ᠮᠤᠩᠭᠤᠯᠴᠤᠤᠨ ᠤᠨ ᠭᠠᠯ ᠤᠨ ᠮᠢᠬ᠎ᠠ ᠴᠢᠨᠠᠬᠤ ᠶᠤᠰᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/7/12
     ᠤᠷᠳᠤᠰ ᠤᠨ ᠦᠬᠡᠯᠵᠢᠨ ᠰᠠᠷ᠎ᠠ ︵ᠪᠢᠯᠢᠭ ᠤᠨ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠰᠠᠷ᠎ᠠ︶ ᠶᠢᠨ ᠬᠤᠷᠢᠨ ᠭᠤᠷᠪᠠᠨ᠂ ᠬᠤᠷᠢᠨ ᠲᠦᠷᠪᠡᠨ ᠳᠤ ᠨᠠᠶᠢᠬᠡᠮ ᠨᠠᠶᠢᠳᠠ ᠪᠠᠷ  ᠢᠶᠠᠨ ᠭᠠᠯ ᠳᠠᠬᠢᠳᠠᠭ ᠵᠤᠷᠰᠢᠯ ᠲᠠᠢ ᠪᠠᠶᠢᠳᠠᠭ ᠳᠤᠯᠠ ᠠᠷᠪᠠᠳᠤᠭᠠᠷ ᠰᠠᠷ᠎ᠠ ᠶᠢᠨ ︵ᠬᠤᠪᠢ ᠰᠠᠷ᠎ᠠ︶ ᠡᠪᠤᠯ ᠤᠨ ᠦᠬᠦᠴᠠ ᠪᠠᠷ ᠬᠤᠨᠢ ᠢᠮᠠᠭ᠎ᠠ ᠦᠬᠡᠷ ᠤᠨ ᠡᠪᠴᠢᠬᠦᠤ ᠪᠠᠨ ᠬᠤᠷᠤᠭᠤ ᠳᠠᠷᠤᠮ ᠬᠡᠷᠰᠠᠩ ᠲᠠᠢ ︵ᠡᠪᠴᠢᠬᠦᠤ ᠶᠢᠨ ᠪᠦᠳᠤᠷᠬᠡᠢ ᠳᠡᠬᠡᠷ᠎ᠡ ᠠᠷᠠᠰᠤ ᠶᠢ ᠦᠯᠡᠳᠡᠬᠡᠨ᠎ᠡ︶ ᠦᠷᠬᠡᠨ ᠬᠤᠷᠮᠤᠢ ᠲᠠᠢ ᠶᠠᠰᠤ ᠶᠢ ᠬᠡᠮᠳᠤᠬᠡᠬᠦ ᠦᠬᠡᠢ ᠪᠠᠷ ᠬᠡᠷᠴᠢᠨ ᠠᠪᠴᠤ᠂ ᠮᠠᠯ ᠤᠨ ᠳᠤᠳᠤᠷ ᠬᠡᠳᠡᠰᠤᠨ ᠠᠴᠠ ᠦᠷᠤᠴᠡᠨ ᠮᠢᠬ᠎ᠠ᠂ ᠰᠠᠶᠢᠨ ᠰᠠᠷᠬᠢᠨᠠᠭ ᠢ ᠠᠯᠳᠠ ᠰᠢᠬᠠᠮ ᠵᠦᠰᠤᠵᠤ᠂ ᠬᠤᠶᠠᠷ ᠳᠠᠪᠬᠤᠷ ᠳᠤᠭᠤᠷᠢᠩᠬᠠᠢ ᠬᠡᠳᠡᠰᠤ ᠲᠠᠢ ᠳᠡᠪᠬᠤᠷᠯᠠᠨ ᠠᠪᠢᠯᠠᠭ ᠲᠤ ᠨᠢ ᠴᠢᠬᠢᠵᠤ ᠡᠷᠬᠢᠬᠦᠯᠤᠨ ᠡᠪᠴᠢᠬᠦᠤ ᠶᠢᠨ ᠡᠩᠬᠡᠷ ᠳᠠᠯ᠎ᠠ ᠳᠤ ᠵᠦᠪ ᠢᠶᠠᠷ ᠤᠷᠢᠶᠠᠵᠤ ᠳᠡᠬᠡᠬᠦᠷ  ᠨᠢ ᠡᠪᠴᠢᠬᠦᠨ ᠤ ᠰᠤᠶᠤᠭ᠎ᠠ ᠰᠦᠪᠡᠭᠡ ᠶᠢ ᠳᠤᠳᠤᠭᠰᠢ ᠨᠤᠭᠤᠯᠤᠨ ᠬᠤᠷᠮᠤᠢ ᠪᠠᠷ ᠨᠢ ᠬᠤᠮᠢᠵᠤ ᠴᠤᠭᠯᠠᠭᠠᠤᠨ ᠠᠷᠤ ᠪᠠᠷ ᠨᠢ ᠮᠤᠳᠤ ᠪᠠᠷ ᠪᠦᠬᠡᠳᠡᠯᠡᠨ ᠬᠡᠳᠤᠨ ᠮᠠᠯ ᠠᠯᠠᠭᠰᠠᠨ ᠪᠤᠯ ᠳᠡᠳᠤᠢ ᠡᠪᠴᠢᠬᠦᠤ ᠪᠠᠨ ᠪᠦᠬᠦᠨ ᠢ ᠢᠩᠬᠢᠵᠤ ᠴᠤᠭᠯᠠᠭᠠᠤᠨ ᠳᠤᠰᠬᠠᠢ ᠨᠢᠬᠡᠨ ᠰᠠᠪᠠᠨ ᠳᠤ ᠬᠦᠯᠳᠡᠬᠡᠬᠡᠤᠨ ᠭᠠᠯ ᠳᠠᠬᠢᠬᠤ ᠳᠤ ᠪᠡᠯᠡᠤᠨᠬᠡᠳᠡᠭ ᠶᠤᠮ᠃     ᠦᠬᠡᠯᠵᠢᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠭᠤᠷᠪᠠᠨ ᠪᠤᠶᠤ ᠬᠤᠷᠢᠨ ᠲᠦᠷᠪᠡᠨ ᠤ ᠦᠷᠯᠤᠬᠡ ᠠᠴᠠ ᠡᠬᠢᠯᠡᠨ ᠳᠤᠯᠭ᠎ᠠ ᠵᠤᠤᠬ᠎ᠠ ᠪᠠᠨ ᠳᠠᠯᠪᠢᠨ ᠵᠠᠰᠠᠵᠤ᠂ ᠳᠤᠭᠤᠭ᠎ᠠ ᠰᠢᠨᠠᠭ᠎ᠠ ᠪᠠᠨ ᠪᠦᠷᠢᠨ ᠤᠬᠢᠶᠠᠵᠤ ᠴᠡᠪᠡᠷᠯᠡᠨ ᠠᠷᠢᠭᠤᠤᠨᠬᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠴᠡᠪᠡᠷ ᠰᠠᠶᠢᠬᠠᠨ ᠳᠤᠭᠤᠭ᠎ᠠ ᠳᠤ ᠪᠠᠨ ᠠᠷᠢᠭᠤᠨ ᠳᠤᠩᠭᠠᠯᠠᠭ ᠰᠢᠨ᠎ᠠ ᠤᠰᠤ ᠪᠠᠨ ᠬᠢᠵᠤ᠂ ᠳᠡᠬᠡᠷ᠎ᠡ ᠠᠴᠠ ᠨᠢ ᠰᠦ ᠪᠤᠶᠤ ᠴᠠᠭᠠᠨ ᠢᠳᠡᠬᠡᠨ ᠳᠤᠰᠤᠭᠠᠵᠤ ᠴᠠᠶᠢᠪᠤᠷ ᠦᠩᠬᠡ ᠲᠠᠢ ᠤᠰᠤᠨ ᠳᠤ ᠡᠪᠴᠢᠬᠦᠤ ᠶᠢᠨ ᠪᠦᠬᠡᠳᠡᠯᠡᠭᠰᠡᠨ ᠮᠤᠳᠤ ᠪᠠᠨ ᠠᠪᠴᠤ ᠭᠠᠯ ᠳᠤ ᠬᠠᠯᠠᠭᠠᠵᠤ ᠨᠠᠭᠠᠯᠳᠤᠭᠰᠠᠨ ᠤᠩᠭᠠᠰᠤ ᠬᠢᠯᠠᠭᠠᠰᠤ ᠶᠢ ᠨᠢ ᠬᠤᠶᠢᠬᠠᠯᠠᠵᠤ ᠴᠡᠪᠡᠷ ᠪᠤᠯᠭᠠᠭᠰᠡᠨ ᠤ ᠳᠠᠷᠠᠭ᠎ᠠ ᠬᠢᠵᠤ᠂ ᠳᠡᠬᠡᠷ᠎ᠡ ᠨᠢ ᠴᠠᠭᠠᠨ ᠦᠵᠤᠮ᠂ ᠤᠯᠠᠭᠠᠨ ᠴᠢᠪᠠᠭ᠎ᠠ᠂ ᠰᠢᠷ᠎ᠠ ᠰᠢᠬᠦᠮᠡᠯ ᠬᠢᠬᠦ ᠠᠴᠠ ᠪᠢᠰᠢ ᠳᠠᠪᠤᠰᠤ᠂ ᠼᠤᠤ ᠵᠢᠶᠠᠩᠶ᠋ᠢᠤ ᠪᠤᠯᠤᠨ ᠰᠤᠩᠬᠢᠨ᠎ᠠ ᠰᠠᠷᠢᠮᠰᠠᠭ ᠵᠡᠷᠬᠡ ᠶᠢᠨ ᠠᠮᠳᠠ ᠤᠷᠤᠭᠤᠯᠬᠤ ᠶᠠᠭᠤᠮ᠎ᠠ ᠶᠢ ᠤᠭᠳᠤ ᠬᠢᠳᠡᠭ ᠦᠬᠡᠢ᠃ ᠮᠢᠬ᠎ᠠ ᠪᠠᠨ ᠦᠬᠡᠷ ᠤᠨ ᠠᠷᠭᠠᠯ ᠤᠨ ᠨᠠᠮᠵᠢᠭᠤᠨ ᠭᠠᠯ ᠢᠶᠠᠷ ᠴᠢᠨᠠᠵᠤ ᠪᠤᠯᠭᠤᠭᠠᠤᠨ ᠶᠡᠭᠡ ᠳᠡᠪᠰᠢᠨ ᠳᠤ ᠪᠠᠭᠤᠯᠭᠠᠵᠤ ᠱᠦᠯᠤᠨ ᠤ ᠳᠤᠰᠤ ᠶᠢ ᠪᠠᠭ᠎ᠠ ᠰᠠᠭ᠎ᠠ ᠬᠠᠯᠢᠮ ᠳᠤᠰᠤᠭᠠᠯ ᠪᠡᠯᠡᠤᠨᠬᠡᠬᠦ ᠠᠴᠠ ᠠᠪᠤᠭᠠᠤᠨ ᠪᠤᠰᠤᠤᠨ ᠱᠦᠯᠤᠨ ᠤ ᠭᠤᠷᠪᠠᠨ ᠤ ᠨᠢᠬᠡ ᠬᠤᠪᠢ ᠶᠢᠨ ᠬᠡᠮᠵᠢᠶ᠎ᠡ ᠲᠠᠢ ᠳᠤᠳᠤᠷᠭ᠎ᠠ᠂ ᠮᠤᠩᠭᠤᠯ ᠪᠤᠳᠠᠭ᠎ᠠ ᠪᠠᠨ ᠬᠠᠭᠠᠰ ᠬᠠᠷᠢᠴᠠᠯ ᠢᠶᠠᠷ ᠨᠠᠶᠢᠯᠡᠬᠦᠯᠤᠨ ᠪᠦᠯᠢᠶᠡᠨ ᠤᠰᠤᠨ ᠳᠤ ᠳᠠᠬᠢᠨ ᠳᠠᠪᠳᠠᠨ ᠤᠬᠢᠶᠠᠵᠤ ᠱᠦᠯᠤᠨ ᠳᠤ ᠪᠠᠨ ᠬᠢᠵᠤ ᠳᠠᠮᠡᠢ ᠭᠠᠯ ᠲᠦᠯᠡᠬᠦ ᠦᠬᠡᠢ ᠬᠡᠳᠤ  ᠬᠤᠤᠨᠬᠤᠭᠠᠤᠨ ᠪᠤᠯᠭᠤᠴᠢᠬᠠᠳᠠᠭ᠃     ᠬᠡᠷ ᠤᠨ ᠡᠵᠡᠨ ᠨᠢ ᠨᠢᠭᠤᠷ ᠭᠠᠷ ᠢᠶᠠᠨ ᠤᠬᠢᠶᠠᠵᠤ᠂ ᠠᠮᠠ ᠬᠠᠮᠠᠷ ᠢᠶᠠᠨ ᠪᠦᠳᠡᠬᠡᠵᠤ᠂ ᠡᠪᠴᠢᠬᠦᠤ ᠪᠠᠨ ᠴᠦᠮᠤᠵᠤ ︵ᠮᠢᠬ᠎ᠠ ᠶᠢ ᠨᠢ ᠶᠠᠰᠤᠨ ᠠᠴᠠ ᠨᠢ ᠰᠠᠯᠭᠠᠨ ᠴᠠᠭᠠᠯᠠᠬᠤ︶ ᠦᠬᠡᠷ᠎ᠡ ᠨᠢᠬᠡ ᠫᠢᠯᠠᠨ ᠳᠡᠬᠡᠷ᠎ᠡ ᠲᠦᠷᠪᠡᠯᠵᠢᠯᠡᠨ ᠬᠠᠶᠢᠴᠢᠯᠠᠭᠰᠡᠨ ᠤᠯᠠᠭᠠᠨ ᠴᠠᠭᠠᠰᠤᠨ ᠳᠡᠪᠢᠰᠬᠡᠷ ᠤᠨ ᠳᠡᠬᠡᠷ᠎ᠡ ᠨᠢ ᠡᠪᠴᠢᠬᠦᠤ ᠶᠢᠨ ᠶᠠᠰᠤ ᠪᠠᠨ ᠬᠤᠳᠤᠭᠤᠷ ᠳᠠᠯ᠎ᠠ ᠶᠢ ᠨᠢ ᠳᠡᠬᠡᠭᠰᠢ ᠬᠠᠨᠳᠤᠭᠤᠯᠤᠨ ᠳᠡᠬᠦᠨ ᠤ ᠳᠡᠬᠡᠷ᠎ᠡ ᠡᠪᠴᠢᠬᠦᠤ ᠶᠢᠨ ᠬᠡᠷᠰᠡᠩ᠂ ᠠᠪᠢᠯᠠᠭ ᠤᠨ ᠳᠤᠯᠤᠭᠠᠢ᠂ ᠭᠠᠯ ᠤᠨ ᠪᠤᠳᠠᠭ᠎ᠠ ᠪᠤᠭᠤᠷᠰᠤᠭ ᠳᠠᠯᠪᠢᠵᠤ ᠭᠠᠯ ᠤᠨ ᠬᠡᠰᠢᠭ ᠪᠤᠯᠭᠠᠵᠤ᠂ ᠪᠠᠰᠠ ᠠᠷᠴᠠ᠂ ᠬᠦᠵᠢ᠂ ᠠᠬᠢ᠂ ᠬᠢᠯᠠᠭᠠᠨ᠎ᠠ ᠵᠡᠷᠬᠡ ᠶᠢ ᠬᠢᠵᠤ ᠭᠠᠯ ᠤᠨ ᠪᠤᠷᠬᠠᠨ ᠤ ᠮᠤᠷᠢᠨ ᠢᠳᠡᠰᠢ ᠪᠤᠯᠭᠠᠵᠤ᠂ ᠳᠤᠰᠤ ᠰᠢᠬᠦᠮᠠᠯ᠂ ᠰᠢᠬᠢᠷ ᠪᠤᠷᠠᠮ ᠵᠡᠷᠬᠡ ᠢᠳᠡᠬᠡᠨ ᠪᠦᠬᠦᠨ ᠤ ᠳᠡᠬᠡᠵᠢ ᠨᠢ ᠭᠠᠯ ᠤᠨ ᠪᠤᠷᠬᠠᠨ ᠤ ᠪᠡᠯᠡᠭ ᠰᠠᠯᠳᠠ ᠪᠤᠯᠵᠤ᠂ ᠨᠢᠬᠡ ᠵᠢᠯ ᠤᠨ ᠳᠤᠷᠰᠢ ᠡᠰᠬᠡᠵᠤ ᠤᠶᠣᠭᠰᠠᠨ ᠬᠤᠪᠴᠠᠰᠤᠨ ᠤ ᠳᠤᠷᠭ᠎ᠠ ᠪᠦᠰ ᠤᠨ ᠦᠬᠡᠳᠡᠰᠤ ᠶᠢ ᠳᠠᠯᠪᠢᠵᠤ ᠭᠠᠯ ᠤᠨ ᠡᠮᠤᠰᠬᠡᠯ ᠪᠤᠯᠭᠠᠳᠠᠭ᠃ ᠪᠠᠰᠠ ᠮᠦᠩᠬᠦᠨ ᠴᠠᠭᠠᠨ ᠶᠤᠸᠠᠮᠪᠤᠤ ᠵᠠᠰᠠᠵᠤ ᠳᠠᠯᠪᠢᠬᠤ᠂ ᠠᠯᠳᠠᠨ ᠴᠠᠭᠠᠰᠤᠨ ᠵᠤᠭᠤᠰ ᠢ ᠬᠠᠶᠢᠴᠢᠯᠠᠵᠤ ᠳᠠᠯᠪᠢᠬᠤ ᠨᠢ ᠭᠠᠯ ᠤᠨ ᠪᠤᠷᠬᠠᠨ ᠤ ᠵᠠᠷᠤᠳᠠᠯ ᠪᠤᠯᠭᠠᠨ ᠤᠪᠤᠭᠠᠯᠠᠵᠤ ᠴᠠᠭᠠᠰᠤᠨ ᠳᠡᠪᠢᠰᠬᠡᠷ ᠢ ᠨᠢ ᠬᠤᠮᠢᠵᠤ ᠴᠤᠭᠯᠠᠭᠠᠤᠨ ᠳᠡᠬᠡᠬᠦᠷ ᠨᠢ ᠳᠠᠪᠤᠨ ᠦᠩᠬᠡ ᠶᠢᠨ ᠳᠤᠷᠭᠠᠨ ᠤᠳᠠᠰᠤ ᠪᠤᠶᠤ ᠬᠤᠴᠠᠨ ᠤᠩᠭᠠᠰᠤᠨ ᠤᠳᠠᠰᠤ ᠪᠠᠷ ᠪᠤᠭᠤᠵᠤ ᠳᠡᠬᠦᠨ ᠤ ᠳᠡᠬᠡᠷ᠎ᠡ ᠨᠢ ᠳᠤᠷᠭᠠᠨ ᠬᠠᠳᠠᠭ ᠳᠠᠯᠪᠢᠵᠤ᠂ ᠳᠤᠯᠭ᠎ᠠ ᠵᠤᠤᠬᠠᠨ ᠤ ᠡᠮᠤᠨ᠎ᠡ ᠵᠤᠯᠠᠭ ᠴᠠᠭᠠᠨ ᠢᠰᠡᠬᠡᠢ ᠳᠤᠯᠤᠭ ᠳᠡᠯᠬᠡᠵᠤ ᠳᠡᠬᠦᠨ ᠤ ᠳᠡᠬᠡᠷ᠎ᠡ ᠳᠤᠰ ᠬᠡᠷ ᠤᠨ ᠡᠵᠡᠨ ᠨᠢ ᠰᠦᠬᠦᠳᠤᠨ ᠰᠠᠭᠤᠵᠤ᠂ ᠪᠤᠭᠤᠳᠠᠯ ᠲᠠᠢ ᠡᠪᠴᠢᠬᠦᠤ ᠪᠠᠨ ᠬᠤᠶᠠᠷ ᠭᠠᠷᠯᠠᠨ ᠠᠪᠴᠤ ᠳᠡᠬᠡᠷ᠎ᠡ ᠡᠷᠬᠦᠨ ᠭᠠᠯ ᠤᠨ ᠦᠴᠢᠭ ᠢᠷᠤᠬᠡᠯ ᠢᠶᠠᠨ ᠬᠢᠴᠢᠶᠡᠩᠬᠦᠶᠢᠯᠡᠨ ᠤᠩᠰᠢᠬᠤ ᠳᠤ ᠪᠤᠰᠤᠤᠨ ᠨᠢ ᠠᠷᠤ ᠠᠷᠤᠨ ᠠᠴᠠ  ᠨᠢ ᠰᠦᠬᠦᠳᠤᠨ ᠰᠠᠭᠤᠵᠤ ︽ᠳᠠᠷᠠ ᠪᠡᠯᠬᠡ ᠪᠠᠷ ᠪᠤᠯᠳᠤᠭᠠᠢ︕︾ ᠬᠡᠮᠡᠨ ᠳᠠᠭᠠᠵᠤ ᠴᠤᠤᠷᠢᠶᠠᠳᠤᠨ ᠳᠠᠬᠢᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠳᠠᠯᠠᠯᠭᠠᠨ ᠫᠢᠯᠠᠨ ᠳᠤ ᠪᠤᠳᠠᠭ᠎ᠠ ᠪᠠᠨ ᠬᠢᠵᠤ᠂ ᠳᠡᠬᠡᠷ᠎ᠡ ᠨᠢ ᠡᠪᠴᠢᠬᠦᠤ ᠶᠢᠨ ᠮᠢᠬ᠎ᠠ ᠠᠪᠢᠯᠠᠭ ᠠᠴᠠ ᠳᠠᠯᠪᠢᠵᠤ ᠬᠡᠷ ᠤᠨ  ᠡᠵᠡᠨ ᠠᠴᠠ ᠡᠬᠢᠯᠡᠨ ᠳᠠᠶᠠᠭᠠᠷ ᠢᠶᠠᠨ ᠵᠡᠷᠬᠡᠴᠡᠨ ᠰᠠᠭᠤᠵᠠᠭᠠᠵᠤ ᠲᠦᠷᠪᠡᠨ ᠵᠦᠭ  ᠤᠨ ᠳᠠᠯᠠᠯᠭ᠎ᠠ ᠳᠠᠯᠠᠯᠠᠬᠤ ᠳᠤ ᠪᠤᠰᠤᠤᠨ ᠨᠢ ︽ᠬᠤᠷᠤᠢ︕ ᠬᠤᠷᠤᠢ︕ ᠬᠤᠷᠤᠢ︕︾ ᠬᠡᠮᠡᠨ ᠳᠠᠭᠠᠵᠤ ᠢᠷᠤᠬᠡᠬᠡᠤᠨ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ ᠳᠠᠯᠠᠯᠭᠠᠨ ᠫᠢᠯᠠ ᠲᠠᠢ ᠪᠤᠳᠠᠭ᠎ᠠ ᠪᠠᠨ ᠪᠤᠷᠬᠠᠨ ᠳᠤ ᠪᠠᠨ ᠡᠷᠬᠦᠵᠤ᠂ ᠪᠤᠰᠤᠤᠨ ᠢ ᠨᠢ ᠳᠤᠰ ᠳᠤᠰ ᠤᠨ ᠳᠠᠯᠠᠯᠤᠭᠰᠠᠨ ᠪᠤᠳᠠᠭ᠎ᠠ ᠪᠠᠨ ᠦᠪᠡᠷ ᠦᠪᠡᠷᠰᠠᠤᠨ ᠢᠶᠠᠨ ᠢᠳᠡᠵᠤ᠂ ᠳᠠᠷᠠᠭ᠎ᠠ ᠪᠠᠷ ᠨᠢ ᠭᠠᠯ ᠤᠨ ᠴᠠᠢ ᠪᠠᠨ ᠤᠤᠭᠤᠵᠠᠭᠠᠨ᠎ᠠ᠃
ᠢᠷᠡᠯᠲᠡ᠄ ᠤᠷᠳᠤᠰ ᠨᠤᠳᠤᠭ ᠤᠨ ᠢᠳᠡᠬᠡᠨ ᠤᠮᠳᠠᠭᠠᠨ