᠠᠷ ᠠᠷᠢᠬᠢ ᠤᠤᠭᠤᠬᠰᠠᠨ ᠬᠦᠮᠦᠨ᠂ ᠠᠷᠢᠬᠢᠨ ᠬᠤᠤᠷ᠎ᠡ ᠪᠠᠶ᠎ᠠ ᠪᠠᠷᠠᠨ᠎ᠠ᠃ ᠬᠡᠤᠬᠡᠳ ᠮᠢᠨᠢ  ᠬᠤᠵᠢᠮ ᠠᠷᠢᠬᠢ ᠪᠠᠭ᠎ᠠ ᠤᠤᠭᠤ᠂ ᠡᠷᠡᠬᠦᠯ ᠪᠠᠶ᠎ᠠ ᠪᠠᠨ ᠡᠷᠳᠠᠨᠢ ᠪᠤᠯᠭᠠᠵᠤ ᠬᠠᠶᠢᠷᠯᠠᠠᠵᠤ ᠶᠠᠪᠤᠴᠠᠭ᠎ᠠ︕︾ ᠬᠡᠵᠤ ᠠᠪᠤ ᠬᠡᠯᠡᠳᠡᠭ ᠨᠢ ᠠᠯᠢ ᠨᠢᠬᠡ ᠡᠳᠤᠷ ᠮᠠᠨ ᠠᠴᠠ ᠢᠳᠡᠷ ᠵᠠᠯᠠᠭᠤ   ᠪᠠᠷ ᠰᠠᠯᠵᠤ ᠶᠠᠪᠤᠬᠤ ᠪᠠᠨ ᠤᠷᠢᠳᠴᠢᠯᠠᠨ ᠮᠡᠳᠡᠵᠤ ᠪᠠᠶᠢᠬᠰᠠᠨ ᠮᠡᠳᠤ ᠪᠢᠯᠡ᠃     ᠲᠡᠷᠡ ᠦᠶ᠎ᠡ ᠠᠮᠤ ᠲᠦᠮᠦᠰᠤ ᠠᠪᠬᠤ ᠳᠤ ᠵᠡᠷᠬᠡᠯᠳᠡᠭᠡ ᠰᠤᠮᠤᠨ ᠤ ᠠᠮᠤ ᠪᠤᠳᠠᠭᠠᠨ ᠬᠦᠮᠦᠷᠬᠡ ᠳᠤ ᠬᠤᠨᠤᠭᠤᠳᠠ ᠦᠨᠵᠢᠬᠦᠳᠡ ᠬᠦᠯᠢᠶᠡᠨ ᠪᠠᠶᠢᠵᠤ ᠠᠪᠳᠠᠭ᠃ ᠠᠬ᠎ᠠ ᠶᠢ ᠲᠠᠭᠠᠵᠤ ᠠᠩᠬ᠎ᠠ ᠤᠳᠠᠭ᠎ᠠ ᠬᠠᠰᠠᠭ ᠲᠡᠷᠬᠡ ᠪᠠᠷ ᠠᠮᠤ ᠪᠤᠳᠠᠭ᠎ᠠ ᠪᠠᠨ ᠠᠪᠤᠭᠠᠳ ᠤᠷᠤᠶᠢᠳᠡᠵᠤ ᠵᠠᠮ ᠳᠤ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠠᠴᠠ ᠦᠬᠡᠷ᠎ᠡ ᠠᠶᠢᠯ ᠲᠤᠰᠬᠤᠨ ᠦᠬᠡᠢ ᠪᠤᠯᠬᠤᠷ ᠠᠷᠭ᠎ᠠ ᠦᠬᠡᠢ ᠬᠢᠳᠡᠳ ᠠᠶᠢᠯ ᠳᠤ ᠬᠤᠨᠤᠭ ᠭᠤᠶᠤᠪᠠ᠃ ᠨᠦᠬᠦᠬᠡ ᠠᠶᠢᠯ ᠤᠨ ᠬᠢᠨ ᠶᠠᠭᠠᠬᠢᠵᠤ ᠭᠤᠶᠤᠬᠰᠠᠨ ᠴᠤ  ᠴᠢᠷᠡᠢ ᠦᠩᠬᠡ ᠲᠠᠯᠪᠢᠵᠤ ᠬᠤᠨᠤᠭᠤᠯᠬᠤ ᠦᠬᠡᠢ ᠬᠡᠳ ᠪᠠᠶᠢᠪᠠ᠃ ᠬᠡᠷ ᠤᠨ ᠡᠵᠡᠨ ᠨᠢ ᠰᠡᠬᠦᠯ ᠳᠤ ᠠᠪᠤ ᠶᠢᠨ ᠨᠡᠷ᠎ᠡ ᠶᠢ ᠠᠰᠠᠭᠤᠵᠤ ᠮᠡᠳᠡᠬᠡᠳ ᠲᠤᠤᠷ᠎ᠠ ᠪᠠᠨ ᠡᠷᠬᠢᠯᠳᠡ ᠭᠠᠷᠴᠤ᠄ ︽ᠠᠪᠤ ᠴᠢᠨᠢ ᠰᠠᠶᠢᠨ ᠬᠦᠮᠦᠨ ᠶᠤᠮ ᠡ᠂ ᠮᠠᠨ ᠤ ᠲᠠᠯᠠᠪᠠᠢ ᠶᠢᠨ ᠬᠢᠨ ᠪᠦᠷ ᠲᠠᠨᠢᠨ᠎ᠠ᠂ ᠶᠠᠭᠤᠨ ᠳᠤ ᠡᠷᠳᠡ ᠬᠡᠯᠡᠳᠡᠭ ᠦᠬᠡᠢ ᠪᠤᠢ︖︾ ᠬᠡᠳ ᠠᠶᠤᠵᠤ ᠪᠠᠴᠢᠮᠳᠠᠬᠰᠠᠨ ᠪᠢᠳᠠ ᠬᠤᠶᠠᠭᠤᠯᠠ ᠶᠢᠨ ᠬᠦᠯᠦᠪᠦᠷᠢ ᠶᠢᠨ ᠤᠨᠤᠭ᠎ᠠ ᠶᠢ ᠡᠪᠡᠰᠤ ᠪᠤᠷᠳᠤᠭ᠎ᠠ ᠪᠠᠷ ᠲᠡᠵᠢᠬᠡᠵᠤ᠂ ᠭᠤᠯᠢᠷ ᠪᠤᠳᠠᠭ᠎ᠠ ᠴᠢᠨᠠᠵᠤ ᠦᠯᠦᠨ ᠬᠡᠳᠡᠰᠤ ᠶᠢ ᠲᠦᠬᠦᠷᠬᠡᠵᠤ ᠬᠤᠨᠤᠵᠤ ᠪᠢᠯᠡ᠃ ᠠᠪᠤ ᠶᠢᠨ ᠪᠢᠳᠡᠨ ᠳᠤ ᠦᠯᠡᠳᠡᠬᠡᠭᠰᠡᠨ ᠨᠢ ᠰᠠᠶᠢᠬᠠᠨ ᠨᠠᠷ᠎ᠠ ᠰᠠᠷᠠᠭᠤᠯ ᠤᠬᠠᠭᠠᠨ ᠪᠠᠶᠢᠵᠤ ᠦᠷ᠎ᠡ ᠶᠢᠨ ᠦᠷ᠎ᠡ ᠳᠤ ᠡᠳ᠋ᠯᠡᠬᠦ ᠦᠨᠡᠳᠤ ᠦᠪ ᠬᠦᠷᠦᠩᠬᠡ ᠪᠤᠯᠬᠤ ᠨᠢ ᠵᠦᠪᠳᠠᠢ᠃     ᠡᠷᠬᠢᠨ ᠰᠠᠨᠠᠬᠤ ᠳᠤ ᠡᠯᠢᠬᠡ ᠵᠢᠷᠦᠬᠡ ᠮᠢᠨᠢ ᠡᠮᠳᠡᠷᠡᠬᠦ ᠬᠡᠳ ᠪᠠᠶᠢᠬᠤ ᠶᠤᠮ᠃ ᠬᠠᠶᠢᠷ᠎ᠠ ᠶᠢᠨ ᠲᠥᠰᠢᠭ ᠠᠪᠤ ᠮᠢᠨᠢ ᠳ᠋ᠧ︕
ᠢᠷᠡᠯᠲᠡ᠄ ᠵᠣᠬᠢᠶᠠᠭᠴᠢ ᠠᠴᠠ ᠬᠠᠩᠭᠠᠪᠠ