ᠰᠤᠮᠤᠨ ᠴᠠᠭᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/25
                                              ᠴᠠᠬᠠᠷ ᠨᠠᠷᠠᠨᠳᠠᠯᠠᠢ     ᠡᠮᠡᠬᠡᠯᠳᠤ ᠬᠡᠵᠤ ᠬᠡᠳᠤᠨ ᠪᠠᠷ᠎ᠠ ᠶᠢᠨ ᠭᠠᠵᠠᠷ ᠠᠴᠠ ᠬᠠᠷᠠᠬᠳᠠᠬᠤ ᠦᠨᠳᠤᠷ ᠰᠢᠷᠭᠠᠯ ᠡᠯᠡᠰᠤᠨ ᠤᠷᠤᠢ ᠬᠡᠷ ᠤᠨ ᠮᠢᠨᠢ ᠠᠰ ᠡᠮᠤᠨ᠎ᠡ ᠵᠦᠭ ᠲᠤ ᠪᠠᠶᠢᠷᠢᠯᠠᠳᠠᠭ᠃ ᠡᠷᠳᠡ ᠲᠡᠬᠡᠳᠤ ᠶᠢᠨ ᠦᠶ᠎ᠡ ᠳᠤ ᠮᠤᠩᠭᠤᠯ ᠤᠨ ᠨᠢᠬᠡᠨ ᠪᠠᠭᠠᠳᠤᠷ ᠵᠠᠩᠵᠤᠨ ᠰᠤᠮᠤᠨ ᠴᠠᠭᠠᠨ ᠬᠡᠳᠡᠭ ᠴᠤᠤ ᠲᠠᠢ ᠬᠦᠯᠦᠭ ᠢᠶᠠᠨ ᠤᠨᠤᠵᠤ ᠲᠠᠶᠢᠰᠤᠨ ᠢᠶᠠᠨ ᠲᠠᠷᠤᠵᠤ ᠲᠠᠷᠬᠠᠨ ᠴᠤᠯᠠ ᠪᠠᠨ ᠮᠠᠨᠳᠤᠭᠤᠯᠤᠨ ᠮᠠᠨ ᠤ ᠨᠤᠳᠤᠭ ᠢᠶᠠᠷ  ᠴᠡᠷᠢᠭ ᠪᠠᠭᠤᠵᠤ ᠪᠠᠶᠢᠬᠰᠠᠨ ᠬᠡᠵᠤ ᠡᠪᠦᠭᠡ ᠮᠢᠨᠢ ᠲᠤᠮᠤᠭ ᠰᠢᠭ᠋ ᠬᠠᠭᠤᠴᠢᠯᠠᠳᠠᠭ ᠪᠠᠶᠢᠵᠠᠢ᠃ ᠪᠠᠭᠠᠳᠤᠷ ᠵᠠᠩᠵᠤᠨ ᠤ ᠡᠮᠡᠬᠡᠯ ᠢᠶᠠᠨ ᠰᠡᠪᠡᠷᠡᠬᠡᠵᠤ᠂ ᠬᠦᠯᠦᠭ ᠢᠶᠠᠨ ᠠᠮᠠᠷᠠᠭᠠᠬᠰᠠᠨ ᠦᠨᠳᠤᠷ ᠤᠷᠤᠢ ᠪᠤᠯᠬᠤᠷ ᠡᠮᠡᠬᠡᠯᠳᠤ ᠲᠤᠯᠤᠭᠠᠢ ᠬᠡᠵᠤ ᠤᠯᠠᠨ ᠵᠢᠯ ᠤᠨ ᠬᠤᠶᠢᠨ᠎ᠠ ᠡᠯᠡᠰᠤᠵᠢᠵᠤ ᠲᠠᠴᠢᠷᠳᠠᠬᠰᠠᠨ ᠠᠴᠠ ᠡᠮᠡᠬᠡᠯᠳᠤ ᠶᠢᠨ ᠮᠠᠩᠬ᠎ᠠ ᠬᠡᠬᠦ ᠪᠤᠯᠤᠬᠰᠠᠨ ᠬᠡᠨ᠎ᠡ᠃ ᠮᠠᠯ ᠲᠡᠭᠷᠢ ᠮᠠᠭᠤᠳᠠᠬᠤ ᠶᠢ ᠲᠠᠭᠠᠷᠠᠭᠤᠯᠵᠦ ᠲᠦᠯᠯᠡᠳᠡᠭ ᠭᠡᠵᠦ ᠠᠪᠤ ᠡᠵᠢ ᠬᠡᠯᠡᠯᠴᠡᠲᠡᠭ ᠪᠠᠶᠢᠪᠠ᠃ ᠦᠨᠡᠨ ᠪᠤᠯᠪᠠ ᠤᠤ︖ ᠰᠤᠮᠤᠨ ᠴᠠᠭᠠᠨ ᠮᠢᠨᠢ ᠬᠦᠢᠳᠡᠨ ᠰᠠᠯᠬᠢ ᠱᠤᠤᠬᠢᠬᠰᠠᠨ‌ᠡᠳᠤᠷ ᠡᠮᠡᠬᠡᠯᠳᠤ ᠶᠢᠨ ᠮᠠᠩᠬᠠᠨ ᠤ ᠡᠩᠬᠡᠷ ᠲᠤ ᠲᠥᠷᠥᠭᠰᠡᠨ ᠶᠤᠮ᠃ ᠭᠤᠷᠪᠠ ᠶᠢᠰᠤ ᠶᠢᠨ ᠶᠠᠰᠤ  ᠬᠠᠪᠳᠠᠭᠠᠶᠢᠯᠠᠮᠠᠷ ᠬᠦᠢᠳᠡᠨ ᠡᠳᠤᠷ ᠲᠠᠭᠠᠷᠠᠬᠰᠠᠨ ᠪᠤᠯᠬᠤᠷ ᠡᠬᠡ ᠨᠢ ᠲᠤᠯᠢᠶᠠᠵᠤ ᠠᠮᠵᠢᠯ ᠦᠬᠡᠢ ᠰᠠᠯᠠᠢ ᠨᠢ ᠬᠦᠯᠳᠡᠵᠤ᠂ ᠡᠬᠡ ᠳᠤ ᠨᠢ ᠬᠦᠬᠦᠬᠦᠯᠬᠦ ᠪᠠᠷ ᠴᠢᠷᠮᠠᠶᠢᠬᠰᠠᠨ ᠪᠤᠯᠪᠠᠴᠤ ᠲᠤᠯᠤᠭᠠᠢ ᠪᠠᠨ ᠲᠠᠭᠠᠭ᠎ᠠ ᠶᠠᠳᠠᠬᠰᠠᠨ     ᠮᠠᠭᠤᠵᠢᠷᠠᠩᠬᠠᠢ ᠬᠤᠷᠠᠭ᠎ᠠ ᠡᠬᠡ ᠪᠠᠨ ᠬᠦᠬᠦᠵᠤ ᠴᠢᠳᠠᠬᠰᠠᠨ ᠦᠬᠡᠢ᠃ ᠰᠠᠨᠳᠤᠷᠴᠤ ᠪᠠᠴᠢᠮᠳᠠᠬᠤ ᠳᠤ ᠪᠠᠨ ᠮᠦᠷᠦᠯᠡᠵᠤ ᠢᠷᠡᠭᠰᠡᠨ ᠤᠭᠤᠳᠠᠨ ᠳᠤ ᠬᠤᠷᠠᠭ᠎ᠠ  ᠪᠠᠨ ᠬᠢᠵᠤ᠂ ᠠᠶᠢᠷᠠᠭ ᠢᠳᠡᠭᠰᠡᠨ ᠬᠦᠴᠤ ᠪᠠᠨ ᠭᠠᠷᠭᠠᠨ ᠪᠠᠶᠢᠵᠤ ᠡᠬᠦᠷᠦᠬᠡᠳ ᠡᠬᠡ ᠶᠢ ᠨᠢ ᠲᠠᠭᠠᠭᠤᠯᠵᠤ ᠬᠡᠷ ᠤᠷᠤᠭᠤ ᠰᠠᠯᠬᠢ ᠰᠦᠷᠦᠨ ᠲᠡᠮᠤᠯᠡᠵᠤ ᠪᠢᠯᠡ᠃           — — ᠨᠢᠳᠤ ᠦᠬᠡᠢ ᠰᠢᠯᠢᠷᠡᠨ ᠲᠡᠨᠤᠵᠤ ᠬᠤᠷᠠᠭᠠᠯᠠᠳᠠᠭ ᠬᠤᠨᠢ ᠪᠠᠶᠢᠵᠤ ᠬᠦᠢ︕ ᠠᠪᠤ ᠴᠢᠨᠢ ᠠᠶᠢᠯ ᠠᠴᠠ ᠲᠠᠭᠤᠵᠤ ᠢᠷᠡᠭᠰᠡᠨ ᠬᠡᠳᠤᠨ‌ᠨᠤᠳᠤᠭ ᠤᠨ ᠡᠬᠦᠯᠳᠡᠷ ᠤᠨ ᠬᠤᠨᠢᠨ ᠤ ᠨᠢᠬᠡ ᠪᠠᠶᠢᠵᠠᠢ᠃ ᠲᠠᠩᠴᠤ ᠵᠠᠩ ᠢ ᠨᠢ ᠮᠡᠳᠡᠭᠰᠡᠨ ᠦᠬᠡᠢ᠃ ᠮᠠᠭᠤ ᠬᠦᠦ ᠮᠢᠨᠢ ᠰᠠᠶᠢᠨ ᠬᠤᠨᠢᠴᠢᠨ ᠪᠤᠯᠬᠤᠷ ᠴᠢᠮ᠎ᠠ ᠮᠠᠭᠤ ᠶᠢ ᠬᠦᠯᠳᠡᠬᠡᠭᠰᠡᠨ ᠦᠬᠡᠢ ᠠᠪᠤᠷᠠᠬᠰᠠᠨ ᠶᠤᠮ ᠪᠠᠶᠢᠨ᠎ᠠ ᠰᠢᠤ ᠬᠡᠵᠤ ᠡᠵᠢ ᠰᠢᠷ᠎ᠠ ᠲᠤᠰᠤ ᠬᠠᠯᠠᠭᠤᠯᠵᠤ ᠠᠮᠠᠳᠠᠵᠤ ᠬᠦᠬᠦᠬᠦᠯᠦᠭᠰᠡᠨ ᠬᠤᠷᠠᠭ᠎ᠠ ᠪᠠᠨ ᠡᠩᠬᠦᠷᠡᠶᠢᠯᠡᠵᠤ ᠬᠡᠯᠡᠪᠡ᠃ ᠰᠢᠷ᠎ᠠ ᠲᠤᠰᠤ ᠪᠠᠷ ᠬᠡᠳᠡᠰᠤ ᠪᠠᠨ ᠬᠠᠯᠠᠭᠤᠯᠤᠬᠰᠠᠨ ᠬᠤᠷᠠᠭ᠎ᠠ ᠲᠤᠯᠤᠭᠠᠢ ᠦᠨᠳᠡᠶᠢᠬᠦ ᠲᠡᠩᠬᠡᠬᠡ ᠲᠠᠢ ᠪᠤᠯᠵᠤ᠂ ᠰᠡᠬᠦᠯ ᠭᠤᠳᠤᠭᠤᠨᠠᠭᠤᠯᠤᠨ ᠡᠬᠡ ᠪᠠᠨ ᠬᠦᠬᠦᠵᠤ ᠠᠳᠬᠤ ᠬᠡᠳᠡᠰᠤ ᠲᠠᠢ ᠪᠤᠯᠤᠨ ᠦᠬᠡᠳᠡ ᠠᠴᠠ ᠮᠢᠨᠢ ᠬᠠᠨᠳᠤᠨ ᠮᠠᠢ ᠮᠠᠢ ᠮᠠᠶᠢᠯᠠᠬᠤ ᠶᠤᠮ ᠪᠢᠯᠡ᠃ ᠡᠬᠡ ᠪᠠᠨ ᠲᠠᠭᠤᠷᠢᠶᠠᠬᠰᠠᠨ ᠴᠤᠯ ᠴᠠᠭᠠᠨ᠂ ᠬᠠᠷ᠎ᠠ ᠨᠢᠳᠤᠨ ᠠᠮᠢᠳᠠᠨ ᠪᠠᠶᠢᠵᠤ᠂ ᠲᠤᠶᠢᠮᠤᠭ ᠰᠢᠨᠵᠢ ᠨᠢ ᠮᠡᠳᠡᠭᠳᠡᠵᠤ ᠪᠠᠶᠢᠬᠰᠠᠨ ᠲᠤᠯᠠ ᠡᠩᠬᠡᠷ ᠲᠤ ᠤᠨᠠᠬᠤ ᠳᠤ ᠠᠮᠢ ᠵᠠᠯᠭᠠᠭᠤᠯᠤᠬᠰᠠᠨ ᠢᠶᠠᠷ ᠢᠶᠠᠨ ᠨᠢᠬᠡᠮᠤᠰᠤᠨ ᠡᠵᠡᠨ  ᠨᠢ ᠪᠤᠯᠵᠤ ᠰᠤᠮᠤᠨ ᠴᠠᠭᠠᠨ ᠬᠡᠰᠡᠨ ᠨᠡᠷ᠎ᠡ ᠦᠭᠴᠢᠬᠡᠪᠡ᠃ ᠲᠤᠤᠷ ᠬᠦᠷᠢᠶ᠎ᠡ ᠴᠦᠬᠡᠨ ᠪᠠᠶᠢᠬᠰᠠᠨ ᠴᠠᠭ᠂ ᠬᠤᠶᠠᠷ ᠲᠠᠯ᠎ᠠ ᠠᠴᠠ ᠮᠠᠯᠳᠠᠵᠤ ᠲᠤᠮᠳᠠ ᠨᠢ ᠰᠢᠪᠠᠷ ᠤᠪᠤᠭᠠᠯᠠᠨ ᠨᠦᠳᠦᠵᠤ ᠪᠤᠰᠬᠠᠬᠰᠠᠨ ᠲᠠᠷᠢᠶᠠᠨ ᠰᠤᠪᠠᠭ ᠢ ᠮᠠᠨ ᠤ ᠬᠢᠨ ᠰᠤᠮᠤᠨ  ᠭᠤᠤ ᠬᠡᠳᠡᠭ᠃ ᠬᠠᠳᠠᠭᠤ ᠲᠤᠭᠤᠢ ᠲᠤᠯᠤᠭᠠᠢ ᠲᠠᠢ᠂ ᠭᠤᠤᠯ ᠨᠢᠷᠤᠭᠤ  ᠪᠠᠷ ᠢᠶᠠᠨ ᠰᠤᠳᠠᠯ ᠮᠡᠳᠤ ᠰᠢᠯᠤᠭᠤᠨ ᠵᠢᠷᠤᠭᠠᠰᠤ ᠲᠠᠢ᠂ ᠰᠤᠮᠤ ᠴᠠᠬᠢᠯᠭᠠᠨ ᠰᠢᠭ᠋ ᠲᠥᠷᠬᠡᠨ ᠬᠢᠯᠠᠰᠴᠤ ᠠᠷᠢᠯᠳᠠᠭ ᠰᠤᠮᠤᠨ ᠴᠠᠭᠠᠨ ᠨᠡᠷᠡᠳᠤ ᠮᠤᠭᠠᠢ ᠪᠠᠶᠢᠳᠠᠭ᠃ ᠲᠤᠮᠤᠭ ᠴᠤᠤᠳᠤ ᠬᠦᠯᠦᠭ᠂ ᠪᠤᠰᠤᠨ ᠰᠤᠮᠤᠳᠠᠳᠠᠭ ᠮᠤᠭᠠᠢ᠂ ᠠᠰᠬᠠᠨ ᠰᠢᠯᠦᠭᠤᠨ ᠰᠤᠪᠠᠭ ᠪᠦᠬᠦᠨ ᠢ ᠰᠠᠨᠠᠵᠤ ᠤᠯᠵᠤ ᠤᠤ ᠪᠤᠤ ᠮᠠᠳᠠ᠂ ᠶᠠᠭᠤ ᠴᠤ ᠬᠡᠰᠡᠨ ᠡᠨᠡ ᠬᠤᠷᠠᠭ᠎ᠠ ᠪᠤᠯ ᠰᠤᠮᠤᠨ ᠴᠠᠭᠠᠨ ᠨᠡᠷ᠎ᠡ ᠤᠯᠬᠤ ᠳᠤ ᠪᠠᠨ ᠲᠠᠭᠠᠷᠠᠨ᠎ᠠ ᠬᠡᠵᠤ ᠪᠤᠳᠤᠬᠰᠠᠨ ᠨᠢ ᠯᠠᠪᠳᠠᠢ᠃ ᠡᠨᠡ ᠮᠠᠭᠤ ᠲᠤᠷᠠᠩᠬᠠᠢ ᠬᠤᠷᠠᠭ᠎ᠠ ᠳᠤ ᠰᠤᠮᠤᠨ ᠴᠠᠭᠠᠨ ᠨᠡᠷ᠎ᠡ ᠥᠭᠳᠡᠭ ᠬᠡᠵᠤ ᠠᠬ᠎ᠠ ᠨᠠᠳᠠ ᠶᠢ ᠱᠤᠬᠯᠠᠨ᠎ᠠ᠃ ᠰᠤᠮᠤ ᠰᠢᠭ᠋ ᠲᠡᠰᠢᠨ ᠬᠠᠯᠢᠳᠠᠭ ᠠᠷᠭᠠᠯᠢ ᠤᠭᠠᠯᠵᠠ ᠠᠷᠠᠢ ᠴᠤ ᠡᠶᠢᠮᠦ ᠶᠠᠭᠤᠮ᠎ᠠ ᠪᠢᠰᠢ ᠭᠡᠵᠦ ᠡᠯᠡᠭᠯᠡᠵᠦ ᠪᠠᠶᠢᠬᠤ ᠨᠢ ᠢᠯᠡᠭᠡᠨ᠃ ᠡᠬᠡᠴᠢ ᠮᠢᠨᠦ ᠴᠠᠭᠠᠳᠠᠢ ᠲᠣᠭᠤᠯᠳᠠᠭ ᠥᠬᠡᠢ ᠨᠠᠶᠢᠷ ᠲᠠᠯᠪᠢᠳᠠᠭ ᠠᠴᠠ ᠪᠤᠯᠪᠠ ᠤᠤ ᠡᠰᠡᠬᠦᠯ᠎ᠡ ᠮᠢᠨᠦ ᠵᠠᠷᠢᠮ ᠵᠦᠩ ᠰᠤᠪᠢᠩ ᠵᠦᠪ ᠪᠤᠯᠳᠠᠭ  ᠲᠤ ᠢᠳᠡᠬᠡᠭᠰᠡᠨ ᠴᠤ ᠪᠣᠯᠪᠠ ᠤᠤ︖ ᠠᠮᠠ ᠪᠠᠨ ᠪᠢᠳᠡᠬᠦᠯᠡᠨ‌ᠢᠨᠢᠶᠡᠪᠡ᠃         ᠬᠠᠪᠤᠷ ᠤᠨ ᠰᠡᠬᠦᠯᠴᠢ ᠶᠢᠨ ᠨᠢᠬᠡᠨ ᠦᠷᠯᠦᠬᠡ᠂ ᠬᠤᠷᠰᠢᠶ᠎ᠠ ᠲᠤᠭᠤᠶᠢᠯᠠᠩ ᠤᠨ ᠨᠡᠯᠢᠶᠡᠳ ᠬᠦᠮᠦᠰ ᠬᠡᠷ ᠲᠤ ᠴᠤᠬᠯᠠᠷᠠᠪᠠ᠃ ᠮᠠᠨ ᠤ ᠬᠢᠨ ᠪᠤᠭ ᠮᠠᠯ ᠠᠷᠪᠢᠳᠴᠤ ᠬᠤᠷᠠᠭ᠎ᠠ ᠢᠰᠢᠬᠡ ᠲᠠᠢ ᠪᠠᠨ ᠲᠠᠪᠤ ᠵᠢᠷᠭᠤᠭᠠᠨ ᠵᠠᠭᠤ ᠦᠩᠬᠡᠷᠡᠬᠡᠬᠡᠳ ᠪᠤᠰᠤᠤᠨ ᠲᠤ ᠰᠦᠷᠦᠭ ᠬᠠᠷᠢᠭᠤᠯᠠᠭᠤᠯᠬᠤ ᠪᠠᠷ ᠪᠤᠯᠤᠬᠰᠠᠨ ᠢ ᠨᠤᠶᠢᠷ ᠠᠴᠠ ᠲᠥᠩᠬᠡᠵᠢ ᠰᠡᠷᠡᠭᠰᠡᠨ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠠᠰᠠᠭᠤᠵᠤ ᠴᠤ ᠠᠮᠵᠢᠬᠰᠠᠨ ᠦᠬᠡᠢ ᠭᠠᠲᠠᠭᠰᠢ ᠬᠦᠶᠦᠪᠡ᠃ ᠬᠤᠨᠢ ᠢᠮᠠᠭ᠎ᠠ᠂ ᠬᠤᠷᠠᠭ᠎ᠠ ᠢᠰᠢᠬᠡ ᠨᠢ ᠲᠤᠰ ᠲᠤᠰ  ᠲᠤ ᠪᠠᠨ ᠬᠠᠰᠢᠶᠠᠨ ᠳᠤ ᠬᠤᠷᠢᠭᠠᠳᠠᠢ᠂ ᠨᠢᠬᠡ ᠲᠦᠯ ᠢ ᠨᠢ ᠲᠠᠪᠠᠷᠠᠵᠤ ᠭᠠᠷᠭᠠᠪᠠᠯ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠡᠬᠡ ᠶᠢ ᠨᠢ ᠲᠤᠳᠤᠷ᠎ᠠ ᠬᠤᠷᠤᠭᠠᠨ ᠠᠴᠠ ᠵᠢᠰᠦᠯᠡᠵᠤ ᠭᠠᠷᠭᠠᠵᠤ ᠪᠠᠶᠢᠪᠠ᠃         — —  ᠶᠤᠰᠤᠳᠠᠢ ᠬᠢᠷᠠᠬᠠᠢ ᠰᠡᠷᠬᠦᠯᠡᠩ ᠪᠢᠴᠢᠬᠠᠨ ᠬᠤᠨᠢᠴᠢᠨ ᠪᠠᠶᠢᠨ᠎ᠠ᠃ ᠡᠨᠡ ᠤᠯᠠᠨ‌ᠬᠤᠷᠠᠭ᠎ᠠ ᠢᠰᠢᠬᠡᠨ ᠲᠠᠭᠤ ᠪᠠᠷ ᠨᠢ ᠲᠠᠨᠢᠵᠤ ᠡᠬᠡ ᠮᠠᠯ ᠶᠢ ᠨᠢ ᠢᠯᠭᠠᠵᠤ ᠰᠠᠯᠭᠠᠵᠤ ᠭᠠᠷᠬᠤ ᠬᠡᠵᠤ ᠭᠠᠶᠢᠬᠠᠮᠠᠷ ᠶᠤᠮ ᠡ ᠬᠡᠵᠤ ᠮᠠᠯᠵᠢᠯ ᠤᠨ ᠬᠤᠷᠰᠢᠶᠠᠨ ᠡᠪᠤᠬᠡᠵᠢᠶᠡᠷ ᠲᠠᠷᠤᠭ᠎ᠠ ᠮᠠᠬᠳᠠᠵᠤ ᠭᠠᠷᠬᠤ ᠳᠤ᠄    — — ᠡᠨᠡ ᠬᠡᠳᠤᠨ ᠬᠡᠤᠬᠡᠳ ᠪᠠᠶᠢᠬᠤ ᠦᠬᠡᠢ ᠪᠤᠯ ᠪᠢᠳᠠ ᠦᠴᠢᠨᠡᠬᠡᠨ ᠤᠯᠠᠨ ᠮᠠᠯ ᠬᠠᠷᠠᠵᠤ ᠮᠠᠨᠳᠤ ᠰᠦᠷᠦᠭ ᠤᠨ ᠡᠵᠡᠨ ᠪᠤᠯᠵᠤ ᠲᠡᠶᠢᠯᠬᠦ ᠦᠬᠡᠢ ᠬᠡᠵᠤ ᠡᠵᠢ ᠪᠠᠷᠳᠠᠮ ᠨᠢ ᠠᠷᠭ᠎ᠠ ᠦᠬᠡᠢ ᠬᠡᠯᠡᠨ᠎ᠡ᠃     ᠰᠦᠷᠦᠭ ᠰᠠᠯᠭᠠᠨ ᠭᠠᠳᠠᠬᠰᠢ ᠲᠠᠭᠤᠵᠤ ᠡᠬᠢᠯᠡᠬᠦ ᠳᠤ ᠡᠨᠡ ᠶᠡᠭᠡ ᠤᠶᠢᠮᠡᠬᠡᠨ ᠱᠤᠤᠬᠢᠶᠠᠨ ᠳᠤ ᠲᠠᠷᠢᠬᠢ ᠨᠢ ᠢᠰᠦᠭᠰᠡᠨ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠬᠡᠳᠤᠨ ᠬᠠᠶᠢᠷᠠᠳᠠᠢ ᠬᠤᠨᠢ ᠬᠤᠷᠠᠭ᠎ᠠ ᠨᠢ ᠠᠶᠢᠯ ᠳᠤ ᠰᠢᠯᠵᠢᠬᠦ ᠪᠤᠯᠤᠬᠰᠠᠨ ᠢ ᠬᠡᠨᠡᠳᠳᠡ ᠰᠡᠷᠡᠪᠡ᠃ ᠮᠠᠬᠳᠠᠭᠤᠯᠵᠤ ᠬᠦᠬᠡᠷᠴᠤ ᠪᠠᠶᠢᠬᠰᠠᠨ ᠬᠤᠶᠠᠷ ᠨᠢᠯᠪᠤᠰᠤ ᠲᠤᠰᠤᠯᠠᠭᠤᠯᠵᠤ ᠠᠪᠤ ᠡᠵᠢ  ᠶᠢ ᠪᠠᠨ ᠬᠤᠷᠮᠤᠶᠢᠳᠠᠪᠠᠯ᠂ ᠨᠠᠷᠠᠨ ᠠᠴᠠ ᠡᠮᠤᠨ᠎ᠠ ᠮᠠᠯ ᠢᠶᠠᠨ ᠪᠡᠯᠴᠢᠬᠡᠬᠦ ᠬᠡᠵᠤ ᠶᠠᠭᠠᠷᠠᠵᠤ ᠪᠠᠶᠢᠬᠰᠠᠨ ᠠᠪᠤ ᠡᠵᠢ ᠮᠢᠨᠢ ᠴᠤ ᠰᠡᠳᠬᠢᠯ ᠤᠶᠠᠷᠠᠵᠤ᠂ ᠬᠤᠯᠠᠳᠠᠬᠰᠠᠨ ᠬᠤᠨᠢ ᠶᠢ ᠲᠠᠬᠢᠨ ᠴᠤᠬᠯᠠᠭᠤᠯᠵᠤ᠂ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠰᠤᠮᠤᠨ ᠴᠠᠭᠠᠨ᠂ ᠰᠢᠷ᠎ᠠ ᠬᠠᠯᠵᠠᠨ ᠬᠤᠷᠠᠭᠠᠳᠠᠨ ᠢᠶᠠᠨ ᠰᠤᠯᠢᠵᠤ ᠦᠯᠡᠳᠡᠬᠡᠬᠡᠳ ᠰᠠᠨᠠᠭ᠎ᠠ ᠠᠮᠠᠷᠠᠵᠤ ᠪᠢᠯᠡ᠃         ᠲᠡᠷᠡ ᠵᠢᠯ ᠤᠨ ᠭᠠᠩ ᠬᠠᠭᠰᠠᠷᠭᠠᠨ ᠬᠡᠵᠤ ᠴᠢᠷᠠᠢ ᠠᠯᠳᠠᠭᠤᠯᠤᠮ᠎ᠠ᠃ ᠵᠤᠨ ᠤ ᠠᠭᠤᠷ  ᠪᠤᠯᠴᠢᠬᠠᠬᠰᠠᠨ ᠪᠠᠶᠢᠳᠠᠯ᠎ᠠ ᠪᠠᠯᠠᠷ ᠡᠷᠢᠶᠡᠯᠡᠩ ᠢᠶᠠᠷ ᠨᠤᠭᠤᠭᠠᠨ ᠦᠩᠬᠡ ᠲᠠᠮᠠᠢ ᠬᠠᠷᠠᠬᠳᠠᠬᠤ ᠦᠬᠡᠢ᠃ ᠬᠡᠰᠡᠨ ᠴᠤ ᠰᠤᠮᠤᠨ ᠴᠠᠭᠠᠨ ᠡᠪᠡᠰᠤ ᠪᠤᠷᠳᠤᠭᠠᠨ ᠳᠤ ᠤᠷᠤᠭᠠᠳ ᠤᠳᠠᠵᠤ ᠡᠳᠤᠷ ᠠᠴᠠ ᠡᠳᠤᠷ ᠲᠤᠮᠤᠷᠠᠵᠤ ᠪᠠᠶᠢᠯ᠎ᠠ᠃ ᠨᠢᠬᠡ ᠡᠳᠤᠷ ᠰᠤᠮᠤᠨ ᠴᠠᠭᠠᠨ ᠡᠬᠡ ᠲᠠᠢ ᠪᠠᠨ ᠤᠰᠤᠨ ᠳᠤ ᠢᠷᠡᠭᠰᠡᠨ ᠦᠬᠡᠢ᠃ ᠲᠠᠷᠠᠭ᠎ᠠ ᠡᠳᠤᠷ ᠨᠢ ᠪᠢᠳᠠ ᠪᠡᠯᠴᠢᠬᠡᠷ ᠤᠨ ᠦᠵᠦᠬᠦᠷ ᠬᠦᠷᠳᠡᠯ᠎ᠡ ᠡᠷᠢᠵᠤ ᠠᠶᠢᠮᠠᠭ ᠬᠠᠵᠠᠭᠤ ᠪᠠᠷ ᠡᠷᠢᠯ ᠰᠤᠷᠠᠭ ᠲᠠᠯᠪᠢᠭᠠᠳ ᠤᠯᠵᠤ ᠬᠦᠴᠦᠷᠦᠭᠰᠡᠨ ᠦᠬᠡᠢ᠃ ᠪᠤᠷᠤᠭᠠᠨ ᠬᠤᠷ᠎ᠠ ᠦᠬᠡᠢ᠂ ᠣᠰᠤ ᠵᠠᠳᠠᠭᠠᠢ ᠪᠦᠷ ᠰᠢᠷᠬᠢᠭᠰᠡᠨ ᠴᠠᠭ ᠲᠤ ᠮᠢᠨᠥ ᠮᠠᠭᠤ ᠰᠤᠮᠤᠨ ᠴᠠᠭᠠᠨ ᠠᠩᠭᠠᠵᠤ ᠰᠤᠶᠢᠳ ᠪᠤᠯᠵᠤ ᠪᠠᠶᠢᠯᠬᠦᠢ ᠬᠡᠵᠤ ᠪᠤᠳᠤᠭᠠᠳ ᠡᠰᠡᠯ᠎ᠡ ᠤᠬᠢᠯᠠᠬᠤ ᠰᠢᠬᠠᠯ᠎ᠠ᠃         — — ᠦᠨᠡᠭᠡ ᠰᠢᠪᠠᠭᠤ ᠰᠢᠬᠦᠷᠴᠢᠬᠡᠪᠡ ᠤᠤ︖ ᠲᠡᠬᠡᠪᠡᠯ ᠡᠬᠡ ᠨᠢ ᠢᠷᠡᠬᠦ ᠤᠴᠢᠷᠳᠡᠢ ᠳ᠋ᠠ︕ ᠬᠡᠵᠤ ᠡᠵᠢ ᠬᠡᠯᠡᠭᠰᠡᠨ ᠢᠶᠠᠨ ᠤᠷᠤᠭᠤᠯ ᠢᠶᠠᠨ ᠲᠠᠬᠯᠠᠵᠤ᠄         — — ᠡᠨᠡ ᠠᠮᠠ ᠬᠡᠵᠤ ᠪᠡᠯᠬᠡ ᠲᠠᠮᠪᠡᠷᠢᠯ ᠦᠬᠡᠢ ᠦᠬᠡ ᠬᠡᠯᠡᠵᠤ ᠬᠦᠦ ᠪᠠᠨ ᠠᠶᠤᠯᠭᠠᠴᠢᠬᠠᠪᠠ ᠤᠤ ᠬᠡᠮᠡᠨ ᠲᠤᠯᠤᠭᠠᠢ ᠶᠢ ᠮᠢᠨᠢ ᠵᠦᠬᠡᠯᠡᠨ ᠢᠯᠪᠢᠪᠡ᠃         — — ᠠᠶ᠎ᠠ︕ ᠮᠢᠨᠥ ᠡᠨᠡ ᠮᠠᠷᠳᠠᠮᠳᠠᠭᠠᠢ ᠬᠡᠳᠡᠭ ᠨᠢ᠃ ᠰᠤᠮᠤᠨ ᠴᠠᠭᠠᠨ ᠤ ᠡᠬᠡ ᠨᠢ ᠬᠤᠷᠠᠭ᠎ᠠ ᠪᠠᠶᠢᠬᠤ ᠳᠤ ᠪᠠᠨ ᠪᠠᠶᠠᠨ ᠠᠪᠠᠭ᠎ᠠ ᠶᠢᠨ ᠬᠢ ᠠᠴᠠ ᠨᠢ ᠥᠬᠡᠷ ᠢᠶᠠᠷ ᠰᠤᠯᠢᠬᠳᠠᠵᠤ ᠢᠷᠡᠭᠰᠡᠨ ᠶᠤᠮ᠃ ᠬᠦᠬᠡᠷᠦᠬᠦᠢ᠂ ᠲᠠᠨᠳᠠ ᠶᠠᠪᠤᠬᠤ ᠨᠢ ᠲᠠᠭᠠᠷᠠᠨ᠎ᠠ ᠶᠠᠭᠠᠬᠢᠬᠤᠪ︕ ᠬᠡᠵᠤ ᠡᠵᠢ‌ᠤᠬᠠᠭᠠᠨ ᠲᠦᠬᠦᠬᠡ ᠨᠢ ᠤᠯᠳᠠᠬᠤ ᠦᠬᠡᠢ ᠶᠠᠭᠤᠮ᠎ᠠ ᠶᠠᠷᠢᠪᠠ᠃         — — ᠬᠤᠷᠠᠭ᠎ᠠ ᠪᠠᠶᠢᠵᠤ ᠪᠠᠶᠢᠭᠠᠳ ᠪᠡᠯᠴᠢᠬᠡᠷ ᠢᠶᠠᠨ ᠲᠠᠨᠢᠳᠠᠭ ᠶᠤᠮ ᠤᠤ︖ ᠬᠡᠵᠤ ᠪᠢ ᠢᠳᠡᠬᠡᠵᠤ ᠶᠠᠳᠠᠨ ᠠᠰᠠᠭᠤᠬᠤ ᠳᠤ ᠡᠵᠢ᠄         — — ᠮᠠᠯ ᠬᠡᠵᠤ ᠮᠡᠷᠬᠡᠨ ᠪᠠᠶᠢᠳᠠᠭ ᠰᠢᠤ᠃ ᠬᠡᠳᠡᠰᠤᠨ ᠳᠤ ᠪᠠᠶᠢᠬᠰᠠᠨ ᠴᠤ ᠨᠤᠳᠤᠭ ᠢᠶᠠᠨ ᠲᠠᠨᠢᠳᠠᠭ ᠰᠢᠤ᠃ ᠠᠬ᠎ᠠ ᠶᠢ ᠴᠢᠨᠢ ᠪᠠᠶᠠᠨ ᠠᠪᠠᠭ᠎ᠠ ᠶᠢᠨ ᠳᠤ  ᠨᠢ ᠶᠠᠪᠤᠭᠤᠯᠤᠶ᠎ᠠ ᠬᠡᠯ᠎ᠡ᠃ ᠪᠢ ᠠᠬ᠎ᠠ ᠶᠢ ᠲᠠᠭᠠᠵᠤ ᠶᠠᠪᠤᠶ᠎ᠠ ᠬᠡᠪᠠᠯ ᠠᠬ᠎ᠠ ᠨᠠᠳᠠ ᠶᠢ ᠰᠠᠭᠠᠳ ᠬᠡᠵᠤ ᠲᠠᠭᠠᠭᠤᠯᠬᠤ ᠲᠤᠷ᠎ᠠ ᠦᠬᠡᠢ ᠪᠠᠶᠢᠪᠠ᠃ ᠪᠢ ᠠᠬ᠎ᠠ ᠶᠢ ᠴᠢᠷᠡᠶᠢᠳᠠᠵᠤ᠂ ᠡᠵᠢ ᠶᠢᠨ ᠬᠤᠷᠮᠤᠢ ᠠᠴᠠ ᠵᠢᠭᠤᠷᠠᠨ ᠭᠤᠶᠤᠬᠤ ᠳᠤ ᠠᠬ᠎ᠠ ᠲᠤᠷ᠎ᠠ ᠲᠠᠢ ᠲᠤᠷ᠎ᠠ ᠦᠬᠡᠢ ᠵᠦᠪᠰᠢᠶᠡᠷᠡᠵᠤ ᠡᠵᠢ ᠤᠷᠤᠭᠤ ᠬᠠᠷᠠᠪᠠ᠃ ᠡᠵᠢ ᠪᠠᠭ᠎ᠠ ᠤᠳᠠᠰᠬᠢᠵᠤ ᠪᠠᠶᠢᠭᠠᠳ           — — ᠵᠠ ᠲᠡᠬᠡᠪᠡᠯ ᠦᠳᠡᠰᠢ ᠰᠠᠶᠢᠨ ᠤᠨᠳᠠᠵᠤ ᠠᠪᠤᠭᠠᠳ ᠮᠠᠷᠭᠠᠰᠢ ᠦᠷᠯᠦᠬᠡ ᠡᠷᠳᠡ ᠶᠢᠨ ᠰᠠᠷᠢᠬᠦᠨ ᠢᠶᠠᠷ ᠶᠠᠪᠤ᠃ ᠲᠦᠴᠢᠨ ᠭᠠᠵᠠᠷ ᠬᠤᠯᠠ‌‍ᠰᠢᠤ᠂ ᠵᠠᠮ  ᠳᠤ ᠪᠠᠨ ᠠᠶᠢᠯ ᠤᠷᠤᠵᠤ ᠤᠰᠤ ᠴᠠᠢ ᠰᠠᠶᠢᠨ ᠤᠤᠭᠤᠵᠤ ᠪᠠᠢ ᠬᠡᠵᠤ ᠠᠬ᠎ᠠ ᠳᠤ ᠵᠠᠬᠢᠯ᠎ᠠ᠃         ᠨᠠᠷᠠ ᠭᠠᠷᠬᠤ ᠳᠤ ᠠᠬ᠎ᠠ ᠪᠢᠳᠠ ᠬᠤᠶᠠᠷ ᠡᠮᠡᠬᠡᠯᠳᠤ ᠶᠢᠨ ᠮᠠᠩᠬ᠎ᠠ ᠶᠢ ᠠᠷᠤ ᠳᠤ ᠪᠠᠨ ᠬᠤᠯᠠ ᠤᠷᠬᠢᠵᠤ᠂ ᠬᠠᠷᠬᠢᠯ ᠤᠨ ᠰᠢᠯᠢ ᠲᠠᠪᠠᠵᠤ ᠡᠬᠢᠯᠡᠪᠡ᠃ ᠬᠤᠯᠠ ᠭᠠᠵᠠᠷ ᠶᠠᠪᠤᠵᠤ ᠦᠵᠡᠭᠡ ᠦᠬᠡᠢ ᠪᠢ ᠨᠠᠷᠠ ᠲᠡᠬᠡᠭᠰᠢ ᠰᠤᠪᠤᠷᠠᠬᠤ ᠳᠤ ᠶᠠᠳᠠᠷᠠᠵᠤ ᠲᠤᠶᠢᠯᠳᠠᠬᠤ ᠬᠡᠴᠡᠬᠦᠦ ᠪᠤᠯᠵᠤ ᠢᠷᠡᠪᠡ᠃ ᠠᠬ᠎ᠠ ᠪᠠᠨ ᠰᠢᠨᠠᠯᠭᠠᠵᠤ ᠢᠷᠡᠭᠰᠡᠨ ᠪᠤᠯᠬᠤᠷ ᠰᠢᠳᠤ ᠵᠠᠭᠤᠵᠤ ᠬᠡᠯᠳᠤᠷᠡᠵᠤ ᠯᠡ ᠪᠠᠶᠢᠪᠠ᠃ ᠰᠢᠯᠢ ᠶᠢᠨ ᠤᠷᠤᠢ ᠲᠠᠪᠠᠵᠤ ᠭᠠᠷᠬᠤ ᠳᠤ ᠭᠠᠩ ᠲᠠᠢ ᠵᠢᠯ ᠳᠤ ᠪᠠᠶᠢᠮ᠎ᠠ ᠦᠬᠡᠢ ᠤᠰᠤ ᠵᠠᠳᠠᠭᠠᠢ ᠮᠡᠯᠳᠡᠶᠢᠵᠤ᠂ ᠦᠩ ᠰᠢᠮᠡᠯᠢᠭ ᠨᠤᠭᠤᠭᠠᠨ ᠴᠠᠶᠢᠳᠠᠮ ᠬᠠᠷᠠᠭᠠᠨ ᠳᠤ ᠲᠤᠳᠤᠷᠠᠪᠠ᠃ ᠶᠠᠮᠠᠷ ᠭᠠᠩ ᠴᠠᠩ ᠲᠠᠢ ᠵᠢᠯ ᠬᠡᠳ ᠤᠰᠤ ᠴᠢᠬᠢᠭ ᠠᠯᠳᠠᠳᠠᠭ ᠦᠬᠡᠢ᠂ ᠲᠠᠭᠤᠨ ᠳᠤ ᠭᠠᠷᠳᠠᠭ ᠠᠯᠳᠠᠨ ᠭᠠᠳᠠᠰᠤᠨ ᠴᠠᠶᠢᠳᠠᠮ ᠨᠢ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠬᠦᠷᠳᠡᠯ᠎ᠡ ᠦᠷᠬᠦᠯᠵᠢᠯᠡᠵᠤ᠂ ᠬᠠᠷᠠᠭ᠎ᠠ ᠶᠢ ᠪᠠᠶᠠᠰᠬᠠᠵᠤ ᠴᠢᠩᠭᠠᠵᠤ ᠶᠠᠳᠠᠷᠠᠬᠰᠠᠨ ᠢ ᠬᠤᠷᠤᠮᠬᠠᠨ ᠵᠠᠭᠤᠷ᠎ᠠ ᠮᠠᠷᠳᠠᠭᠤᠯᠪᠠ᠃ ᠤᠳᠠᠯ ᠦᠬᠡᠢ ᠶᠡᠭᠡ ᠡᠷᠳᠡᠨ ᠤ ᠪᠠᠯᠪᠠᠷᠠᠵᠤ ᠬᠠᠭᠠᠷᠠᠬᠰᠠᠨ  ᠬᠡᠯᠳᠡᠷᠬᠡᠢ ᠲᠤᠭᠤᠰᠭ᠎ᠠ ᠴᠢᠯᠠᠭᠤ ᠯᠠ ᠦᠯᠡᠳᠡᠭᠰᠡᠨ ᠰᠤᠪᠤᠷᠭ᠎ᠠ ᠶᠢᠨ ᠬᠤᠭᠤᠯᠠᠢ ᠬᠡᠭᠴᠢ ᠲᠠᠰᠢᠭᠤ ᠭᠠᠵᠠᠷ ᠦᠩᠬᠡᠷᠡᠨ ᠦᠳᠡ ᠲᠤᠮᠳᠠ ᠪᠤᠯᠬᠤ ᠳᠤ ᠴᠢᠯᠠᠭᠤᠨ ᠤᠪᠤᠭ᠎ᠠ ᠶᠢᠨ ᠬᠤᠷᠮᠤᠢ ᠬᠦᠷᠪᠠ᠃ ᠲᠠᠬᠢᠭᠠᠳ ᠯᠠ ᠴᠢᠩᠭᠠᠵᠤ ᠶᠠᠳᠠᠷᠠᠨ ᠬᠦᠯ ᠢᠶᠠᠨ ᠡᠷᠬᠦᠵᠤ ᠲᠠᠭᠠᠭᠠᠬᠤ ᠦᠬᠡᠢ ᠬᠡᠮᠵᠢᠶᠠᠨ ᠳᠤ ᠲᠤᠯᠳᠠᠯ᠎ᠠ᠂ ᠵᠤᠯ ᠲᠠᠭᠠᠷᠠᠵᠤ ᠨᠢᠬᠡ ᠠᠶᠢᠯ ᠤᠨ ᠪᠠᠷ᠎ᠠ ᠬᠠᠷᠠᠬᠳᠠᠪᠠ᠃ ᠬᠡᠷ ᠲᠤ ᠤᠷᠤᠬᠤ ᠳᠤ ᠬᠠᠨᠵᠤᠨ ᠭᠤᠤᠯ ᠳᠤ ᠬᠡᠳᠤᠨ ᠬᠡᠤᠬᠡᠳ ᠤᠨᠳᠠᠵᠤ᠂ ᠰᠢᠷᠡᠬᠡᠨ ᠲᠡᠬᠡᠷ᠎ᠡ ᠲᠤᠮᠤ ᠰᠠᠪᠠ ᠲᠠᠢ ᠴᠠᠢ ᠬᠦᠷᠦᠬᠡᠵᠤ ᠲᠠᠯᠪᠢᠬᠰᠠᠨ ᠢ ᠬᠡᠳᠡᠰᠤ ᠭᠠᠷᠳᠠᠯ᠎ᠠ ᠤᠤᠭᠤᠵᠤ ᠠᠪᠤᠭᠠᠳ᠂ ᠠᠶᠢᠯ ᠤᠨ ᠬᠦᠮᠦᠨ ᠳᠤ ᠮᠠᠨᠳᠤ ᠣᠰᠤ ᠮᠡᠳᠡᠬᠡᠳ ᠭᠠᠷᠬᠤ ᠬᠡᠰᠡᠨ ᠴᠤ ᠨᠠᠳᠠ ᠲᠠᠢ ᠨᠠᠰᠤ ᠪᠠᠷᠤᠭ ‍ᠦᠨ‌ᠨᠢᠬᠡ ᠬᠡᠤᠬᠡᠳ ᠨᠢᠳᠤ ᠪᠠᠨ ᠵᠠᠪᠰᠠᠷᠯᠠᠵᠤ ᠪᠢᠳᠠ ᠬᠤᠶᠠᠷ ᠢ ᠬᠠᠷᠠᠵᠤ ᠠᠪᠤᠭᠠᠳ ᠶᠡᠭᠡ ᠬᠠᠯᠠᠭᠤᠨ ᠦᠳᠡ ᠶᠢᠨ ᠨᠤᠶᠢᠷ ᠲᠤ ᠪᠠᠨ ᠲᠡᠶᠢᠯᠳᠡᠵᠤ ᠡᠷᠬᠢᠵᠤ ᠤᠨᠳᠠᠬᠰᠠᠨ ᠪᠤᠯᠬᠤᠷ ᠰᠡᠮᠬᠡᠨ ᠭᠠᠷᠴᠤ ᠶᠠᠪᠤᠪᠠ᠃ ᠶᠡᠬᠡᠮᠡᠳ ᠨᠢ ᠡᠵᠡᠬᠦᠢ ᠪᠠᠶᠢᠬᠰᠠᠨ ᠴᠢᠷᠡᠢ᠃ ᠬᠠᠷᠢᠨ ᠬᠤᠳᠳᠤᠭ ᠤᠨ ᠲᠡᠷᠬᠡᠳᠡ ᠬᠦᠷᠬᠦ ᠳᠤ ᠰᠠᠶ᠋ᠢᠬᠠᠨ ᠤᠤᠭᠤᠬᠰᠠᠨ ᠴᠠᠢ ᠬᠠᠮᠢᠭ᠎ᠠ ᠤᠷᠤᠴᠢᠬᠠᠵᠤ ᠬᠡᠮᠡᠷ ᠨᠡᠩ ᠶᠡᠭᠡ ᠪᠠᠷ ᠴᠢᠩᠭᠠᠵᠤ᠂ ᠢᠷᠤᠭᠠᠷ ᠨᠢ ᠦᠵᠡᠭᠳᠡᠬᠦ ᠦᠬᠡᠢ ᠠᠶᠤᠳᠠᠰᠤ ᠬᠦᠷᠬᠡᠮ᠎ᠡ ᠬᠠᠳᠠᠨ ᠬᠤᠳᠳᠤᠭ ᠲᠤ ᠴᠢᠷᠭ᠎ᠠ ᠶᠢ ᠨᠢ ᠤᠳᠠᠳᠠᠯ᠎ᠠ ᠡᠷᠬᠢᠬᠦᠯᠵᠤ ᠬᠤᠪᠤᠭᠤ ᠪᠠᠷ ᠲᠠᠰ ᠬᠦᠢᠳᠡᠨ ᠤᠰᠤ ᠶᠢ  ᠨᠢ ᠬᠠᠨᠤᠳᠠᠯ᠎ᠠ ᠤᠤᠭᠤᠵᠤ ᠪᠢᠯᠡ᠃ ᠰᠢᠯᠢ ᠵᠠᠬᠠᠳᠠᠬᠰᠠᠨ ᠬᠤᠳᠳᠤᠭ ᠤᠨ ᠤᠰᠤ ᠬᠡᠵᠤ ᠤᠨᠴᠠᠭᠠᠢ ᠪᠠᠶᠢᠬᠰᠠᠨ ᠤᠤ︖ ᠲᠤᠶᠢᠯᠳᠠᠵᠤ ᠬᠡᠳᠤᠷᠡᠭᠰᠡᠨ ᠬᠦᠮᠦᠨ ᠳᠤ ᠲᠠᠶᠢᠮᠤ ᠪᠠᠶᠢᠬᠰᠠᠨ ᠤᠤ︖ ᠪᠤᠦ ᠮᠡᠳᠡ᠃ ᠤᠰᠤ ᠬᠡᠳᠤᠢ ᠠᠮᠳᠠᠳᠠᠢ ᠬᠡᠭᠴᠢ ᠶᠢ ᠶᠤᠰᠤᠳᠠᠢ ᠠᠩᠬ᠎ᠠ ᠮᠠᠳᠠᠯ᠎ᠠ᠃         ᠣᠳᠠᠯ ᠦᠬᠡᠢ ᠪᠠᠶᠠᠨ ᠠᠪᠠᠭ᠎ᠠ ᠶᠢᠨ ᠳᠤ ᠬᠦᠷᠪᠡ᠃ ᠨᠢᠬᠡ ᠵᠠᠮ ᠰᠤᠮᠤᠨ ᠴᠠᠭᠠᠨ ᠪᠠᠶᠠᠨ ᠠᠪᠠᠭ᠎ᠠ ᠶᠢᠨ ᠳᠤ ᠪᠠᠶᠢᠬᠤ ᠬᠡᠵᠤ ᠢᠳᠡᠬᠡᠭᠰᠡᠨ ᠦᠬᠡᠢ ᠪᠢᠳᠠ ᠬᠤᠶᠠᠷ ᠤᠨ ᠰᠠᠨᠠᠭ᠎ᠠ ᠢᠯᠡᠬᠦᠴᠡ ᠪᠤᠯᠵᠤ᠂ ᠡᠵᠢ ᠮᠢᠨᠢ ᠶᠤᠰᠤᠳᠠᠢ ᠮᠠᠷᠬᠠᠨ ᠲᠦᠯᠬᠡᠴᠢ ᠪᠤᠯᠬᠤ ᠶᠢ ᠢᠳᠡᠬᠡᠯ᠎ᠡ᠃ ᠬᠡᠳᠤᠬᠡᠨ ᠡᠳᠤᠷ ᠤᠨ ᠲᠤᠳᠤᠷ᠎ᠠ ᠴᠠᠶᠢᠳᠠᠮ ᠤᠨ ᠡᠪᠠᠰᠤᠨ ᠳᠤ ᠦᠩᠬᠡ ᠤᠷᠤᠬᠰᠠᠨ ᠰᠤᠮᠤᠨ ᠴᠠᠭᠠᠨ ᠡᠬᠡ ᠲᠠᠢ ᠪᠠᠨ ᠮᠤᠳᠤᠨ ᠰᠡᠬᠦᠳᠡᠷ ᠲᠤ ᠦᠳᠡᠯᠡᠵᠤ ᠪᠠᠶᠢᠬᠤ ᠶᠢ ᠦᠵᠡᠮᠡᠭᠴᠡ ᠲᠠᠨᠢᠴᠢᠬᠠᠪᠠ᠃ ᠨᠠᠷ᠎ᠡ ᠪᠠᠷ ᠨᠢ ᠲᠠᠭᠤᠳᠠᠬᠤᠯᠠᠷ ᠨᠠᠳᠠ ᠤᠷᠤᠭᠤ ᠬᠦᠶᠤᠨ ᠢᠷᠡᠵᠤ᠂ ᠨᠢᠬᠡ ᠵᠠᠮ ᠬᠠᠯᠠ ᠲᠠᠮᠤ ᠠᠮᠰᠠᠬᠰᠠᠨ ᠢᠶᠠᠨ ᠮᠠᠷᠳᠠᠴᠢᠬᠠᠵᠤ ᠲᠡᠪᠡᠷᠡᠨ ᠦᠨᠦᠰᠴᠤ ᠪᠦᠬᠡᠮ ᠪᠠᠶᠠᠷ ᠬᠦᠷ ᠪᠤᠯᠵᠠᠢ᠃ ᠦᠵᠦᠮ ᠠᠪᠠᠭ᠎ᠠ ᠡᠵᠢ᠄     — — ᠰᠠᠶᠢᠨ ᠪᠡᠯᠴᠢᠬᠡᠷ ᠲᠤ ᠪᠠᠶᠢᠵᠤ ᠪᠠᠶᠢᠭ ᠳ᠋ᠠ᠃ ᠰᠤᠮᠤᠨ ᠴᠠᠭᠠᠨ ᠴᠢᠨᠢ ᠲᠤᠷᠤᠭ ᠬᠤᠨᠢ ᠪᠤᠯᠬᠤ ᠶᠤᠮ ᠪᠠᠶᠢᠨ᠎ᠠ᠃ ᠪᠤᠷᠤᠭᠠᠨ ᠬᠤᠷ᠎ᠠ ᠡᠯᠪᠡᠭ ᠪᠤᠯᠪᠠᠯ ᠢᠷᠡᠵᠤ ᠠᠪᠤᠭᠠᠷᠡᠢ ᠬᠡᠪᠡ᠃ ᠵᠢᠯ ᠠᠴᠠ ᠨᠠᠭᠠᠰᠢ ᠰᠠᠭᠠᠯᠢ ᠰᠦ ᠲᠠᠢ ᠲᠠᠮᠠᠢ ᠵᠤᠯᠭᠠᠭ᠎ᠠ ᠦᠬᠡᠢ ᠪᠢᠳᠠ ᠬᠤᠶᠠᠷ ᠰᠢᠷ᠎ᠠ ᠲᠤᠰᠤᠨ ᠪᠤᠳᠠᠭ᠎ᠠ᠂ ᠪᠤᠴᠠᠯᠭᠠᠬᠰᠠᠨ ᠪᠤᠭᠤᠷᠰᠤᠭ᠂ ᠠᠶᠢᠷᠠᠭ ᠲᠠᠢ ᠨᠤᠬᠤᠬᠰᠠᠨ ᠲᠠᠭᠠᠨ᠎ᠠ ᠪᠠᠷ ᠵᠤᠴᠢᠯᠠᠭᠤᠯᠵᠤ ᠬᠠᠷᠮᠠᠨ ᠳᠤ ᠪᠠᠨ ᠪᠤᠷᠠᠮ ᠴᠢᠪᠠᠭ᠎ᠠ ᠲᠦᠬᠦᠷᠬᠡᠵᠤ ᠠᠪᠤᠭᠠᠳ ᠰᠡᠷᠢᠬᠦᠨ ᠤᠨᠠᠬᠤ ᠳᠤ ᠬᠡᠷ  ᠤᠨ ᠵᠦᠭ ᠰᠡᠳᠬᠢᠯ ᠬᠠᠩᠬᠤᠯᠠᠭᠤᠨ‌‍ᠪᠤᠴᠠᠪᠠ᠃         ᠬᠤᠨᠢ ᠠᠬᠤᠷᠯᠠᠵᠤ ᠲᠠᠭᠤᠰᠤᠬᠰᠠᠨ ᠬᠤᠶᠢᠨ᠎ᠠ ᠨᠢᠬᠡ ᠡᠳᠤᠷ ᠰᠡᠳᠡᠷᠯᠡᠭᠰᠡᠨ ᠬᠤᠨᠢ ᠰᠢᠭ᠋ ᠲᠤᠰᠤ ᠲᠠᠭᠠᠪᠤᠷᠢᠯᠠᠬᠰᠠᠨ ᠵᠤᠵᠠᠭᠠᠨ ᠨᠣᠣᠰᠤ ᠲᠠᠢ ᠬᠤᠶᠠᠷ ᠬᠤᠨᠢ ᠬᠤᠳᠳᠤᠭ ᠲᠡᠬᠡᠷ᠎ᠡ ᠢᠷᠡᠵᠤ᠂ ᠪᠢᠳᠠ ᠬᠡᠳᠤᠬᠦᠯᠡ ᠤᠰᠤ ᠬᠢᠬᠦ ᠪᠠᠷ ᠬᠦᠷᠬᠦ ᠳᠤ ᠬᠠᠷᠢᠨ‌‍ᠰᠤᠮᠤᠨ ᠴᠠᠭᠠᠨ ᠡᠬᠡ ᠲᠠᠢ ᠪᠠᠨ ᠪᠠᠶᠢᠯ᠎ᠠ᠃ ᠠᠮᠠ ᠨᠢ ᠢᠳᠡᠪᠡᠯ ᠰᠡᠬᠦᠯ ᠨᠢ ᠲᠠᠷᠭᠤᠯᠠᠬᠤ ᠬᠡᠭᠴᠢ ᠪᠠᠷ ᠰᠤᠮᠤᠨ ᠴᠠᠭᠠᠨ ᠲᠠᠨᠢᠬᠳᠠᠬᠤ ᠦᠬᠡᠢ ᠪᠤᠯᠳᠠᠯ᠎ᠠ ᠦᠰᠴᠤ᠂ ᠬᠤᠶᠠᠷ ᠰᠠᠷ᠎ᠠ ᠤᠨ ᠬᠤᠭᠤᠴᠠᠭᠠᠨ ᠳᠤ ᠪᠢᠷᠠᠭᠤ ᠰᠢᠭ ᠲᠤᠮᠤ ᠪᠡᠶ᠎ᠡ ᠲᠠᠢ᠂ ᠪᠦᠳᠦᠬᠦᠨ ᠦᠷᠬᠡᠨ ᠦᠬᠡᠬᠦᠨ ᠰᠡᠬᠦᠯ ᠲᠠᠢ ᠪᠤᠯᠤᠬᠰᠠᠨ ᠪᠠᠶᠢᠯ᠎ᠠ᠃ ᠲᠤᠰ ᠤᠷᠤᠢ ᠳᠤ ᠨᠢ ᠠᠪᠤ ᠲᠠᠳᠠ ᠬᠤᠶᠠᠷ ᠲᠤ ᠬᠤᠪᠴᠠᠰᠤ ᠶᠢ ᠨᠢ ᠨᠢᠮᠬᠡᠯᠡᠨ ᠠᠬᠤᠷ ᠢ ᠨᠢ ᠬᠠᠶᠢᠴᠢᠯᠠᠵᠤ ᠦᠭᠬᠦᠭᠰᠡᠨ ᠪᠦᠬᠡᠳ ᠰᠤᠮᠤᠨ ᠴᠠᠭᠠᠨ ᠢ ᠴᠢᠬᠢᠯᠡᠵᠤ ᠴᠠᠭᠠᠯᠠᠵᠤ ᠬᠠᠶᠠᠪᠠ᠃         ᠲᠠᠷᠠᠭ᠎ᠠ ᠵᠢᠯ ᠤᠨ ᠬᠠᠪᠤᠷ ᠨᠢ ᠰᠤᠮᠤᠨ ᠴᠠᠭᠠᠨ ᠡᠬᠡ ᠲᠠᠢ ᠪᠠᠨ ᠪᠠᠰᠠ ᠯᠠ ᠠᠯᠠᠭ᠎ᠠ ᠪᠤᠯᠵᠠᠢ᠃ ᠡᠨᠡ ᠤᠳᠠᠭ᠎ᠠ ᠲᠦᠩᠬᠡᠵᠢ ᠬᠦᠯ ᠳᠤ ᠤᠷᠤᠵᠤ ᠪᠠᠶᠢᠭ᠎ᠠ ᠲᠡᠬᠦᠦ ᠶᠢ ᠮᠢᠨᠢ ᠭᠠᠷᠭᠠᠪᠠᠯ ᠬᠡᠷ ᠢᠶᠠᠷ ᠢᠶᠠᠨ ᠲᠦᠯᠬᠡᠴᠢ ᠰᠢᠨᠵᠢᠬᠡᠴᠢ ᠪᠤᠯᠤᠯ᠎ᠠ ᠬᠡᠰᠡᠨ ᠦᠬᠡ᠃ ᠶᠠᠮᠠᠷᠴᠤ ᠡᠷᠢᠯ ᠰᠤᠷᠠᠭ ᠲᠠᠯᠪᠢᠬᠰᠠᠨ ᠦᠬᠡᠢ᠃ ᠵᠢᠱᠢᠭᠰᠡᠨ ᠠᠴᠠ ᠭᠠᠷᠤᠬᠰᠠᠨ ᠦᠬᠡᠢ᠂ ᠵᠤᠨ ᠪᠤᠯᠬᠤ ᠳᠤ ᠰᠤᠮᠤᠨ ᠴᠠᠭᠠᠨ ᠬᠠᠷᠢᠵᠤ ᠢᠷᠡᠯ᠎ᠡ᠃ ᠢᠷᠡᠬᠦ ᠢᠷᠡᠬᠦ ᠳᠤ ᠪᠠᠨ ᠪᠠᠰᠠ ᠨᠢᠬᠡ ᠦᠬᠢᠨ ᠲᠡᠬᠦᠦ ᠲᠠᠭᠠᠭᠤᠯᠵᠤ ᠭᠤᠷᠪᠠ ᠪᠤᠯᠵᠤ ᠢᠷᠡᠪᠡ᠃ ᠠᠬ᠎ᠠ ᠳᠤ ᠲᠤᠭᠤᠬᠳᠠᠬᠤ ᠦᠬᠡᠢ ᠪᠠᠶᠢᠬᠰᠠᠨ ᠮᠢᠨᠥ ᠮᠠᠭᠤ ᠰᠤᠮᠤᠨ ᠴᠠᠭᠠᠨ ᠰᠦᠷᠦᠭ ᠤᠨ ᠲᠦᠷᠦᠬᠦᠦ ᠤᠭᠠᠯᠵᠠᠨ ᠡᠪᠡᠷᠳᠤ ᠬᠤᠴᠠ ᠶᠢ ᠭᠠᠷᠭᠠᠪᠠᠯ ᠪᠦᠬᠦ ᠰᠦᠷᠦᠭ ᠲᠤ ᠪᠠᠨ ᠦᠵᠦᠬᠦᠷ ᠪᠤᠯᠤᠬᠰᠠᠨ ᠬᠠᠮᠤᠭ ᠲᠤᠮᠤ ᠪᠠᠶ᠎ᠠ ᠲᠠᠢ ᠰᠢᠳᠦᠯᠡᠩ ᠪᠤᠯᠵᠤ ᠮᠢᠨᠥ ᠤᠮᠤᠬᠰᠢᠯ ᠪᠠᠭ᠋ᠠᠷᠬᠠᠯ ᠪᠤᠯᠪᠠ᠃     ᠲᠡᠬᠦᠦ ᠲᠠᠢ ᠪᠤᠯᠤᠬᠰᠠᠨ ᠰᠤᠮᠤᠨ ᠴᠠᠭᠠᠨ ᠪᠠᠭ᠎ᠠ ᠶᠢᠨ ᠬᠢ ᠰᠢᠭ ᠢᠶᠠᠨ ᠨᠠᠳᠠ ᠢᠷᠡᠵᠤ  ᠢᠯᠢᠬᠦᠯᠵᠤ ᠬᠠᠶᠢᠷᠠᠯᠠᠭᠤᠯᠵᠤ ᠪᠠᠨ ᠴᠦᠬᠡᠷᠡᠪᠡ᠃ ᠲᠠᠮᠠᠢ ᠤᠳᠠᠯ ᠦᠬᠡᠢ ᠡᠬᠡ ᠪᠤᠯᠤᠨ ᠲᠠᠬᠦᠦ ᠠᠴᠠ ᠪᠠᠨ ᠰᠠᠯᠤᠩᠬᠢᠳᠠ ᠪᠡᠯᠴᠢᠬᠡᠷᠯᠡᠬᠦ ᠪᠤᠯᠵᠤ᠂ ᠰᠦᠷᠦᠭ ᠤᠨ ᠡᠮᠤᠨ᠎ᠡ ᠶᠠᠪᠤᠨ᠂ ᠦᠳᠡᠰᠢ ᠨᠢ ᠰᠦᠷᠦᠭ ᠤᠨ ᠭᠠᠳᠠᠭᠤᠷ ᠴᠡᠪᠠᠷ ᠮᠠᠩᠬᠠᠨ ᠲᠡᠬᠡᠷ᠎ᠡ ᠬᠡᠪᠳᠡᠳᠡᠭ᠃ ᠶᠠᠭ ᠯᠠ ᠬᠤᠨᠢᠨ ᠰᠦᠷᠦᠭ ᠤᠨ ᠪᠢᠴᠢᠬᠠᠨ ᠵᠠᠩᠵᠤᠨ ᠮᠡᠳᠤ ᠰᠤᠷᠳᠤᠭᠤᠯᠤᠨ᠎ᠠ ᠬᠡᠭᠴᠢ ᠨᠢ᠃         ᠲᠠᠷᠡ ᠨᠠᠮᠤᠷ ᠠᠪᠤ ᠬᠠᠮᠢᠭ᠎ᠠ ᠠᠴᠠ ᠠᠪᠴᠢᠷᠠᠬᠰᠠᠨ ᠶᠢ ᠮᠡᠳᠡᠬᠦ ᠦᠬᠡᠢ᠃ ᠬᠡᠳᠤᠨ ᠬᠠᠷ᠎ᠠ ᠲᠤᠯᠤᠭᠠᠢ ᠲᠠᠢ ᠤᠷᠳᠤ ᠰᠡᠬᠦᠯ ᠲᠠᠢ ᠬᠤᠨᠢ ᠠᠪᠴᠢᠷᠠᠵᠤ ᠰᠦᠷᠦᠭ  ᠲᠤ ᠨᠠᠶᠢᠯᠠᠬᠦᠯᠪᠠ᠃ ᠰᠢᠪᠠᠭᠤ ᠠᠮᠢᠳᠠᠨ ᠠᠴᠠ ᠦᠷᠬᠦᠭᠰᠡᠨ ᠪᠤᠯ ᠤᠤ ᠪᠤᠤ ᠮᠡᠳᠡ ᠡᠬᠢᠨ ᠤ ᠬᠡᠳᠤᠨ ᠡᠳᠤᠷ ᠲᠤᠬᠳᠠᠭᠤᠬᠠᠨ ᠪᠠᠶᠢᠬᠰᠠᠨ ᠬᠤᠨᠢᠳ ᠬᠡᠨᠡᠳᠳᠡ ᠠᠶᠤᠮᠠᠳᠠᠭᠠᠢ ᠦᠷᠬᠦᠮᠡᠳᠡᠬᠡᠢ ᠪᠤᠯᠵᠤ ᠬᠤᠶᠢᠯᠠᠷᠠᠭᠠᠳ ᠬᠤᠳᠠᠨ ᠳᠤ ᠢᠷᠡᠬᠦ ᠪᠠᠨ ᠪᠤᠯᠢᠪᠠ᠃ ᠡᠬᠡᠴᠢ ᠪᠢᠳᠠ ᠬᠤᠶᠠᠷ ᠬᠡᠳᠤᠨ ᠡᠳᠤᠷ ᠰᠦᠷᠦᠭ ᠲᠤ ᠨᠠᠶᠢᠯᠠᠬᠦᠯᠤᠨ ᠬᠡᠷ  ᠤᠨ ᠵᠦᠭ ᠬᠤᠮᠢᠬᠰᠠᠨ ᠴᠤ ᠬᠤᠷᠢᠶ᠎ᠠ ᠬᠠᠰᠢᠶᠠᠨ ᠳᠤ ᠤᠶᠢᠷᠠᠳᠤᠬᠤ ᠦᠬᠡᠢ ᠪᠤᠯᠳᠠᠵᠤ ᠲᠤᠳᠠᠭᠠᠭᠠᠳ ᠠᠷᠢᠯᠴᠢᠬᠠᠨ᠎ᠠ᠃ ᠪᠦᠬᠦᠳᠡᠬᠡᠷ ᠢᠶᠠᠨ ᠬᠠᠮᠵᠢᠨ ᠪᠠᠶᠢᠵᠤ ᠬᠡᠳᠤ  ᠶᠢ ᠨᠢ ᠰᠦᠷᠦᠭ ᠲᠤ ᠨᠡᠶᠢᠯᠡᠬᠦᠯᠦᠭᠰᠡᠨ ᠴᠤ ᠲᠦᠷᠪᠠᠨ ᠬᠤᠨᠢ ᠨᠢ ᠨᠢᠬᠡᠮᠤᠰᠤᠨ ᠲᠤᠳᠠᠭᠠᠵᠤ ᠵᠢᠯᠢᠢᠴᠢᠬᠡᠪᠡ᠃ ᠠᠪᠤ ᠠᠭᠤᠷ ᠤᠮᠤᠭ ᠲᠤ ᠪᠠᠨ ᠮᠢᠬ᠎ᠠ ᠠᠪᠳᠠᠭ ᠮᠠᠶᠢᠮᠠᠶᠢᠴᠢᠨ ᠲᠠᠭᠤᠳᠠᠵᠤ᠂ ᠮᠤᠷᠢ ᠪᠠᠷ ᠬᠤᠮᠢᠵᠤ᠂ ᠬᠡᠳᠤᠨᠳᠡ ᠬᠡᠷ ᠤᠨ ᠪᠠᠷ᠎ᠠ ᠬᠠᠪᠢᠳᠠᠭᠤᠯᠤᠬᠰᠠᠨ ᠴᠤ ᠬᠦᠴᠦᠷᠦᠭᠰᠡᠨ ᠦᠬᠡᠢ᠃ ᠠᠪᠤ᠄       — — ᠵᠠ ᠵᠠ᠂ ᠬᠤᠨᠢ ᠢᠩᠬᠢᠵᠤ ᠵᠡᠷᠯᠢᠭᠰᠢᠬᠦ ᠢ ᠦᠵᠡᠭᠰᠡᠨ ᠦᠬᠡᠢ ᠶᠤᠮ ᠪᠠᠶᠢᠨ᠎ᠠ᠃ ᠤᠳᠤ ᠬᠦᠬᠡᠬᠡᠵᠤ ᠬᠦᠴᠦᠯᠡᠬᠦ ᠦᠬᠡᠢ᠃ ᠨᠠᠮᠤᠷ ᠤᠨ ᠮᠠᠯ ᠶᠡᠭᠡ ᠲᠠᠭᠤᠪᠠᠯ ᠪᠠᠯᠪᠠᠷᠠᠨ᠎ᠠ᠂ ᠡᠪᠤᠯ ᠲᠦᠯ ᠴᠤ ᠦᠬᠡᠢ ᠬᠤᠰᠠᠷᠠᠨ᠎ᠠ᠂ ᠵᠠᠶᠠᠭ᠎ᠠ ᠨᠢ ᠮᠡᠳᠡᠭ ᠬᠡᠪᠡ᠃ ᠤᠳᠠᠯ ᠦᠬᠡᠢ ᠬᠦᠮᠦᠨ ᠪᠠᠶᠢᠳᠤᠭᠠᠢ ᠨᠤᠬᠠᠢ ᠰᠢᠪᠠᠭᠤ ᠶᠢᠨ ᠲᠠᠭᠤᠨ ᠰᠤᠨᠤᠰᠪᠠᠴᠤ ᠶᠡᠭᠡ ᠬᠤᠯᠠ ᠠᠴᠠ ᠲᠤᠭᠤᠰᠤ ᠯᠠ ᠦᠯᠡᠳᠡᠬᠡᠵᠤ ᠬᠤᠴᠤᠷᠠᠳᠠᠭ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠲᠦᠷᠪᠡᠨ ᠵᠡᠷᠯᠢᠭ ᠬᠡᠵᠤ ᠨᠡᠷ᠎ᠡ ᠭᠠᠷᠴᠤ᠂ ᠮᠠᠨ ᠤ ᠬᠢᠨ ᠠᠯᠢ ᠣᠪᠣᠭ᠎ᠠ ᠲᠤᠯᠤᠭᠠᠢ᠂ ᠬᠡᠨ ᠤ ᠬᠢᠨ ᠤ ᠬᠤᠳᠳᠤᠭ ᠲᠤ ᠤᠰᠤ ᠤᠤᠭᠤᠭᠠᠳ ᠶᠠᠪᠤᠯ᠎ᠠ ᠬᠡᠰᠡᠨ ᠰᠤᠷᠠᠭ ᠢ ᠨᠢ ᠰᠤᠨᠤᠰᠴᠤ ᠰᠠᠨᠠᠭ᠎ᠠ ᠠᠮᠠᠷᠠᠳᠠᠭ ᠪᠤᠯᠵᠠᠢ᠃         ᠡᠪᠤᠯ ᠪᠤᠯᠪᠠ᠃ ᠨᠢᠬᠡ ᠦᠳᠡ ᠳᠤ ᠠᠳᠤᠭᠤᠨ ᠳᠤ ᠶᠠᠪᠤᠬᠰᠠᠨ ᠠᠪᠤ ᠴᠢᠷᠡᠢ ᠮᠠᠭᠤᠳᠠᠢ ᠤᠷᠤᠵᠤ ᠢᠷᠡᠬᠡᠳ᠄         — — ᠲᠠᠷᠴᠤᠬᠳᠤ ᠲᠤᠯᠤᠭᠠᠢ ᠪᠠᠷ ᠲᠠᠪᠤᠨ ᠬᠦᠷᠦᠬᠡᠰᠤ ᠰᠢᠭ ᠶᠠᠭᠤᠮ᠎ᠠ ᠬᠤᠢ ᠰᠠᠯᠬᠢ ᠮᠡᠳᠤ ᠬᠤᠶᠢᠯᠠᠷᠠᠵᠤ ᠤᠳᠤᠯ᠎ᠠ᠃ ᠶᠠᠭᠤ ᠪᠤᠯᠴᠢᠬᠠᠪᠠ ᠬᠡᠵᠤ ᠮᠤᠷᠢᠨ  ᠤ ᠬᠤᠷᠳᠤ ᠪᠠᠷ ᠲᠡᠪᠬᠢᠭᠤᠯᠵᠤ ᠦᠢᠷᠡᠳᠤᠪᠠᠯ ᠰᠤᠮᠤᠨ ᠴᠠᠭᠠᠨ ᠰᠡᠶ᠋ᠢᠬᠢ ᠲᠦᠷᠪᠡᠨ ᠤᠷᠤᠯᠠᠩ ᠲᠠᠢ ᠨᠠᠶᠢᠯᠠᠴᠢᠬᠡᠭᠰᠡᠨ‌‍ᠰᠡᠬᠦᠯ ᠴᠠᠶᠢᠯᠵᠠᠭᠤᠯᠵᠤ ᠰᠤᠮᠤᠳᠠᠵᠤ ᠪᠠᠶᠢᠯ᠎ᠠ᠃ ᠠᠢ︕ ᠣᠳᠤ ᠶᠠᠭᠠᠬᠢᠳᠠᠭ ᠪᠢᠯᠡ ᠬᠡᠯ᠎ᠡ᠃ ᠬᠦᠮᠦᠰ ᠤᠨ ᠨᠢᠳᠤ ᠭᠠᠶᠢᠬᠠᠬᠰᠠᠨ᠂ ᠦᠷᠦ ᠡᠪᠡᠳᠦᠭᠰᠡᠨ ᠨᠢ ᠢᠯᠭᠠᠷᠠᠬᠤ ᠦᠬᠡᠢ ᠨᠠᠳᠠ ᠤᠷᠤᠭᠤ ᠵᠢᠷᠬᠡᠳᠡ ᠲᠦᠪᠯᠡᠷᠡᠪᠡ᠃ ᠲᠤᠬᠤ ᠤᠷᠤᠭᠤ ᠪᠠᠨ ᠮᠠᠨᠴᠤᠷᠭ᠎ᠠ ᠪᠠᠭᠤᠯᠭᠠᠬᠰᠠᠨ ᠮᠡᠳᠤ ᠪᠤᠯᠵᠤ ᠠᠶᠠᠭ᠎ᠠ ᠲᠠᠢ ᠪᠤᠳᠠᠭ᠎ᠠ ᠪᠠᠨ ᠬᠠᠶᠠᠩᠭᠤᠳᠠ ᠬᠡᠷ ᠠᠴᠠ ᠬᠦᠶᠤᠨ ᠭᠠᠷᠪᠠ᠃ ᠲᠤᠯᠤᠭᠠᠢ ᠲᠦᠨᠡᠷᠡᠨ ᠲᠤᠳᠤᠷ᠎ᠠ ᠤᠶᠢᠮᠤᠵᠤ᠂ ᠰᠤᠮᠤᠨ ᠴᠠᠭᠠᠨ ᠮᠢᠨᠢ ᠲᠠᠭᠤᠰᠴᠤ ᠬᠦᠢᠴᠡᠯ᠎ᠡ ᠬᠡᠵᠤ ᠬᠠᠷᠠᠰᠠᠨ ᠪᠠᠴᠢᠮᠳᠠᠯ᠂ ᠬᠤᠷᠤᠰᠤᠯ᠂ ᠭᠤᠮᠤᠳᠠᠯ ᠤᠨ ᠨᠢᠯᠪᠤᠰᠤ ᠢᠪᠡᠷᠡᠨ ᠢᠷᠡᠯ᠎ᠡ᠃ ᠠᠬ᠎ᠠ ᠡᠬᠡᠴᠢ ᠪᠤᠯ ᠪᠦᠷ ᠨᠠᠳᠠ ᠶᠢ ᠰᠤᠮᠤᠨ ᠴᠠᠭᠠᠨ ᠢᠶᠠᠨ ᠬᠠᠶᠢᠷᠯᠠᠬᠰᠠᠭᠠᠷ ᠪᠠᠶᠢᠭᠠᠳ ᠬᠡᠷᠡᠭ ᠠᠴᠠ ᠭᠠᠷᠭᠠᠴᠢᠬᠠᠯ᠎ᠠ ᠬᠡᠵᠤ ᠲᠠᠪᠠᠯᠠᠵᠤ ᠵᠢᠮᠡᠯᠡᠵᠤ ᠪᠠᠶᠢᠯᠬᠦᠢ ᠳ᠋ᠠ᠃ ᠲᠠᠭᠦᠨ ᠠᠴᠠ ᠬᠤᠶᠢᠰᠢ ᠤᠯᠠᠨ ᠬᠤᠨᠤᠭ ᠨᠠᠳᠠ ᠠᠴᠠ ᠪᠠᠶᠠᠷ ᠵᠢᠷᠭᠠᠯ ᠪᠦᠷ ᠯᠠ ᠵᠢᠭᠤᠳᠠᠵᠤ ᠬᠤᠯᠠᠳᠠᠪᠠ᠃ ᠶᠠᠭᠠᠬᠢᠬᠤᠪ ᠳ᠋ᠠ᠂ ᠠᠪᠤ ᠬᠦᠷᠳᠡᠯ᠎ᠡ ᠠᠷᠭ᠎ᠠ ᠪᠤᠳᠤᠵᠤ ᠣᠯᠬᠤ ᠦᠬᠡᠢ ᠶᠤᠮ ᠴᠢᠨᠢ︕         ᠬᠠᠴᠢᠨ ᠰᠤᠨᠢᠨ ᠪᠦᠬᠦᠨ ᠢ ᠬᠠᠷ᠎ᠠ ᠲᠤᠯᠤᠭᠠᠶᠢᠳᠤ ᠬᠦᠮᠦᠨ ᠯᠠ ᠪᠦᠳᠦᠬᠡᠳᠡᠭ ᠪᠢᠰᠢ ᠬᠡᠰᠡᠨ ᠢ ᠢᠳᠡᠬᠡᠵᠤ ᠶᠠᠳᠠᠮ᠎ᠠ ᠡᠨᠡ ᠶᠠᠪᠤᠳᠠᠯ ᠬᠡᠷᠡᠴᠢᠯᠡᠪᠡ᠃ ᠲᠠᠮᠠᠢ ᠤᠳᠠᠯ ᠦᠬᠡᠢ ᠰᠤᠮᠤᠨ ᠴᠠᠭᠠᠨ ᠵᠡᠷᠯᠢᠭ ᠲᠦᠷᠪᠡ ᠶᠢ ᠲᠠᠭᠠᠭᠤᠯᠤᠨ ᠬᠤᠷᠠᠭ᠎ᠠ ᠢᠰᠢᠬᠡᠨ ᠪᠡᠯᠴᠢᠬᠡᠷ ᠢᠶᠠᠷ ᠦᠵᠡᠭᠳᠡᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠬᠤᠳᠳᠤᠭ ᠤᠰᠤ ᠪᠠᠷ ᠬᠠᠶᠠ ᠢᠷᠡᠳᠡᠭ ᠪᠤᠯᠪᠠ᠃ ᠵᠠᠷᠢᠮ ᠳᠤ ᠨᠢ ᠬᠤᠳᠠᠨ ᠠᠴᠠ ᠵᠠᠶᠢᠳᠡᠢ ᠬᠤᠨᠤᠬᠯᠠᠵᠤ ᠶᠠᠪᠤᠭᠠᠳ ᠪᠡᠯᠴᠢᠬᠡᠷ ᠲᠤ ᠰᠦᠷᠦᠭ ᠨᠠᠶᠢᠯᠠᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠨᠢᠬᠡ ᠦᠳᠡᠰᠢ ᠨᠢᠬᠡᠮᠤᠰᠤᠨ ᠬᠠᠰᠢᠶᠠᠨ ᠳᠤ ᠤᠷᠤᠨ ᠬᠡᠪᠳᠡᠵᠤ᠂ ᠶᠠᠭᠤ ᠴᠤ ᠪᠤᠯᠤᠭ᠎ᠠ ᠦᠬᠡᠢ ᠶᠤᠮ ᠰᠢᠭ ᠱᠠᠪᠢᠷ ᠱᠠᠪᠢᠷ ᠬᠡᠪᠢᠴᠢᠬᠡᠨ᠎ᠡ ᠬᠡᠵᠤ ᠬᠡᠨ ᠮᠡᠳᠡᠯ᠎ᠡ᠃ ᠲᠡᠷᠡ ᠦᠳᠡᠰᠢ ᠪᠢ ᠶᠤᠰᠤᠳᠠᠢ ᠦᠯᠢᠬᠡᠷ ᠤᠨ ᠪᠠᠭᠠᠳᠤᠷ ᠰᠢᠭ᠋ ᠪᠤᠯᠵᠤ᠂ ᠠᠪᠤ ᠨᠠᠳᠠ ᠶᠢ ᠶᠤᠰᠤ ᠵᠠᠩᠰᠢᠯ ᠠᠴᠠ ᠭᠠᠳᠠᠭᠤᠷ ᠬᠠᠨᠵᠤᠨ ᠭᠤᠤᠯ ᠳᠤ ᠰᠠᠭᠤᠯᠭᠠᠵᠤ ᠠᠯᠢ ᠦᠬᠡᠬᠦ ᠲᠠᠢ ᠲᠠᠷᠭᠤᠨ ᠬᠤᠯᠢᠶ᠎ᠠ ᠶᠢ ᠠᠶᠠᠭᠠᠨ ᠳᠤ ᠮᠢᠨᠢ ᠬᠢᠵᠤ ᠦᠭᠬᠦ ᠳᠤ ᠡᠵᠢ᠄         — — ᠬᠦᠦ ᠶᠢᠨ ᠮᠢᠨᠢ ᠴᠢᠷᠡᠢ ᠲᠡᠨᠡᠶᠢᠵᠤ ᠪᠢᠳᠠᠨ ᠤ ᠬᠡᠷ ᠲᠤ ᠪᠠᠰᠠ ᠨᠠᠷᠠ ᠭᠠᠷᠤᠯ᠎ᠠ᠃ ᠪᠢ ᠬᠡᠯᠡᠵᠤ ᠦᠩᠬᠡᠷᠡᠭᠰᠡᠨ ᠦᠬᠡᠢ ᠪᠢᠯᠡ ᠤᠤ︖ ᠮᠠᠯ ᠬᠡᠵᠤ ᠵᠠᠷᠢᠮ ᠳᠤ ᠪᠠᠨ ᠬᠦᠮᠦᠨ ᠠᠴᠠ ᠮᠠᠷᠬᠡᠨ ᠰᠢᠤ᠃ ᠵᠡᠷᠯᠢᠭ ᠲᠦᠷᠪᠡ ᠶᠢᠨ ᠬᠤᠶᠠᠷ ᠡᠮ᠎ᠡ ᠬᠤᠨᠢ ᠨᠢ ᠬᠡᠬᠡᠯ ᠲᠤᠬᠳᠠᠬᠰᠠᠨ ᠴᠢᠷᠡᠢ᠂ ᠬᠤᠨᠢ ᠴᠤ ᠦᠷ᠎ᠡ ᠬᠤᠶᠢᠴᠢᠰ ᠤᠨ ᠲᠦᠯᠦᠬᠡ ᠪᠤᠳᠤᠳᠠᠭ ᠶᠤᠮ ᠰᠢᠤ ᠬᠡᠵᠤ ᠴᠢᠬᠢᠭᠳᠦᠭᠰᠡᠨ ᠨᠢᠳᠤ ᠪᠠᠨ ᠠᠷᠴᠢᠬᠤᠶᠢᠴᠠ ᠪᠤᠯᠤᠭᠠᠳ ᠠᠪᠳᠠᠷ᠎ᠠ ᠠᠴᠠ ᠪᠠᠨ ᠮᠦᠰᠦᠨ ᠰᠢᠬᠡᠷ ᠭᠠᠷᠭᠠᠵᠤ ᠬᠤᠪᠢᠶᠠᠬᠤ ᠳᠤ  ᠪᠠᠨ ᠬᠠᠮᠤᠭ ᠶᠡᠭᠡ ᠬᠡᠰᠡᠭ ᠢ ᠨᠠᠳᠠ ᠱᠠᠩᠨᠠᠪᠠ᠃ ᠪᠢ ᠮᠦᠰᠦᠨ ᠰᠢᠬᠡᠷ ᠪᠠᠨ ᠰᠡᠮᠡᠬᠡᠷᠬᠡᠨ ᠬᠠᠷᠮᠠᠯᠠᠭᠠᠳ ᠭᠠᠷᠪᠠ᠃ ᠰᠤᠮᠤᠨ ᠴᠠᠭᠠᠨ ᠨᠠᠳᠠ ᠠᠴᠠ ᠪᠦᠱᠦᠬᠦᠷᠬᠡᠬᠦ ᠮᠡᠳᠤ ᠵᠠᠶᠢᠯᠠᠨ ᠪᠠᠶᠢᠬᠰᠠᠭᠠᠷ ᠬᠠᠰᠢ ᠯᠠ ᠪᠠᠷᠢᠬᠳᠠᠪᠠ᠃ ᠪᠢ ᠮᠦᠰᠦᠨ ᠰᠢᠬᠡᠷ ᠢᠶᠠᠨ ᠠᠯᠪᠠ ᠪᠠᠷ ᠠᠮᠠᠨ ᠳᠤ ᠨᠢ ᠴᠢᠬᠢᠵᠤ ᠤᠷᠤᠭᠤᠯᠤᠭᠠᠳ ᠪᠠᠶᠠᠷᠳᠠᠢ ᠬᠡᠭᠴᠢ ᠢᠨᠢᠶᠡᠪᠡ᠃         — — ᠬᠠᠶᠢᠷᠠᠳᠠᠢ ᠰᠤᠮᠤᠨ ᠴᠠᠭᠠᠨ ᠮᠢᠨᠢ᠂ ᠴᠢ ᠯᠠ ᠬᠡᠵᠤ ᠮᠢᠨᠥ ᠨᠡᠷ᠎ᠡ ᠨᠢᠭᠤᠷ ᠶᠢ ᠠᠪᠴᠤ ᠭᠠᠷᠤᠯ᠎ᠠ ᠬᠡᠳ ᠠᠷᠡᠢ ᠪᠠᠭ᠎ᠠ ᠬᠠᠳᠠᠵᠤ ᠲᠤᠷᠠᠬᠰᠠᠨ ᠬᠠ ᠨᠢᠷᠤᠭᠤ ᠶᠢ ᠨᠢ ᠢᠯᠢᠵᠤ ᠦᠭᠬᠦ ᠳᠤ ᠰᠤᠮᠤᠨ ᠴᠠᠭᠠᠨ ᠦᠨᠡᠬᠡᠷ ᠴᠤ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠤᠬᠰᠠᠨ ᠪᠠᠭᠠᠳᠤᠷ ᠰᠢᠭ᠋ ᠪᠦᠳᠦᠬᠦᠨ ᠲᠠᠭᠤᠨ ᠢᠶᠠᠷ ᠮᠠᠶᠢᠯᠠᠵᠤ ᠡᠩᠬᠡᠷ ᠬᠤᠷᠮᠤᠢ ᠶᠢ ᠮᠢᠨᠢ ᠦᠨᠦᠷᠯᠡᠨ ᠪᠠᠶᠢᠯ᠎ᠠ᠃           ᠲᠠᠷᠡ ᠵᠢᠯ ᠤᠨ ᠨᠠᠮᠤᠷ ᠤᠨ ᠪᠤᠷᠤᠭᠠᠨ ᠬᠡᠳᠤᠨ ᠡᠳᠤᠷ ᠦᠷᠬᠦᠯᠵᠢᠯᠡᠵᠤ ᠵᠤᠬᠰᠤᠬᠤ ᠳᠤ ᠠᠬ᠎ᠠ ᠪᠢᠳᠠ ᠬᠤᠶᠠᠷ ᠪᠤᠳᠠᠷᠠᠬᠰᠠᠨ ᠬᠤᠨᠢ ᠪᠠᠨ ᠬᠤᠷᠢᠶᠠᠬᠤ ᠪᠠᠷ ᠶᠠᠪᠤᠵᠠᠢ᠃ ᠬᠠᠭᠠᠰ ᠡᠳᠤᠷ ᠶᠠᠪᠤᠵᠤ᠂ ᠤᠷᠤᠪᠠᠯ ᠭᠠᠷᠴᠤ ᠴᠢᠳᠠᠮᠠᠷ ᠦᠬᠡᠢ ᠲᠠᠰᠢᠭᠤ ᠬᠦᠨ ᠪᠠᠯᠠᠷ ᠡᠷᠢᠶᠡᠯᠡᠩ ᠳᠤ ᠤᠷᠤᠬᠤ ᠳᠤ ᠰᠦᠷᠦᠭ ᠤᠨ ᠬᠠᠭᠠᠰ ᠨᠢ ᠤᠯᠳᠠᠵᠤ ᠠᠬ᠎ᠠ ᠨᠠᠳᠠ ᠶᠢ ᠬᠡᠷ ᠤᠷᠤᠭᠤ ᠢᠳᠬᠠᠵᠤ ᠪᠠᠶᠢᠬᠤ ᠶᠢ ᠲᠠᠭᠠᠭᠠᠯᠭᠠᠭᠠᠳ ᠦᠪᠡᠷ ᠢᠶᠠᠨ ᠰᠠᠯᠬᠢᠨ ᠤ ᠵᠦᠭ ᠰᠢᠷᠦᠬᠦᠨ ᠪᠤᠷᠤᠭᠠᠨ ᠳᠤ ᠰᠢᠭᠤᠷᠤᠬᠰᠠᠨ ᠪᠤᠰᠤᠤᠨ‌ᠬᠤᠨᠢ ᠪᠠᠨ ᠤᠯᠬᠤ ᠪᠠᠷ ᠬᠤᠷᠳᠤᠯᠠᠵᠠᠢ᠃ ᠪᠦᠷᠬᠦᠭ ᠲᠡᠭᠷᠢ ᠬᠡᠨᠡᠳᠳᠡ ᠵᠠᠯᠭᠠᠨ ᠪᠤᠷᠤᠭᠠᠯᠠᠵᠠᠢ᠃ ᠰᠠᠨᠳᠤᠷᠬᠤ ᠳᠤ ᠪᠠᠨ ᠪᠠᠯᠠᠷ ᠤᠨ ᠲᠤᠮᠳᠠ ᠬᠠᠭᠤᠴᠢᠨ ᠲᠤᠤᠷᠠ ᠪᠠᠶᠢᠳᠠᠭ ᠢ ᠰᠠᠨᠠᠵᠤ ᠬᠤᠨᠢ ᠪᠠᠨ ᠰᠢᠪᠠᠳᠠᠵᠤ ᠵᠠᠯᠠᠵᠤ ᠪᠠᠶᠢᠭᠠᠳ ᠪᠦᠷᠦᠢ ᠪᠤᠯᠬᠤ ᠳᠤ ᠰᠡᠶ᠋ᠢ ᠲᠤᠤᠷᠠ ᠬᠦᠷᠪᠡ᠃ ᠤᠳᠠᠯ ᠦᠬᠡᠢ ᠠᠬ᠎ᠠ ᠴᠤ ᠦᠯᠡᠳᠡᠭᠰᠡᠨ ᠬᠤᠨᠢ ᠪᠠᠨ ᠲᠤᠭ᠎ᠠ ᠶᠤᠰᠤᠭᠠᠷ ᠤᠯᠵᠤ ᠲᠤᠤᠷᠠ ᠪᠠᠷ ᠲᠦᠰᠢᠭ ᠪᠤᠯᠭᠠᠬᠤ ᠪᠠᠷ ᠢᠷᠡᠵᠡᠢ᠃ ᠬᠤᠨᠢ ᠲᠠᠢ ᠡᠵᠡᠨ ᠲᠠᠢ ᠪᠠᠨ ᠪᠦᠷ ᠤᠰᠤᠨ ᠬᠤᠯᠤᠭᠠᠨ᠎ᠠ ᠰᠢᠭ᠋ ᠪᠤᠯᠵᠤ ᠴᠠᠮᠫᠠᠨ ᠨᠦᠮᠦᠷᠢᠨ ᠳᠤ ᠰᠢᠬᠠᠯᠴᠢᠨ ᠪᠤᠷᠤᠭᠠᠨ ᠠᠴᠠ ᠲᠠᠯᠳᠠᠯᠠᠪᠠ᠃ ᠬᠡᠳᠡᠯ᠎ᠡ ᠰᠦᠨᠢ ᠪᠤᠯᠬᠤ ᠳᠤ ᠲᠠᠭᠠᠷᠠᠵᠤ ᠵᠢᠩᠨᠡᠬᠡᠳ ᠪᠠᠶ᠎ᠠ ᠴᠠᠴᠡᠷᠡᠨ ᠰᠢᠳᠤ ᠬᠠᠪᠢᠷᠠᠯᠳᠤᠵᠤ ᠡᠬᠢᠯᠡᠪᠡ᠃ ᠠᠬ᠎ᠠ ᠬᠠᠷᠢᠨ ᠨᠢᠬᠡᠮᠤᠰᠤᠨ ᠬᠤᠶᠠᠷ ᠬᠤᠨᠢᠨ ᠤ ᠲᠤᠮᠳᠠ ᠤᠷᠤᠭᠠᠳ ᠬᠡᠪᠳᠠᠴᠢᠬᠡᠵᠤ ᠨᠠᠳᠠ ᠶᠢ ᠬᠤᠷᠳᠤᠨ ᠪᠠᠰᠠ ᠢᠩᠬᠢᠵᠤ ᠬᠡᠪᠳᠠ ᠬᠡᠯ᠎ᠡ᠃ ᠪᠢ ᠰᠤᠮᠤᠨ ᠴᠠᠭᠠᠨ ᠪᠤᠯᠤᠨ ᠪᠠᠰᠠ ᠨᠢᠬᠡ ᠪᠦᠳᠦᠬᠦᠨ ᠢᠷᠬᠡ ᠶᠢᠨ ᠲᠤᠮᠳᠠ ᠨᠢ ᠤᠷᠤᠵᠤ ᠬᠡᠪᠳᠡᠪᠡ᠃ ᠬᠤᠨᠢᠨ ᠤ ᠨᠤᠶᠢᠳᠠᠨ ᠪᠠᠭᠠᠰᠤ᠂ ᠬᠠᠯᠠᠭᠤᠨ ᠵᠤᠩᠭᠠᠭ ᠤᠨ ᠦᠨᠦᠷ ᠴᠤ ᠲᠠᠭᠠᠷᠠᠬᠰᠠᠨ ᠬᠦᠮᠦᠨ ᠳᠤ ᠰᠠᠶᠢᠬᠠᠨ ᠦᠨᠦᠷᠳᠤᠵᠤ᠂ ᠤᠳᠠᠯ ᠦᠬᠡᠢ ᠪᠡᠶ᠎ᠡ ᠲᠤᠯᠠᠭᠠᠨ ᠪᠤᠯᠵᠤ ᠶᠠᠳᠠᠷᠠᠵᠤ ᠲᠤᠶᠢᠯᠳᠠᠬᠰᠠᠨ ᠪᠢᠳᠡ ᠬᠤᠶᠠᠷ ᠤᠨᠳᠠᠵᠤ ᠤᠷᠬᠢᠪᠡ᠃ ᠰᠦᠨᠢ ᠬᠠᠭᠠᠰ ᠦᠩᠬᠡᠷᠡᠬᠦ ᠳᠤ ᠪᠤᠷᠤᠭᠠᠨ ᠵᠤᠬᠰᠤᠵᠤ᠂ ᠬᠤᠨᠢᠨ ᠤ ᠢᠯᠴᠢᠨ ᠳᠤ ᠪᠤᠷᠤᠭᠠᠨ ᠳᠤ ᠤᠰᠤᠭᠠᠵᠤ ᠦᠶᠡᠳᠡᠬᠦ ᠠᠴᠠ ᠮᠤᠯᠳᠤᠷᠠᠬᠰᠠᠨ ᠠᠬ᠎ᠠ ᠪᠢᠳᠠ ᠬᠤᠶᠠᠷ ᠨᠠᠷᠠ ᠭᠠᠷᠬᠤ ᠳᠤ ᠬᠡᠷ ᠤᠨ ᠪᠠᠷ᠎ᠠ ᠬᠠᠷᠠᠪᠠ᠃         ᠰᠤᠮᠤᠨ ᠴᠠᠭᠠᠨ ᠪᠠᠶ᠎ᠠ ᠬᠦᠢᠴᠡᠭᠰᠡᠨ ᠢᠷᠬᠡ ᠪᠤᠯᠵᠤ ᠵᠤ ᠨᠢᠷᠤᠭᠤ ᠨᠢ ᠲᠡᠭᠰᠢᠷᠡᠨ᠂ ᠰᠡᠷᠪᠡᠭᠡ ᠲᠠᠰᠢᠶ᠎ᠠ ᠶᠢ ᠨᠢ ᠲᠡᠮᠳᠡᠷᠡᠪᠡᠯ ᠶᠠᠰᠤ ᠪᠠᠶᠢᠬᠤ ᠨᠢ ᠮᠡᠳᠡᠭᠳᠡᠬᠦ ᠦᠬᠡᠢ ᠪᠤᠯᠳᠠᠯ᠎ᠠ ᠲᠠᠷᠭᠤᠯᠠᠪᠠ᠃     ᠨᠢᠬᠡ ᠡᠳᠤᠷ ᠰᠤᠮᠤᠨ ᠤ ᠰᠠᠩᠴᠢ ᠬᠠᠶᠢᠷᠴᠠᠭ ᠲᠠᠢ ᠲᠡᠷᠬᠡ ᠪᠠᠷ ᠢᠷᠡᠵᠤ ᠠᠯᠢ ᠲᠠᠷᠭᠤᠨ ᠠᠯᠢ ᠲᠤᠮᠤ ᠰᠡᠬᠦᠯ ᠲᠠᠢ ᠢᠷᠬᠡ ᠠᠴᠠ ᠪᠠᠨ ᠨᠢᠬᠡ ᠶᠢ ᠦᠭᠴᠢᠬᠡ᠃ ᠮᠠᠷᠭᠠᠰᠢ ᠬᠤᠳᠠ ᠠᠴᠠ ᠲᠤᠮᠤ ᠲᠠᠷᠤᠭ᠎ᠠ  ᠪᠠᠭᠤᠨ᠎ᠠ᠃ ᠬᠡᠳᠤᠨ ᠠᠶᠢᠯ ᠢᠶᠠᠷ ᠤᠷᠤᠭᠠᠳ ᠲᠤᠭᠤᠬᠳᠠᠮᠠᠷ ᠤᠯᠢᠬᠳᠠᠢ ᠶᠠᠭᠤᠮ᠎ᠠ ᠥᠭᠳᠡᠭᠰᠡᠨ ᠦᠬᠡᠢ᠃ ᠪᠡᠶ᠎ᠡ ᠪᠠᠷ᠎ᠠ  ᠲᠠᠢ ᠰᠢᠬᠦᠰᠦ ᠲᠠᠯᠪᠢᠬᠤ ᠦᠬᠡᠢ ᠪᠣᠯ ᠦᠩᠬᠡᠳᠡᠢ ᠦᠬᠡᠳᠡᠳᠡᠢ ᠵᠤᠴᠢᠯᠠᠭ᠎ᠠ ᠪᠤᠯᠳᠠᠭ ᠥᠬᠡᠢ ᠬᠡᠨ᠎ᠡ᠃ ᠲᠡᠬᠡᠬᠡᠳ ᠰᠦᠷᠦᠭ ᠬᠤᠷᠢᠶᠠᠵᠤ ᠬᠤᠳᠠᠯᠠᠭᠠᠳ ᠢᠷᠡᠬᠦ ᠳᠤ ᠰᠡᠶ᠋ᠢᠬᠢ ᠰᠠᠩᠴᠢ ᠶᠢᠨ ᠨᠢᠳᠤ ᠰᠤᠮᠤᠨ ᠴᠠᠭᠠᠨ᠂ ᠰᠢᠷ᠎ᠠ ᠬᠠᠯᠵᠠᠨ ᠬᠤᠶᠠᠷ ᠲᠤ ᠲᠤᠰᠤᠭᠠᠳ ᠯᠠ ᠪᠠᠶᠢᠯ᠎ᠠ᠃ ᠲᠡᠬᠡᠬᠦ ᠳᠤ ᠠᠪᠤ  ᠄         — — ᠵᠠ᠂ ᠡᠨᠡ ᠰᠤᠮᠤᠨ ᠴᠠᠭᠠᠨ᠂ ᠰᠢᠷ᠎ᠠ ᠬᠠᠯᠵᠠᠨ ᠬᠤᠶᠠᠷ ᠢᠷᠬᠡ ᠠᠴᠠ ᠪᠤᠰᠤᠤᠨ ᠢ ᠨᠢ ᠲᠤᠷ᠎ᠠ ᠪᠠᠷ ᠰᠢᠯᠢᠵᠤ ᠮᠡᠳᠡ᠃ ᠡᠨᠡ ᠬᠤᠶᠠᠷ ᠴᠤ ᠪᠤᠯ ᠬᠡᠤᠬᠡᠳ ᠤᠨ ᠮᠢᠨᠢ ᠠᠮᠢᠨᠳᠠᠢ ᠨᠢ ᠪᠠᠶᠢᠭ᠎ᠠ ᠬᠡᠯ᠎ᠡ᠃ ᠰᠢᠷ᠎ᠠ ᠬᠠᠯᠵᠠᠨ ᠪᠤᠯ ᠡᠬᠡᠴᠢ ᠶᠢᠨ ᠬᠠᠶᠢᠷᠠᠳᠠᠢ ᠬᠤᠨᠢ ᠨᠢ ᠶᠤᠮ᠃ ᠬᠠᠷᠢᠨ ᠨᠦᠬᠦᠬᠡ ᠬᠦᠮᠦᠨ ᠤ ᠨᠢᠳᠤ ᠮᠦᠨ ᠦᠬᠡᠷ᠎ᠡ ᠬᠤᠨᠢᠨ ᠵᠦᠭ ᠰᠢᠯᠵᠢᠵᠤ ᠪᠤᠯᠳᠠᠭ ᠦᠬᠡᠢ᠄         — — ᠵᠠ᠂ ᠠᠪᠠᠭ᠎ᠠ ᠮᠢᠨᠢ᠂ ᠡᠨᠡ ᠨᠠᠰᠤ ᠬᠦᠢᠴᠡᠭᠰᠡᠨ ᠪᠦᠳᠦᠬᠦᠨ ᠴᠠᠭᠠᠨ ᠢᠷᠬᠡ ᠶᠠᠭ ᠵᠠᠷᠤᠬᠤ ᠴᠠᠭ ᠲᠤ ᠪᠠᠨ ᠰᠢᠤ᠃ ᠵᠠᠷᠤᠬᠤ ᠵᠠᠷᠤᠬᠤ ᠳᠤ ᠪᠠᠨ ᠤᠷᠤᠨ ᠤ ᠶᠡᠭᠡ ᠲᠠᠷᠤᠭ᠎ᠠ ᠶᠢ ᠵᠤᠴᠢᠯᠠᠬᠤ ᠬᠡᠭᠴᠢ ᠲᠠᠨ ᠤ ᠪᠤᠶᠠᠨ ᠪᠠᠶᠢᠨ᠎ᠠ ᠰᠢᠤ︕ ᠵᠠ ᠮᠦᠨ ᠡᠬᠦᠨ ᠢᠶᠠᠨ ᠦᠭᠴᠢᠬᠡ ᠬᠡᠵᠤ ᠭᠤᠶᠤᠵᠤ ᠭᠤᠩᠰᠢᠭᠠᠳ ᠪᠠᠶᠢᠬᠤ  ᠳᠤ ᠠᠪᠤ ᠴᠤ ᠨᠢᠭᠤᠷ ᠲᠠᠭᠠᠭᠠᠬᠤ ᠦᠬᠡᠢ ᠠᠷᠭ᠎ᠠ  ᠮᠤᠬᠤᠷᠳᠠᠵᠤ᠄           — — ᠵᠠ ᠬᠦᠬᠡᠷᠦᠬᠦᠢ᠂ ᠪᠤᠶᠠᠨ ᠲᠠᠢ ᠳᠤ ᠤᠷᠤᠪᠠᠯ ᠮᠠᠭᠤ ᠬᠦᠦ᠂ ᠰᠤᠮᠤᠨ ᠴᠠᠭᠠᠨ ᠬᠤᠶᠠᠷ ᠤᠨ ᠮᠢᠨᠢ ᠪᠤᠶᠠᠨ ᠬᠡᠵᠤ ᠮᠡᠳᠡ︕ ᠬᠤᠪᠢ ᠵᠠᠶᠠᠭ᠎ᠠ ᠨᠢ ᠠᠳᠡ ᠪᠠᠶᠢᠭ᠎ᠠ ᠬᠤᠶᠢᠨ᠎ᠠ ᠶᠠᠭᠠᠬᠢᠨ᠎ᠠ ᠬᠡᠵᠤ ᠰᠠᠩᠴᠢ ᠳᠤ ᠪᠤᠰᠤ ᠰᠤᠮᠤᠨ ᠴᠠᠭᠠᠨ ᠳᠤ ᠲᠦᠳᠦᠨᠡᠵᠤ ᠬᠡᠯᠡᠬᠡᠳ‌‍ᠬᠡᠳᠤᠬᠦᠯᠡ ᠨᠠᠶᠢᠯᠠᠨ ᠪᠠᠷᠢᠵᠤ  ᠲᠡᠷᠬᠡᠨ ᠤ ᠠᠷᠤ ᠬᠠᠶᠢᠷᠴᠠᠭ ᠲᠤ ᠨᠢ ᠰᠠᠪᠠᠯᠠᠵᠤ ᠤᠭᠤᠷᠠᠭ ᠰᠡᠬᠦᠯ ᠤᠨ ᠠᠬᠤᠷ ᠤᠩᠭᠠᠰᠤ ᠠᠴᠠ ᠨᠢ ᠨᠢᠬᠡ ᠬᠡᠰᠡᠭ ᠦᠭᠳᠡᠬᠡᠵᠤ ᠠᠪᠤᠭᠠᠳ ᠪᠤᠷᠭᠠᠰᠤᠨ ᠬᠠᠰᠢᠶᠠᠨ ᠳᠤ ᠬᠠᠪᠴᠢᠭᠤᠯᠪᠠ᠃ ᠠᠭᠤᠷ ᠭᠤᠮᠤᠳᠠᠯ ᠳᠤ ᠬᠡᠳᠤᠷᠡᠬᠡᠢ ᠠᠪᠳᠠᠪᠠᠯ ᠬᠦᠮᠦᠨ ᠤᠬᠢᠯᠠᠵᠤ ᠴᠢᠳᠠᠬᠤ ᠦᠬᠡᠢ ᠪᠤᠯᠤᠨ᠎ᠠ ᠬᠡᠳᠡᠭ ᠢ ᠪᠢ ᠠᠩᠬ᠎ᠠ  ᠮᠡᠳᠡᠪᠡ᠃ ᠦᠨᠡᠬᠡᠷ ᠮᠠᠷᠳᠠᠴᠢᠬᠠᠵᠠᠢ᠃ ᠡᠬᠡᠴᠢ ᠬᠡᠷ ᠤᠨ ᠠᠷᠤ ᠤᠷᠤᠭᠤ ᠬᠦᠶᠤᠨ ᠤᠷᠤᠪᠠ᠃ ᠲᠡᠬᠦᠨ ᠤ ᠮᠢᠨᠥ ᠲᠦᠯᠦᠬᠡ ᠵᠤᠪᠠᠵᠤ ᠤᠬᠢᠯᠡᠵᠣ ᠪᠠᠶᠢᠨ᠎ᠠ ᠬᠡᠰᠡᠨ ᠢ ᠬᠡᠶᠢᠳᠡᠯ᠎ᠡ ᠮᠡᠳᠡᠵᠤ ᠪᠠᠶᠢᠨ᠎ᠠ᠃ ᠬᠠᠮᠠᠷ ᠨᠢ ᠱᠤᠤᠬᠢᠵᠤ ᠬᠠᠴᠠᠷ ᠨᠢ ᠤᠯᠠᠶᠢᠨ ᠨᠢᠳᠤ ᠨᠢ ᠠᠶᠤᠮᠠᠷ ᠪᠦᠯᠳᠡᠯᠵᠢᠵᠤ᠂ ᠰᠠᠩᠴᠢ ᠶᠢ ᠠᠳᠠᠭᠠᠳᠤ ᠲᠠᠶᠢᠰᠤᠨ ᠮᠡᠳᠤ ᠵᠠᠨᠤᠬᠰᠠᠨ ᠨᠠᠳᠠ ᠶᠢ ᠡᠵᠢ ᠭᠠᠷ ᠠᠴᠠ ᠬᠦᠴᠤ ᠪᠠᠷ ᠴᠢᠷᠴᠤ ᠬᠡᠷ ᠲᠤ ᠤᠷᠤᠭᠤᠯᠪᠠ᠃ ᠲᠡᠨᠡᠭ ᠨᠠᠳᠠ ᠶᠢ ᠶᠠᠭᠤ ᠨᠢᠬᠡ ᠶᠢ ᠬᠢᠴᠢᠬᠡᠬᠦ ᠠᠴᠠ ᠬᠢᠴᠢᠶᠡᠭᠰᠡᠨ ᠪᠤᠯᠤᠯᠳᠠᠢ᠃         ᠰᠤᠮᠤᠨ ᠴᠠᠭᠠᠨ ᠵᠶ᠋ᠠᠨ‌‍ᠴᠢᠨ᠋ᠸ᠎ᠠ ᠳᠤ ᠲᠠᠳᠠᠭᠤᠯᠤᠭᠠᠳ ᠨᠠᠳᠠ ᠠᠴᠠ ᠠᠪᠤᠷᠠᠯ ᠭᠤᠶᠤᠵᠤ ᠬᠦᠬᠡᠷᠦᠬᠦᠢ ᠲᠠᠭᠤᠨ ᠢᠶᠠᠷ ᠮᠠᠶᠢᠯᠠᠵᠤ ᠪᠠᠶᠢᠨ᠎ᠠ ᠬᠡᠵᠤ ᠵᠡᠬᠦᠳᠤ ᠠᠴᠠ  ᠪᠠᠨ ᠰᠤᠴᠢᠨ ᠰᠡᠷᠢᠪᠠᠯ ᠬᠡᠷ ᠤᠨ ᠭᠠᠳᠠᠭ᠎ᠠ ᠶᠠᠮᠠᠷ ᠨᠢᠬᠡᠨ ᠲᠠᠭᠤ ᠴᠢᠮᠡᠭᠡ ᠭᠠᠷᠬᠤ ᠰᠢᠭ᠋ ᠪᠤᠯᠵᠤ ᠪᠢ ᠭᠤᠳᠤᠯ ᠢᠶᠠᠨ ᠴᠤ ᠰᠢᠷᠭᠤᠭᠤᠯᠵᠤ ᠠᠮᠵᠢᠬᠰᠠᠨ ᠦᠬᠡᠢ ᠬᠦᠯ‌ᠨᠢᠴᠦᠬᠦᠨ ᠬᠦᠶᠤᠨ ᠭᠠᠷᠪᠠ᠃ ᠶᠤᠰᠤᠳᠠᠢ ᠭᠠᠶᠢᠬᠠᠮᠰᠢᠭ ᠬᠡᠵᠤ ᠲᠡᠷᠡ᠃ ᠬᠠᠶᠢᠷᠠᠳᠠᠢ ᠰᠤᠮᠤᠨ ᠴᠠᠭᠠᠨ ᠮᠢᠨᠢ ᠬᠠᠷᠢᠭᠠᠳ ᠢᠷᠡᠵᠡᠢ᠃ ᠪᠠᠶᠠᠷᠯᠠᠵᠤ ᠭᠠᠶᠢᠬᠠᠨ ᠮᠡᠬᠡᠶᠢᠷᠡᠭᠰᠡᠨ ᠪᠢ ᠶᠠᠭᠤ ᠴᠤ ᠬᠠᠮᠢᠶᠠᠷᠤᠯ ᠦᠬᠡᠢ ᠬᠦᠶᠤᠨ ᠤᠴᠢᠵᠤ ᠰᠤᠮᠤᠨ ᠴᠠᠭᠠᠨ ᠤ ᠬᠦᠵᠤᠬᠦᠦ ᠪᠠᠷ ᠲᠠᠪᠠᠷᠠᠵᠤ ᠠᠪᠬᠤ ᠳᠤ ᠲᠠᠷᠡ ᠴᠤ ᠪᠤᠯᠳᠠᠵᠤ ᠵᠠᠶᠢᠯᠠᠬᠤ  ᠪᠠᠨ ᠮᠠᠷᠳᠠᠴᠢᠬᠠᠬᠰᠠᠨ ᠰᠢᠭ᠋ ᠨᠠᠳᠠ ᠶᠢ ᠦᠨᠦᠷᠯᠡᠵᠤ ᠪᠠᠶᠢᠪᠠ᠃ ᠪᠢ ᠡᠳᠤᠷ ᠤᠬᠢᠯᠠᠵᠤ ᠪᠤᠯᠤᠬᠰᠠᠨ ᠦᠬᠡᠢ ᠪᠠᠨ ᠨᠦᠬᠦᠬᠦ ᠮᠡᠳᠤ ᠰᠤᠮᠤᠨ ᠴᠠᠭᠠᠨ ᠢᠶᠠᠨ ᠲᠡᠪᠡᠷᠡᠨ ᠱᠤᠬᠰᠢᠷᠠᠨ ᠤᠬᠢᠯᠡᠵᠤ ᠪᠠᠶᠢᠳᠠᠯ᠎ᠠ ᠬᠡᠨᠡᠳᠳᠡ ᠨᠢᠷᠤᠭᠤᠨ ᠬᠡᠰᠡᠭ ᠳᠤ ᠨᠢ ᠨᠤᠶᠢᠳᠠ ᠠᠯᠳᠠᠬᠤ ᠶᠢ ᠰᠡᠷᠡᠵᠤ ᠬᠠᠰᠬᠢᠷᠠᠬᠤ ᠶᠢ ᠵᠠᠪᠳᠤᠳᠠᠯ᠎ᠠ ᠭᠠᠳᠠᠨ᠎ᠠ ᠶᠢᠨ ᠤᠶᠢᠮᠡᠬᠡᠨ  ᠢᠶᠠᠷ ᠰᠡᠷᠡᠭᠰᠡᠨ ᠠᠪᠤ ᠡᠵᠢ ᠪᠤᠯᠤᠨ ᠡᠬᠡᠴᠢ ᠶᠠᠭ ᠬᠡᠷ ᠠᠴᠠ ᠭᠠᠷᠴᠤ ᠢᠷᠡᠬᠡᠳ ᠪᠠᠶᠢᠪᠠ᠃ ᠪᠢᠳᠠ ᠬᠡᠳᠤᠬᠦᠯᠡ ᠰᠤᠮᠤᠨ ᠴᠠᠭᠠᠨ ᠢ ᠲᠦᠯᠬᠢᠵᠤ ᠲᠠᠳᠠᠬᠤ ᠲᠠᠢ ᠬᠡᠷ  ᠲᠤ ᠤᠷᠤᠭᠤᠯᠵᠤ ᠳ᠋ᠧᠩ ᠤᠨ ᠬᠡᠷᠡᠯ ᠳᠤ ᠪᠠᠶᠢᠴᠠᠭᠠᠨ ᠦᠵᠡᠬᠡᠳ ᠰᠤᠮᠤᠨ ᠴᠠᠭᠠᠨ ᠤ ᠨᠢᠷᠤᠭᠤ ᠪᠡ ᠨᠢᠬᠡ ᠬᠦᠯ ᠨᠢ ᠰᠢᠷᠬᠠᠳᠤᠬᠰᠠᠨ ᠢ ᠮᠡᠳᠡᠪᠡ᠃           — — ᠶᠠᠮᠠᠷ ᠤᠬᠠᠭᠠᠨ ᠲᠠᠢ ᠮᠠᠯ ᠶᠤᠮ ᠪᠤᠢ︖ ᠶᠠᠭᠠᠬᠢᠵᠤ ᠠᠯᠳᠠᠭᠤᠯᠵᠤ ᠢᠷᠡᠪᠡ︖ ᠵᠠᠮ ᠲᠤᠵᠢᠨ ᠲᠡᠷᠡ ᠤᠯᠠᠨ ᠬᠦᠷᠢᠶ᠎ᠡ ᠲᠤᠤᠷ ᠢ ᠶᠠᠭᠠᠬᠢᠵᠤ ᠲᠤᠭᠤᠯᠵᠤ ᠢᠷᠡᠪᠡ︖ ᠤᠶᠢᠯᠡ ᠶᠢᠨ ᠦᠷ᠎ᠡ ᠡ︕ ᠬᠡᠵᠤ ᠡᠵᠢ ᠤᠨ ᠲᠠᠭᠤ ᠬᠤᠭᠤᠯᠠᠢ ᠨᠢ ᠴᠡᠴᠡᠷᠡᠵᠤ ᠨᠢᠳᠤ ᠨᠢ ᠠᠯᠢ ᠬᠡᠵᠢᠶᠡᠨ ᠤ ᠵᠠᠶᠢᠷᠳᠤᠴᠢᠬᠠᠬᠰᠠᠨ ᠪᠠᠶᠢᠪᠠ᠃           ᠠᠪᠤ ᠮᠠᠯ ᠤᠨ ᠡᠮ ᠤᠨ ᠬᠠᠶᠢᠷᠴᠠᠭ ᠢᠶᠠᠨ ᠭᠠᠷᠭᠠᠵᠤ ᠰᠢᠷᠬ᠎ᠠ ᠶᠢ ᠨᠢ ᠤᠬᠢᠶᠠᠵᠤ ᠠᠷᠴᠢᠨ  ᠰᠢᠷᠬ᠎ᠠ ᠲᠠᠢ ᠬᠦᠯ ᠢ ᠨᠢ ᠰᠠ ᠪᠠᠷ ᠤᠷᠢᠶᠠᠭᠠᠳ ᠬᠡᠷ ᠠᠴᠠ ᠭᠠᠷᠭᠠᠬᠤ ᠳᠤ ᠰᠤᠮᠤᠨ ᠴᠠᠭᠠᠨ ᠲᠡᠬᠡᠭ ᠲᠤᠭᠤᠭ ᠠᠯᠬᠤᠬᠰᠠᠭᠠᠷ ᠪᠢ ᠬᠠᠷᠢᠭᠠᠳ ᠢᠷᠡᠯ᠎ᠡ ᠬᠡᠵᠤ ᠵᠠᠷᠯᠠᠬᠤ ᠮᠡᠳᠤ ᠮᠠᠶᠢᠯᠠᠬᠰᠠᠭᠠᠷ ᠢᠵᠢᠯᠢ ᠰᠦᠷᠦᠭ ᠲᠤ ᠪᠠᠨ ᠨᠠᠶᠢᠯᠠᠪᠠ᠃ ᠠᠪᠤ ᠭᠠᠭᠴᠠ ᠲᠤᠭᠤᠭ᠎ᠠ ᠲᠠᠮᠠᠬᠢ ᠨᠠᠷᠠᠵᠤ ᠪᠠᠶᠢᠬᠰᠠᠨ ᠢᠶᠠᠨ ᠡᠬᠡᠴᠢ ᠤᠷᠤᠭᠤ ᠡᠩᠬᠦᠷᠡᠶᠢᠯᠡᠨ ᠰᠢᠷᠳᠡᠵᠤ᠂ ᠤᠳᠠᠯ ᠦᠬᠡᠢ ᠤᠨᠤᠭ᠎ᠠ ᠬᠦᠯᠯᠡᠵᠤ᠂ ᠰᠢᠷ᠎ᠠ ᠬᠠᠯᠵᠠᠨ ᠢᠷᠬᠡ ᠶᠢ ᠪᠠᠷᠢᠵᠤ᠂ ᠬᠠᠰᠠᠭ ᠲᠠᠬᠡᠷ᠎ᠡ ᠬᠦᠯᠢᠬᠡᠳ ᠰᠤᠮᠤ ᠤᠷᠤᠭᠤ ᠦᠷ ᠰᠦᠨᠢ ᠪᠠᠷ ᠶᠠᠪᠤᠵᠠᠢ᠃ ᠡᠬᠡᠴᠢ ᠦᠬᠡ ᠲᠤᠤᠭᠠᠷᠤᠬᠰᠠᠨ ᠦᠬᠡᠢ᠂ ᠶᠠᠭᠤ ᠴᠤ ᠪᠤᠯᠤᠬᠰᠠᠨ ᠦᠬᠡᠢ ᠮᠡᠳᠤ ᠬᠦᠨᠵᠢᠯᠡᠨ ᠳᠤ ᠪᠠᠨ ᠤᠷᠤᠵᠤ ᠤᠨᠳᠠᠴᠢᠬᠤ ᠰᠢᠭ᠋ ᠪᠤᠯᠪᠠ᠃ ᠡᠨᠡ ᠤᠳᠠᠭ᠎ᠠ ᠡᠬᠡᠴᠢ ᠮᠢᠨᠢ ᠪᠠᠰᠠ ᠤᠬᠢᠯᠡᠬᠤ ᠪᠠᠨ ᠮᠠᠷᠳᠠᠬᠤ ᠡᠬᠡᠯᠵᠢ ᠪᠤᠯᠤᠬᠰᠠᠨ ᠪᠤᠯ ᠤᠤ ᠬᠡᠵᠤ ᠪᠤᠳᠤᠭᠠᠳ ᠬᠡᠨᠡᠳᠳᠡ ᠰᠠᠶ᠋ᠢᠬᠠᠨ ᠤ ᠪᠠᠶᠠᠷ ᠵᠢᠷᠭᠠᠯ ᠪᠦᠬᠦᠨ ᠬᠤᠷᠤᠮᠬᠠᠨ᠎ᠠ ᠠᠷᠢᠯᠵᠤ᠂ ᠡᠬᠡᠴᠢ ᠶᠢᠨ ᠲᠦᠯᠦᠬᠡ ᠵᠤᠪᠠᠵᠤ ᠦᠷ ᠴᠠᠶᠢᠳᠠᠯ᠎ᠠ ᠤᠨᠳᠠᠵᠤ ᠴᠢᠳᠠᠬᠰᠠᠨ ᠦᠬᠡᠢ᠃         ᠠᠪᠤ ᠲᠡᠬᠢᠵᠤ ᠱᠦᠯᠦ ᠤᠰᠤ ᠤᠤᠭᠤᠬᠤ ᠬᠡᠵᠤ ᠶᠠᠮᠠᠷ ᠬᠦᠮᠦᠨ ᠭᠤᠶᠤᠵᠤ ᠢᠷᠡᠭᠰᠡᠨ ᠴᠤ ᠰᠤᠮᠤᠨ ᠴᠠᠭᠠᠨ ᠢ ᠦᠢᠷᠠᠳᠤᠭᠤᠯᠬᠤ ᠦᠬᠡᠢ ᠪᠤᠯᠪᠠ᠃ ᠰᠤᠮᠤᠨ ᠴᠠᠭᠠᠨ ᠨᠡᠷ᠎ᠡ ᠨᠢᠳᠡᠷ ᠲᠤ ᠪᠠᠨ ᠲᠡᠩᠴᠡᠵᠤ᠂ ᠤᠯᠠᠨ ᠵᠢᠯ ᠢᠶᠠᠷ ᠰᠦᠷᠦᠭ ᠮᠠᠯ ᠤᠨ ᠤᠳᠤ ᠰᠤᠳᠤ ᠨᠢ ᠪᠤᠯᠵᠤ ᠢᠷᠡᠭᠰᠡᠨ ᠶᠤᠮ ᠡ᠃ ᠰᠤᠮᠤᠨ ᠴᠠᠭᠠᠨ ᠢ ᠰᠡᠳᠡᠷᠯᠡᠭᠰᠡᠨ ᠦᠬᠡᠢ ᠪᠤᠯᠪᠠᠴᠤ ᠰᠡᠳᠡᠷᠳᠤ ᠬᠤᠨᠢᠨ ᠤ ᠬᠦᠨᠳᠤ ᠶᠢ ᠤᠯᠵᠤ ᠬᠤᠨᠢᠨ ᠤ ᠨᠠᠰᠤ ᠪᠠᠨ ᠲᠤᠭᠤᠯᠪᠠ᠃         ᠪᠢ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠲᠡᠬᠦᠰᠦᠭᠰᠡᠨ ᠲᠠᠷᠡ ᠵᠢᠯ᠂ ᠰᠤᠮᠤᠨ ᠴᠠᠭᠠᠨ ᠬᠠᠷᠬᠢᠯ ᠤᠨ ᠰᠢᠯᠢ ᠶᠢᠨ ᠬᠠᠮᠤᠭ ᠦᠨᠳᠤᠷ ᠤᠷᠬᠢᠯ ᠪᠤᠯᠬᠤ ᠭᠤᠵᠤᠩ ᠬᠠᠷᠬᠢᠯ  ᠤᠨ ᠡᠩᠬᠡᠷ ᠲᠤ ᠬᠡᠪᠳᠡᠭᠡ ᠪᠠᠷ ᠢᠶᠠᠨ ᠨᠦᠬᠦᠴᠢᠯ᠎ᠡ ᠬᠡᠵᠤ ᠠᠶᠢᠯ ᠤᠨ ᠬᠢᠨ ᠬᠡᠯᠡ ᠪᠤᠯᠵᠤ ᠢᠷᠡᠭᠰᠡᠨ ᠬᠡᠨ᠎ᠡ᠃ ᠲᠦᠷᠦᠵᠤ ᠠᠮᠢᠳᠤᠷᠠᠬᠰᠠᠨ ᠡᠮᠡᠬᠡᠯᠳᠤ ᠶᠢᠨ ᠮᠠᠩᠬ᠎ᠠ᠂ ᠭᠠᠳᠠᠰᠤᠨ ᠴᠠᠶᠢᠳᠠᠮ᠂ ᠰᠢᠯᠢ ᠪᠠᠯᠠᠷ ᠢᠶᠠᠨ ᠨᠢᠳᠤ ᠲᠦᠬᠦᠷᠡᠩ ᠪᠠᠷᠠᠯᠠᠭᠠᠳ ᠮᠤᠷᠳᠠᠴᠢᠬᠠᠵᠠᠢ ᠳ᠋ᠠ︕ ᠬᠡᠵᠢᠶ᠎ᠠ ᠰᠡᠬᠦᠯ ᠳᠤ ᠪᠢ ᠭᠤᠵᠤᠩ ᠬᠠᠷᠬᠢᠯ ᠳᠤ ᠭᠠᠷᠤᠭᠠᠳ ᠬᠡᠳᠤᠢ ᠡᠷᠢᠭᠰᠡᠨ ᠴᠤ ᠰᠤᠮᠤᠨ ᠴᠠᠭᠠᠨ ᠤ ᠪᠠᠨ ᠤᠩᠭᠠᠰᠤ ᠶᠠᠰᠤ ᠶᠢ ᠴᠤ ᠤᠯᠵᠤ ᠲᠡᠶᠢᠯᠦᠭᠰᠡᠨ ᠦᠬᠡᠢ᠃           ᠲᠠᠬᠢᠨ ᠤᠳᠠᠭ᠎ᠠ ᠰᠤᠷᠤᠯᠭ᠎ᠠ ᠶᠢᠨ ᠴᠢᠯᠦᠬᠡ ᠪᠠᠷ ᠬᠠᠷᠢᠬᠤ ᠳᠤ ᠲᠡᠬᠦᠦ ᠮᠢᠨᠢ ᠶᠡᠭᠡ ᠬᠤᠯᠠ ᠠᠴᠠ ᠪᠤᠷᠭᠠᠰᠤᠨ ᠮᠤᠷᠢ ᠲᠠᠢ ᠲᠤᠪᠳᠤᠯᠭᠠᠵᠤ ᠬᠠᠷᠠᠬᠳᠠᠪᠠ᠃ ᠠᠷᠤ ᠠᠴᠠ ᠨᠢ ᠲᠤᠩ ᠴᠠᠭᠠᠨ ᠬᠤᠷᠠᠭ᠎ᠠ ᠰᠡᠬᠦᠯ ᠬᠤᠷᠤᠶᠢᠯᠳᠤᠭᠤᠯᠤᠨ ᠰᠠᠯᠤᠯ ᠦᠬᠡᠢ ᠦᠰᠦᠷᠤᠨ ᠲᠡᠭᠳᠡᠵᠤ ᠨᠠᠰᠢᠯᠠᠨ᠎ᠠ᠃         — — ᠠᠬ᠎ᠠ ᠡ︕ ᠰᠤᠮᠤᠨ ᠴᠠᠭᠠᠨ ᠢ ᠬᠠᠷᠠᠭᠠᠴᠢ︕ ᠬᠡᠵᠤ ᠰᠢᠷᠦᠬᠦᠨ ᠲᠤᠪᠳᠤᠯᠭᠠᠨ ᠳᠤ ᠠᠮᠢᠰᠬᠤᠭ᠎ᠠ ᠠᠪᠬᠤ ᠵᠠᠪ ᠦᠬᠡᠢ ᠬᠠᠰᠬᠢᠷᠠᠪᠠ᠃         ᠰᠤᠮᠤᠨ ᠴᠠᠭᠠᠨ ᠤᠤᠯ ᠨᠢ ᠮᠠᠨ ᠤ ᠬᠢᠨ ᠠᠴᠠ ᠶᠠᠪᠤᠭ᠎ᠠ ᠦᠬᠡᠢ ᠶᠤᠮ ᠪᠠᠶᠢᠵᠡᠢ᠃ ᠰᠤᠮᠤᠨ ᠴᠠᠭᠠᠨ ᠮᠢᠨᠢ ᠰᠠᠬᠢᠭᠤᠰᠤ ᠤᠷᠤᠰᠢᠬᠰᠠᠨ ᠠᠮᠢᠳᠠᠨ ᠪᠠᠶᠢᠵᠤ ᠪᠤᠯᠵᠤᠰᠢ ᠦᠬᠡᠢ ᠬᠡᠰᠡᠨ ᠪᠤᠳᠤᠯ ᠤᠲᠤ ᠴᠤ ᠭᠡᠰᠡᠨ ᠨᠠᠲᠠ ᠠᠴᠠ ᠰᠠᠯᠲᠠᠭ ᠦᠭᠡᠢ ᠶᠤᠮ ᠡ︕ ᠵᠣᠬᠢᠶᠠᠭᠴᠢ ᠠᠴᠠ ᠬᠠᠩᠭᠠᠪᠠ
ᠢᠷᠡᠯᠲᠡ᠄ ᠵᠣᠬᠢᠶᠠᠭᠴᠢ ᠠᠴᠠ ᠬᠠᠩᠭᠠᠪᠠ