| ᠬᠦᠬᠦᠤᠷ ᠤᠨ ᠢᠷᠡᠯᠲᠡ ᠶᠢ ᠮᠥᠷᠳᠡᠪᠡᠯ᠂ ᠬᠦᠬᠦᠤᠷ ᠪᠣᠯ ᠬᠠᠮᠠᠷ ᠲᠠᠮᠠᠬᠢ ᠲᠠᠲᠠᠬᠤ ᠵᠠᠩ ᠳᠠᠳᠬᠠᠯ ᠠᠴᠠ ᠪᠤᠢ ᠪᠣᠯᠤᠭᠰᠠᠨ ᠨᠢ ᠲᠡᠦᠬᠡ ᠶᠢᠨ ᠬᠤᠯᠪᠣᠭᠳᠠᠯ | ᠪᠦᠬᠦᠢ ᠨᠣᠮ᠂ ᠲᠡᠮᠳᠡᠭᠯᠡᠯ ᠳᠤ ᠢᠯᠡᠭᠡᠨ ᠰᠢᠭ ᠪᠤᠢ᠃ ᠴᠢᠩᠭᠢᠪᠡᠯ ᠬᠠᠮᠠᠷ ᠲᠠᠮᠠᠬᠢ ᠲᠠᠲᠠᠬᠤ ᠳᠠᠳᠬᠠᠯ ᠬᠠᠮᠢᠭᠠ ᠠᠴᠠ ᠪᠤᠢ ᠪᠣᠯᠤᠭᠰᠠᠨ ᠢ ᠮᠥᠷᠳᠡᠪᠡᠯ᠂ ᠡᠮᠦᠨᠡᠲᠦ | ᠠᠮᠧᠷᠢᠺᠠ ᠲᠢᠪ ᠤᠨ ᠢᠨᠳᠢᠶᠠᠨᠴᠤᠳ ᠤᠨ ᠳᠠᠳᠬᠠᠯ ᠪᠤᠯᠬᠤ ᠶᠤᠮ᠃ 1492 ᠣᠨ ᠳᠤ ᠢᠰᠫᠠᠨᠢ ᠶᠢᠨ ᠳᠠᠯᠠᠢ ᠶᠢᠨ ᠠᠶᠠᠯᠠᠯᠴᠢᠨ ᠺᠣᠯᠤᠮᠪᠤ ᠬᠠᠮᠠᠷ ᠲᠠᠮᠠᠬᠢ ᠶᠢ | ᠦᠢᠯᠡᠳᠬᠦ ᠪᠠ ᠬᠡᠷᠡᠭᠯᠡᠬᠦ ᠶᠢ ᠳᠠᠯᠠᠢ ᠶᠢᠨ ᠠᠶᠠᠨᠴᠢᠳ᠂ ᠮᠠᠶᠢᠮᠠᠶᠢᠴᠢᠨ᠂ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠦᠭᠴᠢ ᠨᠠᠷ ᠲᠠᠢ ᠶᠠᠪᠤᠯᠴᠠᠬᠤ ᠳᠤᠮᠳᠠ ᠳᠡᠯᠡᠬᠡᠢ ᠶᠢᠨ ᠡᠯᠡ ᠭᠠᠵᠠᠷ ᠲᠤ | ᠳᠠᠮᠵᠢᠭᠤᠯᠤᠨ ᠲᠠᠷᠬᠠᠭᠠᠭᠰᠠᠨ ᠪᠠᠶᠢᠨᠠ᠃ ᠮᠢᠩ ᠤᠯᠤᠰ ᠤᠨ ᠸᠠᠨ ᠯᠢ ᠶᠢᠨ ᠶᠢᠰᠦᠳᠦᠭᠡᠷ ᠣᠨ ︵1582︶ ᠳᠤ ᠢᠲ᠋ᠠᠯᠢ ᠶᠢᠨ ᠯᠢ ᠮᠠ ᠲᠧᠦ ᠭᠡᠳᠡᠭ ᠬᠥᠮᠥᠨ | ᠳᠠᠯᠠᠢ ᠶᠢᠨ ᠠᠶᠠᠯᠠᠯ ᠢᠶᠠᠷ ᠭᠤᠸᠠᠩᠳᠦ᠋ᠩ ᠳᠤ ᠢᠷᠡᠵᠤ ᠬᠠᠮᠠᠷ ᠲᠠᠮᠠᠬᠢᠨ ᠤ ᠠᠷᠠᠯᠵᠢᠶᠠ ᠶᠢ ᠬᠢᠪᠡ ᠬᠡᠮᠡᠬᠦ ᠰᠤᠯᠠ ᠲᠡᠮᠳᠡᠭᠯᠡᠯ ᠤᠳ ᠪᠤᠢ᠃ | ᠬᠠᠭᠠᠳ ᠤᠨ ᠣᠷᠳᠣᠨ ᠤ ᠲᠡᠮᠳᠡᠭᠯᠡᠯ ᠤᠳ ᠠᠴᠠ ᠮᠠᠨᠵᠤ ᠴᠢᠩ ᠤᠨ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠬᠤᠷᠢᠨ ᠭᠤᠷᠪᠠᠳᠤᠭᠠᠷ ᠣᠨ ︵1685 ᠣᠨ︶ ᠳᠤ | ᠭᠠᠳᠠᠭᠠᠳᠤ ᠶᠢᠨ ᠵᠣᠴᠢᠳ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠳᠤ ᠬᠠᠮᠠᠷ ᠲᠠᠮᠠᠬᠢ ᠬᠦᠷᠭᠡᠨ ᠢᠷᠡᠬᠦ ᠳᠤ ᠲᠡᠷᠡ ᠭᠥᠯᠢᠶᠡᠨ ᠠᠪᠤᠭᠰᠠᠨ ᠲᠤᠬᠠᠢ ᠬᠠᠭᠠᠨ ᠤ ᠣᠷᠳᠣᠨ ᠳᠤ | ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠯ ᠪᠢᠴᠢᠭᠡᠰᠦ ᠪᠤᠢ ᠭᠡᠵᠦ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠳᠤ ᠪᠠᠰᠠ ᠦᠵᠡᠭᠳᠡᠵᠦ ᠪᠤᠢ᠃ ᠬᠠᠮᠠᠷ ᠲᠠᠮᠠᠬᠢ ᠮᠠᠨ ᠤ ᠤᠯᠤᠰ ᠲᠤ ᠣᠷᠣᠵᠤ ᠢᠷᠡᠬᠦ ᠳᠤ | ᠲᠡᠭᠦᠨ ᠢ ᠰᠠᠪᠠᠯᠠᠵᠤ ᠪᠠᠶᠢᠭᠰᠠᠨ ᠬᠡᠷᠡᠭᠰᠡᠯ ᠨᠢ ᠪᠢᠴᠢᠬᠠᠨ ᠡᠮ ᠤᠨ ᠯᠣᠩᠬᠤ ᠪᠠ ᠵᠢᠭᠠᠬᠠᠨ ᠲᠡᠮᠦᠷ ᠬᠠᠶᠢᠷᠴᠠᠭ ᠲᠠᠢ ᠪᠠᠶᠢᠭᠰᠠᠨ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨᠠ᠃ | ᠲᠡᠭᠷᠢ ᠲᠡᠳᠬᠦᠭᠴᠢ ᠶᠢᠨ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠣᠨ ︵1752︶ ᠳᠤ ᠫᠣᠷᠲ᠋ᠦ᠋ᠭᠠᠯ ᠤᠨ ᠸᠠᠩ ᠲᠡᠭᠷᠢ ᠲᠡᠳᠬᠦᠭᠴᠢ ᠬᠠᠭᠠᠨ ᠳᠤ ᠰᠢᠵᠢᠷ ᠠᠯᠳᠠ᠂ ᠲᠤᠩ ᠤᠨ | ᠰᠢᠭᠢᠳᠬᠡ᠂ ᠮᠠᠨᠤᠨ ᠯᠣᠩᠬᠤ ᠳᠤ ᠰᠠᠪᠠᠯᠠᠭᠰᠠᠨ ᠬᠠᠮᠠᠷ ᠲᠠᠮᠠᠬᠢ ᠵᠡᠷᠭᠡ ᠶᠢ ᠪᠡᠯᠡᠭ ᠪᠣᠯᠭᠠᠨ ᠡᠷᠭᠦᠭᠰᠡᠨ ᠲᠡᠮᠳᠡᠭᠯᠡᠯ ᠤᠳ ᠪᠠᠰᠠ ᠪᠤᠢ᠃ | ᠳᠡᠭᠡᠷᠡᠬᠢ ᠥᠩᠭᠡᠷᠡᠯᠲᠡ ᠨᠦᠭᠦᠳ ᠠᠴᠠ ᠦᠵᠡᠪᠡᠯ᠂ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠡᠵᠡᠨ ᠬᠠᠭᠠᠳ ᠠᠴᠠ ᠬᠠᠮᠠᠷ ᠲᠠᠮᠠᠬᠢ ᠪᠠ ᠲᠡᠭᠦᠨ ᠤ ᠰᠠᠪᠠ ᠶᠢ ᠨᠢᠭᠡᠨ | ᠵᠦᠢᠯ ᠤᠨ ᠵᠠᠰᠠᠯ ᠴᠢᠮᠡᠭᠯᠡᠯ ᠤᠨ ᠪᠠᠭᠠᠵᠢ ᠪᠣᠯᠭᠠᠨ ᠬᠡᠷᠡᠭᠯᠡᠭᠰᠡᠨ ᠠᠴᠠ ᠬᠤᠵᠢᠮ ᠪᠣᠯᠵᠤ ᠢᠷᠡᠭᠡᠳ ᠨᠡᠶᠢᠭᠡᠮ ᠨᠡᠶᠢᠲᠡ ᠳᠤ ᠲᠤᠰᠬᠠᠯ ᠲᠠᠢ ᠪᠣᠯᠵᠤ᠂ ᠸᠠᠩ ᠭᠦᠩ | ᠨᠣᠶᠠᠳ ᠠᠴᠠ ᠠᠪᠤᠭᠠᠳ ᠪᠠᠶᠠᠨ ᠡᠷᠬᠢᠮ ᠬᠥᠮᠥᠰ ᠴᠦ ᠲᠠᠭᠠᠨ ᠳᠠᠭᠤᠷᠢᠶᠠᠵᠤ᠂ ᠡᠯᠳᠡᠪ ᠵᠦᠢᠯ ᠤᠨ ᠬᠠᠮᠠᠷ ᠲᠠᠮᠠᠬᠢᠨ ᠰᠠᠪᠠ ᠪᠤᠯᠬᠤ ᠬᠦᠬᠦᠤᠷ ᠤᠳ ᠢ ᠠᠷᠪᠢᠨ | ᠦᠢᠯᠡᠳᠦᠨ ᠵᠠᠰᠠᠵᠤ ᠭᠠᠷᠭᠠᠭᠰᠠᠨ ᠪᠠᠶᠢᠨᠠ᠃ ᠣᠨᠴᠠᠭᠠᠶᠢᠯᠠᠨ ᠬᠥᠬᠦᠦᠷ ᠤᠨ ᠬᠡᠪ ᠨᠠᠮᠪᠠ᠂ ᠪᠠᠶᠢᠳᠠᠯ ᠲᠥᠯᠥᠪ᠂ ᠶᠡᠭᠡ ᠪᠠᠭᠠ ᠵᠡᠷᠭᠡ ᠤᠯᠠᠨ ᠶᠠᠩᠵᠤ ᠶᠢᠨ | ᠬᠥᠬᠦᠦᠷ ᠤᠳ ᠢᠯᠡᠷᠡᠪᠡ᠃ ᠬᠥᠬᠦᠦᠷ ᠵᠠᠰᠠᠬᠤ ᠮᠠᠲ᠋ᠧᠷᠢᠶᠠᠯ ᠢ ᠴᠦ ᠠᠯᠲᠠ᠂ ᠮᠥᠩᠭᠦ᠂ ᠱᠢᠷᠦ᠂ ᠬᠠᠰ᠂ ᠮᠠᠨᠤ᠂ ᠨᠣᠮᠢᠨ᠂ ᠡᠷᠳᠡᠨᠢ᠂ ᠣᠭ᠍ᠶᠤ᠂ ᠵᠠᠭᠠᠨ ᠤ ᠶᠠᠰᠤ᠂ | ᠴᠠᠭᠠᠨ ᠶᠠᠭᠠᠨ ᠪᠣᠯᠣᠷ᠂ ᠱᠠᠭᠠᠵᠠᠩ᠂ ᠭᠠᠤᠯᠢ᠂ ᠰᠢᠯ᠂ ᠨᠣᠭᠤᠭᠠᠨ ᠬᠠᠰ᠂ ᠽᠠᠨᠳᠠᠨ ᠮᠣᠳᠣ᠂ ᠲᠤᠭᠤᠰ᠂ ᠴᠢᠯᠠᠭᠤ ᠵᠡᠷᠭᠡ ᠠᠯᠢ ᠰᠠᠶᠢᠨ ᠰᠠᠶᠢᠬᠠᠨ ᠦᠨᠡᠲᠦ | ᠴᠤᠬᠠᠭ ᠪᠣᠳᠠᠰ ᠢᠶᠠᠷ ᠵᠠᠰᠠᠵᠤ ᠬᠢᠳᠡᠭ᠃ ᠠᠳᠠ ᠣᠨᠴᠠ ᠳᠤᠷᠠᠳᠤᠭᠤᠰᠢᠲᠠᠢ ᠵᠦᠢᠯ ᠭᠡᠪᠡᠯ᠂ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠪᠠᠭᠠᠵᠢ ᠬᠡᠷᠡᠭᠰᠡᠯ ᠬᠤᠴᠤᠷᠤᠩᠭᠤᠢ ᠪᠠᠶᠢᠳᠠᠯ | ᠳᠣᠣᠷᠠ᠂ ᠨᠢᠭᠡ ᠰᠠᠶᠢᠨ ᠮᠠᠨᠤᠨ ᠬᠥᠬᠦᠦᠷ ᠢ ᠵᠠᠰᠠᠬᠤ ᠳᠤ ᠬᠡᠳᠦᠨ ᠰᠠᠷᠠ ᠶᠢᠨ ᠬᠥᠯᠥᠰᠦ ᠬᠦᠴᠦ ᠶᠢ ᠵᠠᠷᠤᠴᠠᠭᠤᠯᠳᠠᠭ ᠪᠠᠶᠢᠨᠠ᠃ ᠨᠢᠭᠡ ᠰᠠᠶᠢᠨ ᠮᠠᠨᠤ ᠶᠢ ᠰᠢᠯᠢᠵᠦ | ᠰᠣᠩᠭᠤᠭᠰᠠᠨ ᠤ ᠳᠠᠷᠠᠭᠠ ᠲᠡᠭᠦᠨ ᠤ ᠬᠡᠪ ᠪᠠᠶᠢᠳᠠᠯ ᠢ ᠨᠢ ᠵᠣᠬᠢᠴᠠᠭᠤᠯᠤᠨ ᠨᠦᠬᠡᠯᠡᠨ ᠮᠠᠯᠲᠠᠵᠤ ᠬᠥᠨᠳᠡᠢ ᠭᠠᠷᠭᠠᠨ᠂ ᠬᠠᠮᠠᠷ ᠲᠠᠮᠠᠬᠢ ᠪᠠᠨ ᠬᠢᠵᠦ ᠬᠡᠷᠡᠭᠯᠡᠳᠡᠭ᠃ | ᠬᠠᠭᠤᠴᠢᠨ ᠳᠤ ᠮᠠᠨᠤᠨ ᠬᠥᠬᠦᠦᠷ ᠢ ᠠᠯᠢ ᠨᠢᠮᠭᠡᠨ ᠮᠠᠯᠲᠠᠭᠰᠠᠨ ᠢ ᠨᠢ ᠡᠷᠬᠢᠮ ᠨᠠᠨᠳᠢᠨ ᠭᠠᠷ ᠤᠷᠠᠯᠠᠯ ᠤᠨ ᠶᠠᠪᠤᠴᠠ ᠶᠢ ᠥᠩᠭᠡᠷᠡᠮᠡᠨᠵᠢᠨ ᠰᠠᠶ᠋ᠢ ᠪᠦᠲᠦᠳᠡᠭ᠃ ᠠᠩᠬᠠ | ᠠᠯᠬᠤᠮ ᠳᠤ ᠰᠠᠶᠢᠨ ᠰᠠᠶᠢᠬᠠᠨ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠮᠠᠨᠤ ᠶᠢ ᠰᠢᠯᠢᠵᠦ ᠰᠣᠩᠭᠤᠨ᠂ ᠲᠡᠭᠦᠨ ᠤ ᠥᠩᠭᠡ ᠪᠠᠶᠢᠳᠠᠯ ᠢ ᠨᠢ ᠰᠢᠨᠵᠢᠵᠦ᠂ ᠶᠠᠮᠠᠷ ᠬᠡᠪ ᠮᠠᠶ᠋ᠢᠭ ᠤᠨ | ᠶᠠᠩᠵᠤ ᠲᠠᠢ ᠪᠠᠷ ᠵᠠᠰᠠᠨ ᠦᠢᠯᠡᠳᠬᠦ ᠪᠠᠨ ᠲᠣᠭᠲᠠᠭᠠᠳᠠᠭ᠃ ᠳᠠᠷᠠᠭᠠ ᠪᠠᠷ ᠨᠢ ᠲᠡᠭᠦᠨ ᠤ ᠥᠪᠡᠷ ᠤᠨ ᠪᠦᠲᠦᠭᠰᠡᠨ ᠵᠢᠷᠤᠭ ᠵᠢᠷᠤᠭᠠᠰᠤ ᠶᠢ ᠨᠢ ᠦᠨᠳᠦᠰᠦᠯᠡᠵᠦ | ᠤᠤᠯ ᠤᠨ ᠥᠩᠭᠡ ᠵᠢᠷᠤᠭ ᠢ ᠨᠢ ᠠᠮᠢᠳᠤᠯᠢᠭ ᠢᠶᠠᠷ ᠲᠤᠰᠬᠠᠨ᠂ ᠨᠢᠭᠡᠨ ᠥᠯᠵᠡᠢ ᠪᠡᠯᠭᠡᠲᠦ ᠵᠢᠷᠤᠭ ᠢ ᠲᠥᠰᠥᠪᠯᠡᠨ ᠵᠣᠬᠢᠶᠠᠬᠤ ᠪᠤᠶᠤ ᠦᠯᠡᠳᠡᠭᠡᠨ ᠵᠠᠰᠠᠳᠠᠭ᠃ ᠮᠠᠨᠤᠨ | ᠬᠥᠬᠦᠦᠷ ᠤᠨ ᠰᠣᠶᠣᠯ ᠨᠢ ᠲᠡᠶᠢᠮᠦ ᠭᠦᠨ ᠬᠤᠯᠠ ᠪᠢᠰᠢ ᠪᠤᠯᠪᠠᠴᠤ ᠲᠡᠭᠦᠨ ᠢ ᠵᠠᠰᠠᠨ ᠦᠢᠯᠡᠳᠬᠦ ᠳᠤ ᠬᠦᠴᠦ ᠬᠥᠯᠥᠰᠦ ᠶᠡᠭᠡ ᠵᠠᠷᠤᠴᠠᠭᠤᠯᠬᠤ ᠪᠠ ᠰᠠᠶᠢᠨ ᠮᠠᠨᠤ ᠶᠢ | ᠣᠯᠬᠤ ᠳᠤ ᠴᠦ ᠬᠦᠴᠢᠷ ᠲᠠᠢ ᠪᠠᠶᠢᠳᠠᠭ᠃ ᠨᠢᠭᠡ ᠰᠠᠶᠢᠨ ᠲᠠᠭᠯᠠᠭᠠ ᠲᠠᠭᠠᠷᠠᠭᠤᠯᠬᠤ ᠳᠤ ᠪᠠᠰᠠ ᠦᠨᠡᠲᠦ ᠵᠦᠢᠯ ᠢ ᠵᠠᠷᠤᠴᠠᠭᠤᠯᠳᠠᠭ ᠤᠴᠢᠷ ᠠᠴᠠ ᠬᠡᠳᠦᠨ ᠵᠠᠭᠤᠨ | ᠵᠢᠯ ᠤᠨ ᠲᠤᠷᠰᠢ ᠮᠠᠨᠤᠨ ᠬᠥᠬᠦᠦᠷ ᠬᠡᠵᠢᠶᠡ ᠴᠦ ᠶᠡᠭᠡ ᠯᠡ ᠦᠨᠡ ᠬᠠᠩᠰᠢ ᠲᠠᠢ ᠪᠠᠶᠢᠳᠠᠭ ᠶᠤᠮ᠃ ᠡᠳᠦᠭᠡ ᠪᠣᠯᠵᠤ ᠢᠷᠡᠬᠦ ᠳᠤ ᠬᠥᠬᠦᠦᠷ ᠨᠢ ᠮᠣᠩᠭᠤᠯᠴᠤᠳ ᠤᠨ | ᠰᠢᠨᠡᠯᠡᠬᠦ ᠪᠤᠶᠤ ᠪᠠᠶᠠᠷ ᠨᠠᠶᠢᠷ ᠬᠢᠬᠦ ᠳᠤ ᠳᠤᠲᠠᠭᠳᠠᠵᠤ ᠪᠣᠯᠣᠰᠢ ᠦᠭᠡᠢ ᠵᠠᠰᠠᠯ ᠴᠢᠮᠡᠭᠯᠡᠯ ᠤᠨ ᠡᠳ᠋ ᠪᠣᠯᠤᠭᠰᠠᠨ ᠪᠠᠶᠢᠳᠠᠭ᠃ ᠤᠯᠠᠮᠵᠢᠯᠠᠯ ᠶᠠᠷᠢᠶᠠᠨ ᠳᠤ ᠬᠥᠬᠦᠦᠷ ᠤᠨ | ᠲᠤᠬᠠᠢ ᠳᠤᠮᠤᠭ ᠶᠠᠷᠢᠶᠠ ᠴᠦ ᠠᠷᠪᠢᠨ ᠪᠤᠢ᠂ ᠴᠡᠭᠡᠷ ᠬᠤᠷᠢᠭᠠ ᠴᠦ ᠨᠡᠯᠢᠶᠡᠳ ᠪᠤᠢ᠃ ᠬᠥᠬᠦᠦᠷ ᠮᠠᠨ ᠤ ᠮᠣᠩᠭᠤᠯᠴᠤᠳ ᠤᠨ ᠵᠠᠰᠠᠯ ᠴᠢᠮᠡᠭᠯᠡᠯ ᠤᠨ ᠨᠠᠨᠳᠢᠨ ᠡᠳ᠋ | ᠪᠤᠯᠬᠤ ᠶᠢ ᠮᠡᠳᠡᠵᠤ᠂ ᠠᠯᠢ ᠤᠯᠠᠨ ᠨᠠᠨᠳᠢᠨ ᠬᠥᠬᠦᠦᠷ ᠵᠠᠰᠠᠭᠳᠠᠨ ᠭᠠᠷᠴᠤ ᠡᠨᠡ ᠬᠦ ᠰᠣᠶᠣᠯ ᠦᠷᠭᠦᠯᠵᠢᠯᠡᠬᠦ ᠪᠣᠯᠲᠤᠭᠠᠢ︕ |