| ᠡᠪᠦᠭᠡᠨ ᠰᠢᠪᠠᠭᠤᠨ ᠤ ᠲᠤᠤᠯᠢ | | ᠮᠦ᠊᠂ ᠨᠠᠷᠠᠨᠮᠠᠨᠳᠤᠬᠤ | | ᠵᠢᠷᠠ ᠨᠤᠳᠤᠭ ᠠᠴᠠ ᠤᠴᠢᠯᠠᠵᠤ ᠲᠦᠷᠡᠯᠵᠡᠭᠰᠡᠨ ᠤᠮᠤᠬᠳᠤ ᠭᠠᠯ | ᠵᠢᠷᠤᠭᠠ ᠬᠦᠯᠦᠭ ᠠᠴᠠ ᠤᠳᠤᠯᠠᠵᠤ ᠲᠤᠶᠠᠭᠠᠷᠠᠭᠰᠠᠨ ᠲᠤᠮᠤᠬᠳᠤ ᠭᠠᠷᠠᠭ | ᠵᠢᠷᠭᠠᠯ ᠵᠤᠪᠠᠯᠠᠩ ᠢᠶᠠᠨ ᠲᠤᠭᠤᠯᠵᠤ ᠢᠰᠭᠡᠷᠦᠭᠰᠡᠨ ᠭᠡᠴᠡᠭᠦᠦ ᠪᠡᠷᠭᠡ | ᠵᠠᠶᠠᠭᠠ ᠲᠠᠪᠢᠯᠠᠩ ᠢᠶᠠᠨ ᠲᠤᠭᠠᠯᠠᠵᠤ ᠢᠮᠡᠷᠦᠭᠰᠡᠨ ᠪᠢᠳᠡᠭᠦᠦ ᠡᠷᠬᠡ | ᠪᠡᠶᠡ ᠰᠦᠨᠡᠰᠦ ᠬᠤᠶᠠᠷ ᠢᠶᠠᠷ ᠠᠮᠢ ᠪᠤᠯᠵᠤ | ᠪᠢᠯᠢᠭ ᠤᠬᠠᠭᠠ ᠬᠤᠶᠠᠷ ᠢᠶᠠᠷ ᠨᠡᠷᠡ ᠤᠯᠵᠤ | ᠪᠢᠴᠢᠭ ᠨᠤᠮ ᠬᠤᠶᠠᠷ ᠢᠶᠠᠷ ᠦᠢᠯᠡᠰ ᠵᠠᠯᠭᠠᠵᠤ | ᠪᠡᠭᠡ ᠪᠢᠷ ᠬᠤᠶᠠᠷ ᠢᠶᠠᠷ ᠬᠠᠨᠢ ᠪᠤᠯᠭᠠᠵᠤ | ᠦᠤᠬᠡ ᠲᠡᠤᠬᠡ ᠠᠴᠠ ᠲᠤᠰᠤᠯᠤᠬᠰᠠᠨ ᠤᠯᠠᠭᠠᠨ ᠴᠢᠰᠤᠨ ᠤ ᠤᠶᠢᠯᠤᠯ | ᠦᠨᠡᠨ ᠮᠦᠨ ᠠᠴᠠ ᠲᠤᠰᠤᠳᠠᠭᠰᠠᠨ ᠴᠠᠭᠠᠨ ᠰᠦᠨ ᠤ ᠦᠷᠭᠦᠯᠵᠢᠯᠡᠯ | ᠦᠬᠡᠷ ᠲᠡᠷᠭᠡ ᠪᠠᠷ ᠵᠠᠮᠨᠠᠬᠰᠠᠨ ᠴᠠᠷᠳᠠ ᠭᠠᠯᠪᠠ ᠶᠢᠨ ᠨᠡᠭᠦᠳᠡᠯ | ᠦᠷᠡ ᠤᠳᠤᠮ ᠢᠶᠠᠨ ᠵᠠᠯᠭᠠᠭᠰᠠᠨ ᠴᠠᠳᠢᠭ ᠰᠤᠳᠤᠷ ᠤᠨ ᠦᠳᠡᠮᠡᠯ | ᠽᠠᠮᠪᠤᠯᠢᠩ ᠤᠨ ᠲᠤᠭᠤᠰᠤᠨ ᠳᠤ ᠤᠨᠠᠵᠤ ᠪᠤᠰᠴᠤ ᠲᠤᠮᠤᠭᠠᠵᠢᠨ | ᠽᠠᠨᠳᠠᠨ ᠵᠠᠯᠠᠭᠤ ᠨᠠᠰᠤ ᠪᠠᠨ ᠲᠦᠷᠦ ᠵᠠᠰᠠᠭ ᠲᠤ ᠪᠠᠨ ᠡᠷᠭᠦᠭᠰᠡᠨ | ᠠᠯᠳᠠᠷ ᠠᠵᠢᠯ ᠬᠤᠶᠠᠷ ᠢᠶᠠᠨ ᠵᠡᠷᠭᠡ ᠠᠪᠴᠤ ᠭᠢᠯᠠᠷᠠᠨ | ᠠᠰᠠᠷ ᠶᠡᠭᠡ ᠦᠢᠯᠡᠰ ᠢᠶᠠᠨ ᠲᠡᠷᠭᠡ ᠪᠤᠯᠵᠤ ᠲᠡᠭᠡᠭᠡᠭᠰᠡᠨ | ᠭᠠᠩ ᠢᠯᠳᠦ ᠬᠤᠷᠤᠶᠢᠯᠠᠵᠤ ᠪᠠᠶᠢᠯᠳᠤᠭᠰᠠᠨ ᠦᠭᠡᠢ ᠴᠦ | ᠭᠠᠩᠭᠠᠩ ᠪᠢᠷ ᠢᠶᠠᠨ ᠬᠤᠷᠴᠠᠯᠠᠵᠤ ᠪᠢᠴᠢᠭᠯᠡᠭᠰᠡᠨ ᠶᠤᠮ ᠲᠠ | ᠰᠢᠷᠢᠨ ᠵᠤᠳᠤᠭ ᠨᠦᠮᠦᠷᠴᠤ ᠪᠠᠷᠢᠯᠳᠤᠭᠰᠠᠨ ᠦᠭᠡᠢ ᠴᠦ | ᠰᠢᠳᠢᠳᠦ ᠤᠬᠠᠭᠠᠨ ᠢᠶᠠᠨ ᠰᠤᠷᠢᠵᠤ ᠨᠤᠮᠯᠠᠬᠰᠠᠨ ᠶᠤᠮ ᠲᠠ | ᠬᠠᠨ ᠶᠡᠭᠡ ᠰᠤᠶᠤᠯ ᠳᠤ ᠪᠠᠨ ᠦᠴᠢᠭ ᠪᠣᠯᠵᠤ ᠨᠠᠰᠤ ᠪᠠᠷ ᠲᠡᠮᠡᠤᠯᠦᠭᠰᠡᠨ | ᠪᠦᠬᠦᠬᠦ ᠦᠭᠡᠢ ᠵᠤᠯᠠ ᠶᠢᠨ ᠭᠡᠷᠡᠯ ᠪᠤᠯᠬᠤᠷ ᠪᠦᠭᠦᠳᠡ ᠶᠢᠨ ᠶᠤᠮ ᠲᠠ | ᠬᠠᠩᠭᠠᠢ ᠠᠭᠤᠳᠠᠮ ᠨᠤᠳᠤᠭ ᠲᠤ ᠪᠠᠨ ᠦᠮᠦᠭ ᠪᠤᠯᠵᠤ ᠶᠤᠰᠤ ᠪᠠᠷ ᠮᠦᠩᠬᠡᠷᠡᠭᠰᠡᠨ | ᠮᠦᠬᠦᠬᠦ ᠦᠭᠡᠢ ᠤᠭᠰᠠᠭᠠᠨ ᠤ ᠡᠷᠢᠯ ᠪᠤᠯᠬᠤᠷ ᠮᠦᠩᠬᠡ ᠶᠢᠨ ᠶᠤᠮ ᠲᠠ | ᠮᠠᠯ ᠢᠶᠠᠨ ᠬᠠᠷᠠᠵᠤ ᠦᠰᠦᠭᠰᠡᠨ ᠪᠤᠯᠬᠤᠷ ᠡᠷᠴᠢ ᠶᠤᠮ ᠲᠠ | ᠭᠠᠯ ᠢᠶᠠᠨ ᠮᠠᠨᠠᠵᠤ ᠦᠳᠡᠯᠦᠭᠰᠡᠨ ᠪᠤᠯᠬᠤᠷ ᠢᠯᠴᠢ ᠶᠤᠮ ᠲᠠ | ᠲᠤᠮᠤᠭ ᠶᠤᠮ ᠰᠢᠭ᠋ ᠦᠨᠡᠨ ᠪᠤᠯᠬᠤᠷ ᠴᠢᠯᠠᠭᠤ ᠶᠤᠮ ᠲᠠ | ᠲᠤᠭᠰᠢᠨ ᠠᠳᠠᠯᠠ ᠲᠦᠯᠭᠡᠨ ᠪᠤᠯᠬᠤᠷ ᠪᠢᠯᠠᠭᠤ ᠶᠤᠮ ᠲᠠ | ᠡᠷᠳᠡᠨ ᠴᠠᠳᠢᠭ ᠲᠡᠤᠬᠡᠨ ᠳᠤ ᠪᠠᠨ ᠴᠤᠯᠭᠤᠷᠠᠭᠰᠠᠨ ᠪᠤᠯᠬᠤᠷ | ᠤᠷᠳᠤᠰ ᠮᠤᠩᠭᠤᠯ ᠰᠤᠶᠤᠯ ᠤᠨ ᠬᠦᠨᠡᠰᠦ ᠶᠤᠮ ᠲᠠ | ᠡᠬᠡ ᠮᠤᠩᠭᠤᠯ ᠬᠡᠯᠡᠨ ᠳᠤ ᠪᠠᠨ ᠰᠢᠯᠭᠠᠷᠠᠭᠰᠠᠨ ᠪᠤᠯᠬᠤᠷ | ᠤᠳᠬᠠ ᠢᠷᠠᠭᠤ ᠤᠷᠠᠯᠢᠭ ᠤᠨ ᠰᠦᠨᠡᠰᠦ ᠶᠤᠮ ᠲᠠ | ᠨᠤᠳᠤᠭ ᠢᠶᠠᠨ ᠡᠷᠭᠦᠵᠤ ᠵᠢᠳᠭᠦᠭᠰᠡᠨ ᠪᠤᠯᠬᠤᠷ ᠪᠤᠶᠠᠨ ᠶᠤᠮ ᠲᠠ | ᠬᠤᠳᠤᠭ ᠢᠶᠠᠨ ᠰᠠᠬᠢᠵᠤ ᠡᠵᠡᠯᠡᠭᠰᠡᠨ ᠪᠤᠯᠬᠤᠷ ᠨᠤᠶᠠᠨ ᠶᠤᠮ ᠲᠠ | ᠨᠤᠮ ᠢᠶᠠᠨ ᠲᠢᠭᠯᠡᠵᠤ ᠴᠠᠭᠠᠷᠠᠭᠰᠠᠨ ᠪᠤᠯᠬᠤᠷ ᠲᠠᠷᠬᠠᠨ ᠶᠤᠮ ᠲᠠ | ᠲᠤᠮ ᠢᠶᠠᠨ ᠰᠢᠪᠰᠢᠵᠤ ᠮᠦᠩᠬᠡᠷᠡᠭᠰᠡᠨ ᠪᠤᠯᠬᠤᠷ ᠪᠤᠷᠬᠠᠨ ᠶᠤᠮ ᠲᠠ | ᠲᠠ ᠰᠠᠯᠬᠢ ᠶᠤᠮ | ᠲᠠᠶᠠᠩ ᠲᠠᠭᠤᠷᠢᠰᠤᠨᠠ | ᠲᠠ ᠪᠤᠷᠤᠭᠠ ᠶᠤᠮ | ᠲᠠᠶᠠᠭᠠᠷ ᠲᠤᠷᠠᠰᠤᠨᠠ | ᠵᠢᠷᠠᠭᠠᠳ ᠪᠤᠳᠢ ᠨᠤᠮ ᠢᠶᠠᠨ ᠲᠤᠭᠤᠷᠪᠢᠵᠤ ᠦᠳᠡᠯᠦᠭᠰᠡᠨ ᠰᠤᠶᠤᠯ ᠤᠨ ᠰᠢᠪᠠᠭᠤ | ᠲᠠᠯᠠᠭᠠᠳ ᠤᠨ ᠤ ᠰᠢᠭᠤᠷᠭᠠᠨ ᠳᠤ ᠵᠢᠭᠦᠷ ᠨᠢ ᠰᠢᠷᠬᠠᠳᠤᠭᠰᠠᠨ ᠠᠶᠠᠨ ᠤ ᠰᠢᠪᠠᠭᠤ | ᠨᠠᠶᠠᠨ ᠨᠠᠢᠮᠠᠨ ᠬᠠᠪᠤᠷ ᠨᠠᠮᠤᠷ ᠢ ᠡᠯᠡᠭᠡᠵᠤ ᠲᠤᠭᠤᠯᠤᠬᠰᠠᠨ ᠡᠪᠦᠭᠡᠨ ᠰᠢᠪᠠᠭᠤ | ᠶᠡᠷᠡ ᠶᠢᠰᠦᠨ ᠲᠩᠷᠢ ᠳᠤ ᠪᠠᠨ ᠦᠳᠦᠯᠡᠵᠤ ᠬᠠᠯᠢᠬᠰᠠᠨ ᠠᠪᠤᠷᠭᠤ ᠰᠢᠪᠠᠭᠤ | ᠤᠳᠤᠭ ᠤᠨ ᠪᠠᠷᠠᠭᠤᠨ ᠵᠠᠬᠠ ᠠᠴᠠ ᠰᠤᠶᠤᠯ ᠢᠶᠠᠷ ᠰᠠᠴᠤᠷᠠᠭᠰᠠᠨ ᠨᠠᠷᠠ ᠪᠢᠯᠡ | ᠤᠷᠤᠨ ᠭᠠᠵᠠᠷ ᠨᠤᠳᠤᠭ ᠬᠤᠯᠠ ᠳᠤ ᠰᠤᠳᠤᠷ ᠢᠶᠠᠷ ᠭᠡᠭᠡᠷᠡᠭᠰᠡᠨ ᠰᠠᠷᠠ ᠪᠢᠯᠡ | ᠤᠷᠴᠢᠯᠠᠩ ᠤᠨ ᠬᠠᠳᠠᠭᠤ ᠵᠢᠮᠡ ᠪᠠᠷ ᠰᠤᠯᠢᠷᠰᠢᠵᠤ ᠬᠠᠷᠪᠤᠬᠰᠠᠨ ᠤᠳᠤ ᠪᠢᠯᠡ | ᠤᠴᠢᠯᠠᠬᠤ ᠴᠡᠭᠡᠨ ᠭᠡᠷᠡᠯ ᠢᠶᠠᠨ ᠲᠦᠮᠡᠨ ᠳᠤ ᠲᠦᠭᠡᠭᠰᠡᠨ ᠰᠤᠳᠤ ᠪᠢᠯᠡ | ᠠᠮᠢ ᠨᠠᠰᠤᠨ ᠤ ᠰᠡᠭᠦᠯᠴᠢ ᠶᠢᠨ ᠠᠮᠢᠰᠬᠤᠭᠠ ᠪᠠᠨ ᠬᠦᠷᠲᠡᠯᠡ | ᠦᠷᠡᠰ ᠲᠤ ᠪᠠᠨ ᠬᠤᠷᠢᠶᠠᠵᠤ | ᠠᠮᠢᠳᠤᠷᠠᠯ ᠦᠢᠯᠡᠰ ᠤᠨ ᠡᠴᠦᠰ ᠤᠨ ᠲᠡᠯᠴᠢᠯᠡᠯ ᠢᠶᠠᠨ ᠬᠦᠷᠲᠡᠯᠡ | ᠦᠨᠳᠦᠰᠦᠳᠡᠨ ᠳᠤ ᠪᠠᠨ ᠵᠢᠳᠬᠦᠵᠤ | ᠰᠤᠳᠤᠷ ᠤᠨ ᠶᠡᠭᠡ ᠠᠭᠤᠯᠠᠨ ᠳᠤ | ᠬᠠᠳᠠᠨ ᠪᠢᠴᠢᠭ ᠢᠶᠠᠨ ᠰᠡᠶᠢᠯᠵᠤ ᠡᠪᠦᠭᠡᠷᠡᠭᠰᠡᠨ ᠲᠠ | ᠰᠤᠶᠤᠯ ᠤᠨ ᠠᠨᠠᠪᠠᠳ ᠳᠠᠯᠠᠢ ᠳᠤ | ᠬᠠᠰ ᠰᠡᠯᠢᠭᠦᠷ ᠢᠶᠠᠨ ᠤᠷᠬᠢᠵᠤ ᠤᠳᠤᠭᠰᠠᠨ ᠲᠠ | ᠴᠢᠳᠠᠯ ᠵᠢᠳᠭᠦᠯ ᠬᠤᠶᠠᠷ ᠢᠶᠠᠷ ᠲᠠᠶ᠋ᠢᠭ ᠪᠤᠯᠭᠠᠨ ᠪᠤᠰᠴᠤ | ᠴᠢᠩᠭᠠ ᠨᠢᠮᠪᠠᠢ ᠬᠤᠶᠠᠷ ᠢᠶᠠᠷ ᠰᠠᠶ᠋ᠢᠭ ᠪᠤᠯᠭᠠᠨ ᠠᠨᠠᠵᠤ | ᠴᠢᠩᠭᠢᠰ ᠤᠨ ᠬᠠᠯᠠᠭᠤᠨ ᠮᠤᠩᠭᠤᠯ ᠢᠶᠠᠷ ᠬᠠᠶ᠋ᠢᠭ ᠪᠤᠯᠭᠠᠨ ᠵᠤᠷᠢᠵᠤ | ᠴᠢᠨᠠᠳᠤ ᠶᠡᠭᠡ ᠶᠢᠷᠳᠢᠨᠴᠤ ᠠᠴᠠ ᠨᠤᠳᠤᠭ ᠪᠤᠴᠠᠵᠤ ᠲᠦᠷᠦᠭᠡᠷᠡᠢ ᠁ | |