ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠪᠠ ᠦᠷᠴᠢᠭᠡᠷ ᠡᠮᠡᠭᠡᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/11/8
     ᠬᠠᠭᠲᠠ ᠴᠤᠬᠤᠶᠢᠬᠤ ᠠᠴᠠ ᠡᠮᠤᠨᠡᠬᠡᠨ ᠬᠠᠪᠤᠷ ᠤᠨ ᠨᠢᠭᠡᠨ ᠦᠷᠯᠦᠭᠡ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠦᠷᠴᠢᠭᠡᠷ ᠡᠮᠡᠭᠡᠨ ᠬᠤᠶᠠᠷ ᠲᠠᠨᠢᠯᠴᠠᠵᠤ ᠪᠢᠯᠡ᠃ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠦᠷᠦᠭᠡᠨ ᠤ ᠬᠢᠨᠢ ᠴᠤᠩᠬᠤ ᠪᠠᠷ ᠱᠠᠭᠠᠶᠢᠭᠠᠳ᠄ ︽ᠦᠷᠴᠢᠭᠡᠷ ᠡᠮᠡᠭᠡᠨ ᠡ᠂ ᠡᠪᠦᠭᠡᠨ ᠦᠷ᠎ᠡ ᠬᠡᠦᠬᠡᠳ ᠲᠠᠢ ᠪᠠᠨ ᠴᠤᠭ ᠬᠦᠭᠡᠷᠦᠯᠳᠦᠵᠦ ᠰᠠᠭᠤᠬᠤ ᠦᠭᠡᠢ᠂ ᠦᠷ ᠢᠶᠠᠷ ᠭᠠᠭᠴᠠᠭᠠᠷ ᠦᠴᠦᠭᠡᠨᠡᠭᠦ ᠴᠢᠨᠢ ᠶᠠᠭᠤᠨ ᠪᠢᠯᠡ︾ ᠬᠡᠭᠦ ᠶᠤᠮ᠃ ︽ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠴᠢ ᠦᠨᠳᠡᠭᠡ ᠲᠦᠷᠦᠵᠦ ᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠭᠠᠳ ᠬᠤᠩᠭᠤᠷ ᠠᠯᠠᠭ ᠬᠤᠶᠠᠷ ᠦᠷ᠎ᠡ ᠲᠦᠷᠦᠭᠦᠯᠤᠭ᠍ᠰᠡᠨ ᠨᠠᠮ᠎ᠠ ᠶᠢ ᠬᠤᠱᠤᠩᠨᠠᠬᠤ ᠴᠢᠨᠢ ᠶᠠᠭᠤᠨ ᠪᠢᠯᠡ︾ ᠭᠡᠵᠦ ᠦᠷᠴᠢᠭᠡᠷ ᠡᠮᠡᠭᠡᠨ ᠤᠴᠠᠭᠠᠷᠳᠠᠩᠭᠤᠢ ᠶᠠᠷᠢᠨ᠎ᠠ᠃ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠰᠦᠭᠡᠩᠬᠢ ᠨᠠᠮ ᠳᠠᠭᠤ ᠪᠠᠷ ᠡᠮᠡᠭᠡᠨ ᠤᠷᠤᠭᠤ᠄ ︽ᠶᠢᠷᠳᠢᠨᠴᠤ ᠳᠤ ᠬᠦᠮᠦᠨ ᠦᠪᠡᠷ ᠢᠶᠠᠨ ᠮᠦᠩᠬᠡᠷᠡᠳᠡᠭ ᠦᠭᠡᠢ᠂ ᠦᠷ᠎ᠡ ᠪᠠᠨ ᠦᠯᠡᠳᠡᠭᠡᠵᠦ ᠮᠦᠩᠬᠡᠷᠡᠳᠡᠭ ᠯᠡ ᠵᠢᠮ᠎ᠡ ᠲᠠᠢ ᠬᠤᠶᠢᠨ᠎ᠠ᠂ ᠴᠢ ᠪᠢᠳᠠ ᠬᠤᠶᠠᠷ ᠦᠷᠦᠭᠡᠰᠦᠨ ᠪᠤᠷᠤᠭᠤ ᠬᠤᠶᠠᠷ ᠦᠭᠡ ᠪᠠᠷ ᠵᠦᠷᠢᠯᠳᠦᠬᠦ ᠶᠢᠨ ᠤᠷᠤᠨ ᠳᠤ ᠦᠪᠡᠷ ᠦᠪᠡᠷ ᠤᠨ ᠦᠩᠭᠡ ᠪᠠᠷ ᠢᠶᠠᠨ ᠢᠯᠭᠠᠷᠠᠵᠤ ᠠᠮᠢᠳᠤᠷᠠᠬᠤ ᠪᠢᠰᠢ ᠤᠤ︾ ᠬᠡᠬᠦ ᠶᠤᠮ᠃ ᠡᠨᠡ ᠬᠠᠷᠢᠨ ᠴᠢᠬᠢᠨ ᠳᠤ ᠳᠤᠯᠠᠭᠠᠬᠠᠨ ᠰᠢᠭ ᠬᠤᠶᠠᠷ ᠦᠭᠡ ᠰᠤᠨᠤᠰᠳᠠᠬᠤ ᠰᠢᠭ ᠪᠤᠯᠤᠯ᠎ᠠ ᠬᠡᠵᠤ ᠦᠷᠴᠢᠭᠡᠷ ᠡᠮᠡᠭᠡᠨ ᠠᠮᠠᠨ ᠳᠠᠭᠠᠨ ᠲᠦᠳᠦᠨᠡᠨ᠎ᠡ᠃ ᠡᠪᠦᠭᠡᠨ ᠲᠠᠭᠲᠠᠭ᠎ᠠ᠄ ︽ᠮᠢᠨᠤ ᠬᠠᠷᠢᠭᠤᠴᠠᠯᠭ᠎ᠠ ᠪᠤᠯ ᠦᠷ᠎ᠡ ᠶᠢᠨ ᠢᠶᠠᠨ ᠡᠵᠢ ᠶᠢ ᠰᠠᠨᠠᠭ᠎ᠠ ᠶᠢ ᠨᠢ ᠠᠮᠠᠷᠠᠭᠠᠵᠤ᠂ ᠬᠠᠨᠢ ᠲᠠᠢ ᠪᠠᠨ ᠬᠠᠮᠵᠢᠯᠴᠠᠵᠤ᠂ ᠦᠨᠳᠡᠭᠡ ᠵᠤᠯᠵᠠᠭ᠎ᠠ ᠪᠠᠨ ᠦᠰᠭᠡᠵᠦ ᠪᠤᠶᠢᠵᠢᠭᠤᠯᠬᠤ ᠪᠤᠯᠤᠨ᠎ᠠ᠃ ᠭᠠᠴᠢᠭ ᠬᠠᠭᠰᠠᠷᠠᠭᠠᠨ ᠲᠠᠢ ᠡᠨᠡ ᠴᠠᠭ ᠲᠤ ᠭᠠᠳᠠᠨ᠎ᠠ ᠠᠴᠠ ᠴᠢᠨᠢ ᠡᠮᠬᠦ ᠬᠤᠭᠤᠯᠠ ᠤᠯᠵᠤ᠂ ᠦᠨᠳᠡᠭᠡ ᠳᠠᠷᠤᠭᠰᠠᠨ ᠦᠷ᠎ᠡ ᠶᠢᠨ ᠢᠶᠠᠨ ᠡᠵᠢ ᠶᠢ ᠲᠡᠵᠢᠭᠡᠶ᠎ᠡ ᠭᠡᠵᠦ ᠡᠭᠦᠳᠡ ᠪᠠᠷ ᠴᠢᠨᠢ ᠡᠳᠦᠷᠵᠢᠨ ᠡᠷᠭᠢᠴᠡᠵᠦ ᠪᠠᠶᠢᠭ᠎ᠠ ᠨᠢ ᠡᠨᠡ ᠪᠢᠰᠢ ᠤᠤ︾ ᠬᠡᠬᠦ ᠶᠤᠮ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠬᠠᠨᠢ ᠳᠠᠭᠠᠨ ᠬᠠᠶᠠᠭᠳᠠᠭᠠᠳ᠂ ᠬᠠᠶᠢᠷᠠᠲᠠᠢ ᠬᠤᠶᠠᠷ ᠦᠷ᠎ᠡ ᠶᠢ ᠪᠠᠨ ᠰᠠᠬᠢᠵᠤ ᠰᠠᠭᠤᠬᠤ ᠳᠠᠭᠠᠨ ᠭᠠᠭᠴᠠᠬᠠᠨ ᠠᠶᠠᠭ᠎ᠠ ᠲᠦᠭᠦᠬᠡᠢ ᠭᠤᠯᠢᠷ᠂ ᠬᠠᠭᠠᠰ ᠠᠯᠠᠭᠠᠨ ᠴᠢᠨᠡᠭᠡᠬᠡᠨ ᠬᠠᠶᠢᠯᠭᠠᠭᠰᠠᠨ ᠢᠮᠠᠭᠠᠨ ᠦᠭᠡᠬᠦ ᠲᠠᠢ ᠬᠤᠴᠤᠷᠴᠤ᠂ ᠦᠷᠯᠦᠭᠡ ᠶᠢᠨ ᠬᠤᠭᠤᠯᠠ ᠪᠠᠨ ᠠᠷᠭᠠᠯᠠᠪᠠᠯ ᠦᠳᠠ᠂ ᠤᠷᠤᠢ ᠬᠤᠭᠤᠯᠠ ᠦᠭᠡᠢ ᠬᠤᠭᠤᠰᠤᠨ ᠬᠤᠨᠤᠳᠠᠭ ᠪᠠᠶᠢᠭᠰᠠᠨ ᠢᠶᠠᠨ ᠰᠠᠨᠠᠵᠤ᠂ ᠬᠠᠮᠠᠷ ᠢᠶᠠᠨ ᠲᠠᠲᠠᠵᠤ ᠳᠤᠭᠤᠢ ᠰᠠᠭᠤᠵᠤ᠂ ᠦᠨᠳᠡᠭᠡ ᠠᠴᠠ ᠨᠡᠪᠴᠢᠳᠡᠭ ᠦᠴᠦᠭᠡᠨ ᠲᠠᠭᠲᠠᠭ᠎ᠠ ᠬᠦᠷᠲᠡᠯ᠎ᠡ ᠡᠴᠢᠭᠡ ᠶᠢᠨ ᠬᠠᠷᠢᠭᠤᠴᠠᠯᠭ᠎ᠠ ᠶᠢ ᠡᠶᠢᠨ ᠬᠦ ᠮᠦᠷᠤᠨ ᠳᠡᠭᠡᠨ ᠡᠭᠦᠷᠭᠡᠯᠡᠵᠦ ᠪᠠᠶᠢᠭ᠎ᠠ ᠶᠢ ᠬᠠᠷᠠᠭᠠᠳ᠂ ᠡᠷᠭᠡ ᠦᠭᠡᠢ ᠢᠲᠡᠭᠡᠵᠤ ᠪᠢᠰᠢᠷᠡᠭᠰᠡᠨ ᠬᠠᠷᠠᠴᠠ ᠪᠠᠷ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠶᠢ ᠠᠰ ᠡᠮᠦᠨ᠎ᠡ ᠠᠴᠠ ᠨᠢ ᠴᠤᠭᠤᠷᠠᠲᠠᠯ᠎ᠠ ᠪᠠᠨ ᠰᠢᠷᠲᠡᠯ᠎ᠡ᠃ ᠲᠡᠷᠡ ᠲᠠᠭᠲᠠᠭ᠎ᠠ ᠲᠡᠶᠢᠮᠦ ᠯᠡ ᠰᠦᠷᠯᠢᠭ᠂ ᠲᠡᠶᠢᠮᠦ ᠯᠡ ᠠᠭᠤᠤ᠂ ᠲᠡᠶᠢᠮᠦ ᠯᠡ ᠬᠠᠩᠬᠠᠭᠠᠷ᠂ ᠲᠡᠶᠢᠮᠦ ᠯᠡ ᠲᠦᠰᠢᠭ ᠲᠠᠢ ᠬᠠᠷᠠᠭᠳᠠᠨ᠎ᠠ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠰᠡᠳᠭᠢᠯ ᠢᠶᠠᠷ ᠤᠨᠠᠵᠤ᠂ ᠮᠦᠡᠭᠭᠦᠨ ᠪᠤᠭᠤᠷᠤᠯ ᠪᠤᠯᠵᠤ᠂ ᠢᠳᠡᠭᠦ ᠬᠤᠭᠤᠯᠠ ᠦᠭᠡᠢ᠂ ᠤᠨᠲᠠᠬᠤ ᠨᠦᠢᠷ ᠦᠭᠡᠢ ᠡᠮᠰᠡᠶᠢᠵᠤ ᠬᠠᠮᠰᠶᠢᠭᠠᠳ ᠡᠵᠢ ᠶᠢᠨ ᠢᠶᠠᠨ ᠠᠷᠭᠠᠯ ᠤᠨ ᠤᠪᠤᠭᠠᠨ ᠤ ᠬᠠᠵᠠᠭᠤ ᠳᠤ ᠬᠦᠷᠴᠦ ᠶᠤᠤᠯᠠᠵᠤ ᠭᠡᠪᠲᠡᠳᠡᠭ ᠪᠤᠯᠤᠯ᠎ᠠ᠃ ᠦᠳᠡᠯᠦᠭᠡ ᠪᠤᠯᠤᠭᠰᠠᠨ ᠡᠵᠢ ᠨᠢ ᠬᠠᠵᠠᠭᠤ ᠳᠤᠨᠢ ᠬᠦᠷᠦᠭᠡᠳ᠄ ︽ᠬᠡᠦᠭᠡᠨ ᠮᠢᠨᠢ ᠡ᠂ ᠴᠢ ᠬᠡᠨ ᠳᠤ ᠬᠡᠷᠡᠭ ᠦᠭᠡᠢ ᠴᠤ ᠬᠤᠶᠠᠷ ᠬᠡᠥᠬᠡᠳ ᠪᠢᠳᠠ ᠭᠤᠷᠪᠠ ᠳᠤ ᠬᠡᠷᠡᠭᠲᠡᠢ ᠰᠢᠤ᠂ ᠲᠡᠭᠡᠬᠦ ᠪᠠᠷ ᠢᠶᠠᠨ ᠴᠢ ᠵᠠᠪᠠᠯ ᠵᠤᠷᠢᠭᠯᠠᠵᠤ᠂ ᠡᠳᠡᠭᠡᠷᠡᠵᠦ ᠪᠤᠰᠴᠤ ᠵᠤᠭᠰᠤᠬᠤ ᠬᠡᠷᠡᠭᠲᠡᠢ ᠰᠢᠤ︾ ᠭᠡᠳ ᠡᠩᠬᠡᠷ ᠢᠶᠠᠨ ᠲᠡᠪᠲᠤᠲᠡᠯ᠎ᠡ ᠣᠬᠢᠯᠠᠵᠤ ᠵᠤᠭᠰᠤᠨ᠎ᠠ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠤ ︽ᠪᠢ ᠨᠢᠭᠡ ᠬᠠᠨᠲᠠᠯ᠎ᠠ ᠪᠠᠨ ᠤᠨᠲᠠᠬᠤ ᠶᠤᠮ ᠰᠠᠨ᠂ ᠴᠠᠳᠲᠠᠯ᠎ᠠ ᠪᠠᠨ ᠢᠳᠡᠬᠦ ᠶᠤᠮ ᠰᠠᠨ︾ ᠭᠡᠵᠦ ᠪᠠᠶᠢᠨ ᠲᠠᠬᠢᠨ ᠠᠮᠠᠨ ᠳᠠᠭᠠᠨ ᠳᠦᠳᠦᠨᠡᠭᠦ ᠶᠢ ᠬᠠᠷᠠᠭᠰᠠᠨ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠲᠦᠷᠭᠡᠨ ᠭᠡᠭᠴᠢ ᠦᠷᠴᠢᠭᠡᠷ ᠡᠮᠡᠭᠡᠨ ᠤ ᠡᠮᠦᠨ᠎ᠡ ᠨᠢ ᠨᠢᠰᠴᠤ ᠬᠦᠷᠦᠭᠡᠳ᠄ ︽ᠳᠤᠭ ᠭᠡᠪᠡᠯ ᠨᠦᠢᠷ᠂ ᠳᠤᠨᠳᠠᠭᠤᠷ ᠢᠳᠡᠪᠡᠯ ᠬᠤᠭᠤᠯᠠ᠂ ᠬᠠᠨᠠᠨ ᠭᠡᠷ ᠠᠴᠠ ᠪᠠᠨ ᠭᠠᠷᠤᠭᠠᠳ ᠬᠠᠳᠠᠨ ᠭᠡᠷ ᠲᠡᠭᠡᠨ ᠬᠠᠷᠢᠴᠢᠬᠠᠪᠠᠯ ᠴᠢ ᠳᠠᠬᠢᠵᠤ ᠰᠡᠷᠡᠬᠦ ᠦᠭᠡᠢ ᠤᠨᠲᠠᠬᠤ ᠯᠡ ᠬᠡᠷᠡᠭ ᠪᠢᠵᠡ᠂ ᠪᠠᠰᠠ ᠶᠠᠭᠤᠨ ᠤ ᠬᠢᠨᠢ ᠶᠠᠭᠠᠷᠠᠴᠢᠬᠠᠭᠰᠠᠨ ᠪᠣᠢ︾ ᠬᠡᠵᠤ ᠵᠠᠩᠳᠤᠷᠤᠩᠭᠤᠢ ᠳᠠᠭᠤ ᠪᠠᠷ ᠶᠠᠷᠢᠵᠤ ᠭᠠᠷᠤᠯ᠎ᠠ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠭᠤᠲᠤᠷᠠᠵᠤ ᠭᠤᠨᠢᠭᠰᠠᠨ ᠳᠠᠭᠤᠨ ᠢᠶᠠᠷ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠳᠤ᠄ ︽ᠪᠢ ᠭᠡᠵᠦ ᠱᠠᠯ ᠲᠤᠰᠠ ᠦᠭᠡᠢ ᠠᠮᠢᠲᠠᠨ ᠶᠤᠮ᠂ ᠬᠠᠨᠢ ᠳᠠᠭᠠᠨ ᠬᠠᠶᠠᠭᠳᠠᠭᠠᠳ ᠬᠠᠮᠤᠭ ᠲᠠᠷ ᠢᠶᠠᠨ ᠪᠠᠷᠠᠭᠠᠳ ᠦᠷ᠎ᠡ ᠶᠢᠨ ᠢᠶᠠᠨ ᠠᠪᠤ ᠳᠤ ᠭᠤᠯᠤᠭᠳᠠᠵᠤ᠂ ᠦᠩᠭᠡ ᠵᠢᠰᠦ ᠪᠠᠭᠤᠷᠠᠨ ᠬᠠᠲᠤᠨ ᠭᠤᠤᠯ ᠤᠶᠢᠷ᠎ᠠ ᠪᠤᠯ ᠬᠠᠷᠠᠶᠢᠵᠤ ᠦᠬᠦᠮᠡᠷ᠂ ᠭᠠᠵᠠᠷ ᠠᠩ ᠭᠠᠷᠪᠠᠯ ᠭᠠᠭᠴᠠᠬᠠᠨ ᠦᠰᠦᠷᠴᠦ ᠤᠷᠤᠭᠠᠳ ᠳᠠᠭᠤᠰᠴᠢᠬᠠᠮᠠᠷ︾ ᠭᠡᠬᠦ ᠳᠤ᠂ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠨᠠᠮᠤᠭᠤᠨ ᠲᠠᠶᠢᠪᠤᠭᠤᠬᠠᠨ ᠢᠶᠠᠷ ᠡᠮᠡᠭᠡᠨ ᠤ ᠲᠤᠯᠤᠭᠠᠢ ᠳᠡᠭᠡᠭᠦᠷ ᠡᠷᠭᠢᠯᠳᠦᠵᠦ ᠡᠷᠭᠢᠯᠳᠦᠴᠢᠬᠡᠭᠡᠳ᠂ ︽ᠴᠢ ᠰᠢᠭ ᠲᠡᠩᠭᠡᠭᠡ ᠪᠠᠨ ᠪᠠᠷᠠᠭᠰᠠᠨ ᠡᠮᠡᠭᠡᠨ ᠳᠤ ᠬᠠᠲᠤᠨ ᠭᠤᠤᠯ ᠬᠠᠨᠵᠤᠨ ᠳᠡᠭᠡᠷ᠎ᠡ ᠴᠢᠨᠢ ᠨᠡᠭᠦᠵᠦ ᠢᠷᠡᠬᠦ ᠦᠭᠡᠢ ᠪᠤᠯ ᠪᠡᠶᠡᠯᠡᠭᠳᠡᠵᠦ ᠳᠡᠶᠢᠯᠤᠰᠢ ᠦᠭᠡᠢ ᠵᠡᠭᠦᠳᠦ ᠪᠠᠶᠢᠨ᠎ᠠ ᠰᠢᠤ ᠳ᠋ᠠ᠂ ᠦᠪᠡᠷ ᠢ ᠪᠠᠨ ᠪᠢᠲᠡᠭᠡᠢ ᠮᠠᠭᠤᠯᠠ᠂ ᠦᠭᠡᠷ᠎ᠡ ᠪᠤᠰᠤᠳ ᠬᠦᠮᠦᠨ ᠴᠢᠮ᠎ᠠ ᠶᠢ ᠰᠠᠨᠠᠭ᠎ᠠ ᠶᠢ ᠴᠢᠨᠢ ᠬᠠᠩᠭᠠᠲᠠᠯ᠎ᠠ ᠮᠠᠭᠤᠯᠠᠬᠤ ᠶᠤᠮ ᠰᠢᠤ︾ ᠬᠡᠵᠦ ᠬᠠᠩᠭᠠᠢ ᠶᠠᠷᠢᠬᠤ ᠶᠤᠮ ᠪᠢᠯᠡ᠃ ᠵᠢᠷᠦᠬᠡ ᠶᠢ ᠪᠠᠵᠠᠭᠰᠠᠨ ᠡᠨᠡ ᠦᠭᠡᠨ ᠳᠤ ᠦᠷᠴᠢᠭᠡᠷ ᠡᠮᠡᠭᠡᠨ ᠰᠡᠭᠡᠰᠭᠢᠨ ᠰᠡᠷᠡᠵᠤ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠵᠦᠭ ᠬᠠᠷᠠᠭᠠᠳ᠄ ︽ᠲᠡᠭᠡᠪᠡᠯ ᠪᠢ ᠴᠤᠬᠤᠮ ᠬᠡᠷᠬᠢᠪᠡᠯ ᠵᠤᠬᠢᠬᠤ ᠪᠤᠢ︖︾ ᠬᠡᠭᠦ ᠳᠤ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠡᠷᠡᠰ ᠰᠢᠭᠤᠷᠬᠠᠢ ᠪᠠᠷ᠄ ︽ᠢᠰᠢᠭᠡ ᠢᠬᠡᠷᠡᠯᠡᠬᠦ ᠳᠤ ᠡᠪᠡᠰᠦ ᠢᠯᠡᠭᠦᠦ ᠨᠢᠭᠡ ᠨᠠᠪᠴᠢ ᠲᠠᠢ ᠤᠷᠭᠤᠳᠠᠭ ᠶᠤᠮ᠃ ᠡᠶᠢᠮᠦ ᠴᠤᠪᠤᠭᠤ ᠬᠤᠶᠠᠷ ᠦᠷ᠎ᠡ ᠴᠢᠨᠢ ᠶᠢᠷᠳᠢᠨᠴᠤ ᠳᠤ ᠢᠷᠡᠬᠦ ᠳᠡᠭᠡᠨ ᠠᠮᠢ ᠠᠮᠢᠨ ᠤ ᠪᠠᠨ ᠠᠮᠠᠨ ᠭᠡᠰᠢᠭ ᠢᠶᠠᠨ ᠠᠪᠴᠤ ᠲᠦᠷᠦᠭᠰᠡᠨ ᠳ᠋ᠡ᠂ ᠠᠶᠢᠪᠤᠭᠤ ᠲᠠᠶᠢᠪᠤᠭᠤ ᠪᠠᠷ ᠦᠪᠡᠷ ᠤᠨ ᠴᠢᠳᠠᠳᠠᠭ ᠦᠢᠯᠡ ᠪᠠᠨ ᠬᠢᠵᠦ᠂ ᠦᠢᠯᠡᠷ ᠢᠶᠠᠨ ᠪᠠᠷᠠᠭᠠᠨ ᠭᠠᠷ ᠢᠶᠠᠨ ᠬᠦᠳᠡᠯᠭᠡᠵᠦ᠂ ᠭᠠᠢ ᠪᠠᠨ ᠲᠠᠭᠤᠰᠬᠠᠬᠤ ᠳᠤ ᠡᠷ᠎ᠡ ᠦᠰᠴᠦ ᠢᠰᠡᠭᠡᠢ ᠰᠤᠨᠵᠤ᠂ ᠲᠦᠷᠦ ᠰᠠᠬᠢᠬᠤ ᠬᠦᠦ ᠲᠠᠢ ᠲᠦᠷᠦᠯ ᠲᠠᠲᠠᠬᠤ ᠦᠬᠢᠨ ᠲᠠᠢ᠂ ᠭᠤᠯᠤᠮᠲᠠ ᠰᠠᠬᠢᠬᠤ ᠬᠦᠦ ᠲᠠᠢ ᠭᠠᠯ ᠮᠠᠨᠠᠬᠤ ᠦᠬᠢᠨ ᠲᠠᠢ ᠴᠢ ᠴᠢᠨᠢ ᠬᠤᠷᠸ᠎ᠠ ᠶᠢᠨ ᠬᠠᠮᠤᠭ ᠵᠢᠷᠭᠠᠯ ᠢ ᠡᠳ᠋ᠯᠡᠨ᠎ᠡ ᠰᠢᠤ ᠳ᠋ᠡ︾ ᠭᠡᠳ ᠬᠠᠨᠤᠮᠵᠢᠲᠠᠶᠢᠬᠠᠨ ᠢᠨᠢᠶᠡᠯ᠎ᠡ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠤ ᠤᠷᠤᠢ ᠶᠢᠨ ᠦᠰᠦ ᠨᠢ ᠤᠪᠤᠯᠵᠠᠨ ᠰᠢᠷᠦᠭᠦᠰᠴᠤ ᠪᠤᠰᠤᠯ᠎ᠠ᠂ ᠤᠯᠠᠭᠠᠨ ᠠᠯᠠᠭ ᠵᠢᠷᠦᠬᠡ ᠨᠢ ᠠᠭᠤᠵᠢᠭᠤ ᠲᠠᠶᠢᠪᠤᠭᠤᠬᠠᠨ ᠴᠤᠬᠢᠯᠠᠬᠤ ᠪᠤᠯᠤᠯ᠎ᠠ᠃ ᠤᠰᠬᠠᠯ ᠬᠤᠶᠠᠷ ᠨᠢᠳᠦᠨ ᠠᠴᠠ ᠨᠢ ᠤᠴᠢ ᠶᠢᠨ ᠭᠠᠯ ᠲᠦᠷᠡᠯᠵᠡᠯ᠎ᠡ᠃ ᠲᠡᠷᠡ ᠴᠠᠭ ᠠᠴᠠ ᠬᠤᠶᠢᠰᠢ ᠦᠷᠴᠢᠭᠡᠷ ᠡᠮᠡᠭᠡᠨ ᠵᠤᠷᠢᠭ ᠪᠤᠰᠤᠭ᠎ᠠ ᠡᠮ᠎ᠡ ᠬᠦᠮᠦᠨ ᠪᠤᠯᠤᠯ᠎ᠠ᠂ ᠡᠷᠡᠯᠬᠡᠭ ᠳᠠᠶᠢᠴᠢᠨ ᠠᠮᠢᠳᠤᠷᠠᠯ ᠤᠨ ᠴᠤᠭᠴᠠᠯᠠᠭᠴᠢ ᠪᠤᠯᠤᠯ᠎ᠠ᠃ ︽ᠪᠢ ᠬᠡᠨ ᠪᠤᠢ︾ ᠭᠡᠳᠡᠭ ᠢᠶᠠᠨ ᠵᠢᠩᠬᠢᠨᠢ ᠤᠬᠠᠭᠠᠷᠠᠵᠤ᠂ ᠶᠢᠷᠳᠢᠨᠴᠤ ᠳᠤ ᠨᠡᠷ᠎ᠡ ᠪᠠᠨ ᠲᠠᠭᠤᠷᠢᠰᠤᠭᠤᠯᠵᠤ᠂ ᠮᠦᠷ ᠢᠶᠠᠨ ᠲᠠᠮᠠᠭᠠᠯᠠᠵᠤ ᠶᠠᠪᠤᠬᠤ ᠪᠤᠯᠤᠯ᠎ᠠ᠃                    ᠪᠢ ᠬᠡᠨ ᠪᠤᠢ     ᠲᠡᠮᠲᠡᠭ ᠢᠶᠠᠨ ᠲᠡᠯᠭᠡᠪᠡᠯ ᠤᠶᠤᠲᠠᠨ      ᠲᠡᠷᠭᠡ ᠪᠠᠨ ᠲᠦᠯᠬᠢᠪᠡᠯ ᠠᠵᠢᠯᠴᠢᠨ      ᠠᠶᠠᠭ᠎ᠠ ᠪᠠᠨ ᠤᠬᠢᠶᠠᠪᠠᠯ ᠦᠢᠯᠡᠴᠢᠯᠡᠭᠴᠢ      ᠠᠯᠤᠬ᠎ᠠ ᠪᠠᠨ ᠪᠠᠷᠢᠪᠠᠯ ᠲᠠᠷᠬᠠᠨ     ᠪᠢᠷ ᠢᠶᠠᠨ ᠪᠠᠷᠢᠪᠠᠯ ᠪᠠᠭᠰᠢ     ᠪᠦᠯᠢᠭᠦᠷ ᠢᠶᠠᠨ ᠪᠠᠷᠢᠪᠠᠯ ᠰᠠᠭᠠᠯᠢᠴᠢᠨ     ᠬᠠᠶᠢᠴᠢ ᠪᠠᠨ ᠪᠠᠷᠢᠪᠠᠯ ᠤᠶᠤᠳᠠᠯᠴᠢᠨ     ᠬᠠᠳᠤᠭᠤᠷ ᠢᠶᠠᠨ ᠪᠠᠷᠢᠪᠠᠯ ᠲᠠᠷᠢᠶᠠᠴᠢᠨ     ᠬᠤᠭᠤᠯᠠᠢ ᠪᠠᠨ ᠭᠠᠷᠭᠠᠪᠠᠯ ᠳᠠᠭᠤᠴᠢᠨ     ᠬᠤᠷᠭᠤᠯ ᠢᠶᠠᠨ ᠱᠦᠭᠦᠷᠳᠡᠪᠡᠯ ᠮᠠᠯᠴᠢᠨ     ᠬᠤᠷᠤᠳ ᠢᠶᠠᠨ ᠵᠠᠰᠠᠪᠠᠯ ᠠᠷᠠᠯᠵᠢᠶᠠᠴᠢᠨ     ᠬᠤᠭᠤᠯᠠᠨ ᠭᠡᠷ ᠤᠨ ᠡᠷᠬᠢᠯᠡᠭᠴᠢ     ᠬᠦᠷᠵᠡ ᠪᠠᠨ ᠮᠦᠷᠦᠯᠡᠪᠡᠯ ᠬᠦᠳᠡᠯᠮᠦᠷᠢᠴᠢᠨ     ᠬᠦᠨᠳᠦᠲᠦ ᠪᠤᠭᠤᠷᠥᠯ ᠤᠨ ᠢᠶᠠᠨ ᠦᠬᠢᠨ     ᠬᠦᠭᠡᠷᠦᠬᠦᠨ ᠦᠷᠡᠰ ᠤᠨ ᠢᠶᠠᠨ ᠡᠵᠢ     ᠬᠦᠮᠦᠨ ᠤ ᠤᠷᠴᠢᠯᠠᠩ ᠤᠨ ᠢᠨᠵᠧᠨᠧᠷᠢᠩ     ᠲᠤᠰᠤᠨ ᠵᠢᠷᠦᠬᠡ ᠶᠢᠨ ᠡᠵᠡᠨᠲᠡᠨ     ᠳᠤᠯᠠᠭᠠᠨ ᠠᠮᠢᠳᠤᠷᠠᠯ ᠤᠨ ᠴᠤᠭᠴᠠᠯᠠᠭᠴᠢ     ᠲᠤᠯᠪᠤᠲᠤ ᠮᠤᠩᠭᠤᠯ ᠤᠨ ᠬᠤᠶᠢᠴᠢᠰ     ᠳᠤᠷᠠᠶᠢᠭᠰᠠᠨ ᠮᠦᠷ ᠲᠠᠢ ᠡᠮᠡᠭᠲᠡᠢ     ᠠᠰᠢᠳᠠ ᠦᠢᠯᠡᠳᠪᠦᠷᠢ ᠶᠢᠨ ᠡᠵᠡᠭᠲᠡᠢ     ᠠᠯᠠᠭ ᠦᠷᠡᠰ ᠤᠨ ᠢᠶᠠᠨ ᠲᠦᠰᠢᠭ     ᠬᠦᠷ ᠪᠠᠶᠠᠷ ᠴᠠᠯᠭᠢᠮ᠎ᠠ ᠠᠮᠢᠳᠤᠷᠠᠳᠠᠭ     ᠬᠦᠬᠡ ᠲᠤᠯᠪᠤᠲᠤ ᠮᠤᠩᠭᠤᠯ ᠪᠠᠭᠰᠢ ᠡ     ᠦᠷᠴᠢᠭᠡᠷ ᠡᠮᠡᠭᠡᠨ ᠡᠷᠬᠢᠯᠡᠭᠰᠡᠨ ᠦᠢᠯᠡᠳᠪᠦᠷᠢ᠂ ᠲᠡᠯᠭᠡᠭᠦᠷ ᠪᠦᠬᠦᠨ ᠤ ᠪᠠᠨ ᠡᠭᠦᠲᠡᠨ ᠳᠤ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠳᠤ ᠬᠤᠭᠤᠯᠠ ᠪᠡᠯᠡᠳᠭᠡᠳᠡᠭ ᠪᠤᠯᠤᠯ᠎ᠠ᠂ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠬᠦᠷᠬᠦ ᠪᠤᠯᠭᠠᠨ ᠳᠠᠭᠠᠨ ᠦᠨᠡᠲᠦ ᠢᠷᠦᠭᠡᠯ ᠢᠶᠠᠨ ᠬᠠᠷᠠᠮ ᠦᠭᠡᠢ ᠬᠠᠶᠢᠷᠠᠯᠠᠳᠠᠭ ᠪᠠᠶᠢᠯ᠎ᠠ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠤ ᠳᠤ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠶᠢᠨ ᠢᠷᠦᠭᠡᠯ ᠰᠢᠩᠭᠡᠵᠦ᠂ ᠡᠷᠦᠬᠡ ᠭᠡᠷ ᠲᠤᠨᠢ ᠨᠠᠷᠠ ᠭᠠᠷᠤᠯ᠎ᠠ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠤ ᠦᠷ᠎ᠡ ᠬᠡᠦᠬᠡᠳ ᠨᠢ ᠦᠪᠡᠷ ᠤᠨ ᠭᠡᠰᠡᠨ ᠦᠢᠯᠡᠰ ᠲᠠᠢ᠂ ᠬᠠᠨᠢ ᠲᠠᠢ ᠢᠵᠢᠯᠢ ᠲᠠᠢ ᠪᠤᠯᠤᠯ᠎ᠠ᠃ ᠦᠷᠴᠢᠭᠡᠷ ᠡᠮᠡᠭᠡᠨ ᠦᠷ᠎ᠡ ᠶᠢᠨ ᠢᠶᠠᠨ ᠰᠠᠶᠢᠨ ᠳᠤ ᠪᠠᠭ᠋ᠠᠳᠤᠵᠤ᠂ ᠦᠢᠯᠡᠰ ᠤᠨ ᠢᠶᠠᠨ ᠰᠠᠶᠢᠬᠠᠨ ᠳᠤ ᠪᠠᠶᠠᠰᠴᠤ᠂ ᠡᠳᠦᠷ ᠪᠤᠯᠭᠠᠨ ᠡᠷᠲᠡ ᠶᠢᠨ ᠨᠠᠷᠠᠨ ᠢᠶᠠᠷ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠳᠤ ᠬᠤᠭᠤᠯᠠ ᠶᠢ ᠨᠢ ᠬᠢᠵᠦ ᠦᠭᠴᠢᠬᠡᠭᠡᠳ᠄ ︽ᠬᠦᠮᠦᠨ ᠠᠮᠢᠲᠠᠨ ᠪᠦᠬᠦᠨ ᠭᠡᠵᠦ ᠭᠠᠭᠴᠠᠬᠠᠨ ᠵᠤᠷᠢᠭ ᠢᠶᠠᠷ ᠭᠠᠯᠪᠠ ᠶᠢᠨ ᠭᠠᠶᠢᠬᠠᠮᠰᠢᠭ ᠢ ᠡᠭᠦᠳᠦᠳᠡᠭ ᠶᠤᠮ ᠪᠠᠶᠢᠨ᠎ᠠ︾ ᠭᠡᠴᠢᠬᠡᠭᠰᠡᠨ ᠮᠠᠶᠢᠵᠢᠭᠢᠨᠠᠨ᠎ᠠ᠃ ᠡᠪᠦᠭᠡᠨ ᠲᠠᠭᠲᠠᠭ᠎ᠠ ᠳᠠᠩᠳᠠ ᠡᠭᠦᠷ ᠦᠨᠳᠡᠭᠡ ᠪᠠᠷ ᠢᠶᠠᠨ ᠢᠷᠡᠵᠦ ᠦᠷᠴᠢᠭᠡᠷ ᠡᠮᠡᠭᠡᠨ ᠢ ᠲᠤᠭᠤᠷᠢᠨ ᠰᠠᠭᠤᠵᠤ᠂ ᠦᠨᠳᠦᠷ ᠲᠠᠭᠲᠤ ᠶᠢᠨ ᠳᠡᠭᠡᠳᠤ ᠤᠷᠤᠢ ᠳᠤ ᠡᠨᠡ ᠬᠤᠶᠠᠷ ᠠᠶᠢᠯ ᠡᠳᠦᠷᠵᠢᠨ ᠨᠠᠷᠭᠢᠵᠤ ᠵᠢᠷᠭᠠᠳᠠᠭ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ 
ᠢᠷᠡᠯᠲᠡ᠄ ᠣᠷᠳᠣᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠣᠨᠢᠨ ᠮᠡᠳᠡᠭᠡᠨ ᠤ ᠰᠦᠯᠵᠢᠶ᠎ᠡ